یوحنا 13
13
عیسی شاگردون لنگی بَشوشتی
1پِسَخَه عیدی بَه نَ، وقتی عیسی سَر آگِنَه کن چَی وَقت آرَستَیَه تا اِم دِنیا کا دَدَ ور بشو، اَیِنی کن اِم دنیاکا رَی داری، برکَه موحبَت کَردشَه.
2سوری وَقت بَه. اِبلیس چیمی بَه نَ شمعونی زوعَه، یهودای اَسْخَریوطی دلیکا نوعَش بَه کن عیسی غَنیمی تَسلیم بکَرِ. 3عیسی کن اَزنیَه دَدَ گرد چیون چَی دست آدوعَشه و اِمی نی اَزنیَه کن خدا طَرفیکا آمَیه و خدا وَر آرَگَردست، 4سوری سَفرَکا پِبه. اَ اِشتَن عَبا آوَتِشَه و حوولَه‌ای پِگَتِشَه و اِشتَن مینی کا دَبستش. 5اَموقه لَگَنییکا آو دَکَردِشَه و دَمندَ شاگردون لنگون شوشتِه واَ حولَه اینه کن مینیکا دَبَستَش بَه اَوون خِشک آکَردِش. 6وَقتی شَمعون پِطروسی سَر آرَستَه، پِطروس بَی واتِشَه: «آقا، ته بَپیرَ چمن لنِگی بوشوری؟» 7عیسی جواب داشَه: «ایسَه اِم کاریکا کن اَز بکَمَه سَر آنِگِنی، ولی دوملَه بَفَهمستیشَه.» 8پِطروس عیساش واتَه: «اَز هیچ موقه نِمَشت کن تِه چمن لنگون بوشوری!» عیسی جواب داشَه: «اَگَم بَتِه مَشورم هیچ رَسَتی بَمِنَه نِداری!» 9شَمعون پِطروس واتِش: «آقا، نه تاکَه چمن لنگِن، بسکم چمن بالِنو و کلَّه نی بوشور!» 10عیسی بَش واتَه: «اَ کن جان شوشتَشَه غَیراَز چَی لنگِن دِ شوشتِه نِپیستِش، اِمی خونه کن کامیلا تَمیزَ. شمه نی تمیزیرون، ولی شِمَه گِرد نِه.» 11اِمی خونه کن عیسی بَموستی کن کی بَی غنیمی تَسلیم بَکَیَه؛ اِمی خاطر بَه کن واتِش: «شمَه گرد تمیز نیرون.»
12عیسی شاگردون لنگون شوشتِه بَه دوملَه، اِشتَن عَبا دَکَردشه وهَنی سوری سفرَ سَر نشتَه. اَیِنِش واتَه: سَرآگِنِستِرون شِمَرام چِه کَردَ؟ 13شمه بَمن اِستا وآقا خِلِه بکَرون و درست نی باتیرون، اِمی خونه کن هِستیمَه. 14پس اَگَم اَز کن شمَه آقا و اِستا ایمَه شمه لنگون شوشتَمَه، شمَه نی پی یَندِ لنگونِ بوشورَ. 15اَز اِم کارینَه، بَشمَه ایلَه نمونَه آدوعَمَه تا شمَه نی یندِنَه هَته رفتار بکَرَ کن اَز شمَنه رفتارکَردِمَه. 16حَییقتا بَه شمَه باتیمَه، نِه وَزیَر اِشتَن اَربابیکا یال تَرَ، نِه قاصید اِشتَن رَونَه آکَریکا. 17اَگَم اِم چییون بَموستیرون، خَشی شِمَه حالیرا بَبی اَگَم اَوون اَنجوم بدَرَ.
18«شمَه گِردی خونه گَف نِمَژ، اَز اَیِنی کن اِینتخاب کَردمَه آمَموست. اَمّا موقدّسَه نوشتَه اون اِم واتَه چیی اَنجوم ببیَه کن باتی، ”اَکَن چمن نونی هَردِش، چمن غَنیم گیریرا راست آبَه یَه.“ 19ایسَه چَی اَنجوم بِه بَه نَ، بَه شمَه باتیم تا هَنگومی کن ایتفاق دَگِنِستَه، ایمان بوعَرَ کن، اَزیمَه. 20حَییقتا بَه شمَه باتیمَه، هر کم اَ کَسی کن من عَندَیَه قِبول بِکَر، بَمن قبول بَکَی، و هر کَم بَمن قِبول بکَرِ، اَ کن بَمن روَنه آکردشَه قِبول بَکَی.»
