یوحنا 11
11
مِردِن ایلعازَر
1پیای ایلعازَر نُم مریض بی. او اژ مردِم بِیت‌‌عَنیا، آبادی مریم ئو خُیِِه‌ی مارتا بی. 2مریم هَراَ ژَنَ بیَ گه خداون عیسی وَه عطِر مسح کِردی ئو وَه گیسَلی پال او حُشگا کِردی. اِسگَه بِرای ایلعازَر مریض بوئی. 3اَسَه خُیَه‌ل ایلعازَر پِغومو رِ کِرد اَرِه عیسی، وِتو: «اِ آقا، رِقیف عزیزِت مریضَ.» 4عیسی وخدی گه ایی خَوَرَ شنَفتی، وِتی: «عاقویَت ایی مریضیَ مرگ نیَ، بلکِم اَرِه جِلال دائِن خداءَ، تا کُر خدا وَه‌سونگَ اَوَه جِلال بِگِری.» 5عیسی، مارتا ئو خُیِِه‌ی ئو ایلعازَر دوس داشدی. 6اَسَه وخدی شنَفتی گه ایلعازَر مریضَ، دو روژتِریش مَن اَر اَ جاءَ گه بی.
7اَسَه وِتیَ شاگردَلی: «بورِن اِدوارَه بِچیم اَرِه هیال یهودیَه.» 8شاگردَلی وِتونَ بی: «استاد، هَرایی تازَه یهودیَل مِهِستو سنگسارِت کَن، تو اِدوارَه میا بِچین اَرِه اورَه؟» 9عیسی جوواو داتی: «مَر روژ، دوازَه سات نیَ؟ اِنسونی گه وَه روژ بِچوءَ رئیا، پای گیر نِمِهِه اَر کُچِکی گه بِکُوءِ، اَرِیَگه نُیر ایی دنیاءَ موئینی. 10مِنتائای اَوَه گه وَه شو بِچوءَ رئیا، پای گیرَ مِهِه اَر کُچِکی ئو مَکُوءِ، اَرِیَگه نُیر اِنوم نیِ.» 11عیسی دُما ایی قصه‌لَ وِتیَ بینو: «رِقیفمو ایلعازَر حیوَتیَ، مِنتائای مِنَ مَچِم، تاگَه او بِهَمَ خَوَر.» 12شاگردَلی وِتونَ بی: «آقا، اَرّ حیوَتیَ، خوآ ماو.» 13مِنتائای عیسی اژ مرگ او قصَه مَهَردی، وَه‌یاآگه شاگردَل گُمونونَ مَهَرد عیسیَ موشی ایلعازَر حیوَتیَ ئو شَکَتی اِرَمِهِه. 14اَسَه عیسی آشگارا وِتیَ بینو: «ایلعازَر مِردیَ. 15ئو وَه خاطر هُمَه خَوشالِم گه اَر اورَه نوئیم، تاگَه ایمو بارینو. مِنتائای اِسگَه بِچیمی اَرِه تک.» 16توما، گه وَه لِفونی مَشور بی، وِتیَ شاگردَلی‌تِر: «بورِن ایمِه‌یش بِچیم تاگَه وَه‌گَرد او بِمِریم.»
عیسی، قیومت ئو ژییاینَ
17وخدی عیسی رَسی اَر اورَه، فیَمی چوار روژَ گه ایلعازَر ها لَحَک‌اِر. 18اژ آبادی بِیت‌عَنْیا نزیک نیم فَرسَخ تا شیَر اورشلیم رئی بی. 19یهودیَل فِرِه‌ی هاتوئین اَرِه تک مریم ئو مارتا تا اَرِه مِردِن بِرائو دلگُوئیو دَن. 20وخدی مارتا شنَفتی گه عیسی دیری مای اَرِه اورَه چِتیِ نوا، مِنتائای مریم مَنِ مال. 21مارتا وِتیَ عیسی: «اِ آقا، اَرّ اَر ایرَه بیاین، بِرام نِمَمِرد. 22مِنتائای مَذانِم گه هَر اِسگِه‌یشَ هر چَتی اژ خدا بِ، مِئَه بینِت.» 23عیسی وِتیَ مارتا: «بِرات زِنیا ماو.» 24مارتا وِتیَ عیسی: «مَذانِم گه روژ قیومت زِنیا ماو.» 25عیسی وِتی: «مِنِم اَ قیومت ئو ژییاینَ. هر کی ایمونمَ بی باری، جُ‌جُ اَرّیش بِمِری، وَه ایی حالا زِنِه‌یَ مِهِه. 26ئو هر کی زِنِه‌یَ مِهِه ئو ایمو اَر مِه دیری، تا ابد نِمَمِری؛ یَه باوارَ مِهِین؟» 27مارتا وِتی: «اَاَ، آقا، مِه باوارَ مَهَم گه تو مسیحین، کُر خدا، هَراَوَه گه ما اِنوم ایی دنیا.»
