Luke 22

Iesu humbuto tasora avo ke kasea

(Matthew 26:1-5; Mark 14:1-2; John 11:45-53)

1Eto jarukari ta pondo te bread sivo ikae pajirae amita pondo te iji auvihinu 2enana priests pepeni te ke pepeni simba ari embopo te na Iesu humbuto taro pehaja uje ea rate embomeni isapamane na Iesu ta ke ingihe mihia avo joru ue humbari degi jombure ea.

Judas na Iesu harikasi sija ena

(Matthew 26:14-16; Mark 14:10-11)

3Eto Iesu ta ambotani tapa 12 rate vahai amita javo amo Judas Iscariot amo Satan na jo enetenu 4pambuto priests pepeni te temple simba ari embopo te amiga Iesu daingeto harikau humbasora avo pambuto hihi avo tirio 5ingito tunga javotoho ue koro doinge ikaro humbasuja avo siriketo 6heka uo Judas pambuto embo isapamane irae amikote Iesu humbuto enana ta ingeni ta ikasi simba ena.

Iesu na Jarukari pondo indesi sija ena

(Matthew 26:17-25; Mark 14:12-21; John 13:21-30)

7Eto bread sivo ikae pajirae amita pondo te jarukari pondo te iji puvunu o meni vahai teto heveto pene gaga ta tembari iji avo puvunu 8Iesu na Peter te John te humbuto ke einge ena, “Ungo heriso pambuto jarukari pondo avo nununga evu indore,” ainge enu 9“Dago degi dainge nununga ara uje ere oe?” ainge eo 10“Ingivujo, ungo pambuto da jo ta embo vahai umo higi jigito puvutuhurou hambuto embo avo ambo ambo ue pambuto bande dainge horasuja aita ungo horeto 11bande mamo ta degi ke einge evujo, ‘Ahe Poekari Embo na no degi ta ke erevi aro ingoa ehija Na nau ambotani ga umoro embo ta bande jo dainge horeto arumbeto jarukari ta pondo indoro?’ Ainge avo 12ingito bande jo peni i ta mihia ai ta indari tembari degi te arumbeto indari degi te tapa inono ta mihia avo embo amina au kito pondo ai nununga evujo.” ainge enu 13pambuto Iesu na ke ena ainge inono ta kito pondo nununga eo irae enu.

Bada ta pondo

(Matthew 26:26-30; Mark 14:22-26; 1 Corinthians 11:23-25)

14Pondo iji puvunu Iesu na amita apostero ga tapa areto indesi mihie 15Iesu na enana ta degi ke einge ena, “Na pambuto memenga osaga kesona avoeto nau jo tapa na jarukari pondo erevi ungo ga kihi indesi uje ereona, 16eto ungota degi erena, God ta tihi jigari iji be puvuto ere hua avo ahe kihira ue jarukari pondo tutumota ere indena erevira,” 17ainge eto aguhu humbuto God peketo ke einge ena, “Aguhu erevi humbuto isapa isapa indavu 18eto kivujo, na esi be ta mu ehako mane indesona te God ta tihi jigari iji puvurou ehako indesona,” ainge eto 19bread humbuto God peketo periketo enana ta degi ikihe ke einge ena, “Hamo nau erevi ungo embo ikarira humbuto indie na hotembu hotembu evujo.” ainge eto 20indio irae enu Iesu na ke einge ena “Aguhu ei ta amo orosa nau noma eha ta kajari ta orosa avo ungo embo overekehena. 21Rate kivujo, na isoro embo ta ingeni ta ikasuja embo amita ingeni amo ingeni nau ga tapa gaga ta tembeto mihia 22eto God na ke mahu ari avoeto Embo ta Meni pehasuja te aja to erena, harikari embo avo osaga memenga isapamane kesuja.” ainge enu 23enana vahai amuna harikau avo mine ara ijie ajire engeka ea.

Embo peni amo amuna au?

