Tatanigaina 17
17
Ia Papahe Va Ghilaghilana Varivehai
1Ka ia 99 komuhuna Ebaramu, Iahova neke podolo ka manei neke kahe ghua ghu iahi, “Ara mu ia God ta Torai Mana. O au va hohoghona ka ara nia o toraina kaike noni ta veha ka hoatadi ira noni, e ghua, 2ghe ga age riva ghini nga ara ia nogu varivehai taremehau agho nia ga age vananigho tehi pagusu nga, e ghua.”
3Ebaramu neke maimanihi tala hinae ka kavao, neke kahe ghua ghu iahi God ka manei, 4“Ka ia keha pelona ara ka ia varivehai, ara a riva ghini taremehau agho iahi: Agho o age faadi ira tehi butubutu noni. 5Babaolouna agho e deo ke Ebaramu#17:5 Fafahakanana Ebaramu ka Hiburu mu “Mama ta va vonavonai.” na, nga Ebarahamu#17:5 Fafahakanana Ebarahamu mu, “Nodi Mama ira tehi noni.” eke age ghua ghinigho, vununa ara nato nakaigho agho mala faadira tehi butubutu noni. 6Ara a age vananigho tehi pagusu. Ira pagusu ka agho edi age tehi butubutu noni nia kehara ka hoatadi maneri edi age mane ginitaukela. 7Ara a age sutei ia nogu varivehai taghe kaike varivehai toghunaina vari hoataigu ara nia agho nia ira pagusu ka agho leghuu agho ka ira ubaladi noni keha nareo. Ara a age nou God agho nia God ka ira pagusu agho, e ghua. 8Ara a age vananigho agho nia ira pagusu ka agho ia kava Kenani ta deo go kutana ghu ghau. Kava kamoto iamu edi age tagho fuludaini ira pagusu ka agho, nia ara ga age nodi God ghu maneri, e ghua.”
9Kahe ghua tuna iahi ka Ebarahamu neke ghua God, “Nga ka ia keha pelona agho mo ka ia varivehai mu, agho o toraina sutei ia varivehai ka ara. Agho nia ira pagusu ka agho leghuu agho e ghua, ka ira ubaladi noni keha nareo. 10Iahi mu ia varivehai ka ara taremehau agho ta toraina mala sutei agho nia ira pagusu ka agho, e ghua: Leghu mane nga ka hoatamu ghau, edi age papahe va ghilaghila. 11Ghau o toraina mala hioi ia papahe va ghilaghila. Iahi mu e age va ghilaghilana ia varivehai vari hoatamu ghau nia ara, e ghua. 12Ka ira ubaladi noni ta la meha mu, leghu gogoso manedi nga ka hoatamu ghau ta hana ravatadi, edi toraina mala papahe va ghilaghila, au haghele harona ira ta doli ka ia suga agho, ba ira noni mala varituhu ta tabarari ka kaike noni mehana—ira taka pagusu ghu ka agho. 13Maneri mu edi toraina age papahe va ghilaghila, geta doli ghu ka ia sugamu ghau, ba tabari ka ira rongo ghau. Ira tinimu ghau edi age va podoli ia va ghilaghilana ia nogu toghunaina varivehai. 14Hei mane ta deo ge papahe va ghilaghila ghu mu, e age nai kavei ka ira noni manei, vununa manei ne deo ge sutei ghu ia varivehai taremehagu ara.”
15God neke kahe ghua molamo iahi ka Ebarahamu, “Nga ka Sarai ia ghaseborou agho mu, babaolonana manei mu to deo ge Sarai ghu; tataniga ghatunaina mu, Sera babaolonana manei. 16Ara a age va vehai manei e age toraina vananigho ghu manei kaike tuumane. Ara a age va vehai manei e age nodi uke ghu manei ira tehi butubutu noni. Mane ginitaukeladira ira leghahai butubutu noni mu, edi la meha ka ira pagusu manei.”
17Ebarahamu neke maimanihi tala hinae ka kavao, ghe neke pagho nga, deona geke va hohoghona ghu. “?E boka nai rekaha mo mu ia mane ta 100 komuhuna? ?E boka mo Sera nai rekahana ka ta 90 komuhuna ini manei?” 18Ebarahamu neke kahe ghua ghu iahi ka God, “?Heve ghe noka va malumi nga agho Isimaeli ta mala age hio kadolorira vahina leghutau noke vanaguidi nga agho?”
19Ghe God neke kahe ghua iahi, “Deo. Sera ia ghaseborou e age nai vananigho kaike tuumane, Aesake o age ghua ghini ghu baolina agho. Ara a age sute toghunaini ia nogu varivehai taremehana manei nia ira pagusu ka manei e ghua. Iahi mu e toraina toghunaina varivehai. 20Taghe ghinina Isimaeli mu, ara nato nomohigho: Ara a toraina age va vehai manei, a age vanani tehi rekaha ghu nia tehi pagusu ghu, e ghua. Manei e age nodi mama tazoi palu mane ginitau nia ara a age riva vanani manei kaike leghahai butubutu noni ka ia pagusu manei. 21Ghe ara a age sutei ia nogu varivehai taremehana Aesake ia tuumane agho, ia ta age doli ka Sera taghe ka fafata iahi ghatunaina ka keha komuhu nia.” 22Ka ia nogha God ngengene taremehanana Ebarahamu, manei neke ghahe kaini Ebarahamu.
23Ka toraina ravata ianimu, Ebarahamu neke hioi Isimaeli ia tuunamane nia leghu mane ta au nga ka ia suga taghona, taremehadira ira noni mala varituhu dike doliro ka ia malauna nia ira neke to tabarariro, e ghua, neke papahe va ghilaghilari ghu leghuina taghe neke kaheio God ka manei. 24Ebarahamu neke 99 komuhuna ka ia papahe va ghilaghila manei, 25nia Isimaeli ia tuunamane geke 13 komuhuna ghu, neke ghua. 26Ebarahamu nia Isimaeli ia tuunamane e ghua, dike papahe va ghilaghila ka ravata haro ianimu, 27taremehadira ira leghu mane nga ka ia suga manei dike doliro aianimu, ba dike tabarariro ka kaike noni mehana. Maneri haroharo dike papahe va ghilaghila taremehana manei.
Zur Zeit ausgewählt:
Tatanigaina 17: kji
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2022, Islands Bible Ministries. All rights reserved.
