یوحنا 12
12
مریم عیسی لِنگون عَطرینَه روعَن بَژَی
1شَش روج پِسَخَه عیدی بَه نَ، عیسی بِیت‌عَنْیا آوادیرا را، اَ جِگا ایی کن ایلعازَر بَه آمَه. هَه ایلعازَر کن عیسی بَی مَرگیکا زِندَ آکَردَش بَه. 2اَجگاکا عیسی خونه سور آداشون. مارتا پذیرایی اَکَریَه و ایلعازَر نی ایلَه اَیِنی کا بَه کن عیسی نَه سفرَ سَر نشت بین. 3اَهَنگومیکا، مریم ایله نِم لِترَ شیشَه، گِرونَه عَطری کن خالیصَه سُنبولیکا بَه پِگَتش و اَینه و عیسی لنگون عطرینَه روعَن ژِشَه و اِشتَن ذلفینه چَی لنگون خشک آکَردش، ایی جوری کن عطری بو، کَش پِگَتبَه. 4ولی یهودای اَسْخَریوط کن عیسی ایلَه شاگردونکا بَه و دوملَه تَر اَی تَسلیم آکردِشَه، واتِش: 5«چیرا اِم عطری سیصَد دیناریرا نِخِرَتونه تا چَی پولی گیدَلیون آدَرَ؟» 6یهودا اِم گَفی اِمی خونه کن چَی دِل گیدَلیونرا اَسیجیَه نِواتِش، بَلکَم اِمی خونه واتش کن پِتارچی بَه؛ شاگِردون خَرجی پولَه کِنجَه یَهودا دَست بَه و اَ نی اَ پولیکا دِزدَکی اَشتَنرا پِرَگِریَه. 7عیسی واتِش: «اَینه کاری مَدارَ! اِمی خونه کن اِم عطری چمن دفِن کَردِ روجیرا غَم هَردَش بَه. 8اِمی خونه کن شِمَه، اوزون گیدَلیون اِشتَنَه دارَ، ولی بَمن اوزون نِدارَ.»
9وِرَ کاولَه ایی یهودیونکا، وَقتی دَرستشون عیسی اَ جگاکارَ آمینه، تا نِ تاکَه عیسی، بَلکَم ایلعازَری نی کن مَرگیکا زِندَ آکَردَش بَه، بِوینِن. 10پس، سران کاهینِن کن معبَدی عالِم بینَه، نَقشَه کَشتِشون تا ایلعازَری نی بکشن، 11چون چَی خونه، خَیلیِن یهودیونکا، اَونکا آگَردِستین و بَه عیسی ایمان وَردَشون بَه.
عیسی ایلَه پادیشا شیوار اورشَلیمیرا آ
12سَوسَه، وقتی اَ یالَه جمعیتی کن عیدی خونه آمَه بینَه، دَرستشون عیسی اورشلیمیرا بومَی، 13خرما داری بَشو خالی پِگَتشونَه و چَی پیشوازیرا شینَه. اَیِن تَتَه لَسَّنَه اواجینَه:
«نیجات بِدَ!
موتبارَکَ اَ کن
خداوندی نومینَه آ،
موتبارَکَ خدا قامی، پادیشا!»
14اَموقه عیسی خَرَ کِرَ ایی بَویندیَه و چَی سَردِرِ دَنشتَه؛ هَته کن موقدسَه نِوشتَه اونکا نوشتَه آبَه یَه کن:
15« اورشلیم، اَی کوه صیهونی کِلَه، مَتَرس!
دَیَس اِشتِه پادیشا کا آمِه،
کن خَرَ کِرَای سَردِرِ دَنِشتَه یَه!»
16عیسی شاگردِن اَولیکا اِم چییونکا سَر آنِگِنینَه، ولی وَقتی عیسی مَردِ بَه دومله زِندَ آبه، اَموقه اَیِن یاد آرَفندشونه کن اِمِ چییِن چَی خونه موقدسَه نوشتَه اونکا نِوشتَه آبَه بَه و هَتَه نی چَی سَردِرِ اَنجوم بَه.
