Ja̰ 6
6
Jesu naa gɨ bi dubu mi wa̰y tudi
Mat 4.13-21; Mrk 6.30-44; Luk 9.10-17
1Lɔ tɨ plaa, Jesu o̰ si tɨ larɨm ɓɔ tɨ Galile ne a soon ər ndil jak ɓə Tiberiyad tapaa. 2Bi dɨbla so ul tɨ ər lɔ kəysul a ləg mum ɓɔrji ne ər ka ər nen na bi tɨ mo̰y. 3Jesu ɗɔl si tɨ nan sul. Tɨ un ne ər ti ɓudu na ər bi tɨ wa̰y edɨ. 4Na lula sul ne, Juyb-a na pya̰ tɨ Pak kar tɨ ndog. 5Jesu uma sul ləg bi dɨbla ne wo hina tɨ ər ndɔ gɨna, ər ɓiri Pilip: «Yi ɓə tudi tina tɨ ɓay tɨ huna gɨ bi gun ne naa a?» 6Jesu ja jaa ne tɨ Pilip sangni, kəysul ər una wa̰y ne ər ɓə kar. 7Pilip duga gɨ ər: «Jo yi huna tudi na gursu tɨ cida tɨ ɗa̰y aru sap kaw yi ɓə lɛm mapa huna nɨ jakaw ɓə mapa taal ɓa̰ ndḛni tina lo.» 8Ər wo tɨ tomni paa, ne ndil ɓə A̰dre, yḭr tɨ Simo̰ Piyɛr na ɓun, ja gɨ Jesu ɓə: 9«Ɓa̰ ɓər paa na mapa ne a ka na ya ne a soon ɓə orje tɨ luni la kaa tɨ ndidi la lɛ, ɓə kəy sula tɨ bi dɨbla ne ndɔ a?» 10Gɨna Jesu ja: «Yḭ kay bi gun tɨ nəgri.» Tɨ un ne ya̰n tɨ dɨbla. Bi gun ne ti tɨ lɔr a lɛm dubu mi. 11Gɨna Jesu so mapa, ər ka Ndɨla barka la ər ɓaan gɨ bi ne wo tɨ un ɗay. 12Gorne a twi wa̰y a kər gɨna, Jesu ja gɨ ər bi tɨ wa̰y edɨ ka a to mapa burumi ne gə̰y, ɓa̰ in ka haam lo. 13A to mapa burumi ne bi twi krang dɔkɔmɛ kar sap. 14Gorne bi ləg mum ɓɔrji ne Jesu ka gɨna, a ja: «Tɨ kuri, yḭr jo ər tɨ nebi ne a ja kum ɓə ər wo hina tɨ dunya̰!» 15Lɛ Jesu una ɓə a ɓə hina ər sula tɨ gɨ ər waan wur gɨna, ər duga ər si tɨ nan sul cam.
Jesu si tɨ ndu sul
Mat 14.22-33; Mrk 6.45-52
16Gorne lula wo tɨba gɨna, ər bi tɨ wa̰y edɨ jir marway a si tɨ larɨm ɓɔ mu. 17A ɗɔl tɨ kwa̰r hul tɨ saal tɨ Kapɛrnom, tɨ larɨm ɓɔ tapaa. Na lula sul ɗay, un ɗoy teni lɛ Jesu ɗang an tɨ a ndɔ lo. 18Saaw ɗəng tɨba tɨ larɨm na ndiri dɨbla. 19Gorne a neer kwa̰r lɛm kelengɨ tɨ luni ɓee mika gɨna, a ləg Jesu si tɨ ndu sul wo hina tɨ kwa̰r ndɔ. Ayri ka a nari. 20Lɛ Jesu ja gɨ a: «Tɨ yin, yḭ ka ayri kar lo.» 21A taam Jesu sula tɨ kwa̰r hul, lɛ tɨ daamu kwa̰r hina tɨ kwa̰rmu tɨ un ne a wo saal tɨ nin.
