لوقا 14
14
شِفا اِ روژ شَمَه مقدّس
1اِ یَکی اژ روژَل شَمَه مقدّس گه عیسی اَرِه خوراک هُاردِن چوئی اِرَه مال یَکی اژ رِئیسَل شیخَل فرقَه فَریسی، کسَلی گه اَر اورَه بینَ، اوُ خو آوشدوئیِ کِل چیَما. 2اِ بِرُوَر او پیای بی گه لاری آو آوِردوئیتی. 3عیسی اژ عالمَل دین گه فِتوائونَ ما ئو فَریسیَل پِرسیتی: «آیا شِفا دائِن اِ روژ شَمَه مقدّس شرعاً جائزَ یاگَه نه؟» 4مِنتائای اونَل هُیچ دَنگو نَهَرد. اَسَه عیسی اَ پیا گِرتی، شِفا داتی ئو مِرخص کِردی. 5اَسَه ویر کِردی اَر اونَل ئو پِرسیتی: «کُماین اژ هُمَه اِ روژ شَمَه مقدّس کُر یاگَه گا بِکُوئیتی اِنوم چا، هِرازِه نِمارتیَ دِریر؟» 6اونَل جوواوُنی ناآشد.
متل جَشت داوات
7وخدی گه عیسی دیتی مِمونَل چطور اِ بِلِنگ مِجِلیس اَرِه ووژو جاءَ مَگِرِن، ایی متلَ اَرِه وِتِنی: 8«وخدی کسی اَرِه جَشت داوات دَوَتتَ اَژینَ مَگِری، نَنیش اَر بِلِنگ مِجِلیس، اَرِیَگه هایتِر کسی سرشناس‌تِر اژ تو دَنگ بوئی. 9اَسَه صائای مِجِلیس گه هَردِکتو دَنگ کِردیَسی، مای ئو موشی‌ئونِت: ”جات بیَ ایی پیا.“ اَسَه وَه خجالتا مَنیشین اَر هُار مِجِلیس. 10بلکِم هر وخد کسی مِمو کِردینی، بِچُ ئو بِنیش اَر هُار مِجِلیس، تا وخدی گه صائای مِجِلیس بای، بوشی‌ئونِت: ”اِاِ رِقیفِم، بفرما بِنیش اَر جا بِلِنگ‌تِری.“ اَسَه اَرتَک مِمونَلی‌تِر گه وَه‌گَرد تو نیشتِنَس اَرسر سِفِرَه سربِلِنگا موئین. 11اَرِیَگه هر کی ووژ بیَریِ رُ، خوارَ ماو ئو هر کی ووژ فِروتنا کِ، سربِلِنگا ماو.»
12اَسَه عیسی وِتیَ صائای مِجِلیسِهَه: «وخدی مِمونی ناهار یاگَه شُمَ مِین، رِقیفَل ئو بِرال ئو قومِ‌خویشَل ئو هُمسال ثرودمن ووژِت دَنگ نِهَه؛ ناخواد اون‌یش دَنگِت کَن ئو هُنَ عیوَض ووژِت بِگِرین دُما؛ 13اِسَه وخدی مِمونیَ مِین فِلجَل ئو ژارَل ئو شَلَل ئو کورَل دَنگ کَ 14گه بِرَکتَ مَگِرین؛ اَرِیَگه اونَل چیئی نِرِن گه عیوَضت‌ئون بیَن‌ِ دُما، ئو اِ روژ قیومت، گه آمَل صالح زِنیا موئن، عیوَض ووژتَ مَگِرینِ دُما.»
