Tatanigaina 15

Ia Varivehai Ka Iahova Taremehana Ebaramu

1Leghuna iahi, Ebaramu neke finini ka kaike hahaima kahe ghuana iahi Iahova ka manei:

“Oka maugheu ghu Ebaramu.

Ara lamu nou rereona agho,

ia ta age vananigho kaike leghahai tabara.”

2Ghe Ebaramu neke kahe ghua iahi, “?Iahova God, heve veha mu ta age va riva ghinaguna ara tabara iamu ka agho, vununa ta deo au rekaha ini ara? Eliza ia tanina Damasikasi lama mu, ta age hio kadolorira leghu taghotagho nga ka ara. 3Agho deo rekaha noke vanaguna, e age hio kadolori ghu ira leghutau ta taghori ara kaikeu ka ira nogu noni mala varituhu.”

4Ianimu tuna ghe neke kahe ghuani nga iahi Iahova ka Ebaramu: “Eliza ia mane varituhu ka agho e deo ge age hio kadolori ghu ira leghutau ta taghori agho. Nga ia toraina tuumane taghou mo ta age hio kadolorira ira leghutau ta taghori agho.” 5Iahova neke hio kave laoi peghuru ghe neke kahe ghua nga iahi, “Mato vona ka kolangana o tahori ghu babaghunu ari noto boka la. Taghe iramu edi age ghua tehidira ira pagusu ka agho.”

6Ebarahamu neke va hohoghonai God, neke tahoi ghu God ta lotorona manei.

7Kahe ghua tuna iahi ka manei neke ghua Iahova, “Ara mu Iahova nake hio kaveighono ka ia malau faana Uri ani Babilonia, mala vananighona kava iahi ta taghoina ghu agho.”

8Ghe Ebaramu neke notoho, “?Iahova God, heve e ghua ghe ga boka avohi nga ara kava ianimu ta toraina age taghoina ara?”

9Iahova neke ungene tughui ghu, “Hio vanagu meha kaike ghasena bulumakau ta deo tuuna nga, kaike ghasena gouti nia kaike manena sipisipi ta lito komuhudi haro, nia kaike babahulu bora nia kaike babahulu tahi, e ghua.”

10Ebaramu neke hio mehari ghu ka God leghu irahi nga neke paisi fota paluri ghu hoata. Ianimu tuna ghe neke pata vari tala ghidi nga ka palu papatai ira fota mairidi nia ira fota mautudi. Nga ira memeha mu, deo geke paisi fota paluri ghu manei. 11Ira memeha ta ghani vilahi lemedi dike la hinae meha ka ira vilahidi tagukava lemedi, ghe Ebaramu neke bozo ghaheri.

12Ka ia eroai laona ia taunu, Ebaramu neke toraina epu melukai, neke meha toufi ghu kaike leghahai nagoromo ta mamaghuana. 13Kahe ghua tuna iahi ka Ebaramu neke ghua Iahova, Agho o toraina avohi iahi: “Ira pagusu ka agho edi age noni mehadi ka kaike kava ta deo ge tau ghu ka taghodi. Maneri edi age noni mala varituhu nia edi age ngovala va mukori aianimu ka giliodi 400 komuhu. 14Ghe ara a age va kilasari ghatu ira noni ka ia ta la riva taghe noni mala varituhu ta ghua vanadi maneri, nia maneri edi age hio ghahe taremehadi leghahai taghotagho ghatu ka ia ghahe kaini maneri kava ianimu. 15Nga agho taghou mu, o leme ka ia bule ka ia toraina age mamanekusu va veha agho, edi gilu ghinigho ghu. 16Ka ia va rodanana ubalana noni, ira pagusu ka agho edi ke la leghu meha aiahi, vununa ara e deo ga age bozo kaveri ghu ira noni Amoa, edi vuhai age toraina muko fuludu ghu maneri, mala toraina va kilasarira.”

17Ka ia neke to luduru laono ia taunu neke to age nagoromono ghu, kaike raro ta ghahipa ta kuru totoina ta gufu, nia kaike zuta sasao ta helupu e ghua, neke ghahe fuludu ka varihoataidi ira paisidi tagukava lemedi.#Zeremaea 34:18. 18Ka ravata ianimu Iahova neke riva ghini ia nona varivehai taremehana Ebaramu kahe ghuana iahi, “Ara nato vanadi ira pagusu ka agho kava iahi, tataniga ka ia fofotaina Izipi dufu lao ghu ka ia ketuhu leghaha Iufereti— 19ia kava ka ira noni ka Keni, ira noni ka Kenizi, ira noni ka Kadamoni, 20ira noni ka Heti, ira noni ka Perizi, ira noni ka Refa, 21ira noni ka Amoa, ira noni ka Kenani, ira noni ka Gagasi nia ira noni ka Zebusi, e ghua.”

Zur Zeit ausgewählt:

Tatanigaina 15: kji

Markierung

Kopieren