Bi dɨbla taam Jesu
22Gaana, bi dɨbla ne gə̰y tɨ larɨm ɓɔ tapaa una ɓə lɛli kwa̰r ɓudu ngoy jo gə̰y tɨ a lɔ la, gorne ər bi tɨ wa̰y edɨ wo saal Jesu ho̰on tɨ kwa̰r hul na a lo. Lɛ ər nɨm a si na ər sul. 23Lɛ kwa̰r nii tapeer o̰ tɨ lɔr tɨ Tiberyad hina ndog tɨ un ne toni Baali jul mu tɨ mapaa sul na gɨ bi nɨ tuy gɨna, 24bi ləg kadar Jesu la ər bi tɨ wa̰y edɨ a teni wo tɨ ɗay gɨna, a ɗɔl tɨ kwa̰r hul tɨ saal tɨ Kapɛrnom tɨ Jesu taam. 25Gorne a ten Jesu tɨ larɨm ɓɔ tapaa pi gɨna, a ɓiri ər: «Wo tɨ wa̰y ɓla, əm hina le na kərkwy a?» 26Jesu duga gɨ a: «Ja kuri jo ən wo gɨ i ja le, yḭ kun lɔ mum ton ɓɔrji jaa lo lɛ, tɨ mum tudi jaa jo i kun na ən lɔ. 27Yḭ ka cida kar wa̰y tudi ne gaana ɓə lɔr jaa lo, lɛ yḭ ka cida wa̰y tudi ne ɓə na i tɨm jili na kwi jaa. Wa̰y tudi ne tɨ Wo Ɓa̰ jo ɓə gɨ i naa. Kəysul tɨ yḭr jo, ī Ba Ndɨla naa ər gṵ tɨ mum kar na ər ndil.» 28Gɨna a ɓiri ər: «Yini ɓə kar waa ta i ɓə cida ne Ndɨla hul taam kar a?» 29Jesu duga gɨ a: «Cida ne Ndɨla hul taam jo le: Yḭ ko wo ne ər toon ər hul.» 30Gɨna a ja gɨ ər: «Kəy wa̰y ne ɓɔrji jo əm ɓə gɨ i kar nɨ i ɓə na əm hul kula a? Əm cida tɨ kar tɨ kəy a? 31I kəgɨ twi, tudi ne a soon ɓə maan tɨ tap hul kuna Ndɨla na maktub ja: “Ər naa gɨ a mapa ne o̰ tɨ ndɨlasul.”» 32Jesu duga gɨ a: «Ən ja gɨ i jaa kuri, tɨ Moys jo naa gɨ i mapa ne o̰ tɨ ndɨlasul lo, lɛ tɨ ən Ba jo naa gɨ i mapa kuri ne o̰ tɨ ndɨlasul, 33kəysul mapa ne Ndɨla naa, tɨ yḭr ne jir tɨ ndɨlasul la naa gɨ bi tɨm jili la.» 34A ja gɨ ər: «Baali, naa gɨ yi mapa ne na ɗa̰y sul.»
35Jesu ja gɨ a tɨ bayri: «Yin tɨ mapa tɨ tɨm jili, wo ne hina tɨ ən ndɔ gɨna, ndula ɓə ər kar lo bad la, wo ne ko ən hul a, ndu yuni ɓə ər kar lo bad la. 36Lɛ toni ən ja gɨ i: Yḭ ləg ən ɓari lɛ yḭ ko ən hul lo. 37Bi gun ton ən Ba naa gɨ ən, a ɓə hina tɨ ən ndɔ, la ən ɓə wo kun tɨ bayri lo bad, 38kəysul ən o̰ tɨ ndɨlasul ən hina tɨ nəgri sul le tɨ wa̰y ne ən hul taam kar lo, lɛ tɨ wo ne ton ən hul laar kar. 39Wo ne ton ən na hul laar jo le: Ən ka wo ɓudu in kar nɨ ər ɓə haam lo, lɛ ka ən wag na a gun tɨ ulu daan tɨ ɗa̰y lɔ tɨ tong.» 40I ləg ən Ba na hul laar jo le: Ka bi gun ləg ɓa̰ la a ko ər hul a ten na nina na kwi.
41Juyb-a hurga jaa tuna Jesu sul kəysul ər ja ɓə yḭr tɨ mapa ne o̰ tɨ Ndɨla sul. 42La a ja ɓə: «Ɓər ne tɨ Jesu Josep na ɓa̰ lo a? Yi una ər ba la ər na̰ laa! Ka waa ta ər ɓə ja ɓə: Yin o̰ tɨ ndɨlasul a?» 43Jesu duga gɨ a: «Yḭ ka jaa hurga tɨ i daan lo. 44Wo tɨ lay ne hina tɨ ən ndɔ, tɨ ən ba jo hina na ər tɨ ən ndɔ, tɨ nejo yin ɓə na ər wag tɨ bi tɨ ulu daan na ɗa̰y lɔ tɨ tong la. 45A kya̰ tɨ nebi-a maktub hul ɓə: “Ndɨla ɓə gɨ bi gun mum edɨ.”#6.45 Esa 54.13 Wo ne laa ən Ba jaa la ko ər mum tɨ edɨ la hina tɨ ən ndɔ. 46Ne ən ja ɓə wo paa ləg Ba Ndɨla na ji lo, lɛ tɨ wo ne o̰ tɨ Ndɨla ndɔ ngoy jo ləg Ba Ndɨla. 47Ən ja gɨ i jaa kuri tɨ bayri, wo ne ko hul ɓə tɨm jili na kwi tina. 48Yin tɨ mapa tɨ tɨm jili 49I kəgɨ twi ne a soon maan tɨ tap hul, lɛ ne kway gɨ a un tɨ ulu lo. 50Ndogle mapa ne o̰ tɨ ndɨlasul jo le. Jo wo twi gɨna ər ɓə ulu lo. 51Yin, ən tɨ mapa tɨ tɨm jili ne o̰ tɨ ndɨlasul. Wo ne twi mapa ne gɨna, ər ɓə tɨm jili na kwi. La mapa ne ən ɓə gɨ ər naa tɨ ən ndula ya̰m kəw. Ən naa ka bi tɨ dunya̰ ti na jili.»
