ARING KELESING 4
4
Kain dahin Habel
1Pehawa' nah Adam dawa' Hawa, uh anan mali nah Hawa dahin nganak ji anak, aran na' Kain. Ken Hawa', “Akui uh ala ji anak laké' men asi Tuhan.” 2Men'uh anan en dawa' nganak pah Habel harin Kain nan. Habel anan iha' aleng petuboh duba dahin kading men dawa', bi Kain na luma' tua iha' men dawa'. 3Tegu ji dau en Kain ari nah uli-uli luman na', dahin ma'uk na' men Tuhan. 4#Ib 11:4 Nurei Habel lahuh en na' geri nah anak kading aleng madung, iha' tih anak kading na' aleng una'-una'. Melu lelan nah Tuhan té' ket aleng en Habel uk. 5Bi anun Kain ket aleng na' uk nusi' nah Allah kaséh na'. Pelalau bunget lelan nah Kain dahin ta'ui tua nah neng na'. 6Ken Tuhan men Kain, “Na' nun ka' bunget dahin ta'ui tua neng ka' nunan? 7Iha' ika' na aleng sayu, nusi' neng ka' ji'ek jam na' nunan. Bi awi ika' em na aleng sayu, sala atih uh té' menga té' ba ketamen, iha' pah ngenep nasa' ika', bi sayu im pekalah na'.”
8 #
Mat 23:35; Lk 11:51; 1 Yoh 3:12 Ken Kain men Habel harin na', “Tei nah itu' ha' luma'.” Beka' tegu dawa' tei ha' luma' tih, tenup en Kain nan nukun nah Habel harin na' aleng da'uk atih, dahin lematei iha'.
9Ken Tuhan men Kain, “No' nah harim aleng da'uk dih?” Ken Kain nyu'ei, “Nusi' kui jam. Bareng kui puboh harik iah?”
10 #
Ib 12:24
Ken Tuhan, “Ket nun aleng uh im na anih? Daha harim uh té' medéng Akui men alem tana. 11Kerei inih ika' tulah, dahin Ek uga té' usun tana aleng avam meso' daha harim anih. 12Tegu ika' nyadui té' tana anan, nusi' ka' deng ala uli lim hadui ka', ika' itung ji kelunan aleng tei lap, tei liung té' usun tana anih.”
13Ken Kain men Tuhan, “Ukum kui kelalau lalé' bahat men'uh aleng deng ek gem. 14Kerei inih akui Im uga men usun tana anih, dahin tei lingen men unan Ka', dahin tei lap liung-liung té' usun tana, awi té' daha' pepsuk dahik adang daha' ngenep lematei akui.”
15Ken Tuhan men Kain, “Nusi' peletu ha' nutih. Hi-hi aleng seng lematei ika', iha' seng ga' hulei tusu hangun.” Avin anan Tuhan na ji tada' té' Kain, ja daha' em lematei iha' tegu daha' pepsuk dahin na'. 16Lap nah Kain men unan Tuhan dahin melo' ha' tana Nod, pedah matan dau pa'un té' Eden tih.
Daha' pahu Kain
17Peji nah Kain dahin doh na', doh na' pah mali, uh anan iha' nei nganak ji anak laké', aran anak na' Henokh. En Kain na nah ji daléh ngioh aran anak na' Henokh atih. 18Henokh pah nganak Irad, Irad pah nganak Mehuyael, dahin Mehuyael pah nganak Metusael, Metusael pah nganak Lamekh. 19Lamekh ala nah dua' doh hawan na', aran ji Ada, aran ji Zila. 20Ada pah nganak Yabal, iha' nah aleng taman daha' aleng puboh hulung dahin murip alem lepau anit. 21Aran harin na' aleng da'uk atih Yubal, iha' nah aleng taman daha' aleng haman dak sapé' dahin suling. 22Zila nganak Tubal-Kain, iha' pa'un daha' aleng haman na temaga' dahin titei. Harin doh Tubal-Kain aleng da'uk iha' nah Naama. 23Ken Lamekh men dawa' dua' doh hawan na' anan, iha' tih Ada dawa' Zila,
“U kua' doh kui, ting nah iling kua', kelenghi nah kua' dahuk nih.
Akui uh lematei ji nyemaké' avin iha' mega' akui,
lan, akui uh lematei iha' avin iha'
aleng nyaman akui di.
24Iha' daha' aleng lematei Kain ga'
hulei tusu hangun,
daha' aleng lematei Lamekh pah seng
ga' hulei tusu-pulu-tusu hangun.
Set dahin Enos
25Adam pah peji dahin hawan na' la'an, lun nganak nah doh na' ji anak laké', aran na' Set. Ken na' nah, “Allah uh ma'uk men akui ji anak aleng itung kalui Habel, aleng en Kain lematei dih.” 26Uh anan dih té' nah ji anak Set, anak atih anak laké', aran na' Enos. Tegu atih nah aring daha' jam murui aran Tuhan.
Zur Zeit ausgewählt:
ARING KELESING 4: TDK1990
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Bible in Today's Dahun Kayan Version © Bible Society of Malaysia, 1990.
