Apostolu sira nia Istoria 10
10
Komandante tropas Roma ida naran Cornélio haruka bolu Pedro
1Iha sidade Sezareia iha militar Roma ida naran Cornélio. Nia komandante kompanhia hosi Itália. 2Nia ema ida ke adora ho hamtauk ba Maromak, i nia familia uma laran tomak mos hanesan. Nia sempre foo ajuda ho laran luak ba ema Judeu sira nebee kiak, i sempre halo orasaun ba Nai Maromak.
3Iha loron ida, besik tuku tolu lokraik, hanesan mehi, nia haree momoos Nai Maromak nia anju ida, mai bolu nia dehan, “Cornélio!”
4Nia hateke ba anju nee ho tauk teb-tebes. Nia husu, “Senhor, iha saida?”
Anju nee hataan, “Nai Maromak rona ona o nia orasaun, i Nia haksolok ho ajuda nebee o foo ba ema kiak sira. 5Nee duni, agora o haruka ema ba sidade Jope bolu ema ida naran Simão Pedro. 6Nia hela iha ema ida naran Simão nia uma besik tasi ibun. Ema nee serbisu hamoos animal nia kulit.”
7Bainhira anju nee baa tiha ona, Cornélio bolu nia ema nain rua ho nia soldadu ida nebee hamtauk ba Maromak. 8Cornélio hatete buat nee hotu ba sira, depois nia haruka sira ba Jope.
Pedro vizita Cornélio
9Aban fali, iha meiu-dia, Cornélio nia ema sira besik too ona iha Jope. Momentu nee, Pedro sae ba uma leten hodi halo orasaun.
10Nia sei halo hela orasaun, nia senti hamlaha i hakarak haan. Maibee ema sei tein hela hahaan, Nai Maromak hatudu hanesan mehi ida ba nia. 11Nia haree lalehan nakloke, i mosu buat ida hanesan lensol boot, nia rohan haat nee kesi hotu, tuun mai. 12Iha lensol laran, nia haree animal oi-oin. Iha animal ain haat, animal dolar, ho manu fuik oi-oin.
13Nia mos rona lian ida dehan, “Pedro, hamriik ona! Oho animal sira nee i haan baa!”
14Maibee Pedro hataan, “Nai, la bele! Hau nunka haan animal foer hanesan nee, nebee ami Judeu nia lei bandu.”
15Maibee lian nee hataan fali dehan, “Buat nebee Nai Maromak dehan bele haan ona, o la bele bandu tan.” 16Nee akontese dala tolu, depois lensol nee sae fali ba lalehan.
17Pedro sei hanoin hela atu buka hatene mehi nee dehan saida, Cornélio nia ema sira too iha Simão nia uma oin. 18Sira bolu hodi husu, “Ami buka ema ida naran Simão Pedro. Nia hela iha nee ka?”
19Pedro sei hanoin hela mehi nee dehan saida, Espiritu Santu foo hatene ba nia dehan, “Pedro, ema mai buka o.#10:19:Iha dokumentu Gregu balu dehan ‘ema nain tolu’, balu dehan ‘ema nain rua’, ho balu tan la dehan ema hira mak mai buka Pedro. 20O tuun baa tuir sira ona. La bele laran rurua tan, maski sira laos ema Judeu.#10:20:Tuir ema Judeu sira nia lisan, sira la bele liga ema nebee laos Judeu, saa tan tama iha sira nia uma. Tanba Hau mak haruka sira mai bolu o.”
21Entaun Pedro tuun baa hasoru sira, hodi dehan, “Hau mak nee, ida nebee imi buka. Tanba saa imi buka hau?”
22Sira hataan, “Komandante Cornélio mak haruka ami mai. Nia ema moris loos ho hamtauk ba Nai Maromak. Ema Judeu sira hotu respeita teb-tebes nia. Horiseik Nai Maromak nia anju mai haruka nia bolu senhor hodi ba iha nia uma, para nia bele rona senhor nia liafuan.”
23Depois Pedro husu ba sira atu toba lai kalan ida iha nebaa. Aban Pedro prepara aan hodi baa hamutuk ho sira. Sarani balu hosi Jope akompanha sira baa.
24Sira toba kalan ida iha dalan, depois iha aban fali sira too iha sidade Sezareia. Cornélio hein hela sira ona. Nia mos halibur nia familia ho nia belun diak sira hodi hein iha nebaa. 25Pedro too iha uma, Cornélio baa simu nia, i hakneak iha Pedro nia oin atu adora nia. 26Maibee Pedro foti nia hamriik hodi dehan, “Irmaun, hamriik tiha! La bele adora fali hau. Tanba hau ema hanesan mos ita.”
