Лука 19

(Мт 20:29-34; Мк 10:46-52)

Иисүүс Закхей хоёр

1Иисүүс Ерихоон хото ороод, гудамжаар ябаа. 2Тэрэ хотодо алба татагшадай дарга Закхей гэжэ ехэ баян хүн ажаһуугаа. 3Тэрэ Иисүүсые хэн юм ааб гэжэ харахаяа ехэтэ хүсэжэ, набтар бэетэй байһан дээрэһээ хүн зоной араһаа яашье хаража ядаба. 4Закхей баян гүйдэлөөр зоной урда ороод, һалаархуу модондо абиржа гараба. Иисүүс энэ харгыгаар лэ хажуугаарнь гараха байгаа. 5Иисүүс хажуугаарнь үнгэрхэдөө, өөдөө хаража:

– Закхей, модонһоо түргөөр буу! Би мүнөө танайда орохо ёһотойб, – гэбэ. 6Закхей тэрэ дороо модонһоо буужа, ехэл баяртайгаар Иисүүсые гэртээ оруулжа хүндэлбэ. 7Тиихэдэнь зон булта:

– Иисүүс нүгэлтэй хүнэйдэ орожо айлшалхань гээшэ гү? – гэжэ дураа гутаба.

8– Эзэн аа! Би хахад зөөриеэ үгытэйшүүлдэ хубаажа үгэхэм. Хэрбээ зарим хүнүүдһээ татари буруу нэхэжэ абаһан байгаа һаа, тэрэнээ дүрбэ нугалан бусаахаб, – гэжэ Закхей Иисүүсэй урда зогсон хэлэбэ.

9– Шишье Абраһаамай жэнхэни үри һадаһан байнаш. Мүнөөдэр шинии гэр бүлэ абарагдаба. 10Хүн түрэлхитэнэй Хүбүүн хосорһон хүнүүдые бэдэржэ абархын тула ерээ юм, – гэжэ Иисүүс тэрээндэ хэлэбэ.

Арбан зараса тухай һургаалта үгэ

11Иисүүс үшөө нэгэ һургаалта үгэ шагнажа байһан зондо хөөрэбэ. Тэрэ Иерусалимда дүтэ ерэшэнхэй байгаа, тиимэһээ хүнүүд Бурханай хаан түрэ һаядаа оршохо гэжэ һанажа байгаа һэн. 12Иисүүс хөөрэбэ:

– Нэгэ дээгүүр уг изагууртан хаан шэрээ эзэлхэ эрхэдэ хүртэжэ ерэхын тулада холын орон худар мордобо ха. 13Ябаха дээрээ арбан барлагуудаа дуудаад, хүн бүхэндэнь мүнгэ үгэжэ: «Минии бусажа ерэтэр энээниие мүнгэнэй эрьесэдэ оруулжа байгаарайгты», – гээ һэн. 14Харин албата зониинь тэрээниие үзэн ядадаг ушарһаа: «Энэ хүниие хаанаар табиха дурагүйбди», – гэжэ хэлэхыень элшэн сайдые хойноһоонь эльгээбэ гэхэ. 15Хаан шэрээ эзэлхэ эрхэтэй болоһон хаан бусажа ерэһээр мүнгэ үгэһэн барлагуудаа дуудажа, хэн хэды шэнээн олзо олооб гэжэ һонирхобо. 16Түрүүшынь барлаг ерэжэ: «Эзэмни, үгэһэн мүнгыетнай арба дахин ехэ болгооб», – гэжэ хэлэбэ. 17«Һайнаар ашаглабаш, бэрхэ барлаг байнаш. Багахан юумэндэ үнэн сэхэ байһанайш түлөө шамайе арбан хотын захирагшаар табинаб», – гэжэ эзэн хаан хэлэбэ. 18Хоёрдохи барлагынь ерэжэ: «Эзэмни, үгэһэн мүнгыетнай таба дахин ехэ болгооб», – гэбэ. 19«Ши табан хото зонхилжо байхаш», – гэжэ эзэниинь хэлэбэ. 20Удаадахи барлагынь ерэжэ: «Эзэмни, танай үгэһэн энэ мүнгэ бүдтэ орёогоод, наринаар хадагалжа байгааб. 21Шэрүүн хүн хадатнай танһаа айгааб. Та өөрын бэшэ юумэ абадаг, таряагүй байһан газарһаа хуряадагта», – гэжэ хэлэбэ. 22Эзэниинь тэрээндэ хэлэбэ: «Хара мэхэтэй барлаг, хэлэһэн үгыншни ёһоор шамайе хэһээхэб! Өөрын бэшэ юумэ абадаг, өөрөө таряагүй ургаса хададаг шэрүүн хүн гэжэ намайе мэдэжэ байгааш. 23Үгэһэн мүнгыем юундэ эрьесэдэ оруулаагүйбши? Тиигэбэл би бусажа ерэхэдээ мүнгэеэ түрсэтэйгөөр абаха бэлэйб». 24Тиигээд хажуудань байһан зондо хандажа: «Энээнһээ мүнгыень абаад, арба дахин ехэ болгоһон хүндэ үгэгты», – гэбэ. 25«Эзэмнай, теэд тэрэтнай ехэ мүнгэтэйл», – гэжэ тэдэнь хэлэбэ. 26«Юумэтэй хүндэ үшөө ехэ юумэн үгтэхэ. Юумэгүй байһан хүнһөө һүүлшын юумэниинь абтаха гэжэ танда хэлэнэб. 27Намайе хаан болгохо дурагүй байһан дайсадыемни асаржа, хараһаар байтарни хюдажа алагты», – гэжэ эзэн хэлэбэ.

