मत्ति 2
2
नुहेँसो दरसिगेलाइ इसुहेङ खाङलि लोका
1राजा हेरोदको पहरता यहुदिया माउजाको बेथलेहेम देराता इसुको जोलोम जेङकान्हुअ्सो, नुहेँको दरसिगेलाइ यरुसलेम पुरता लोहि। 2एम्बालाइ द्याङगेलाइहेङ हिअ्हि, “यहुदिगेलाइको राजा जेङतेङ जोलोम जेङका हिता हि? हाइदोनु केलाइ वाको फुरु ल्होका तिङन्हाहि रो केलाइ वासेहेङ बाखिन्लि लोका हिन्हाहि।”
3जेलाउ राजा हेरोद इदोइ हिङहि, वाको मन आसान्ति जेङहि रो यरुसलेमको झाराङ द्याङगेलाइको मन बुङ आसान्ति जेङहि। 4कालाउ वा झाराङ मुल धामिगेलाइ रो धरम मास्टरगेलाइहेङ जोम्पातेङ, “ख्रिस्टको जोलोम हिता ज्याङ?” दोअ्तेङ हिअ्हि। 5एम्बालाइ वासेहेङ दोअ्हि, “यहुदिया माउजाको बेथलेहेम देराता। हाइदोनु परमेस्वर पाहासो धुइका धरमकिताबता इस्का लेखिका हि:
6‘ओइ, यहुदा माउजाको बेथलेहेम देराको द्याङगेलाइ,
ना यहुदाको हाकिमगेलाइको माझाता हासुखान्तेङ म्हुइका मान्थुन्हा,
हाइदोनु नासो एअ्मि हाकिम ओल्हितेङ ल्वावा,
जाइ काङको द्याङ इस्राएलहेङ खानावा।’”#मिका ५:२
7इदोइ हिङतेङ हेरोद इङको दरसिगेलाइहेङ लिअ्ता काइतेङ फुरु हिदोइ पहर देखाल पिका हिघाहि इङको एम्बालाइसो गिहि। 8इङकोन्हुअ्सो वा एम्बालाइहेङ एसा दोअ्तेङ बेथलेहेमता दिङगिल्हि, “हानिसु, इङको जामालहेङ रेम्फा भोसु। वासेहेङ निङतेङसाङ कासेहेङ बानाल पिसु रो का बुङ हानितेङ वासेहेङ बाखिनाङका।”
9कालाउ राजाको काथा हिङतेङ एम्बालाइ ताइको दामा लाअ्हि। जेदोङ फुरु एम्बालाइ ल्होका तिङका हिघाखे, इङको फुरु एम्बालाइको आगाआगा हानिहि रो जामाल हिका थामेता थुकातेङ इङको फुरु इन्ताङ आरेहि।
10जेलाउ एम्बालाइ इङको फुरु तिङहि, कालाउ एम्बालाइ हेन्जाङ लेङचाहिँ। 11कालाउ साअ्लिअ्ता दुल्तेङ एम्बालाइ जामालहेङ वाको आमाइ मरियम दोसा तिङहि रो तिर्हो थोतेङ वासेहेङ बाखिन्हि। कालाउ ताइको बाकस हेतेङ वासेहेङ सोना, मालामालाका धुमाना रो जाङका आतर ओल्हिपातेङ पिहि।
12न्हुअ्सो हेरोदकोता घुरितेङ मान्हेसु दोअ्का सोपोन्दाता चेतानि निङतेङ एम्बालाइ भेनेङ दामा जेङतेङ ताइको मुलुकता घुरिहि।
योसेफ ताइको खाल चुमपुतेङ मिस्रता खाअ्का
13दरसिगेलाइ हानिकान्हुसो, परमप्रभुको एलोङ स्वरगदुत सोपोन्दाता योसेफकोता देखाल पिहि रो इङको एसा दोअ्हि, “ल्हो, आतुइका जामाल रो वाको आमाइहेङ दोसा चुमतेङ मिस्र मुलुकता खाअ् रो नासेहेङ का मादोअ्पाधाउ इन्ताङ हि। हाइपानु, हेरोद जामालहेङ सेअ्लि भोलि तेङका हि।”
14कालाउ वा ल्होतेङ जामाल रो वाको आमाइहेङ दोसा चुमतेङ मिस्र मुलुकता न्हिसिङता दोङ हानिहि 15कालाउ हेरोद मासिपाधाउ इन्ताङ हि। एसापा परमेस्वर पाहासो धुइका परमप्रभुको दोअ्का बचन पोङघाहि, “का ताइको चानहेङ मिस्र मुलुकसो काइघा।”#होसे ११:१
हेरोद जामालाइहेङ सेअ्लि लागाइका
16जेलाउ दरसिगेलाइ ताइमिहेङ जाल पाका काथा हेरोद गिहि कालाउ वा खुब चेरताम्पाहि। कालाउ दरसिगेलाइसो गिका पहरआन्सार बेथलेहेम देरा रो इङको कोरबितिङता हिका न्हे बाअ्सार रो इङकोखान्तेङ लेताको गोताङ जामालाइहेङ सेअ्लि लागाइहि। 17कालाउ परमेस्वर पाहासो धुइका यरमियाको धुइका इदोइ बचन पोङघाहि:
18“रामाता एलोङ गाला हिङहि,
घोनोघोपा खारका रो बिलापको बारका गाला,
राहेल ताइको जामालाइको भाअ्सिङ खारतेङ हिका,
वासेहेङ हासु बुङ लाइपालि मादोहि,
हाइपानु वाको जामालाइ एला मान्थु।”#यरमिया ३१:१५
19कालाउ हेरोद सिकान्हुसो परमप्रभुको एलोङ स्वरगदुत सोपोन्दाता योसेफकोता मिस्रता देखाल पिहि रो एसा दोअ्हि, 20“ल्हो, जामाल रो वाको आमाइहेङ दोसा चुमतेङ इस्राएल मुलुकता हाने, हाइदोनु जामालहेङ सेअ्लि भोकालाइ सिलिदोहोइ।” 21वा ल्होतेङ जामाल रो वाको आमाइहेङ दोसा चुमतेङ इस्राएल मुलुकता घुरिहि।
22कालाउबुङ हेरोद सितेङ वाको थामेता वाको चान आरखिलाउस यहुदिया माउजाता राज पादोङखे दोअ्का हिङतेङ योसेफ इन्ता हानिलि थिहि रो सोपोन्दाता चेतानि निङतेङ वा गालिलको माउजाता हानिहि 23रो नासरत दोअ्का पुरता हि। एसापा परमेस्वर पाहासो धुइका “वासेहेङ नासरि दोअ्तावा” दोअ्का बचन पोङघाहि।#मरकुस १:२४; लुका २:३९; युहन्ना १:४५
Zur Zeit ausgewählt:
मत्ति 2: DHIM
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2025 by Nepal Bible Society and Wycliffe Bible Translators, Inc.
