Apostolu sira nia Istoria 9

Saulo sai Nai Jesus nia ema

(Apostolu sira nia Istoria 22:6-16; 26:12-18)

1Iha tempu nee, Saulo ameasa nafatin ema sira nebee tuir Jesus. Nia tuur la metin atu oho sira. Nunee nia baa iha nai-lulik Judeu nia boot, 2hodi husu surat rekomendasaun atu foo iha responsavel uma kreda Judeu sira iha sidade Damasku nebaa. Ho surat nee nia husu lisensa, se nia hasoru ema nebee tuir Jesus nia Dalan, mane ka feto, nia bele kaer i futu sira, i lori mai Jerusalém.

3Simu tiha surat nee, Saulo ho nia kolega sira baa ona Damasku. Besik ona sidade nee, derepenti naroman ida hosi lalehan leno ba Saulo. 4Nia monu kedas ba rai, i nia rona lian ida dehan, “Saulo! Saulo! Tansaa o halo terus Hau nunee?”

5Saulo husu, “Nai, Ita Boot nee see?”

Lian nee hataan dehan, “Hau mak Jesus, ida nebee o halo terus teb-tebes. 6Agora, hadeer hodi baa sidade ona. Depois mak Hau foo hatene ba o saida mak o tenki halo.”

7Nia kolega sira mos rona lian nee, maibee sira la haree ema ida. Sira nia hanoin hotu lakon too sira la koalia buat ida.

8I Saulo hamriik, loke matan, maibee la haree buat ida. Entaun sira kaer nia liman hodi ajuda nia lao too iha Damasku. 9Durante loron tolu nia matan delek, i nia mos la haan-hemu buat ida.

10Iha Damasku, iha Nai Jesus nia ema ida naran Ananias. Nai Maromak hatudu hanesan mehi ida ba nia, hodi dehan, “Ananias!”

Nia hataan, “Nai.”

11Nai Jesus hatete, “O baa iha Judas nia uma, iha estrada ida naran Loos. O husu ema ida naran Saulo, hosi sidade Tarsu. Agora nia halo hela orasaun. 12Hau mos foo ona hanesan mehi ida ba nia dehan, ema ida naran Ananias sei baa hasoru nia hodi tau liman ba nia, atu nia bele haree fila fali.”

13Ananias hataan dehan, “Maibee Nai, ami rona ona ema konta baa-mai dehan, ema nee sempre halo terus Ita Boot nia ema sira iha Jerusalém. 14Agora ami rona tan dehan nai-lulik Judeu nia ulun sira foo poder ba nia hodi kaer ema hotu nebee tuir Ita Boot.”

15Maibee Nai Jesus koalia tan, “O baa deit! Tanba Hau hili ona nia hodi serbii Hau, i lori Hau nia Novidade Diak baa foo ba sira nebee laos ema Judeu, foo ba liurai sira, ho mos ba ema Judeu sira.#9:15:Ema ‘Judeu’ bele mos bolu ema ‘Israel’. 16Hau sei hatudu ba nia katak, nia sei terus barak tanba nia tuir Hau.”

17Nunee Ananias baa. Nia tama liu ba uma laran, i tau liman ba Saulo hodi dehan, “Irmaun Saulo, Nai Jesus, ida nebee hatudu Aan ba irmaun iha dalan klaran, Nia mak haruka hau mai halo orasaun ba ita, atu ita bele haree fila fali, i atu Espiritu Santu domina ita.”

18Momentu nee kedas, buat ida hanesan ikan kulit monu sai hosi Saulo nia matan, i nia haree fila fali. Nia hamriik, i sira sarani kedas nia. 19aDepois nia foin haan ho hemu, i nia isin forti fila fali.

Saulo foo sai Novidade Diak iha sidade Damasku

19bSaulo sei hela loron ida-rua ho Nai Jesus nia ema sira iha Damasku. 20Nia baa kedas tama-sai ema Judeu sira nia uma kreda, hodi foo sai ba sira dehan, “Jesus nee Nai Maromak nia Oan duni.”

21Sira hotu admira, hodi koalia ba malu dehan, “Ema nee mak halo rahun Nai Jesus nia ema sira iha Jerusalém, loos ka lae?! Agora nia mai iha nee atu kaer sarani sira lori ba nai-lulik nia ulun sira!”

22Maibee Nai Maromak foo poder ba Saulo atu nia bele hatudu loloos katak, Jesus mak Kristu, Ema ida nebee Nai Maromak hili ona. Nunee la iha tan ema ida atu hataan.