17اَ جمعیتی کن، وقتی عیسی ایلعازَری تربَکا خِلِه کَردِشَه و بَی مَرگیکا زندَ آکَردِشَه، اَینَه دَرِ بینَه، یَژَن اِم کاری خونه شاهیدی اَدَرینَه. 18اَ جَمعییَتی کن عیسی پیشوازیرا شینَه اِمی خاطِر شینَه کن ، دَرَستشون بَه، عیسی، اِم نِشونَه و موعجیرزَ اَنجوم دوعَشَه. 19پس فَریسیون فرقه عالیمِن یَندِ واتِشون: «بِویندیرونه کن اَمه هیچ کاری نِمونَشا کَردِ؛ دَیسَه گرد دِنیا چَی دوملَه شَه اینَه.»
بعضی یونانیِن عیسی دوملَه بَگَردستین
20اَ آدَمِنی دِلَکا کن عیدهَنگوم پرستش کَردِ خونِه اورشَلیمیرا آمَه بینه، چَن نفَری یونانی بین. 21اَیِن فیلیپُسی وَر آمین، فیلیپس شهر بیت صیدا آدَمونکا به کن وِلَته جَلیلیکارَ.اَیِن فیلیپوسی واتِشون: «آقا، بَپیمونَه عیسی بوینَم.» 22فیلیپُس آمَه و آندریاسیرا واتشَه و اَیِن هر دِ شینه و عیساشون واتَه. 23عیسی اَیِنِش واتَه: «اِمی وقت آرَستَه یَه کن اینسانی زوعَه بَه شکوه جلال آرَسِه. 24حَییقتا بَشمَه باتیمَه، اَگَم گَندمَه دونَه خاکیکا مَگنِه و نِمِر، تاک بَمَندیَه؛ اَمّا اَگَم بِمِر وِرَ اَکین بوعردی. 25هَرکَم کن اِشتَن جانی رَی بِدارِ اَی اَز دَست آرَدا و هَر کَم کن اِم دِنیا دِلَکا اِشتَن جانیکا بِگذِرِ، اَی تا زَیرونَه زندَگی غَم بَردیَه. 26اَگَم کَسی بَمن خیدمت بَکَی پی چمن دوملَه با؛ و اَجِگایی کن اَز ببوم، چمن پاسَری نی اَجگاکا بَبیَه. اَگَم کَسی بَمن خیدمت بَکَی چمن دَدَ بَی عیزَت بَبَخشستی.
27«ایسَه چمن جان تَته وسَه کا دَگنِستَیَه. چِه بواجم؟ بواجم، ”دَدَ! بَمن اِم چیی اییکا کن پی چمن سَر با نیجات بِدَ“؟ ولی اَز هِمی خونه اِم دِنیا دِلَرا آمَه ایمَه. 28دَدَ، اِشتَن نومی جلال بِدَ!» اَموقه سَسی آستامونیکا آرَستَه کن: « جلال آدوعَمه وَ هَنی جلال آمَدا.» 29اَ جمعییَتی کن اَجگا کا مَند بینَه و اِمی دَرَستشونه، واتِشون: «گرَخونَه بَه.» دییَر آدَمِن واتِشون: «ایلَه فرشتَه بَینه گَف ژِشَه.» 30عیسی واتِش: «اِم سَس شمَرا بَه نِه کن مرا. 31ایسَه، اِم دِنیا سَر دیوون کَرد وَقتَه؛ ایسَه اِم دِنیا رَئیس کن شَیطونَه بِرِن بَنَّفند. 32اَموقه کن بَمن زَمینی سَریکا راست آکرِن، گرد آدَمون، چمن طَرَف دَمَراکنِست.» 33عیسی اِم گَفی ژِشَه تا آمونِه کن، چِنتَرَ مَرگینَه بَمَردیَه. 34پس جَمعییَت اَشون واتَه: «اَمه توراتیکا دَرَستَمونه کن، وعدَ آدوعَه مسیح تا ابد بَمَندیَه، پس چِنتَرَ یه کن باتیشَه اینسانی زوعَه پی راست آکَن. اِم اینسانی زوعَه کییَه؟» 35عیسی اَیِنِش واتَه: «دِ تَلَکَه زمانی، نور شِمَه دِلَکا هِستَه. پس تا زمانی کن هَنوزَنی نوری دارَ، گَل بژَنَه، نِکَر ظِلَمات شمَه بیگِرِ. اَ کن ظِلَماتیکا گَل بَژَی، نیَموست کِرَم جگارا بَشیَه. 36تا زمانی کن نوری دارَ، بَه نور ایمان بوعَرَ تا نوری خردَنِن ببَه.»
