Лука 18

(Мт 24:23-51)

Бэлбэһэн эхэнэр болон зарга шиидхэгшэ тухай һургаалта үгэ

1Һанаа үнөөндөө дарагдаһанай хэрэггүй, саг үргэлжэ Бурхандаа зальбаржа ябаха ёһотой гэжэ ойлгуулхын тула Иисүүс иимэ һургаалта үгэ шабинартаа хөөрэбэ:

2– Нэгэ хотодо зарга шиидхэгшэ ажаһуугаа һэн ха. Тэрэ Бурханһаашье айдаггүй, хүнүүдһээшье эшэдэг гайхадаггүй бэлэй. 3Тус хотын нэгэ бэлбэһэн эхэнэр тэрэ заргашада ерэжэ: «Намда туһалыт, заргыемни зүбөөр шиидхэжэ үгыт!» – гэдэг гэлэй. 4Заргаша туһалха дурагүй байжа, нилээд удаан саг үнгэргэбэ. «Би Бурханһааш айдаггүйб, хүнһөөшье эшэдэг гайхадаггүйб. 5Зүгөөр намайе энэ эхэнэрэй ходол хашараажа байхагүйнь тула туһалха болоо хаб. Тиигээгүй һаамни, энэшни бүри голдомни орохол!» – гэжэ һүүлэй һүүлдэ бодобо.

6Хуурмаг заргашын хэлээшые хаража бодожо үзыт. 7Тэрэнэй тиигэжэ байхадань, Бурхан шэлэжэ абаһан зонойгоо үдэр һүнигүй туһаламжа гуйхадань, бүришье һайнаар харгалзаха хамгаалха бэшэ гү? Тэдэндээ анхаралаа табиха бэшэ гү? 8Бурхан тэдэнэй хэрэгүүдые үнэн зүб руунь түргөөр шиидхэн, туһалха гэжэ танда хэлэнэб. Теэд Хүн түрэлхитэнэй Хүбүүнэй ерэхэдэ, газар дээрэ тиимэ һүзэгтэй хүн байха гү?

Фарисей ба алба татааша тухай һургаалта үгэ

9Өөһэд тухайгаа Бурханай эрхэ мэдэлые дүүргэнэбди гэжэ тоолоод, бусадые доромжолдог зарим хүнүүдтэ Иисүүс иимэ һургаалта үгэ хөөрэбэ:

10– Хоёр хүн мүргэхэеэ Һүмэ руу оробо ха. Нэгэниинь фарисей, нүгөөдэхинь алба татааша байгаа. 11Фарисейнь досоогоо иигэжэ зальбарба: «Бурхан, Танда ехэ баяр баясхалан хүргэнэб! Би болбол эд зөөридэ шуналтай, хуурмаг, забхай бусад зондо адли бэшэб, мүн тээ тэндэ зогсоһон алба татаашадашье адли бэшэб. 12Долоон хоногтоо хоёр дахин масагладагби, олзынгоо арбанай нэгэ хубиие Тандаа үргэдэгби». 13Харин тээ холохоно зогсоһон алба татаашань нюдэеэ тэнгэри өөдэ шэглүүлхэеэшье зүрхэлбэгүй, харин үбсүүгээ шаажа байгаад: «Бурхан, нүгэлтэ намайе үршөөн хайрлыт!» – гэжэ зальбарба. 14Алба татааша фарисей хоёрой гэртээ харихадань, Бурхан тэдэ хоёрһоо алба татаашыень сагааруулаа гэжэ танда хэлэхэ байнаб. Өөрыгөө дээгүүр абхуулһан хүн доошоо даруулагдаха, харин даруу доогуур хүн дээшээ үргэгдэхэ бшуу.

Иисүүс үхибүүдые адистаа хүртөөнэ

15Зарим хүнүүд үхибүүдээ адиста хүртүүлхэеэ Иисүүстэ асарба. Шабинарынь тэдэниие хараад, багшадаа ойртуулбагүй. 16Харин Иисүүс үхибүүдые Өөртөө дуудажа, шабинартаа хэлэбэ:

– Үхибүүдые наашань табигты, Намда ерэхэдэнь һаалта бү хэгты. Иимэ зон Бурханай хаан түрын мэдэлдэ юм. 17Эдэ үхибүүд мэтээр Бурханай хаан орониие хүлеэн абаагүй хүн тэндэ хэзээшье орожо шадахагүй гэжэ баталан хэлэнэб.

Баян, мүн үнэ сэнтэй хүн

18– Эрхим багша! Мүнхын амидаралда хүртэхын тула би юу хэхэ ёһотойбиб? – гэжэ нэгэ дарга Иисүүсһээ һураба. 19Иисүүс тэрээндэ хэлэбэ:

– Юундэ Намайе эрхим гэбэш? Имагтал Бурхан эрхим гээшэ. 20«Ханидаа бү урба, бү ала, хулгай бү хэ, бусад тухай худал юумэ бү хэлэ, эхэ эсэгэеэ хүндэлэ» гэһэн Бурханай захяа заабаринуудые мэдэхэ ха юмши, – гэбэ.

