لوقا 24

زِنیابیئِن عیسی

1اِ اول روژ هفتَه، وِرِصو ژِنَل ادویَه‌ل عطِردار کفنِ‌دفنو گه آماده‌ئو کِردوئی، وَه‌گَرد ووژو بِرد ئو چِن اَرِه لَحَکِهَه. 2ئو دییو گه بَردِهَه اژ وَر لَحَکِهَه پِل هُاردیَسِ لا. 3وخدی چِن اِنوم لَحَکِهَه، جنازَه عیسی خداونو نِئیا. 4اژ ایی اتفاقَ واقونِ دَم پَروئی، گه وَه یِگِل دو پیا هوسیان اَر لِفو گه جِنِکَلونَ مَجویجیا. 5ژِنَل هُنَ زِلَئو چی گه سرو آوشدَ هُار؛ مِنتائای اَ دو پیاءَ وِتون‌ئونو: «اَرِه‌چَه اَوَه گه زِنیَ اِنوم مِردیِلَ مَجورینو؟ 6او اَر ایرَه نیَ، بلکِم زِنیا بیَ! بارنَ ویر وخدی گه اِنوم هیال جلیل بی چِه‌ئون وِتینونی. 7وِتی گه کُر اِنسو باس تسِلیم گناکارَل بو، ئو بِکیشی اَر صلیب ئو اِ روژ سِئِم زِنیا بو.» 8اَسَه ژِنَل قصَه‌ل عیسی‌ئو آوِردَ ویر. 9ئو وخدی گه اژ لَحَکِهَه گِلوناهُارد، کُل چیون اَرِه اَ یازَه رسول ئو کسَلی‌تِر تیَریف کِرد. 10ژِنَلی گه ایی خَوَرونَ داءَ رسولَل مریمِ مَجدَلیّه، یوآنّا، مریم دا یعقوب بین ئو باقی ژِنَلی گه وَه‌گَردو بین. 11مِنتائای رسولَل فگِرونَ مَهَرد ژِنَل هِلَه‌پِلَه موشِن ئو قصَه‌لو باوار نَهَرد. 12وَه ایی حالا، پطرس هیزگِرتی ئو ویرِ لَحَکِهَه ناءِ دو ئو چَمیا سِیل کِردی، مِنتائای بِخِر اژ کفن چیئی نِئیتی. اَسَه هَرهُنَ گه اژ ایی چیئَه گه اتفاق کَتوئی واقِ دَم پَروئیتی، گِلاهُاردی اِرَه مال.

اَرنوم رئی آبادی عِمائوس

13هَراَ روژَ، دو نفر اژ اونَل مَچیان اِرَه آبادی عِمائوس، گه تا شیَر اورشلیم دو فَرسَخ بی. 14اونَل اِبارَه کُل چیئَلی گه اتفاق کَتوئی، گَپونَ گَرد یَکَ ما. 15هَراَ حِنی گه داشدو گَپونَ ما، عیسی، ووژ، هات اِرَه تَکو ئو کَتِ گَردو. 16مِنتائای چیئی وَر چیَمَلون اِراگِرتی هُنَ گه اوُ نشتاسی. 17عیسی اَژینو پِرسیتی: «اَرنوم رئی، اِبارَه چَه گپَ مِینو؟» اونَل چیَم ئو رُیو ناءِ یَک ئو بی‌کِش هوسیان. 18یَکی اَژینو گه نُم کْلِئوپاس بیتی جوواوا داتی وِتی: «مَری تو تَنیا آم خَریو اِنوم اورشلیمین گه اژ چیئَلی گه اِ ایی روژِلَ اتفاق کَتیَ بی‌خَوَرین؟» 19عیسی اَژی پِرسی: «چه چیئَلی؟» اونَل وِتون‌ئون: «اَ چیئَه گه هاتیَسَ سر عیسی ناصری. او پِخَمَری بی گه اِ درگا خدا ئو اَرتَک کُل مردِم کلوم ئو کارَل پِرقدِرتی داشدی. 20ئو یَگه چطور رِئیسَل کاهنَل ئو کَلِنگَلمو اوُ داءَ گیر تاگَه مَکوم بوءَ مرگ ئو کیشیون اَر صلیب. 21مِنتائای ایمَه امیدمو داشد اَوَه هَراَ کسَ بوءَ گه باس اسرائیل آزاد بِهِه. هَمیش، اِسگَه سه روژ اژ ایی چیئِلَ مگُذری. 22بِخِر اژ یَه بِری اژ ژِنَل‌یش گه هان اِنوم ایمَه، تَپون اَر ایمَه شویونیَ. اونَل ایمِرو شفق چِنَ اِرَه لَحَکِهَه، 23ئو وخدی جنازَه عیسی‌ئو نَهَردَ دی، هاتِن، وِتونَ ایمَه فریشدَه‌لونی اِ رویا دیَ گه وتونَس‌ئونو عیسی زِنیَ. 24اَسَه بِری اژ رِقیفَلمو چِن اِرَه لَحَکِهَه، اورونَ هَراَ جورَ گه ژِنَل وِتوئیو، دی، مِنتائای عیسی‌ئو نِئی.» 25اَسَه عیسی وِتی‌ئونو: «اِاِ نایونَل گه دل دیرفیَمی اَرِه باوار کِردِن قصَه‌ل پِخَمَرَل دیرینو! 26آیا نَباس مسیح ایی عذاوِلَ بِکیشی ئو اَسَه بِچو اِنوم جِلال ووژا؟» 27اَسَه بِنیا ناتی اژ موسی ئو کُل پِخَمَرَل ئو اَ چیئَه گه اِنوم کُل نُسَخ مقدّس اِبارَه ووژ وِتوئیو، اَرِه تیَریف کِردِنی.