27Entaun Cornélio hamriik. I sira nain rua komesa koalia, hodi tama ba uma laran. Pedro haree ema barak hein hela nia. 28Nia koalia dehan, “Maun-alin sira, imi hatene ona, tuir ami Judeu nia lisan, ami la bele ransu hamutuk ho ema sira nebee laos Judeu, saa tan ba tama iha sira nia uma. Maibee Nai Maromak hatudu ona mai hau katak, hau la bele dehan ema ida foer ka la iha folin. Nee duni, hau la bele hakribit tan ema nebee laos Judeu. 29Nee mak momentu imi haruka bolu hau, hau mai kedas. Agora hatete, tanba saa mak imi bolu hau mai?”
30Cornélio hataan, “Hori baintolu, tuku tolu lokraik, hau halo hela orasaun iha hau nia uma. Derepenti mane ida hamriik iha hau nia oin. Nia hena nabilan loos. 31Nia dehan, ‘Nai Maromak rona ona o nia orasaun, i Nia haksolok ho ajuda nebee o foo ba ema kiak sira. 32Nee duni, agora o haruka ema ba sidade Jope bolu ema ida naran Simão Pedro. Nia hela iha Simão nia uma besik tasi ibun. Ema nee serbisu hamoos animal nia kulit.’ 33Nee mak hau haruka kedas ema baa bolu ita. Ami agradese teb-tebes tanba ita mai duni. Agora ami halibur hamutuk iha Nai Maromak nia oin hodi rona saida mak Nia haruka ita foo sai mai ami.”
Pedro foo sai Nai Jesus nia Novidade Diak ba ema nebee laos Judeu
34Pedro dehan, “Agora hau foin hatene katak Nai Maromak haree ema hotu-hotu hanesan. Nia la haree ema nee Judeu ka laos Judeu.#Deuteronomio 10:17 35Ema hosi suku nebee deit, se nia hamtauk ba Nai Maromak, i moris tuir Maromak nia hakarak, maka Nai Maromak simu nia. 36Imi hatene novidade nebee mak Nai Maromak foo sai ona ba ami ema Israel. Novidade Diak nee katak Nia haruka ona Jesus Kristu mai, hodi halo dame ema ho Nai Maromak. I Nia mak ema hotu-hotu nia Nai.
37Imi mos hatene ona saida mak akontese iha provinsia Judeia tomak, komesa hosi João foo sai dehan, sira tenki husik ona sira nia sala. I sira mos tenki sarani, hanesan sinal katak sira diak malu fali ho Nai Maromak. 38Imi mos hatene ona katak Nai Maromak foo Nia Espiritu Santu ho mos poder ba Jesus, ema Nazaré. Depois Jesus tama-sai aldeia-aldeia hodi halo diak ba ema, i kura ema hotu nebee Satanás halo terus, tanba Nai Maromak hamutuk ho Nia. 39Ami haree ho ami nia matan rasik, saida mak Nia halo ona iha sidade Jerusalém ho iha Israel laran tomak.
Maibee bele nunee mos, ema prega Nia iha krus too mate. 40Nia mate duni, maibee iha loron tolu, Nai Maromak halo Nia moris fali, i halo Nia hatudu Aan ba ema. 41Laos ema hotu-hotu mak haree Nia. So ami deit. Ami nee, Nai Maromak hili antes tiha ona hodi sai sasin kona ba Jesus. Bainhira Nai Jesus moris fila fali, ami mak baibain haan-hemu hamutuk ho Nia.
42Nunee Nai Maromak haruka ami baa foo sai Nai Jesus nia Novidade Diak ba ema iha fatin-fatin. Nia haruka ami foo sasin katak, Nai Maromak foti ona Jesus nee sai tesi lia nain ba ema moris ho mos ba ema nebee mate tiha ona, hodi hakotu see mak bele moris hamutuk ho Nai Maromak, i see mak lae. 43Nai Maromak nia profeta sira uluk mos, hotu-hotu koalia kona ba Jesus nee katak, see mak fiar ba Nia, Nai Maromak sei hamoos nia sala.”
Ema nebee laos Judeu simu Nai Maromak nia Espiritu Santu
44Pedro sei koalia hela nunee, derepenti Nai Maromak nia Espiritu Santu tuun ba ema hotu nebee rona nia liafuan. 45Ema sarani Judeu sira nebee ohin mai hamutuk ho Pedro, haree ema nebee laos Judeu simu Espiritu Santu, sira admira teb-tebes. 46Sira rona ema sira nee koalia lian oi-oin nebee sira nunka aprende, ho hahii Nai Maromak.
Depois Pedro dehan, 47“Imi haree rasik deit baa! Ema sira nee simu ona Espiritu Santu hanesan mos ita. Nee duni, mai ita sarani sira ona. La iha ema ida mak bandu tan.” 48Entaun Pedro haruka Cornélio sira sarani hodi Jesus nia naran para sira bele sai Nai Jesus nia ema. I sira husu ba Pedro atu hela tan loron ida-rua ho sira.
Zur Zeit ausgewählt:
Apostolu sira nia Istoria 10: BTDT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2024 Wycliffe Timor-Leste.