(Matthew 20:24-28; Mark 10:41-45)

24Eto enana embo vahai amuna dembeto peni aisuja avo hini kambari ue ke mine ara eo 25Iesu na ke einge ena, “Enda embomeni tapa amita kings na tihi jigihore osaga kiora te ehako hande embo ke ara eagora. 26Rate ungo na ainge mane aisova te umo embo peni asi uje ue kito embo teho ejo, eto embo tihi jigesi uje eto kito embo ta pure embo ke ijie ke agi ejo. 27Embo peni amo davore? Indari embo retemo undurari embo re? Amo indari embo rate na ungo unduresi puvena. 28Rate ungo na na egikae na osaga kogue uone namote tapa mihovova. 29Avoeto nau Mama na au na embomeni tihi jigona aisuja ainge dombo 30nane ano ungo nau tihi jigari degi ta horeto gaga nau ta arumbeto indito avo arumba peni ai ta arumbeto Israel ta ohihi javo tapa 12 ainge mihera avo ungona ganoka ijie pehumba aisova.

Peter na Iesu kiae ke aisuja avo Iesu na harikena

(Matthew 26:31-35; Mark 14:27-31; John 13:36-38)

31Ajae Simon! Satan na penunu ngahia na eto ungo tapa humbuto eto kesi ue rice ve jahevarako arote? 32Rate Simon umo God toae humota mahainge iresoa avo pari ere ona avoeto umo pambuto mihiro jo aherekau no namei kamei hondate ejo sovera umbare.” ainge enu 33Simon na ke einge ena, “Bada, na umo te pambuto tipura ta horasona eto pehasora avo nununga ereona,” ainge enu 34ke einge ena, “Peter, na no degi ta erena, iho vujae mihirou mume orohuta inena na kiae ke tapa 3 ainge ijiro ohora javone aisuja” ainge eto.

Utu goru te ehi savo te koro te toto pambuvu

35Enana tapa ta degi ke einge ena, “Eto na ungo ikano pambava ue utu goru te ehi savo te koro te toto pambava ue ehene pahava amikote osaga koguevete?” ainge enu “Osaga kiae tapa inono ta uera” ainge eo 36Iesu na ke einge ena, “Rate oroho amo no koro te ehi savo te tapa umbuvujo, eto no isoro asivo irae kito no ombari asukari amina ombuto umbujo. 37Amita be amo ari nau degi ta do puvuresuja avo God ta ke ta mahu kajari einge mihia, ‘Embo amo ari sapura embo ra ke aisora’ ainge mihia avoeto na pehari iji puvija” ainge enu 38enana “Bada kijo, isoro ari asivo heriso mihia erevira,” ainge eo “Aravora, ke inonora tovu”, ainge eto.

Tiri javo Olives

(Matthew 26:36-46; Mark 14:32-42)

39Bande toto veto ari ainge avoeto tiri ‘Olives’ ta vihesi amita ambotani ga pambuto 40tiri ta puvuto enana ta degi ke einge ena “Satan na ungo engeka aisuja avoeto pari evujo,” ainge eto 41enana toto embo na karu gosukeore pambuto veaguja kane ainge ta pambuto paunge teteri eto 42pari einge ena, “Mama, ari tapa inena ari avoeto aguhu erevi mane indonote avo ke ao ingito toane eto uje nau mane rate uje no avo aisona,” ainge enu 43Anera vahai na uhu ta eto puvuto sovera ari ikena, 44eto osaga pajire be kogue jo tapa iketo pari unu amita ivori na orosa aingeto sinini eto enda ta vena. 45Eto pari enu irae enu ereto pambuto amita ambotani osaga kogue evio avo kito ujeto 46ke einge ena “Ungo do eto evopo ere ove? Ereto ungo engekari ta veasova avoeto pari evujo” ainge ijinu.

