Ja̰ 7
7
Jesu na ɓungɨ ɓini hul kula
Ja̰ 5.44, 15.18-19; Mat 10.16
1Tɨ mum ne bəgri, Jesu si tɨ un gun tɨ Galile, ər taam saal tɨ Jude lo, kəysul Juyb-a taam ər humna. 2Juyb-a na pya̰ tɨ li ne a soon ɓə tabernak kar tɨ ndog. 3Jesu na ɓungɨ ja gɨ ər: «Əm nɨm un ne, lɛ əm si tɨ Jude, ka əm bi tɨ wa̰y edɨ ləg əm cida tɨ kar la. 4Jo wo taam ɓə bi una ər gɨna, ər ka ər mum tɨ kar waal lo. Jo əm ka wa̰y gɨna, əm ka tɨ bayri ka bi gun ləg əm.» 5Kəysul ər ɓungɨ in ko ər hul lo bad. 6Jesu ja gɨ a ɓə: «Yin lula sul ɗang lɛm lo, lɛ yḭ gɨna i lula sul maan lɛm. 7Bi tɨ dunya̰ ɓə i koor lo. Lɛ a ɓə yin koor kəysul ən ja gɨ a ɓə a mum tɨ kar tɨ ɓijim. 8Yḭ si tɨ un tɨ pya̰ kar lɛ, yin, ɓə saal tɨ nin lo, kəysul ən lula sul ɗang lɛm lo.» 9Gorne ər ja jaa kuna ne gɨna, ər gə̰y tɨ Galile.
Jesu wo tɨ pya̰ tɨ Tabernak un
10Gorne Jesu na ɓungɨ si tɨ un tɨ pya̰ kar teni gɨna, Jesu kaw si, lɛ ər ɓla ər ndɔ tɨ bi ji tɨ bayri lo. Ər si kuru ilag.
11Juyb-a taam ər tɨ un tɨ pya̰ kar la a ɓiri a ndɔ ɓə: «Ər wo ɓay a?» 12Bi dɨbla ja jaa tuna ər sul tɨ a daan. Tapeer ja ɓə: «Ər tɨ wo ndinimani.» Lɛ bi tapeer ja ɓə: «ər wo bi haam.» 13Wo ɓudu lɛm ja jaa tuna ər sul tɨ ndal lo, kəysul bi gun oy gɨ Juyb-a na woom.
14Tɨ lula sul tɨ pya̰ kar daan jo Jesu hina tɨ Ndɨla li hul ər ɗolɔ tɨ gɨ bi wa̰y ɓla. 15Ɓɔr Juyb-a ji nari la a ja ɓə: «Yḭr edɨ wa̰y lo lɛ ka waa ta ər una maktub kuna paa ne a?» 16La Jesu duga gɨ a: «Ən wa̰y tɨ ɓla o̰ tɨ ən ndɔ lo lɛ tɨ wo ne toon ən jo ndɔ. 17Jo wo so hul tɨ Ndɨla hul laar kar una gɨna, ər ɓə una ɓə ən wa̰y tɨ ɓla tali kay pay o̰ tɨ Ndɨla ndɔ ɓee ən ja jaa tuna ən sul a? 18Jo wo ja jaa tuna may sul gɨna, ər taam taan ne tuna ər sul. Lɛ wo ne taam wo ne toon ər na taan tɨ wo kuri. La wa̰y gajele ɓa̰ in teni wo tɨ ər ndɔ. 19Moys naa gɨ i Ndɨla gṵ hul lo a? Lɛ wo ɓudu tɨ i daan ne so ka na cida in teni. Kəyjaa yḭ taam ən humna a?» 20Gɨna bi duga gɨ ər: «Yim na jinsə wo tɨm ndɔ! Jajo taam hul mu tɨ əm humna a?» 21Jesu duga gɨ a: «Jo ən ka wa̰y ɓudu ngoy tɨ un ne gɨna, ɓə i jiɓɔr krab tɨ un ne. 22Moys naa gɨ i gṵ tɨ i ɓimi cina ɓina, Tɨ yḭr jo ər ɗolɔ tɨ cina ɓina lo lɛ, i kəgɨ ka toni, lɛ yḭ, ɓya̰ cina na ɗa̰y tɨ saaw bɛ. 23Jo wo ɓya̰ cina na ɗa̰y tɨ saaw bɛ nɨ ka Moys na gṵ hul ti tɨ ər ɗa̰ygor gɨna, kəyja yḭ ka hul laa gorne ən nen woɓari na mu na ɗa̰y tɨ sawbɛ a? 24Yḭ ka jaa tungni na bi ji kula lo lɛ, i tung jaa tugla na ɗa̰ygor.»
Pay Jesu tɨ Mesi a?
25Bi tɨ Jerusalɛm tapeer ja ɓə: «Tɨ ɓər ne jo bi taam ər tɨ humna lo a? 26Yḭr jo ər lor ər wo ja jaa tɨ bi ji tɨ bayri lɛ a ja gɨ ər jaa ɓudu lo. Ma woom ko hul ɓə ər tɨ Mesi a? 27Mesi na un ne ɓə o̰ tɨ nin, wo tɨ una teni lɛ, yḭr, yi una ər un ne ər o̰ tɨ nin.»