52Juyb-a gag peer tɨ a daan la ja ɓə: «Ka waa ɓər ne ɓə gɨ i ər ndula ya̰m naa tɨ tudi a?» 53Jesu ja gɨ a: «Ən ja gɨ i jaa kuri tɨ bayri, jo yḭ twi Wo Ɓa̰ na ya̰m lo la, i yḭḭ ər hima lo la gɨna, yḭ ɓə nina tina lo. 54Wo ne twi ən ya̰m la yḭḭ ən hima la, ɓə tɨm jili na kwi tina la, ən ɓə na ər wag tɨ bi tɨ ulu daan na ɗa̰y lɔ tɨ tong, 55kəysul ən ya̰m tɨ wa̰y tɨ tudi ne ɓari la, ən hima tɨ wa̰y tɨ yḭḭ ne larmani la. 56Wo ne twi ən ya̰m la yḭḭ ən hima la ti na ən la, yin ti na ər la. 57Kuna ən Ba ne toon ən ti jili na kwi, yin kaw ən ti jili na ən Ba jaa la. Wo ne twi ən ya̰m ɓə tɨm jili yin jaa la. 58Yin ne ən tɨ mapa ne o̰ tɨ Ndɨla sul jo le: Yḭr ti kuna mapa ne i bəgɨ twi la a uy la lo. Wo ne twi mapa ne o̰ tɨ ndɨlasul ɓə tɨm jili na kwi.» 59Tɨ jaa ne Jesu ja gorne ər wo gɨ bi wa̰y ɓla tɨ Juyb-a na li tɨ paa tina hul tɨ Kapɛrnom.
60Gorne bi laa jaa ne gun gɨna, Jesu na bi tɨ wa̰y edɨ tapeer dɨbla ja ɓə jaa ne sɨgra nari, jajo ɓə tulɔ kay na laa a? 61Gorne Jesu una ɓə ər bi tɨ wa̰y edɨ wo jaa hurga tuna jaa ne sul gɨna, ər ɓiri a: «Jaa ne ɗo gɨ i tɨla a? 62Gorne yḭ ɓə Yin, Wo Ɓa̰ ləg na ɗɔl tɨ un ne ən ti tɨ nin toni, kəy jaa jo yḭ ɓə ja a? 63Tɨ Ndɨla Lal jo naa gɨ bi tɨm jili. Woɓari na ər sul ɓə lɛm wa̰y ɓudu kar lo. Jaa ne ən ja gɨ i toni tɨ lal la tɨ tɨm jili la. 64Lɛ bi tapeer tɨ i daan ko hul lo.» Jesu ja in kəysul ər una toni tɨ mum lɔ ɗula ɓə bi tɨ hul kula, wo tɨ ər sul sula la. 65La ər ja cam: «Tɨ ne jaa jo ən ja gɨ i ɓə jo ən Ba ɓla gɨ wo ul tɨ hina tɨ ən ndɔ lo gɨna, ər ɓə lɛm hina tɨ ən ndɔ lo.»
66Na lula sul ɗay, Jesu na bi tɨ wa̰y edɨ dɨbla tapeer nɨm ər, la a si na ər cam lo. 67La Jesu ɓiri ər bi tɨ wa̰y edɨ dɔkɔmɛ kar sap: «Yḭ kaw yḭ taam saal la a?» 68Simo̰ Piyɛr duga gɨ ər: «Baali, Yini ɓə saal tɨ ja ndɔ a? Tɨ Yim jo əm na jaa tɨ tɨm jili na kwi. 69Yini, ko hul la, i una ɓə yim tɨ Krist, wo ndeeri tɨ Ndɨla maan.» 70Jesu duga gɨ a: «Tɨ yin jo ən ɛr i ji dɔkɔmɛ kar sap lo a? Lɛ wo ɓudu tɨ i daan tɨ Sidan!» 71Ər ja jaa tuna Judas, Simo̰ Iskariot na ɓa̰ sul, kəysul tɨ yḭr jo ər ɓə Jesu sul sula. Judas tɨ wo paa tɨ ər bi tɨ wa̰y edɨ dɔkɔmɛ kar sap daan!
Zur Zeit ausgewählt:
Ja̰ 6: nie
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2023, ATALTRAB
