मत्ति 4
4
उदादाङका थामेता इसुको जाच
(मर्कुस १:१२-१३; लुका ४:१-१३)
1इङकोन्हुअ्सो पुनित हाङसा मासानको राजा दियाबलससो #४:१ दियाबलस जाइहेङ दियाबलस बुङ दोअ्खे। इसुहेङ कुकरमता फासेपालिको भाअ्सिङ उदादाङका थामेता चुमपुन्हाहि।#हिब्रु २:१८; ४:१५ 2वा न्हेकुरि दिना रो न्हेकुरि दिलिमाथिकापा म्हितुपाङ हिकान्हुअ्सो म्हितुहि। 3कालाउ दियाबलस वाकोता लोतेङ दोअ्हि, “ना परमेस्वरको चान हिन्हा पानु इदोइ उन्ठुइगेलाइहेङ तोले जेनाको दोअ्तेङ हुकुम पि।” 4कालाउ बुङ इसु दोअ्हि, “धरमकिताबता एसापा लेखेन्हाका हि, द्याङ तोलेसो खिनिङ माको, कालाउ बुङ परमेस्वरको नुइसो ओल्हेका ए ए कथनहोइ सिन्हुखे।”#नियम ८:३
5कालाउ दियाबलस वासेहेङ पुनित पुरता चुमपुतेङ थानको तुपाता जाअ्पाहि 6रो वासेहेङ दोअ्हि, “ना परमेस्वरको चान हिना पानु, इतासो लेता धासे हाइदोनु धरमकिताबता इसिका लेखेका हि:
‘वा ताइको सादेलचरगेलाइको जिम्माता नासेहेङ प्यावा
रो नाङको खोकोइ माबोखेन्हाको दोअ्तेङ एम्बालाइ नासेहेङ खुरखुरताङ खोअ्तावा’”#ले ९१:११-१२
7इसु इङकोहेङ दोअ्हि, “लेखेन्हाका हि, ‘ना परमप्रभु ताइको परमेस्वरको जाच मापालि।’”#नियम ६:१६
8आरोङ दियाबलस इसुहेङ एलोङ हेन्जाङ झाउका आरदाङता चुमपुतेङ दुनियाको गोताङ सारभि रो इङकोको सामर्थ वासेहेङ तिम्पाहि 9रो वासेहेङ दोअ्हि, “ना तिर्हो थोतेङ कासेहेङ बाखिन्न्हा पानु, इदोइ गोताङ सामान का नासेहेङ प्याङका।” 10कालाउ इसु इङकोहेङ दोअ्हि, “दियाबलस, ना दुरे हाने! हाइदोनु धरमकिताबता लेखेका हि, ‘ना परमप्रभु ताइको परमेस्वरहेङ खिनिङ बाखिन रो वाको खिनिङ सेवा पा।’”#नियम ६:१३
11कालाउ दियाबलस इसुहेङ लाअ्तेङ हानेहि रो सादेलचरगेलाइ लोतेङ वाको सेवा सुसार पाहि।
इसु गालिलता पारचार पालि तेङका
(मर्कुस १:१४-१५; लुका ४:१४-१५)
12युहन्ना थुनाता परिका हि दोअ्का हिङतेङ इसु गालिलभारि हानेहि#मत्ति १४:३; मर्कुस ६:१७; लुका ३:१९-२० 13रो वा नासरत लाअ्तेङ कफर्नहुम पुरता हानितेङ इन्ता हिलि तेङहि। इदोइ पुर जबुलुन रो नप्तालिको माउजाता गालिल चावान्दिको काम्बेता हिघाहि।#युहन्ना २:१२ 14एसापा आगाधुइका यसैयाको दोअ्का इदोइ कथन एसापा पोङघाहि:
15“हिङसु, यर्दन झोरा ओदोइपार, गालिल चावान्दिको भेर्पा जबुलुनको मुलुक रो नप्तालिको मुलुकको द्याङगेलाइ, गालिल माउजाता हिका बोजात्यागेलाइ,
16कितिकितिकाता हिका द्याङगेलाइ एलोङ बाराका जोल्का तिङका हि।
सिलि गोइका काथाता थितेङ हिकालाइर्हुता एलोङ जोल्का चिल्काका हि।”#यसैया ९:१-२
17इङकोङ पहरसो पारचार पातेङ इसु दोअ्लि तेङहि, “कुकरम पालि लाअ्का मन पासु, हाइदोनु सादेलको सारभि भेर्पाङ लोका हि।”#मत्ति ३:२
इसुको लाङ चात्यागेलाइ
(मर्कुस १:१६-२०; लुका ५:१-११)
18एनि गालिल चावान्दिको काम्बेता हिगिल्लाउ इसु पत्रुस दोअ्का सिमोन रो वाको ओने अन्द्रियासहेङ तिङहि। न्हेमिङ ओनेहेङ चावान्दिता जाले थालतेङहिका तिङहि, हाइदोनु एम्बालाइ गोन्धि हिघाखे। 19इसु एम्बालाइहेङ दोअ्हि, “कासेहेङ पिताइसु, का नेलाइहेङ हाया माको, द्याङगेलाइहेङ काङकोता चुमाका बान्हायाङका।” 20कालाउ ओदोङघरि जाले लाअ्तेङ एम्बालाइ वासेहेङ पिताइहि।
21इन्तासो हानेकाहानेकाताङ वा भेनेङ न्हेमि ओने, याकुब रो युहन्नाहेङ दुसुहि। एम्बालाइ ताइको आबा जब्दियादोफा नाउता योमतेङ ताइको जाले जोदोङघाखे। इसु एम्बालाइहेङ बुङ काइहि। 22कालाउ एम्बालाइ उदोङघरि आबाहेङ नाउताङ लाअ्तेङ वासेहेङ पिताइहि।
इसुहेङ हेन्जाङ द्याङगेलाइ पिताइका
(लुका ६:१७-१९)
23कालाउ इसु एम्बालाइको कचहरिसाअ्गेलाइता धिरपातेङ, सादेलको सारभिको रेम्काबानाल हिङपातेङ रो द्याङगेलाइता हिका गोताङ खाल्को रोगगेलाइ एल्पातेङ गालिलको गोताङ थामेगेलाइता घुराइगिल्हि।#मत्ति ९:३५; मर्कुस १:३९ 24एन्सा जेङलाउ वाको मिङ गालिल भेर्पा हिका सिरिया मुलुकको गोताङ थामेगेलाइता चारचाराइहि। कालाउ द्याङगेलाइ गोताङ खालको रोगाइका रो बेथासो सान्ताइका मासाअ्धेकालाइहेङ इसुकोता चुमाहि। एम्बालाइता मासान खोअ्का, झाकालोङका रो गाहिलि जेङका हिघाखे। वा एम्बालाइ झाराङहेङ एल्पाहि। 25कालाउ गालिल माउजा, ते पुर दोअ्का डेकापोलिस, यरुसलेम पुर, यहुदिया माउजा रो यर्दन झोराको ओदोइपारसो लोका हेन्जाङ द्याङगेलाइ वासेहेङ पिताइहि।
Zur Zeit ausgewählt:
मत्ति 4: DHIM
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2024 (Active), Wycliffe Bible Translators, Inc. All rights reserved.