وَقتی عیسی اِم گَفون ژشَه، اَجگا کا شَه و بَشتن اَوونکا نون آکردشَه.
مردومی بی ایمانی
37با اِمکن عیسی بَرکَه نِشونَه اِن موعجیزَ اون چَوون چَمی نَ کا اَنجوم دوعَش بَه، اَیِن هَنی بَی ایمان نِوَردشونَه. 38اِنتَرآبَه تا اَ چیی ایی کن اِشعیای پَیغَمبَری واسیطَنه واتِه آبَه اَنجوم ببو کن:
« اَی خداوند، کی اَ چیی ایی کن اَمکا دَرَستِشَه، باور کَردِشَه،
وخداوَندی خِنَر کیرا اَیر آبَه یَه؟»
39مردوم نِشاستِشون ایمان وَردِ اِمی خونه کن اِشعیای پَیغَمبَر دییَر جِگاکا واتَش بَه کن:
40«اَ چَوون چَمی کور آکَردَشَه،
و چَوون دلی سَخت آکَردَشه،
تا نِکَرِ اَیِن اِشتَن چَمونَّه بوینِن،
واِشتن دلینه بِفَهمِن،
و آگَردِن و اَز اَوون شفا بِدَرم.»
41اِشعیا اِ پَیغَمبَر اِمی خونه اِم چییِنِش واتَه کن، عیسی جلالی ویندِشَه و چَی خونه گَف ژِشَه.
42گرد اِمونَّه، حتی خَیلی قامی یالونکا نی بَه عیسی ایمان وَردشونَه، ولی فَریسیِن تَرسیرا، اِشتَن ایمانی حاشا ژِشون، کن نِکَرَ اَوون عیبادتگا کا ایخراج بکَن. 43اِمی خونه کن اَیِن اَ تَریفی کن مردومی طَرَفیکا بَه ویشتَر رَی دارین تا اَ تَریفی کن خدا طَرَفیکا بَه.
44اَموقه عیسی تَتَه لَسَّه نَه واتِش: «هَر کم بَمن ایمان بوعَرِ، نِه کن بَمن، بَلکَم چمن رَونَه آکَری ایمان وَردَشه. 45هر کم بَمن ویندِش، چمن رَونَه آکَری ویندَشَه. 46اَز ایلَه نوری شیوار دِنیا دِلَرا آمَه ایمَه تا هر کم بَمن ایمان بوعَرِ، ظِلَماتیکا مَمونِه. 47اَگَم کَسی چمن گَفون دَرَسهِ، ولی اَوون اَنجوم نِدَرِ، اَز چَی سَردِرِ دیوون نِمَکَرد؛ اِمی خونه کن آمَه نیمَه تا دِنیا آدَمون سَردِرِ دیوون بکَم، بَلکَم آمه ایمه تا دِنیا نیجات بِدَرِم. 48کسیرا کن بَمن رد بکَر و چمن گَفون قِبول نکَرِ، دییَرَ داوَری دارِ؛ چمن گَفِن دیوون کَردِ روجیکا اَ آدَمی سَر دیوون بَکَیَه. 49اِمی خونه کن اَز اِشتَن بَسَر گَف ژَم نیَه، بَلکَم دَدَ کن بَمنِش عَندیَه، اِشتَن بَمن حِکم کردَشَه کن چِه بواجم و چیکا گَف بژَنم. 50و اَز بَموستیم کن چَی حِکم زَیرونَه زندگیَه. پس اَچیی کن اَزباتیم درست هَه چی ایی یَه کن دَدَ واتَشَه، تا بواجم.»
Zur Zeit ausgewählt:
یوحنا 12: CTB
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
@ 2024 Korpu Company
