یوحنا 12
12
عیسی اِنوم آبادی بِیت‌عَنْیا
1شَش روژ وِر اژ عِد پِسَخ، عیسی هات اَرِه نوم آبادی بِیت‌‌عَنیا، اَر جای گه ایلعازَر زِنِه‌یَ مَهَردی، هَراَوَه گه عیسی او اژ مِردیَل زِنیا کِردوئیتی. 2اَر اورَه وَه خاطر او شُمو دا. مارتا مِموداریَ مَهَردی ئو ایلعازَر یَکی اژ کسَلی بی گه وَه‌گَرد عیسی نیشتوئی اَر سر سِفِرَه. 3اَسَه، مریم عطِر خیمتی‌ای اژ گل سنبل خالص گه نزیک نیم لیتر بی، گِرتی ئو رِشونی اَر رُی پال عیسی ئو وَه گیسَلی پال او حُشگا کِردی، هُنَ گه اَ مالَ پِرا بی اژ بو عطِر. 4مِنتائای یهودا اَسخَریوطی، یَکی اژ شاگردَل عیسی، گه دُماتِرَل عیسی داءَ گیر دشمن، وِتی: 5«اَرِه‌چَه ایی عطِرَ گه خیمتی چَن دیَه مُنگ مِز یِه عمِلِه‌ی کَ نَفِروتِت، تاگَه پیل بیَنیَ ژارَل؟» 6او یَه وِتی نه وَه خاطر دلسوزی اَرِه ژارَل، بلکِم اَرِیَگه دُز بی؛ ژاژ خرجِ‌بَرج اَر تک بیتی ئو اژ پیلَلی گه مَنیائون اَر تک، مُئزیاتی. 7عیسی وِتی: «کارتون اَژی ناآشدوئی! اَرِیَگه ایی عطِرَ اَرِه روژ کفنِ‌دفن مِه هُیشتوئیتی اَر تک ووژ. 8اَرِیَگه ژارَل هَر وَه‌گَرد ووژتو دیرینو، مِنتائای همیشَه مِه نِرینو.»
9وخدی جیَمیَت فِرِه‌ی اژ یهودیَل، شنَفتو عیسی هار اورَه، هاتِن تاگَه نه فَخَد عیسی، بلکِم ایلعازَریش گه اژ مِردیَل زِنیا کِردوئیتی، بوئینِن. 10اَسَه، رِئیسَل کاهنَل نَشقَلونی کیشی تاگَه ایلعازَریش بِکُشِن، 11اَرِیَگه باعث بوئی فِرَه کسَل اژ یهودیَل پِشت کَن اَر اونَل ئو ایمو بارنَ اَر عیسی.
عیسی اِجور پاتِشائی مَچو اِنوم اورشلیم
12وَه‌صوایکا جیَمیَت فِرِه‌ی گه اَرِه عِد هاتوئین، وخدی شنَفتو عیسی ما اِنوم شیَر اورشلیم، 13وَه تَلَل دار خرما گه وَه دَسونا بی هاتِنیِ نوا. اونَل مَقارونو ئو موئِتو:
«نجاد بِ!
بِمارِکَ اَوَه گه
وَه نُم خداونَ مای،
بِمارِکَ پاتِشا اسرائیل!»
14اَسَه عیسی خِرولی‌ای کِردیَ دی ئو سُوار بیتی؛ هُنَ گه اِ نُسَخ مقدّس نُیسیاءَ:
15«زِلَت نَچو! اِ دِت کوی صَهیون،
سِیل کَ، پاتِشاتَ مای،
وَه کول خِرولی‌ایکا!»
16شاگردَل عیسی اول‌بار، ایی چیئِلونَ نَفیَمی، مِنتائای وخدی عیسی اژ مِردیَل زِنیا بی، هاتَ ویرو گه یوئنَ کُل اِبارَه عیسی اِ نُسَخ مقدّس نُیسیائی ئو وَه سَریش هاتوئیتی.
