Tatanigaina 16
16
Hegari Ghe Isimaeli
1Sarai ia ghaseborona Ebaramu neke sasahaka neke deo ghu boka nai vanani rekahana Ebaramu. Ghe manei neke kurui mo kaike noni mala varituhu babaolonana Hegari ia tanina Izipi, 2neke kahe ghua ghu iahi manei ka Ebaramu, “Iahova ne va nodoau ara ta mala kuru rekahana. Agho o la epu taremehana ghase mala varituhu iamu ka ara. Haeba ara a boka age kuruau rekaha mo ka manei.”
Ebaramu neke va uvei ghu heve neke kaheio Sarai. 3Leghuna au tazo komuhu Ebaramu ani Kenani, Sarai ia ghaseborona manei neke hioi Hegari ia tanina Izipi ia noni mala varituhu ka taghona neke vanani lao ghu Ebaramu mala taghe kaike keranau ta ghua harona. 4Epu taremehana tuna Hegari neke ghua Ebaramu neke pote ghu manei.
Ne hadu kavei ghu ta potena taghonai, manei neke tatanigai age mato va hinaei Sarai ia ghasefaana. 5Kahe ghua tuna iahi ka Ebaramu neke ghua Sarai, “Paluhau agho ghe ne deo nga Hegari ge va vonavonau ghu ara. Ara mu nake vananigho agena manei, ghe ghatunaina ka ta avohini ta potena taghonai, manei to deo ge va vonavonau ghu ara. Iahova ta age va podolina hei mo ne zeana ka ghita palu, agho, ba ara.”
6Ebaramu neke ungene tughui, “Manei mu nou noni mala varituhu agho, e au ghu manei ka pekana ia mana agho. Riva ghini heve no kabai va riva ghinina agho manei.” Sarai neke age kikipana ghini ghu Hegari neke age pelo ghu manei.
7Ia engizeli ka Iahova neke la dufui Hegari ka kaike futu ka ia malau koroghana ta karango, ka ia hangana ta vai lao Sua, 8neke kahe ghua ghu iahi, “?Hegari, agho ia noni mala varituhu ka Sarai, hae noke sipa mehana agho nia hae mu ta laona agho, e ghua?”
“Ara na pelo kaini Sarai ia ghasefaa ka ara,” neke ghua Hegari.
9Ianimu tuna ghe neke va kahe ghini nga ia engizeli ka Iahova, “Leghu lao ka ia ghasefaau agho o la nomohi ghu,” 10Ke kahe ghua tuna iahi neke ghua manei, “Ara a age va hugara tehi fuluduri ira pagusu ka agho, e deo ghu hei ta boka tahorira.”
11Ia engizeli ka Iahova neke kahe ghua molamo iahi ka manei:
“Ghatunaina agho noto pote
o age va urahi ghu kaike tuumane.
Isimaeli, o age ghua ghini ghu baolina,
vununa Iahova to nomohi ia vavahagala ka agho.
12Tuumane iahi agho taghe kaike dongiki mauke e age ghua,
e age magarari leghu noni nga
nia leghu noni nga edi age magari manei,
nia manei e age au taghe kaike kana
ka ira leghu taremehana nga e ghua.”
13Hegari neke vanani ghu Iahova neke ngengene laono ka manei babaolo iahi: “Agho mu ia God ta finiau ara,” vununa ka neke kahe ghuao iahi Hegari, “Ara nato finini ghatunaina Ia ta finiau ara,” neke ghuao. 14Neke ghua mamu ghe neke va kudo ghini Bia-lahai-roi nga ia seu, fafahakanana mu “Ia Seu ka Ia God ta Doli Ia ta Finiau Ara,” dike ghua ghini nga ira noni ia seu ta au ka vari hoataina Kadesi nia Beredi, e ghua.
15Hegari neke va uraha vanani ghu Ebaramu kaike tuunamane, neke vanani ghu babaolo Isimaeli. 16Ka ia dolina Isimaeli, Ebaramu neke to 86 komuhuna.
Zur Zeit ausgewählt:
Tatanigaina 16: kji
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2022, Islands Bible Ministries. All rights reserved.
