Mako 12

Cisimo ca vaka-kupanga mu citungu ca mikolovozi ya vushuka vwa vinyu

(Mateo 21:33-46; Luka 20:9-19)

1Asinoni Yesu wendekele navo na visimo ngwendi, “Kwakele munalume umo wakele na citungu ca mikolovozi ya vushuka vwa vinyu, co wasitileko cipatanga, co wendilemo citeke cakukamwina vinyu, co watungile kaposhi. Asinoni wasezele cije citungu ku vaka-kupanga, co waile vungenzi ku lifuti lyeka. 2Omo simbu yakuvuya vushuka yetele, watumine ndungo yendi kuli vaka-kupanga mukutambulako litambelo lyendi ku vije vanateje. 3Co vaje vaka-kupanga vakwatele uje ndungo, vamupupile, co vamwilwisile mavoko-voko. 4Asinoni uje vavenya citungu watumineko lalo ndungo mukwavo, co vaje vaka-kupanga vamupupangele ku mutwe na kumulinga mwa shwamwa. 5Co vavenya citungu watumineko lalo ndungo mukwavo, co vamutsile, co valingile vakwavo vavangi mu cifwa cije vene, vamo vavapupangele, co vakwavo vavatsiile. 6Kwasalele munendi umolika ikeye yatumineko uje yazemene. Akukotoka watumineko munendi wendekele ngwendi, ‘Mwa vushunga vakasingimika munange.’ 7Oloni vaje vaka-vipangi valyendekesele akati kavo ngwavo, ‘Ou ikeye muna vavenya citungu. Ijeni tumutsiye, co tukafungulula vufuko vwendi!’ 8Ngecivene, vamukwatele vamutsiile, co vombilile muvila wendi anja ya citungu.”

9Yesu wavehwile ngwendi, “Vatijo akalinga uje vavenya citungu? Akaija nakutsiya vaje vanu, akana cije citungu ku vaka-kupanga vandimi veka. 10Mwa vushunga kumwalavele majwi awa mu visoneka ndi?

‘Limanya lije livavyanene vaka-kutunga,

likelyo ololo linapu lya seo kuli voshe.

11Eci cikeco calingile Shukulu Kalunga,

co cinapu cakukomokesa kuli yetu!’ ”

12Co vantwama va vaYunda vashakele kukwata Yesu, omwo vazivukile ngwavo Yesu navatela cisimo eci mukuvalwisa. Oloni vazivile lyova lya mbunga ya vanu, ngecivene, vamusezele, co vaile.

Cihula ca kufweta lisimu

(Mateo 22:15-22; Luka 20:20-26)

13Co vaFaliseo vamo na vamo vaka-munga ya Helonde vavatumine kuli Yesu ngeci vakamweseke na vihula. 14Co vezile kuli ikeye vendekele ngwavo, “Mulongisi, twazivuka ngwetu yove ukendeka vushunga, co ukalongesa vushunga vwa cizango ca Njambi ali munu kujeneka kulipesa a viyongola vya vanu. Omwo kuwesi kukenga ali munu nambe wapwa wa vulemu nambe kesi wa vulemu. Tuleke, kuma Lishiko lyetu litavesa kufweta lisimu kuli Sezale indi embwe?”

15Oloni Yesu wazivukile viyongola vyavo, co wavakumbulwile ngwendi, “Vikajo mulinakunjesekela? Neneni oyo mbongo ya siliva kuli yange, ngeci njiimone.”

16Co vamwanene mbongo imo, wavehwile ngwendi, “Cihanga ceya na lizina lyeya evi viliho?”

Co vamukumbulwile ngwavo, “Vya Sezale.”

17Ngecivene, Yesu wendekele kuli vakevo ngwendi, “Mwamuvwa, asinoni aneni kuli Sezale vije vinakundama kuli Sezale, co aneni kuli Njambi vije vinakundama kuli Njambi.”

Co valikomokelele manene kuli Yesu.

Cihula ca a kusanguka ku vatsi

(Mateo 22:23-33; Luka 20:27-40)

18Asinoni vaSanduki vamo, vaje vaka-kwendeka ngwavo vanu kuvakasanguka ku vatsi, vezile kuli Yesu nakumwihula ngwavo, 19“Mulongisi, Mosesa watusonekelele lishiko eli ngwendi, ‘Nga munalume atsa, co aseza munakazi wendi oloni kesi na vana, co ndolome yendi ambate uje fwile ngeci vakase kukala na vana ali uje natsi.’ 20Kwakele vandolome vatanu na vavali, wa mukulunu wambatele munakazi, omwo watsile kujeneka vana, 21asinoni uje wamucivali wambatele uje munakazi, na ikeye lalo watsile kakele na vana. Co cuma cimo cafwile ngacije na kuli ndolome yendi uje wamucitatu, 22na kuli voshe vasaleleo, vaje vandolome voshe vatanu na vavali vambatele uje munakazi, oloni vatsile kujeneka vana. Co akukotoka kwa vyoshe evi uje munakazi watsile. 23Ololo oni omo vatsi voshe vakasanguka a litangwa lya cisangukilo, uje munakazi akapwa weya akati ka vaje voshe vamwambatele vatanu na vavali?”

