یوحنا 15
15
عیسی حَییقیَه اَنگِرَ دارَ
1«اَز حَقیقیَه اَنگِرَ دار هستیمه و چمن دَدَ باغه وونَه. 2هر خالَه ایی چمن دلَکا میوه نِدَرِ، چمن دَدَ اَ خالَه دَرَبیرد، و هر خالَه ای کن میوَ بوعَرِ، اَی هَرَس بَکی تا ویشتَر میوَ بوعَرِ. 3شمَه هِم ایسَه نی اَ گفِنی خونِه کن اَزبَه شمَه واتَمَه، پاجا ایرون. 4چمن دِلَکا بومونَه، و اَز نی شمَه دلَکا بَمَندیم. هَته کن خالَه اَگَم اَنگِرَ داریکا مَمونِه نِیَشا اِشتَنکا میو بوعَرِ، شمَه نی نینّشا میوَ وَردِ اَگَم چمن دلَکا مَمونَه.
5«اَز اَنگِرَ داریمَه و شمَه اِم داری بَشو خالیرون. هر کَمی کن چمن دلَکا بومونِه و اَز چَی دلَکا، بَرکَه میوَ دَرِ؛ اِمی خونِه کن دور از چمن، نینَّشا هیچ کاری کَردِ. 6اَگَم کَسی چمن دِلَکا مَمونِه، هنته خالَه ای شیوارَ کن اَی بِرِن بَنَّفَند و خشک آرَب. خشکَه بَشو خالی گرد آکَرن و آرا دلَکا برَفندینه و بَسوتینَه. 7اَگَم چمن دلَکا بومونَه و چمن کلام شمَه دلَکا بومونِه، هر چیی ایی بَپیرونَه، درخواست بِکَر کن شِمَرا اَنجوم بَبیَه. 8اِنتَرَ، شِمَه بَرکه میوَ بوعَردیرون و ثابیت بَکَرون کن چمن شاگِردینَه و اِنتَرَکِه چمن دَدَ جلال اَیر آرَب.
9«هَته کن دَدَ بَمن رَی داشتَشَه، اَز نی شمَه رَی داشتَمَه؛ چمن موحَبَتیکا بومونَه. 10اَگَم چمن حِکمون اَنجوم بدَرَ، چمن مُحَبَتیکا بمَندیرون؛ هَته کن اَز اِشتَن دَدَ حِکمون اَنجوم دوعَمَه و چَی موحبتیکا مَندیمَه. 11اِم چِیون شمَرا واتمه تا چمن خَشی شمه دلَکا ببو و شمه خَشی کامیل آبو.
12«چمن حکم اِمَه کن یَندِ رَی بِدارَ، هَته کن اَز شمَه رَی دارِم. 13موحبتی بیمیکا یالتر وجودِش نیَه کن کَسی اِشتَن جانی اِشتَن رَفقون خونِه بدَرِ. 14اَگَم اَچیی ایی کن بَشمَه حکم بَکَم، اَنجوم بدَرَ چمن رَفِقن هِستینَه. 15دِ شمه وَزییَر خِلِه نِمَکَرد، اِمی خونه کن وَزییَر نییَموست کن چَی اَرباب چِه بَکَیه. بَلکَم شمَه رَفق خِلِه بکَم، اِمی خونه کن گِردِ چیی اِنی کن دَدکا دَرستمَه، بَشِمَه باخبَر کَردِمَه. 16شمَه بَمن اینتخاب نِکَردِرون، بَسکم اَز بَشِمَه اینتخاب کَردِمَه و بَشِمَه تَیین کَردِمَه تا بِشَه و میوَ بوعَرَ و شمه میوَ بومونِه، تا هر چیی ایی دَدَ کا چمن نومینَه درخواست بکَرَ بَشمَه عطا بکَرِ. 17چمن حکم بَه شمه اِمَه کن یَندِ رَی بِدارَ.
دِنیا کَسِنی کن عیسی دوملَه بَشینَه نیفرت بداشتی
18«اَگَم دِنیا شمه کا نیفرت بَداشتی، بزنَه کن شمَکا بَه نَه بمنکا نیفرَت داشتَشَه. 19اَگَم شِمَه دِنیا شِن بینَه، دِنیا بَشمَه اِشتَن کَسون شیوار رَی داری. ولی اِمی خونه کن شمَه دِنیا شن نینَّه، بَلکَم اَز بَشِمَه دنیاکا اِینتخاب کَردِمَه، دِنیا شمکا نیفرت دارِ. 20گفی کن اَز بَه شمَه واتمَه، یادیکا غَم بَرَ: ”وَزیَر اِشتَن اَربابیکا یال تَر نیه.“ اَگَم بَمن اَیذَت آزار کَردِشونَه، بَشمَنه نی اَیذَت و آزار بَکَنَه؛ اَگَم چمن گفی اَنجوم آداشون شِمَه گفی نی اَنجوم آنَّدا. 21ولی اِمون گردی چمن نومی خونِه شمَنَه بَکَنه، اِمی خونِه کن چمن روَنه آکری آنینَزنی. 22اَگَم آمَه نِبیمه و اَوونّه گَف ژَم نِبَه، گِناخی نِدارین؛ ولی ایسَه دِ رِقنهَ ای اِشتَن گِناخونرا نِدارن. 23کَسی کن بَمنکا نیفرت بدارِ، چمن دَدکا نی نیفرَت دارِ. 24اَگَم چَوون دلَکا کارونی کَردم نِبَه کن غَیراَزچمن هیچ کَسی اَنجوم دوعَش نییَه، گِناخی نِدارینَه؛ اَمّا ایسَه، با اِمکن اَ کارون ویندَشونهَ، هم بَمنکا و هم چمن دَدکا نیفرت دارِن. 25ولی، اَ کلامی کن چَوون توراتیکا نِوشتَه بَیَه پی اَنجوم ببو کن باتی: ” اَیِن دَدار بَمنکا نیفرت دارین.“
26«ولی وَقتی اَ دیفا اَکَر کن اَز اَی دَدَ طَرَفیکا شمَرا رَونَه آمَکَرد با، یعنی روح حَقیقت کن دَدَ طَرَفیکا بومَی، اَ اِشتَن چمن خونه شاهیدی دَرِ، 27و شمَه نی شاهیدی بَدارون، اِمی خونِه کن شرووکا بَمنه درِ بینَه.
Zur Zeit ausgewählt:
یوحنا 15: CTB
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
@ 2024 Korpu Company