17جیَمیَتی گه وخدی عیسی ایلعازَر اژ لَحَک هِنا کِردی ئو، او اژ مِردیَل زِنیا کِردی، وَه‌گَرد بوئینی، هَر اَر ایی گپَ شاتیونَ ما. 18اَژونَبیَ گه اَ جیَمیَت چِنیِ نوا، اَرِیَگه شنَفتوئیو عیسی هُنَ نشونَه ئو مُجِزِه‌ی اَنجوم داسی. 19اَسَه شیخَل فرقَه فَریسی وِتونَ یَکتِری: «دیتو هُیچ کاری اژ دَستون اِرنِمای؛ سِیل کَن گه کُل دنیا چِنَسیَ دُما.»
یونانیَل مِهِستو عیسی بوئینِن
20اِ بِن کسَلی گه اَرِه عَبادت اِنوم عِد هاتوئین، بِری یونانی‌ش بین. 21اونَل هاتِن اَرِه تک فیلیپُس، گه اَل بِیت‌صِیْدا اِ جلیل بی، ئو وِتونَ بی: «آقا، میا عیسی بوئینیم.» 22فیلیپُس هات ئو وِتیَ آندریاس، ئو اونَل هَردِک چِن ئو وِتونَ عیسی. 23عیسی وِتیَ بینو: «سات مرگ ئو زِنیابیئِن کُر اِنسو رَسیَ. 24حخیختاً، موشِمَ بینتو، اَرّ تُئم گَنِم نَکُوء اِنوم خاک ئو نَمِری، تَنیا مَمینی؛ مِنتائای اَرّ بِمِری ثمر فِرِه‌ی اِرَماری. 25کسی گه گیو ووژ دوس داشدوئیتی، اَوَه اژ دَسَ مِ. مِنتائای کسی گه اِنوم ایی دنیا اژ گیو ووژ بیزار بو، اَوَه اَرِه ژییاین ابدی حفظَ مِهِه. 26اَوَه گه بِیتی خِلمت اَر مِه بِهِه، باس باءَ دُم مِنا؛ ئو جای گه مِه بوئم، خادم مِن‌یش هار اورَه. کسی گه خِلمت اَر مِه بِهِه، باوَه آسمونی عزّتَ مَنِتی اَری.
عیسی اژ مِردِن ووژ قصَه مِهِه
27«اِسگَه سِتارم اَژی بِریاءَ. چَه بوشِم؟ یانی بوشِم، ”باوَه! اژ ایی ساتَ مِه نجاد بیَ“؟ مِنتائای هَر اَرِه ایی قَصَ رَسیمَس اَر ایی ساتَ. 28باوَه، نُم ووژت جِلال بیَ!» اَسَه دَنگی اژ آسمو رَسی گه: «جِلالِم داءَ ئو اِدوارِه‌یش جِلالَ میَم.» 29اَسَه مردِمی گه اَر اورَه بینَ ئو یِئونَ شنَفت، وِتو: «تَش‌بِریق بی.» کسَلی‌تِر وِتو: «فریشدِه‌ی وَه‌گَرد قصَه کِرد.» 30عیسی وِتی: «ایی دَنگَ اَرِه هُمَه بی، نه اَرِه مِه. 31اِسگَه وخد داوری اَر ایی دنیاسَ؛ اِسگَه رِئیس ایی دنیا ماوژِنَ دِریر. 32ئو وخدی اژ زَمی عَلَمِم بِهَن ئو بِکُشِنِم، کُل کسَ مَکیشِم ویرِ ووژِم.» 33او وَه ایی قصَه، هَشارَه مَهَردی اَر مرگی گه چیَمَ‌رئی بیتی، گه چطور مرگی کَ. 34اَسَه مردِم جوواوُ داءَ بی، وِتو: «اَ چیئَه گه ایمَه اژ توراتمو شنَفتیَ، مسیحی گه باس بای تا ابد زِنیَ مَمینی، اِسَه چطورَ موشین کُر اِنسو باس علم بو ئو بِکُشِری؟ ایی کُر اِنسونَ کیَ؟» 35اَسَه عیسی وِتیَ بینو: «تا مِدتی‌تِر، نُیر ها گَردتو. اِسَه تا وخدی گه هَنی نُیر ها گَردتو، بِچِنَ رئیا، ناخواد تیَریکی هُمَه اِرابِگِری. اَوَه گه اِنوم تیَریکیَ مَچوءَ رئیا، نِمَذانی کوءَ مَچو. 36تا وخدی گه نُیر ها گَردتو، ایمو بارِن اَر نُیر تاگَه بوئینونَ آیلَل نُیر.»