23Depois ema Judeu balu kombina malu atu oho Saulo. 24Maibee planu aat nee mos too iha Saulo nia tilun. Ema hein loron-kalan iha portaun sidade nian, atu oho nia. 25Maibee iha kalan ida, Saulo nia kolega balu mai lori tiha nia, i sira hatuun nia ho bote ida, hosi muru sidade nian. Ho nunee, Saulo halai sai hosi sidade Damasku.#2 Korintu 11:32-33

Saulo baa iha Jerusalém

26Tuir mai, Saulo fila baa Jerusalém. Too iha nebaa, nia hakarak baa tama hamutuk ho Nai Jesus nia ema sira. Maibee sira hotu tauk nia, tanba sira hanoin dehan nia halo finji hanesan ema sarani, para hodi kaer sira. 27Maibee ema ida naran Barnabé lori Saulo baa aprezenta ba Nai Jesus nia apostolu sira. Barnabé konta ba sira dehan, Saulo hasoru malu tiha ona ho Nai Jesus iha dalan, i Nai Jesus koalia rasik ho nia. Barnabé mos dehan, Saulo brani hodi Nai Jesus nia Naran foo sai Novidade Diak ba ema iha Damasku.

28Rona nunee, foin sira hotu simu Saulo, i nia hela hamutuk ho sira iha sidade Jerusalém. Nia brani foo sai Nai Jesus nia Novidade Diak ba ema see-see deit. 29Nia koalia ho diskuti malu ho ema Judeu sira nebee koalia lian Gregu. Maibee sira la simu, i sira buka meius atu oho nia. 30Bainhira sarani sira rona nunee, sira lori tiha nia ba iha sidade Sezareia. Depois sira haruka nia fila fali ba sidade Tarsu.

31Liu tiha nee, Nai Jesus nia povu iha provinsia Judeia, iha provinsia Galileia ho provinsia Samaria moris ho hakmatek. Sira amenta barak ba bebeik, i moris hamtauk ba Nai Maromak. Tanba Nai Maromak nia Espiritu Santu mak hametin sira nia laran.

Pedro kura mane ida iha aldeia Lida

32Iha tempu nee, Pedro lao lemo rai hodi baa vizita sarani sira. Iha loron ida, nia baa vizita sira nebee hela iha aldeia Lida. 33Iha nebaa nia hetan mane ida naran Eneias. Nia ain aat, lao la diak, toba deit iha biti tinan walu ona.

34Pedro dehan ba nia, “Eneias, agora duni, Nai Jesus Kristu kura o. Hamriik ona! Aruma o nia kama ba!”

I nia hamriik kedas. 35Bainhira ema hotu iha aldeia Lida ho aldeia Sarona haree Eneias diak tiha ona, sira mos fiar ba Nai Jesus.

Pedro halo Tabita moris fali

36Iha senhora ida naran Tabita hela iha sidade Jope. (Nia naran ho lian Gregu bolu Dorkas, nee dehan katak, ‘bibi rusa’). Nia fiar ba Nai Jesus. I nia sempre halo buat diak ba ema hotu, i sempre foo ezmola ba ema kiak sira. 37Iha tempu nee, Tabita moras, depois nia mate. Sira foo hariis tiha nia mate isin, i lori baa hatoba iha kuartu ida iha andar leten. 38Sarani sira rona dehan Pedro iha Lida, laduun dook hosi Jope. Nunee sira haruka ema nain rua baa bolu nia dehan, “Senhor, favor baa lalais Jope.”

39Pedro tuir kedas sira. Too iha nebaa, nia sae liu ba iha kuartu nebee Tabita nia mate isin rai baa. Iha kuartu nee, feto faluk barak tanis lelir, hodi hatudu ba Pedro sira nia vestidu ho sira nia ropa seluk tan nebee Dorkas suku foo ba sira bainhira nia sei moris.

40Pedro haruka sira hotu sai hosi kuartu nee, i nia hakneak hodi halo orasaun. Hotu tiha, nia see oin ba mate nee hodi hatete, “Tabita, hadeer ona!” Derepenti deit, senhora nee loke nia matan. Bainhira nia haree Pedro, nia hadeer baa tuur kedas. 41I Pedro kaer nia liman hodi foti nia hamriik, depois nia bolu feto faluk sira ho tan sarani sira seluk hodi entrega Dorkas nebee moris fali ba sira.

42Novidade nee namkari lemo-lemo iha sidade Jope laran tomak, too ema barak fiar ba Nai Jesus. 43Pedro hela loron hira tan iha Jope, ho ema ida naran Simão. Simão nia serbisu mak hamoos animal nia kulit.

Zur Zeit ausgewählt:

Apostolu sira nia Istoria 9: BTDT

Markierung

Kopieren