28اِسَه نزیکا بین اَر آبادی‌ای گه مِهِستو بِچِن، عیسی هُنَ نِشو داتی گه میا بِچو اِرَه جا دویرتِری. 29مِنتائای اُوُ جُرّیانی اَری ئو وِتو: «بِمین اَرتَک ایمَه، اَرِیَگه چیئی نَمَنیَ روژ تموم بو ئو شو نزیکَ.» اِسَه عیسی چی اِنوم ئو مَن اَرتَکو. 30وخدی وَه‌گَرد اُوُ نیشتوئی اَرسر سِفِرَه، نونِهَه گِرتی ئو بِرَکت داتی، کُت کِرد ئو دانی‌ئون. 31هَراَ حِنَ، چیَمَلو واز بی ئو عیسی‌ئو شناسی، مِنتائای او جاوارجا اژ وَر چیَمو خِیو بی. 32اَسَه اونَل اژ یَکتِریو پِرسی: «مَر اَسَه گه اَرنوم رئی قصَئَه گَردَ مَهَردیمی ئو نُسَخ مقدّسمون اَرِه میَنا مَهَردی، قلبمون اِنوم سینَه‌لمو گُر نِمَگِرت؟» 33اِسَه هِرازِه هیزو گِرت ئو گِلوناهُارد اِرَه شیَر اورشلیم. اَر اورَه اَ یازَه رسولونَ آدی گه جیَم بوئینَ گَرد رِقیفَلو، 34موئِتو: «اَاَ، اِراسی گه خداون زِنیا بیَ، اَرِیَگه ووژ اَر شَمعون ظاهر کِردیِ.» 35اَسَه، اَ دوئیشَ تیَریفو کِرد گه اَرنوم رئی چَه بیَ ئو چطور عیسی‌‌ئونِ موقَع کُت کِردِن نُو شناسیَ.

عیسی ووژ اَر شاگردَل ظاهرَ مِهِه

36هَنی داشدو اِبارَه ایی چیئِلَ گَپونَ ما، گه عیسی ووژ هوسیا اَر نومجائو، ئو وِتی: «سِلام اَر هُمَه!» 37اونَل زِلَ‌تِراقا بین گُمونو کِرد روحی موئینِن. 38عیسی وِتی‌ئونو: «اَرِه‌چَه هُنَ پریشونینو؟ اَرِه‌چَه چِرچَ میَرینونِ دل؟ 39سِیل کَن اَر دس ئو پائلِم. ووژمِم! دس بِنِن اَر قِم ئو بوئینِن؛ روح گوشد ئو سِخو نِری، مِنتائای هُنَ گه موئینینو مِه دیرِم!» 40یَه وِتی ئو دَسَل ئو پائل ووژ نِشو دانی. 41اونَل اژ زور خَوشی، حِیرو مَنوئین ئو نِمَتونستو باوار کَن. اَسَه وِتی‌ئونو: «اَر ایرَه، چیئی اَرِه هُاردِن دیرینو؟» 42تیکه‌ی مای بِرشیائو دائون. 43اَوَه سَنی ئو اَر وَر چیَمَلو هُاردی.

44اَسَه وِتی‌ئونو: «یَه هَر اَوَه‌‌سَ گه وخدی وَه‌گَردتو بیم، موئِتِم؛ یَگه کُل چیئَلی گه اِنوم تورات موسی ئو کِتاوَل پِخَمَرَل ئو زَبور اِبارَه مِه نُیسیاءَ، باس وَه اَنجوم برَسی.» 45اَسَه ذِنو روشِنا کِردی تاگَه بتونِن نُسَخ مقدّس بفیَمِن. 46ئو وِتی‌ئونو: «اِنوم نُسَخ مقدّس نُیسیاءَ گه مسیح عذاوَ مَکیشی ئو اِ روژِ سِئِم اژ مِردیَل زِنیا ماو، 47ئو وَه نُم او، توئَه ئو بشخِش گنائَل اِلومَ ماو اَر کُل ملتَل ئو بِنیا اژ اورشلیمِ. 48هُمَه شاتَل ایی چیئَلینونَ. 49بِذانِن مِه اَوَه گه باوَه‌م وَدَه داسی کِلَ‌مَهَم اَررُیتو؛ اِسَه بِمینِن اِنوم شیَر تا وخدی گه ایی قدِرتی گه ها نوم آسمون‌اِر هُمَه اِرابِگِری.»

عیسی ویرِ آسمونَ مَچو

50اَسَه عیسی اونَل اژ شیَر تاگَه هِناس آبادی بِیت‌‌عَنیا بِردیَ دِریر ئو دَسَل ووژ بِردیِ رُ، بِرَکت دانی؛ 51ئو هَرهُنَ گه بِرَکتَ مانی اَژینو جیاآ بی ئو ویرِ آسمو بَریا. 52ئو کُل اوُ پِرَسی ئو وَه خَوشی فِرِه‌یکا گِلوناهُارد اِرَه اورشلیم، 53ئو یِمِجو مَمَنِن اِنوم معبد خداون ئو شگِر ئو ستائشت خدائونَ مَهَرد.

Zur Zeit ausgewählt:

لوقا 24: LBT

Markierung

Kopieren