ARING KELESING 3
3
Kelunan legak alem sala
1 #
K Tula 12:9; 20:2 Nyipa' atih iha' nah kelalau lalé' tugé' men hang lim-lim tulan aleng uh en Tuhan Allah na ha' usun tana. Nyipa' kuma' men doh anan, “Adang nunih dahun Tuhan Allah, ‘Lim iung bua alem lida anih, meng kua' kuman bua na',’ nunan dahun Na' kurik?”
2Ken doh anan nyu'ei nyipa' anan, “Lim bua alem lida anih deng en awa' kani, 3bi té' ji iung bua aleng marung belua anih, ken Tuhan Allah, ‘Meng peletu kua' kuman na', meng gem bua na' lahuh, avin tegu kua' kuman na' kua' matei.’ ”
4Bi ken nyipa' atih nyi'ei doh anan, “Nusi' peletu kua' matei, 5avin Tuhan Allah aleng jam, tegu kua' kuman na', matan kua' seng peting, kua' pah seng piah awi Allah, jam marung aleng sayu dahin aleng ji'ek.”
6Pelalau doh anan nyineng nah bua anan, deng en kani, sayu lan jam bua na', nei ngivah nah iha' avin bua atih ngavan na' seng nei nyemugen, pelalau pah iha' ala bua anan en na' kani, dahin ma'uk men laké' na' lahuh, laké' na' pah kani na'. 7Beka' peting nah matan dawa', iha' nah dawa' jam dawa' utoh, pelalau dawa' ala itun bua a en dawa' pething-pething na bah dawa'.
8Tei nah dau levi, kelenghen dawa' nah dahun Tuhan Allah panau-panau alem lida anan, pelalau nyihuk nah dawa' té' Tuhan Allah, té' hang iung bua alem lida anan. 9Bi Tuhan Allah muvui laké' anan dahin kuma' men iha', “No' nah ika' dih?” Laké' anan pah nyu'ei, 10“Tegu akui kelenghi Dahum té' alem lida anih, takut nah akui avin kui utoh, anan nah tavit kui nyihuk nunih.”
11Ken Tuhan men iha', “Hi aleng bara men kua', ja kua' jam kua' utoh nunan? Nuno' nan, kua' kani nah bua aleng Ngavak mano' kua' em mun kua' kani na' arei di iah?”
12Iha' laké' anan nyu'ei, “Doh aleng Im uk men akui anih dih iha' aleng ma'uk bua anan men akui, iha' nah akui kani na'.”
13 #
2 Kor 11:3; 1 Tim 2:14 Men'uh anan ken Tuhan Allah men doh anan, “Ket nun anih aleng uh im na?” Nyu'ei nah doh anan, “Nyipa' aleng peluvat akui, iha' nah akui tei kani na'.”
Tuhan bara tuk-tuk ukum
14Pelalau Tuhan Allah duan nyipa', “Tavit ika' uh peluvat iha' nunih, tulah na ika' té' hang lim-lim hulung aleng malei, dahin tulah té' hang tulan aleng alem uro', té' butit ka' tua ika' seng panau, pup tana tua aleng seng kanem ji iung urip ka'. 15#K Tula 12:17 Akui seng na ika' pebunu dahin doh anih, nunan pah pahu ka' dahin pahu na' lahuh, anak na' seng lemruk kahung ka', dahin anak ka' seng nudek tumin na'.”
16Ken Na' men doh anan, “Akui seng ma'uk katé' men ika' tegu ika' mali, nunan pah tegu ika' nganak lahuh, ika' ga' tusah aya', ika' pah seng liveng té' hawam, nurei pah lahuh hawam aleng seng dekaya' té' ujung ka'.”
17 #
Ib 6:8
Ken Na' pah la'an men laké' anan, “Avin ika' uh kelenghi dahun doh ka', tei kuman bua aleng uh Ek bara, em mun ika' kani na', beka' im kani pah, avin anan tana anih pah tulah kenam dahin katé' nah ika' ilau ket im kani té' usun tana nih ji iung urip ka'. 18Uket uleng dahin uro' nguleng seng nei té' luma' ka', dahin tuvuh-tuvuh té' tana aleng jadi' kanem. 19Ateng umah ka' musang ika' ilau ket im kani, ateng ka' tei uli balui tana la'an, avin men tana kah pa'un Kui na ika', adang uli ha' pup tana kah ika' lahuh.”
20Adam#3:20 ADAM Halem daho' “Adam” atih, iha' tih “kelunan”. anan na aran doh na' Hawa, avin iha' nah aleng hinan kelunan lim-lim. 21Tuhan Allah ala nah anit tulan en Na' na kanan dawa', dahin ma'uk na' men Adam dawa' Hawa doh na'.
Tuhan muga Adam dawa' Hawa men lida Eden
22 #
K Tula 22:14
Ken Tuhan Allah pah la'an, “Aleng lan na', kelunan nih uh jadi' awi piah Telo', jam marung aleng sayu dahin aleng ji'ek, bi kerei inih meng mun iha' metei usu na' té' bua urip atih, dahin kani na', ia meng nah iha' seng pa'en murip.” 23Avin ha' nunan Tuhan Allah muga dawa' men alem lida Eden, ja iha' nyadui té' tana aleng ngavan na' aring nei balui kelunan atih. 24Iha' muga dawa' men lida atih, dahin men béh matan dau pa'un té' lida Eden anan en Na' nei nah kuri-kuri meliket kerub#3:24 MELIKET KERUB Anih ji na'an meliket aleng petula aren Allah, dahin aleng bara Allah té' té' ngavan atih. paget malat aleng té' apui aleng ngelat pa'en, ja pian iung bua urip anan.
Zur Zeit ausgewählt:
ARING KELESING 3: TDK1990
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Bible in Today's Dahun Kayan Version © Bible Society of Malaysia, 1990.