Иисүүс Иерусалим ороно

28Һургаалта үгэнүүдээ хөөрөөд, Иисүүс саашаа, Иерусалим тээшэ ябаба. 29Элеон хадын хаяада оршодог Бэтпагээ ба Бэтаани тосхонуудта дүтэлөөд, Тэрэ хоёр шабияа түрүүлэн эльгээжэ:

30– Урдамнай байгааша тосхон ошоод, тэрэнэй захада хүн амитанай оройдоо унаагүй нэгэ элжэгэнэй уяатай байхые харахат. Тэрэниие уяаһаань тайлаад, наашань хүтэлжэ асарагты. 31Хэрбээ хэн нэгэнэй: «Юундэ уяаһаань тайланабта?» – гэжэ асуугаа һаань: «Энэ элжэгэн Эзэндэ хэрэгтэй болоо», – гэжэ хэлээрэйгты, – гэжэ Иисүүс захиба.

32Шабинарынь ошоод, багшынгаа хэлэһэнэй ёһоор тэрэ элжэгэ олобо. 33Тэрэниие сэргэһээнь тайлажа байхадань:

– Таанад юундэ энэ элжэгэ сэргэһээнь тайланабта? – гэжэ эзэниинь һураба ха.

34– Манай Эзэндэ хэрэгтэй болоо, – гэжэ шабинарынь харюусаба. 35Тиигээд тэрэ элжэгэ Иисүүстэ асаржа, нюрган дээрэнь хубсаһаяа дэбдеэд, багшаяа унуулба. 36Иисүүсэй элжэгэ унаад ябахада, зон ябаха харгы дээрэнь хубсаһаяа дэбдибэ.

37Иисүүсэй Элеон хадаһаа бууха замдаа ябахадань, олон тоото шабинарынь булта харуулһан, үзэһэн гайхалтай хэрэгүүдэй түлөө Бурхан багшадаа магтаал соло дуудаба:

38– Эзэнэй нэрээр заларан ерэһэн

Хаан үршөөл хайратай байһай!

Тэнгэридэ амгалан байдал оршоһой,

Бурхан алдаршахань болтогой!

– гэжэ шанга шангаар хашхаралдаба.

39– Багша аа, эдэ шабинартаа абяагүй болохыень захирыт! – гэжэ зоной дундаһаа фарисейнүүдэй зариман Иисүүстэ хандаба.

40– Шабинараймни абяагүй болоо һаа, харгы дээрэхи шулуунууд хашхаралдаха, – гэжэ Иисүүс тэдээндэ харюусаба.

Иисүүс Иерусалимай зон тухай шанална

41Иисүүс Иерусалимда ойртожо, хотын харагдахада, хүн зонииень хайрлаһандаа бархиржа:

42– Хотын зон, амгалан байдалда юун хүргэхэб гэжэ энэ үдэр ойлгодог һайт! Теэд тэрэтнай мүнөө танай нюдэнһөө далда байна даа. 43Хожом нэгэтэ дайсадтнай добтолжо, хотыетнай тала талаһаань бүһэлэн, газар хүреэгөөр хүреэлхэ, 44тиигээд өөһэдыетнай, үри хүүгэдыетнай хюдажа, хотыетнай һандаргажа, үнэһэн тоборог болгохо. Юундэб гэхэдэ, Бурханай шамайе абарха гэжэ ерэһэн саг мэдэнгүй бшууш, – гэжэ хэлэбэ.

Иисүүс Һүмэ соо

45Һүмэдэ орожо, Иисүүс тэндэ хонжоо наймаа хэгшэдые, юумэ худалдажа абагшадые намнажа гаргахадаа:

46– Нангин Бэшэг соо Бурхан: «Минии гэр мүргэлэй гэр байха ёһотой», – гэжэ хэлэнэ. Харин таанад энэ гэрые дээрмэшэдэй шэбээлдэг үүр болгожорхёот! – гэжэ зэмэлбэ.

47Иисүүс үдэр бүри Һүмэ руу ерэжэ, һургаалаа номнодог байгаа. Түрүү санаартан, Хуули заадаг багшанар, ахамадууд хамтаржа, Иисүүсые алаха гэлсээ. 48Теэд бүхы арад зоной нэгэшье үгыень алдангүй Иисүүсэй һургаалые шагнадаг байхада, тэдэнэр яажаш ядаба.

Zur Zeit ausgewählt:

Лука 19: BurBBL2024

Markierung

Kopieren