24Yesu wavakumbulwile ngwendi, “Yeni mwasevuka! Co kuma yeni kumuzivuka ngweni omwo vika? Omwo kumuzivuka Visoneka na nzili ya Njambi. 25Omwo vatsi vakasanguka, vakevo vakafwa ngwe tungelo vali mwilu, co kuvakambata. 26Co, ngwe akusanguka kwa vatsi, kuma kumwalavele mu Livulu lya Mosesa alije liputa lyakele nakwenya ndi? Vanasoneka ngwavo Njambi wendekele kuli Mosesa ngwendi, ‘Yange Njambi ya Avilahama, Njambi ya Isake na Njambi Yakomba.’ 27Ikeye wapwa Njambi wa vaka-kuyoya, kesi wa vaka-kutsa embwe. Mwa vushunga yeni mwasevuka vene!”

Lishiko lyakama

(Mateo 22:34-40; Luka 10:25-28)

28Co mulongisi wa majwi a Lishiko wakele kuje omo wazivile vimata vije. Co wamwene ngeci Yesu nakumbulula vaSanduki mu ngila yaivwa, ngecivene, wezile kuli Yesu nakumwihula ngwendi, “Lishiko muka lyakama ku Mashiko a Njambi?”

29Yesu wamukumbulwile ngwendi, “Lishiko lyakama kutuvakana linapu eli, ‘Tolilileni, yeni vaIsalele! Shukulu Kalunga ikeye lika Shukulu Kalunga Njambi yetu. 30Co munapande kuzema Shukulu Kalunga Njambi yeni na mbunge yeni yoshe, na mwonyo weni woshe, na mana eni oshe, na nzili yeni yoshe.’ 31Lishiko likwavo lyamucivali lyakama manene ngwe eli, ‘Unapande kuzema mukweni ngwe muwalizema yove vavenya.’ Kukwesi mashiko eka lalo akutuvakana awa avali.”

32Co uje mulongisi wa majwi a Lishiko wendekele kuli Yesu ngwendi, “Unakumbulula mwamuvwa, Mulongisi! Mwa vushunga, ngwe omo unendeka, ngeci Shukulu Kalunga ikeye lika Njambi, co kukwesi njambi weka lalo wai kuvanga ikeye lika. 33Co munu napande kuzema Njambi na mbunge yendi yoshe, na mana endi oshe, na nzili yendi yoshe, co napande kuzema mundambo wendi ngwe mwalizema ikeye vavenya. Mwamuvwa kwononoka mashiko awa avali kutuvakana kunena tusitu va n̄ombelo nakukombelela lalo vin̄ombelo vikwavo kuli Njambi.”

34Co Yesu wanangukile kukumbulula kwendi kwa mana, co wamulekele ngwendi, “Yove kuwesi kulyala na Vumwene vwa Njambi.”

Munima yevi munu naumo wai wehwile lalo Yesu vihula vikwavo.

Cihula ali Wakuvwavesa

(Mateo 22:41-46; Luka 20:41-44)

35Co omo Yesu wakele nakulongesa mu Njuvo ya Shukulu Kalunga, wehwile cihula ngwendi, “Vatijo valongisi va majwi a Lishiko vendeka ngwavo Wakuvwavesa akapwa wa ku naanga ya Ndaviti? 36Munzinzime Wakujela walongesele Ndaviti kwendeka ngwendi,

‘Shukulu Kalunga wendekele kuli Shukulu yange ngwendi,

tumbama ku livoko lyange lya cilyo,

noo njinaka vitozi vove mwisi ya myanja yove.’

37Ndaviti ikeye vavenya wamutumbwile ngwendi ‘Shukulu,’ ngecivene, vatijo Wakuvwavesa apwe mutekulwila wa Ndaviti?”

Yesu anangula ngeci vanyanyame kuli valongisi va majwi a Lishiko

(Mateo 23:1-36; Luka 20:45-47)

Co ije mbunga yakama yatolililile Yesu nakuvwaelela. 38Co omo wakele nakuvalongesa, co wendekele ngwendi, “Nyanyameni kuli valongisi va majwi a Lishiko, vaje vazema kwenda na vikoveyo vyavo vyavilaja, nakuvakandelela na kasingimiko mu mitambela yakulandesela, 39nakwangula vitumbamo vyavivwa mu masinangonge na myela ya vanu va vulemu ku viwano. 40Vakevo vakakwisi vifwile nakuvevila vinjuvo vyavo, co vafwika vilinga vyavo na malombelo amalaja. Co kunyanyamesa kwavo kukapwa kwakama manene!”

Mulambu wa fwile

(Luka 21:1-4)

41Co Yesu watumbamene kuyehi na Njuvo ya Shukulu Kalunga kuje kwakutambwila mulambu, wakele nakukengelela vanu omo vakele nakulambula vimbongo vyavo mu mbango. Vaka-kufuka vavangi vakele nakulambula vimbongo vyavingi, 42asinoni fwile wa kautu wezile, co walambwile tumo tumbongo tuvali twatundondo twa vunengu. 43Co Yesu wasanene vandongisi vendi voshe, wendekele kuli vakevo ngwendi, “Mwa vushunga njimileka ngwange ou fwile wa kautu nalambula vyavingi kutuvakana voshe. 44Omwo veka vanakala nakulambula vyakusala ku vufuko vwavo, oloni ikeye, nalambula vyoshe vyanakele navyo ngwe ku vuutu vwendi, nalambula vyoshe vyanakele navyo vyakulikwasa navyo.”

Zur Zeit ausgewählt:

Mako 12: MBB

Markierung

Kopieren