وخدی گه عیسی ایی قصه‌لَ وِتی، اژ اورَه چی ئو ووژ اَژینو قام کِردی.
بی‌ایمونی مردِم
37وَه‌یاآگه عیسی هُنَ نشونَه‌ل ئو مُجِزَه‌ل فِرِه‌ی اَر وَر چیَمَل اُوُ اَنجوم دائیتی، ایمونونَ بی ناوِرد. 38هُنَ قصَه‌ل اِشعیا پِخَمَر اَنجوم گِرت گه وِتوئیتی:
«اِاِ خداون، کیَ گه پِغوم ایمَه باوار کِردیِ،
ئو کیَ گه بالَل خداون آشگار بیَسی اَری؟»
39هُنَ گه اِشعیا پِخَمَر ووژ اِ جای‌تِر وِتیِ، اونَل نتونستو ایمو بارِن، اَرِیَگه:
40«او چیَمَل اونَل کور،
ئو دلَلو کِردیَسیَ بَرد،
تا وَه چیَمَل ووژو نوئینِن،
ئو وَه دل ووژو نفیَمِن،
ئو گِلانیرِن‌ِ دُما تاگَه شِفائو دَم.»
41اِشعیا پِخَمَر یوئنَ وِتی اَرِیَگه، جِلال او دیتی ئو اِبارَه او قصَه کِردی.
42وَه ایی حالا، جُ‌جُ فِرَه کسَل اژ کَلِنگَل قوم‌یش ایمونو آوِرد اَر عیسی، مِنتائای اژ ترس شیخَل فرقَه فَریسی، اعترافون اَر ایمو ووژو نِمَهَرد، تاناخواد اژ عَبادتگا یهود باوژِنون‌ِ در. 43اَرِیَگه اونَل تیَریف مردِمو ویشتِر اژ تیَریف خدا دوس داشد.
44اَسَه عیسی وَه دَنگ کَلِنگ وِتی: «هر کی ایمون اَر مِه باری، نه اَر مِه، بلکِم ایمو آوِردیَسی اَر کِل‌کَرِم. 45هر کی مِه دیتی، کِل‌کَرِم دیَسی. 46مِه اِجور نُیری هاتِمَس اَرِه ایی دنیا تا هر کی ایمون اَر مِه باری، اِنوم تیَریکی نَمینی. 47اَرّ کسی قصَه‌ل مِه بشتوئی، مِنتائای اَژینو اطاعت نِهِه، مِه اَر او داوری نِمَهَم؛ اَرِیَگه نِهاتِمَ تا اَر دنیا داوری بِهَم، بلکِم هاتِمَ تاگَه دنیا نجاد بیَم. 48اَرِه اَوَه گه دس رد بِ اَر سینَه مِه ئو نَچوءِ گِرد قصَه‌لِم، کسی هَس گه داوری بِهِیتی؛ هَراَ قصَه گه وِتِم، روژ قیومت مَکومَ مِهِیتی. 49اَرِیَگه مِه اژ جونِم ووژِم قصَه‌می نَهَردیَ، بلکِم باوِه گه مِه کِل‌کِردیَسی فِربو داسیَ بینِم گه چَه بوشِم ئو اژ چَه قصَه بِهَم. 50ئو مِنَ مَذانِم گه فِربو او ژییاین ابدیَ. اَسَه اَ چیئَه گه مِنَ موشِم، دُریس هَراَوَه‌سَ گه باوَه وِتیَسیَ بینِم تاگَه بوشِم.»
Zur Zeit ausgewählt:
یوحنا 12: LBT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
@ 2024 Korpu Company
