لوقا 13
13
توئَه بِهَن
1هَراَ وخدَ، بِری اژ کسَلی گه اَر اورَه بینَ، اِبارَه جلیلیَلی وَه‌گَرد عیسی قصه‌ئو کِرد گه پیلاتُس هُنَ قتل عام کِردوئینی گه خوینو وَه‌گَرد خوین قُرونیَلو هاوِنتوئیَ یَک‌اِرا. 2عیسی جوواوا داتی: «یانی گُمونَ مِهِینو جلیلیَلی گه یَه هاتَ سرو گناکارتِر اژ باقی جلیلیَل بین؟ 3نه! موشِم‌ئونتو گه هُنَ نیَ. بلکِم اَرّ توئَه نِهِینو هُمِه‌یش کُلتو هَرهُنَ نابودَ موئینو. 4یاگَه گُمونَ مِهِینو اَ هَژدَه نفرَ گه بِرج سْیلوآم رِمیا اَر سرون‌اِرا ئو مِردِن، اژ باقی مردِم اورشلیم خطاکارتِر بین؟ 5نه، موشِم‌ئونتو گه هُنَ نیَ. بلکِم اَرّ توئَه نِهِینو هُمِه‌یش کُلتو هَرهُنَ نابودَ موئینو.»
6اَسَه ایی متلَ وِتی: «پیای اِنوم باخ انگویر ووژ دار انجیری چُکُنی. وخدی هِستی ثمر بِچِنتی، چیئیَ قِ‌آ نَهَردَ دی. 7اَسَه وِتیَ باخائونِهَه: ”سِیل کَ تا اِسگَه سه سالَ گه مام تا ثمر ایی دارَ بِچِنِم مِنتائای چیئیَ قِ‌آ نِمَهَمیَ دی. اَوَه بُئِر، اَرِه‌چَه هَراَ وِل زمین اِرابِگِری.“ 8مِنتائای باخائونِهَه جوواوا داتی ”اِاِ آقا، بِیل یِه سال‌تِریش بِمینی تا دورا بِکَنمی ئو کوت‌ئون دَمی. 9اَرّ سالی‌تِر ثمر داتی، خو؛ اَرّ ناتی اَسَه بُئِرتی.“»
شِفا ژَن علیل
10اِ یَکی اژ روژَل شَمَه مقدّس، عیسی اِنوم عَبادتگا یهود تیَلیمَ ماتی. 11اَر اورَه ژَنی بی گه یِه روحِ گَن هَژدَه سال او علیل کِردوئیتی. کوخ دائیتی ئو اصِلا نِمَتونستی راس بوسی. 12وخدی عیسی او دیتی هِنا کِردی اِرَه تک ووژ ئو وِتی: «اِاِ ژَن، دیَر اژ علیل بیئِنِت خِلاص بین!» 13اَسَه عیسی دس نا اَر قِ ژِنَهَه ئو، او هِرازِه راسا بی ئو خدا ستائشت کِردی. 14مِنتائای رِئیس عَبادتگا اَرِیَگه عیسی اِ روژ شَمَه مقدّس او شِفا دائیتی، آگِر اژ سر چِتی ئو وِتیَ مردِم: «شَش روژ اَرِه کار کِردِن دیرینو. اِ اَ روژِلَ بورِن ئو شِفا بِگِرِن، نه اِ روژ شَمَه مقدّس.» 15عیسی خداون جوواوا داتی: «اِاِ ریاکارَل! مَر هُیچ کُم اژ هُمَه اِ روژ شَمَه گا یاگَه خر ووژ اژ طوئیلَه واز نِمِهِه تاگَه اَرِه آو دائِن بیَریَ در؟ 16مَر نَباس ایی ژِنَ گه دِت ابراهیمَ ئو شِطو هَژدَه سالَ هُنَ اسیر کِردیَ، اِ روژ شَمَه مقدّس اژ ایی بَنَ آزاد بو؟» 17وخدی یَه وِتی، دشمنَلی کُل خیتِ‌خجالتا بین، مِنتائای مردِم چورِّم اِ کُل کارَل پِرجِلال عیسی خَوشالا بین.
متل دُ خردل ئو حمیرتُرش
18اَسَه عیسی وِتی: «پاتِشائی خدا اِجور چیَ؟ بوشِم گا چَه؟ 19اِجور دُ خردلی کَ گه پیای اَوَه گِرتی ئو اِنوم باخ ووژ کاریتی. اَ دُنَ سُز کِردی ئو بیَ داری، هُنَ گه مَلَل آسمو هاتِن ئو اَررُی پَلَلی لونَه‌ئو دُریس کِرد.»