28Gɨna Jesu ɗo ngor na dwari tɨ lula sul ne ər lor ər wo wa̰y ɓla gɨ bi tɨ Ndɨla li hul. Ər ja ɓə: «Pay yḭ una ən a? Ɓee ən o̰ tɨ ɓay a? Ən hina na ən sul lo, lɛ wo ne toon ən tɨ wo tɨ kuri lɛ, yḭ una ər lo bad. 29Yin ən una ər ɓari kəysul, yin tɨ ər maan la, tɨ yḭr jo ər toon ən la.» 30A taam ul mu tɨ ər par, lɛ wo lɛm ər par lo, kəysul ər lula sul ɗang lɛm lo. 31Lɛ bi dɨbla tɨ bi daan ko ər hul la a ja ɓə: «Gorne Mesi ɓə hina gɨna, ər ɓə mum ne ɓɔrji kar ne ɓə yḭr ne maan ura lo a?» 32Parisyḛ-a laa jaa ne bi hurga tuna ər sul gɨna, woom tɨ hima ɓina nii la, Parisyḛ-a la, a ton əli-a tɨ ər par.
33Jesu ja gɨ a: «Ən wo na i tɨm na lula sul ɓa̰ ndḛni le, ən wo duga tɨ wo ne toon ən ndɔ. 34Yḭ ɓə ən taam lɛ yḭ ɓə ən tina lo la, yḭ lɛm saal tɨ un ne ən wo tɨm tɨ nin lo la.» 35Gɨna Juyb-a ɓiri peer: «Ər wo saal tɨ ɓay ta yi ɓə lɛm ər tina lo a? Pay ər wo saal haam tɨ Juyb-a ne a ti tɨ grek-a maan daan a?» 36Jaa ne ər ja ɓə: «Yḭ ɓə ən taam le yḭ ɓə ən tina lo, kəysul yḭ lɛm saal tɨ un ne ən wo tɨm tɨ nin lo» ji ɓə kəy a?
Jesu ja jaa tuna Ndɨla Lal sul
37Ɗa̰y lɔ tɨ tong, ne tɨ ɗa̰y ɗəng tɨ pya̰ kar. Na ɗa̰y ne Jesu lor tɨ ndal tɨ bi daan. Ər ja jaa tɨ ndal ɓə: «Wo ne ndu yungni ka ər ka ər hina tɨ ən ndɔ ər yḭḭ ndu. 38Wo ne ko ən hul gɨna, larɨm ndu cina ɓə yaal tɨ ər raam lɔ kuna Ndɨla maktub ja no̰.» 39Ər ja jaa ne tuna Ndɨla na Lal ne wo jir tɨ bi tɨ hul kula sul. Na lula ne, Ndɨla ɗang naa ər Lal lo, kəysul Ndɨla ɗang wur taan tɨ Jesu sul lo.
Bi laa paa mu lo tuna Jesu sul
40Gorne bi laa jaa ne Jesu ja gɨna, tapeer ja ɓə: «Yḭr tɨ Ndɨla na nebi kuri.» 41Tapeer ja ɓə: «Yḭr tɨ Krist!» Lɛ tapeer jak cam ja ɓə: «Pay Krist ɓə o̰ tɨ Galile a! 42Ndɨla na maktub ja ɓə Mesi ɓə wag tɨ Dabid kalɔ la tɨ lɔr tɨ Betlehɛm ne tɨ Dawud na lɔr.»#7.42 Mic 5.1 43Bi ɓaan peer lɔ tɨ ndidi tuna Jesu sul. 44Tapeer taam ər par, lɛ wo ɓudu in lɛm ər par lo.
Juyb-a na woom hul sɨgra
45Əli duga hina tɨ Juyb-a woom la Parisyḛ-a la ndɔ. A ɓiri a: «Kəyjaa yḭ hina na Jesu lo a?» 46Əli-a duga gɨ a: «Wo ne ja jaa kuna ɓər ne in teni bad!» 47Gɨna, Parisyḛ-a ja: «Yḭ kaw a tan i la? 48Wo ɓudu tɨ woom daan ɓee tɨ Parisyḛ-a daan ko ər hul wo nin la? 49Tɨ bi ton una Moys na gṵ hul lo la bi ne Ndɨla dobɨn a ngoy jo a ko ər hul!»
50Nikodem ne tɨ wo ɓudu tɨ Parisyḛ-a daan ne si tɨ Jesu ndɔ toni ja gɨ ər peer ɓə: 51«Yi gṵ hul kway gɨ i ul mu tɨ wo par bla jaa laa tɨ ər mu la, bla ja ji una la lo.» 52A duga gɨ ər: «Yim kaw, yim tɨ wo tɨ Galile a? Əm edɨ jaa ne a kya̰ tɨ maktub hul ɓari la əm una ɓə Ndɨla na nebi ɓə o̰ tɨ Galile lo.» 53Gɨna jaa kaw si tɨ gə̰y.
Zur Zeit ausgewählt:
Ja̰ 7: nie
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2023, ATALTRAB