21– Эдэ захяа заабаринуудые бултыень би эдир наһанһаа сахижа ябадаг хүнби, – гэжэ нүгөөдэхинь харюусаба. 22Энэ харюуень дуулаад, Иисүүс тэрээндэ хэлэбэ:

– Үшөөл нэгэ юумэн шамда дутана: зөөри зөөшэеэ бултыень худалдаад, мүнгыень үгытэйшүүлдэ хубаажа үгэ, тиигээ һаа, тэнгэри дээрэ баялиг зөөритэй болохош. Тиигээд Намда ерэжэ, хажуудамни ябаарай.

23Иисүүсэй хэлэһые дуулаад, нүгөөдэхинь ехэ һанаата болобо, юундэб гэхэдэ, ехэ баян хүн байгаа бшуу.

24Тэрэнэй гашуудал ойлгоод, Иисүүс хэлэбэ:

– Баян хүнүүдэй Бурханай хаан орондо орохонь бэрхэтэйл байха даа. 25Баян хүнэй Бурханай хаан орондо орохоһоонь бэлээр зүүнэй һүбөөр тэмээн ороод гарахал.

26– Тиигэхэдээ хэн абарагдаха аргатайб? – гэжэ шагнажа байгшад Иисүүсһээ асууба.

27– Хүнэй хэжэ шадахагүй юумэ Бурхан хэхэ аргатай, – гэжэ Иисүүс харюусаба.

28– Харин бидэ яахабибди? Бидэ хамаг юумэеэ орхёод, Таниие дахаабди, – гэжэ Пётр хэлэбэ.

29– Тиимэ даа, Бурханай хаан орондо орохын тула гэр бараагаа, аба эжыгээ, аха дүүнэрээ, эгэшэ дүүнэрээ, һамга үхибүүдээ орхиһон хүн бүхэн 30энэ наһандаа хэдэ дахин ехэ юумэндэ хүртэхэ, ерээдүйн үедэ мүнхэ наһа наһалха гэжэ үнэниие хэлэнэб, – гэжэ Иисүүс харюусаба.

Иисүүс үхэхэ тухайгаа гурбадахияа хэлэнэ

31Арбан хоёр ойрын шабинараа хажуу тээшэнь абаашаад, Иисүүс иигэжэ хэлэбэ:

– Мүнөө бидэ Иерусалим орохомнай. Эндэ Хүн түрэлхитэнэй Хүбүүн тухай лүндэншэдэй бэшэһэн бүхы хэрэгүүд бэелхэ. 32Хүн түрэлхитэнэй Хүбүүниие хариин зоной гарта тушааха, тэдэнь Тэрэниие баһаха, доромжолхо, нёлбохо, 33үшөө сохихо, хожомынь алаха. Зүгөөр Хүбүүн гурбадахи үдэртөө амидырха.

34Шабинарынь хэлээшыень оройдоо ойлгобогүй. Үгынь удха орёо далда байжа, юуншье тухай багшынгаа хэлэһыень ойлгожо шадабагүй.

Иисүүс һохор гуйраншые эдэгээбэ

35Иисүүсэй Ерихоондо дүтэлхэдэнь, харгын хажууда нэгэ һохор хүн гуйраншалжа һууба. 36Хажуугаарнь хүнүүдэй ябахые дуулаад:

– Энэ юун зон бэ? – гэжэ һураба.

37– Назаредэй Иисүүс ябана, – гэжэ тэрээндэ дуулгаба. 38Тиихэдэнь һохор хүн:

– Давидай үри һадаһан Иисүүс, намайе үршөөжэ хайрлыт! – гэжэ хашхарба. 39Иисүүсэй урда ябаһан хүнүүд абяагүй боло гэжэ тэрэ һохорые зандарба, теэд тэрэнь:

– Давидай үри һадаһан Иисүүс, намайе үршөөжэ хайрлыт! – гэжэ бүри шангаар хашхарба. 40Тиихэдэнь Иисүүс тогтожо:

– Тэрэниие Намда асарагты! – гэбэ. Тэрэ һохорой Иисүүсэй ойро ерэхэдэнь: 41– Шамда юу хэжэ туһалхабиб? – гэжэ Иисүүс асууба.

– Ай, Эзэн! Намайе харадаг болгыт даа! – гэжэ тэрэ гуйгаа хаш.

42– Хара даа! Этигэлшни шамайе абараа, – гэжэ Иисүүс тэрээндэ хэлэбэ. 43Һохор хүниинь тэрэ дороо харадаг боложо, Бурханиие алдаршуулан, Иисүүсэй хойноһоо ябалсаба. Һохор хүнэй хараатай болохые хараһан бүхы зон Бурханиие магтан алдаршуулба.

Zur Zeit ausgewählt:

Лука 18: BurBBL2024

Markierung

Kopieren