20عیسی اِدوارَه وِتی: «پاتِشائی خدا بوشِم گا چَه؟ 21اِجور حمیرتُرشی کَ گه ژَنی هیزدا ئو وَه‌گَرد سه کیسَه آرد دا یَک‌اِرا تاگَه کُل حمیر اِربای.»
در تنگ
22عیسی اَرنوم رئی اورشلیم، مَچیا اَرِه شیَرَل ئو آبادیَل ئو تیَلیمَ ماتی. 23اَسَه یَکی اَژی پِرسی: «اِاِ آقا، یانی اونَلی گه نجادَ مَگِرِن کَمِن؟» عیسی وِتی‌ئونو: 24«فِرَه تقِلا بِهَن تا اژ در تنگ باینون اِنوم، اَرِیَگه موشِم‌ئونتو، فِرَه کسَل تقِلا مَهَن تاگَه بان اِنوم، مِنتائای نِمَتونِن. 25وخدی صائای مال هیزگِری ئو دِرَهَه بوئنی، مَمینینون اَر پِشت در ئو مَکوئینون اَر در ئو موشینو: ”اِاِ آقا، در اَرِنمو واز کَ!“ مِنتائای او جوواوَ مِ: ”هُمَه نِمَشتاسِم؛ نِمَذانِم اژ کو هاتینونَ.“ 26اَسَه موشینو: ”ایمَه وَه‌گَرد تو اَرسر یِه سِفِرَه هُاردمون ئو خُرّمو دا ئو تو اِنوم کویچَه‌ل ایمَلِت تیَلیمَ ما.“ 27مِنتائای اوءَ موشی‌ئونِت: ”موشِم‌ئونتو، نِمَذانِم اژ کو هاتینونَ. کُل اژ مِه دویرا بِگِرِن، اِاِ گَنَ‌کارَل!“ 28اَسَه اَر اورَه مَگیرینون ئو ماینونِ دِنوریچَه، اَرِیَگه موئینینو ابراهیم ئو اسحاق ئو یعقوب ئو کُل پِخَمَرَل هان اِنوم پاتِشائی خدا، مِنتائای ووژتون اژ اورَه هاینونَ دِریر. 29مردِم اژ شرق ئو غرب ئو شمال ئو جنوبَ مان ئو مَنیشِن اَرسر سِفِرَه پاتِشائی خدا. 30اَاَ، کسَلی هَن گه آخِر هاتِنَ، موئنَ اول، ئو کسَلی هَن گه اول هاتِنَ موئنَ آخِر.»
خُصَه عیسی اَرِه اورشلیم
31هَراَ وخدَ، بِری اژ شیخَل فرقَه فَریسی هاتِن اَرِه تک عیسی ئو وِتو: «ایرَه وِل کَ ئو بِچُ اِرَه جای‌تِر، اَرِیَگه هیرودیس میا بِکُشیت.» 32عیسی جوواوا داتی: «بِچِن ئو بوشِنَ اَ رُواءَ: ”بِذان گه مِه ایمِرو ئو صو، مِلاکَتِلَ مَهَمَ دِریر ئو مردِم شِفاءَ میَم، ئو اِ روژ سِئِم کار ووژِم کاملا مَهَم. 33وَه ایی حالا مِن‌یش باس ایمِرو ئو صو ئو دوصو مِل رئی ووژِم بِگِرِم بِچِم، اَرِیَگه مِحالَ پِخَمَر اِ جای بِخِر اژ اورشلیم بِکُشِری.“ 34«اِاِ اورشلیم، اِاِ اورشلیم، اِاِ خوینی پِخَمَرَل، اِاِ سنگسارکَر رسولَلی گه کِلَ‌موئن اِرَه تَکِت! چَن گِل هِستِم چُی مِرخی گه جویجِکَلی جیَمَ مِهِئِه ژیر بال ووژ، آیلَلِت جیَم دَمَ دور یَکا، مِنتائای نِهِستِت! 35اِسگَه مال هُمَه چول ئو اِرچوقیا اَرِنتونَ مَمینی. موشِم‌ئونتو گه دیَر مِه نِموئینینو تا روژی گه بوشینو: ”بِمارِکَ اَوَه گه وَه نُم خداونَ مای.“»
Zur Zeit ausgewählt:
لوقا 13: LBT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
@ 2024 Korpu Company