متل مِمونی کَلِنگ
15وخدی یَکی اژ مِمونَل گه وَه‌گَرد عیسی اَرسر یِه سِفِرَه بی، یَه شنَفتی، وِتی: «خَوزگالَ اَوَه گه اِ مِمونی پاتِشائی خدا نُو بیری.» 16مِنتائای عیسی جوواوا داتی: «یَکی مِمونی کَلِنگی گِرتی ئو فِرَه کسَل دَنگ کِردی. 17وخدی بیَ موقَع شُم، خِلمَتکارِهِه کِل‌کِردی تاگَه بوشیَ کسَلی گه دَنگ بوئین، ”بورِن گه کُل چی حاضرَ.“ 18مِنتائای اونَل هر کُم عذِرونی آوِرد. یَکی وِتی: ”زمینمی خِریَ گه باس بِچِم بوئینمی. خواهشدَ مَهَم گه عذِرِم قبول کِین.“ 19یَکی‌تِر وِتی: ”پنج جِفتِ گام خِریَ، ئو هَراِسگَه دیرِم مَچِم بوئینِم چطورِن. خواهشدَ مَهَم گه عذِرِم قبول کِین.“ 20ئو یَکی‌تِریش وِتی: ”تازَه ژَنِم حُاستیَ، ئو وَه ایی خاطرَ نِمَتونِم بام.“ 21وخدی خِلمَتکارِهَه گِلاهُاردی ئو آقا ووژ اژ ایی چیئِلَ باخَوَرا کِردی. صائای مِجِلیسِهَه آگِر اژ سر چِتی ئو فِربو داتیَ خِلمَتکارِهِه وِتی: زِلِ‌زوی بِچُ اِنوم کویچه ئو بازار شیَر ئو ژارَل ئو فِلجَل ئو کورَل ئو شَلَل بار. 22خِلمَتکارِهَه وِتی: ”اِاِ آقا، فِربونِهَت اَنجوم گِرتی، مِنتائای هَنی جا هَس.“ 23اَسَه اَرباوِهَه وِتیَ خِلمَتکارِهَه: ”بِچُ اَرِه جَدَه‌ل ئو باریکَ‌رئیَل گه اژ شیَر هانَ دِریر ئو بِجُرّ اَر مردِم بارون اَرِه مِمونی تاگَه مالِم پِرا بو. 24اَرِیَگه موشِم‌ئونتو گه هُیچ‌کُم اژ کسَلی گه دَنگ بوئین، اژ شُم مِه طُم نِمَهَن.“»
خیمت شاگردی مسیح
25جیَمیَت فِرِه‌ی وَه‌گَرد عیسی بین. او ویر کِردی اَر اونَل ئو وِتی: 26«هر کی با اِرَه تک مِه ئو اژ باوَه ئو دا، ژَن ئو اولاد، بِرال ئو خُیَه‌لی، ئو جُ‌جُ گیو ووژ بیزار ناو، نِمَتونی شاگرد مِه بو. 27هر کی صلیب ووژ نَگِریِ کول ئو ناءَ تُرّ مِنا، نِمَتونی شاگرد مِه بو.
28کُماین اژ هُمَه هَس گه بِیتی بِرجی باوژی ئو اول‌بار نَنیشی خرجِ‌بَرج حساو کِیتی ئو بوئینی آیا قویَت تموم کِردِن دیرِتی یاگَه نه؟ 29اَرِیَگه اَرّ بِناوَه باوژتی مِنتائای نتونی تموم کِیتی، اَسَه هر کی بوئینتی، تیزمَتَلَ مِهِیتی، 30موشی: ”ایی پیاءَ بِنیا نا اَر ساخدِمو آوشدِن، مِنتائای نتونستی تموم کِیتی!“
31«یاگَه کُماین پاتِشاءَ گه بِچوءَ جنگ پاتِشای‌تِر، بی‌یَگه اول‌بار بنیشی ئو فگِر بِهِه گه آیا مَتونی وَه‌گَرد دیَه هزار سَرواز بِچوءَ جنگ کسی گه وَه‌گَرد بیس هزار سَروازَ ماءَ جنگ او؟ 32اَرّ بوئینی نِمَتونی، اَسَه تا وخدی قُشون دشمن دویرتِرَ، نِمائنده‌ی کِلَ‌مِهِه تاگَه بوئینی چطورَ ماو دوسی کِ. 33اِسَه اِنوم هُمِه‌یش، اَرّ یَکی اَژینتو اژ هرچی گه دیری نگُذَری، نِمَتونی شاگرد مِه بو.
34«خوا خوءَ، مِنتائای اَرّ شوری ووژ اژ دس بِ، چطورَ ماو اِدوارَه شورا کِینی؟ 35نه اِ کار زمینَ مای ئو نه اَرِه کوت وَه کِرَمَ مای؛ بلکِم هُوَ میَنی. هر کی گوش اَرِه شِنَفتِن دیری، بشتوئی!»
Zur Zeit ausgewählt:
لوقا 14: LBT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
@ 2024 Korpu Company