ایلَه شِمَکا بَمن تَسلیم بَکَیه
21عیسی اِم گَفون ژِ بَه دوملَه، چَی روح تَتَّه وَسَّه دگِنستَه و شاهیدی داشَه واتش: «حَییقتا بَشمَه باتیمَه، ایلَه شمَکا بَمن غَنیمی تَسلیم بَکَیَه.» 22شاگردِن یَندِ دَیَشتشون و تَعَجوب کَردشونه کن عیسی اِم گَفی چیکی خونِه باتی. 23ایلَه چَی شاگرداونکا، کن عیسی اَی رَی داری، سِفرَ سَریکا تَم آدوعَش بَه و چَی کَلَّه عیسی سینَکا نِزِک بَه. 24پس شَمعون پِطروس ایشا نَ اَیکا اَپیش بَه عیسی کا دَپَرسِه کن کینَه بَه. 25پس اَ شاگرد تیکَلیی پِشتیرا نَر آبَه و عیسی سینَه سَر تَکیَه ژشَه و دَپرسستَه: «آقا، اَ کییَه؟» 26عیسی جواب داشَه: «هَیَه کن اِم نونهَ پارَ قَدرَکا ویخاستِه بَه دوملَه، بَی آمَدا.» پس وقتی کن اَ نونَه پارَ قَدرَ کا ویخاستِشَه اَی شَمعون اِسْخَریوطی زوعَه، یهوداش آدوعَه. 27یهودا وَقتی لوقمَه ویبَردِش شیطون هَه لحظه کا چَی دِلیکا دَشَه. اموقه عیسی یَهوداش واتَه: «اَچیی کن بَپیرَ اَنجوم بِدَری، زو اَنجوم بدَ.» 28ولی هیچ کم اَیِنیکا کن سِفرَ سَر نشت بینَه، سَر آنِگِنینَه کن چیرا عیسی اِم گَفی یَهوداش ژَ. 29بعضی فکر اَکَرینَه اِمی خونه کن چَوون خَرجی پولَه کِنجَه یهودا کا بَه، عیسی بَی باتیَه کن: «اَچیی ایی کن عیدیرا اَمه لازمِمون بِخِر»، یا اِمکن پی چیی ایی گیدَلیون بدَرِ. 30یهودا اَ لوقمه ویبَردِ بَه دوملَه جَخت بِرِنیرا شَه. و شَو بَه.
عیسی ایله تازَ حِکم دَرِ
31یَهودا بِرِن بَرشِه بَه دوملَه، عیسی واتِش: «ایسَه اینسانی زوعَه جلال دیار آبَه وخدا جَلال اَیکا دیار آبَه. 32اَگَم خدا جلال، اَیکا دیار آبَه، خدا نی چَی جَلالی اِشتَن دیار آرَکَرد و زو اَی جلال آرَدا. 33چمن بَلَه اِن، دِ تَلَکَه زمانی شمَنَه دَرِ ایمَه. چمن دوملَه بَگَردستیرون و هَته کن یهودیون واتِم، ایسَه شِمَرا نی باتیم کن اَجگا کن اَز بَشیمَه، شمَه نینَّشا آمِه. 34ایله تازَ حکمی بَه شمَه دَرِم، و اَ اِمَه کن یَندِ موحبت بکَرَ. هَته کن اَز بَشِمَه موحبت کردِمهَ، شمه نی پی یَندِ موحبت بکَرَ. 35اَگَم شِمَه یَندِ موحبت بکَرَ، اِنتَرَکه گرد آدَمِن بَفَهمستینه کن شمَه، چمن شاگردینَه.»
36شَمعون پِطروس عیساش واتَه: «آقا، کِرَم جگارا بَشیشه؟» عیسی جواب داشَه: «ته ایسَه نِیشَه شا اَ جگاییرا کن اَز بَشیمه، چمن دوملَه را بای؛ اَمّا دوملَه تر چمن دوملَه بومَشَه.» 37پِطروس واتِش: «آقا، چیرا، ایسَه نِمَشا اِشتِه دوملَه آمِه؟ اَز چمن جانی تِرا آمَدا.» 38عیسی واتِش: «اِشتِه جانی مِرا آشَدا؟ حَییقتا بَتِه باتیمَه، سوکی خَندِ بَه نَ، سه کَرَ بَمن حاشا بَژَشَه.»
Zur Zeit ausgewählt:
یوحنا 13: CTB
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
@ 2024 Korpu Company