28وخدی یَه وِتی، چی ئو هِنا کِردی اَر خُیَه ووژ مریم، بی‌کِشکی وِتَ بی: «استاد هار ایرَه ئو هِناتَ مِهِه.» 29مریم وخدی یَه شنَفتی، هِرازِه هیزگِرتی ئو چی اَرِه تک عیسی. 30عیسی هَنی نَرَسوئی اِنوم آبادی، بلکِم هَر اَر اورَه بیَ گه مارتا چوئیتیَ دیار. 31یهودیَلی گه اِنوم مال اَر تک مریم بین ئو دلگُوئیونَ ماءَ بی، وخدی گه دییو مریم هِرازِه هیزگِرتی ئو چیَ دِریر، وَه دُم سِرا چِنی. گُمونونَ مَهَرد میا بِچو اَرِه لَحَک تا اَر اورَه بونگ اِرباری. 32مریم رَسی اَر جای گه عیسی بیتی ئو وخدی او دیتی، کَت اَر رُی پال عیسی ئو وِتی: «آقا، اَرّ اَر ایرَه بیاین بِرام نِمَمِرد.» 33وخدی عیسی گیری‌گاو مریم ئو یهودیَلی گه وَه‌گَرد هاتوئینی دیتی، اژ تیَه دلا خَمین بی ئو سِتار اَژی بِریاتی. 34عیسی پِرسیتی: «اوتو ناس اَر کو؟» وِتو: «آقا، بوری سِیل کَ.» 35عیسی بیِ گیری. 36اَسَه یهودیَل وِتو: «سِیل کَن چَنی او دوس داشدی!» 37مِنتائای بِری اَژینو وِتو: «یانی کسی گه چیَمَل اَ پیا کورَ واز کِردی، نِمَتونستی کاری بِهِه گه ایلعازَر نَمِری؟»
ایلعازَر زِنیا ماو
38اَسَه عیسی، هُنَ گه اژ تیَه دلا خَمین بی، هات اَرِه لَحَک. لَحَکِهَه، مَری بی گه بَرد کَلِنگونی نائی اَر دِراخِلی. 39عیسی وِتی: «بَردِهَه پِل دَنَ اَ لا.» مارتا خُیَه اَ پیاءَ گه مِردوئی، وِتَ بی: «آقا، اِسگَه دیَر بو دِرَّ مایتی، اَرِیَگه چوار روژَ مِردیَ.» 40عیسی وِتَ بی: «مَر نوئتمَ بینِت گه اَرّ ایمونِت داشدوئی، جِلال خداءَ موئینین؟» 41اَسَه بَردِهِئو پِل داءِ اَ لا. اَسَه عیسی ویر کِردی اَر آسمو ئو وِتی: «باوَه، شگِرتَ مَهَم گه دَنگ مِنِت شنَفت. 42مِه مَذِناسدِم گه هَر دَنگ مِنَ مَشتوئین. مِنتائای یَمَ وَه خاطر کسَلی وِت گه هان اَر ایرَه، تاگَه ایمو بارِن گه تو مِنِت کِل‌کِردیَ.» 43وخدی یَه وِتی اَسَه وَه دَنگ کَلِنگ هِنا کِردی: «ایلعازَر، بورَ دِریر!» 44اَسَه اَ مِردیَ، دس ئو پا بُوئنیا اِ کفن ئو پَرو پیچیا اَر دور رُی، هاتَ دِریر. عیسی وِتیَ اونَل: «واز کَنی ئو بِیلِن بِچو.»
نشقَه کُشتِن عیسی
45اَسَه ویشتِر یهودیَلی گه هاتوئینَ دیار مریم، ئو کار عیسی‌ئو دوئی، ایمونونَ بی آوِرد. 46مِنتائای بِری اَژینو چِن اَرِه تک شیخَل فرقَه فَریسی ئو اونَلو اژ اَ چیئَه گه عیسی کِردوئیتی، باخَوَرا کِرد. 47اَسَه رِئیسَل کاهنَل ئو فَریسیَل نیشتِنَ شور، وِتو: «چَه بِهِیم؟ ایی پیا نشونَه‌ل ئو مُجِزَه‌ل فِرِه‌ی اَنجومَ مِ. 48اَرّ بِیلیم هَرهُنَ بِچوءِ وَر، کُل ایمونَ بینَ مارِنی، ئو رومیِل‌َ مان، ایی مکونَ ئو ایی قومَ اژ دَسمونَ مَسینِن.» 49مِنتائای یَکی اژ اونَل گه نُم قیافا بیتی ئو اَ سالَ کاهن اعظم بی، وِتیَ باقیو: «هُمَه هُیچ نِمَذانینو 50ئو فگِر نِمِهِینو گه صِلاتو ها یَگه یَکی اَرِه قوم بِمِری، تاگَه کُل قوم نابود بوئن.» 51مِنتائای ایی قصَه اژ ووژ نوئیتی، بلکِم اَرِیَگه اِ اَ سالَ کاهن اعظم بی، هُنَ پیشگوئی کِردی گه عیسی اَرِه قومَ مَمِری، 52ئو نه فَخَد اَرِه قوم، بلکِم اَرِه جیَم کِردِن ئو یَکی کِردِن آیلَل خدا گه اژ یَک چویچیانَ. 53اَسَه، اژ هَراَ روژَ نَشقَلونی کیشی تاگَه بِکُشِنی.
54اَژونَبیَ گه عیسی دیَر آشگارا اِنوم یهودیَل نِماهات ئو بِچو، بلکِم اژ اورَه چی اَرِه شیَری وَه نُم اِفرایم اَر جای نزیک بیاوو ئو وَه‌گَرد شاگردَلی مَن اَر اورَه.
55وخدی گه عِد پِسَخ یهودیَل نزیک بی، فِرَه کسَل اژ جائَلی‌تِر، چِن اَرِه اورشلیم تاگَه وِر اژ عِد پِسَخ آداو پاکی بارِنَ جا. 56اونَل وَه مِنِی عیسی بین هَرهُنَ گه اِنوم قِلا معبد هوسیائین، موئِتونَ یَکتِری: «چَه فگِرَ مِهِینو؟ یانی اصِلا اَرِه عِد نِمای؟» 57مِنتائای رِئیسَل کاهنَل ئو فَریسیَل فِربونو دائی گه اَرّ کسی بِذانی عیسی هار کو، خَوَر بِ تاگَه بِگِرِنی.
Zur Zeit ausgewählt:
یوحنا 11: LBT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
@ 2024 Korpu Company