Isoro embopo na Iesu andito jigito umbua

(Matthew 26:47-56; Mark 14:43-50; John 18:3-11)

47Amita ambotani 12 rate vahai Judas na embopo kihi humbuto puvuto Iesu ta degi auveto mune tavo aisi unu 48Iesu na kito ke einge ena, “Judas, umo Embo ta Meni avo mune tavo ari na harikasi ere oete?” ainge enu 49embomeni Iesu ga puvua amina ari do puvuresuja avo kito ke einge ea “Bada dago ta asivo na embomeni taro?” ke ainge ijie 50embo vahai na Priest peni ta pure embo amita oje be hena avo jeto tiukenu vena avo 51Iesu na haekihe “Ainge ere ova avo tovu” ijie isoro embota oje avo humbuto ikenu kambuto arinako ena. 52Eto Iesu na priests pepeni te temple ta isoro embopo te Judea ta embo pepeni te isoro amita degi puvutuho ke einge ena, “Na pegene embo mane rate asivo te kepata te jigito na humbasi ere puvutuhovete? 53Na iji tapa temple jo ta embomeni ahe ere poekihovona amikote na humbaeheva amo toagova te ungota iji ikari re eremita Satan ta sovera ari na mumete puveva erevira” ainge enu.

Peter na Iesu kiae ke ena

(Matthew 26:57-58,69-75; Mark 14:53-54,66-72; John 18:12-18,24-27)

54Iesu andito humbuto priest peni ta bande ta pahuo Peter na tunga te jaheki ue ambota pambuna. 55Eto Peter na pambuto priest peni ta bande huga jo orohuta embomeni ji ikeo evekihinu mihia ai pambuto arumbenu ji peri vivihinu 56kakara vahai amina Peter ta tombu usasa ta ijuketo kito ke einge ena “Embo Iesu ga mihei koguenare erevira” ainge ijinu 57Peter na ingito “Kakara, embo amo na kiaera” 58ainge eto isapa mihinu embo nei amina kito “Umo enana emiga eagoa” ainge enu Peter na “Embo, ainge manera” enu 59isapa mihimihe embo nei na Galilee embo hajire be kito “Amo ke be ra embo emo Galilee embo hajire kogona avoeto enana vahaira,” ainge enu 60Peter na “Embo umo ke do erea amo na be kiae ere ona” ke ainge ijinu di ohora javone ijinu 61Iesu egerembeto Peter kogunu Bada na “Peter umo na kiae ke 3 ijiro di ohora ke aisuja” ainge ena avo hotembeto 62osaga kogue arahata pambuto si ijie sisivu kuhena.

Iesu urumbeto tea

(Matthew 26:67-68; Mark 14:65)

63Eto embomeni Iesu umbua amina urumbihe teto 64tihi bo na togeto ke einge ea “Peroveta, amuna umo ere toroi” ainge eto 65ke neite neite ijie Iesu urumbea.

Iesu ikeo koto ta hetena

(Matthew 26:59-66; Mark 14:55-64; John 18:19-24)

66Eto iho vujenu Iesu pehumba asi Judea embomeni ta embo okokose amo priests pepeni te ke pepeni simba ari embopo te amina horukeo Iesu humbuto pambuto ikeo hetenu ke einge ijie ganoka ea, 67“Umo Judea embopo ta hondate ari embo Keriso?” ainge eo “Na ungo ta degi aisona te ungo ke be mane hotembasova, 68eto na ungota degi eto ingesona te ungo ke be mane harikasova, 69rate eha ihikihera emo Embo ta Meni na God sovera isapamane te ta ingeni be ta arumbeto daroho iresuja”, ainge enu 70enana tapa na ke einge ea “Avoeto umo God ta Meni re?” ainge eo “Ke ereva amo namora” ainge enu 71enana ingito ke mine ara eto einge ea “Embo nei na harika mane au ingesora te amita pe na God urumbihe eria aravora.”

Zur Zeit ausgewählt:

Luke 22: OKVH

Markierung

Kopieren