Luke 21

Evohu doru na hande javotoho ikena

(Mark 12:41-44)

1Eto haja vaja embopo na temple ta hande koro ikihoi Iesu na arerembeto kogue mihinu 2evohu doru vahai amina amita degi koro peni irae avoeto toea heriso jujurukihinu 3Iesu na kito ke einge ena “Na ke be na ungota degi erena, evohu doru omina hande ere ikihia amo peni be ra haja vaja embo na ere ikihera ainge mane ra. 4Eto enana ta donda isapamane avoeto ikihe huna jigera te evohu doru emita donda irae avoeto pe te ere ikihia erevira” ainge ena.

Temple arara eto veasuja ta ke

(Matthew 24:1-2; Mark 13:1-2)

5Eto Iesu ta ambotani na temple avo koro orina na gerikari amite donda kiari jajavotoho temple ta hande ikari amite avo kiora ke eo 6Iesu na ingito ke einge ena, “Ungo donda ere kogova rate iji puvutohururou kitoho na puvuto taro koro nei na koro nei ta hamo ta mane tembeto iresuja te tapa arara eto veasuja” ainge enu.

Osaga memenga kiari puvuresuja

(Matthew 24:3-14; Mark 13:3-13)

7Enana ingito ke einge eto ingia, “Ahe poekari embo ari erevi iji deina puvurou, eto puvuresuja amita hajire amo do kioro?” ainge eo 8Iesu na ke einge ena, “Eto embo nei nei na ke sokova ijiroro ingihe ambo ambo avojo amo embo nei na ‘Na ungota orekari embora’ ainge ijiroro embo nei na ‘Iji puvuto ere hua’ ainge ijiroro ingihe ambo ambo mane aisova. 9Eto ungo isoro ta duru hoi ta eto asa ta ingesova avo ungo joru avojo eto iji kombu puvurae iresuja amikote isoro avo einge aisora. 10Enda nei na ereto enda nei ga isoro aisora eto king nei na ereto king nei taisuja. 11Eto titira pajire be te beuje te ambure iji te enda nei ta puvurou uhu ta hajire nei kogue joru pajire be aisora. 12Rate ari erevi puvurae kihi ta amo embomeni na ungo andito humbuto aro osaga kogurovo humbuto ke kasari bande ta iketo ganoka eto humbuto tipura ta ikasora. Eto namo avoembo ungo humbuto gavana ta eto king ta tihi ta ikaro hetasova, 13iji amikote ke nau hande evu ingore. 14Eto ke ae kihi ta ke do aisova avo kihi ungo oenga mane sirikasova 15te ungo hetari iji te nanena ungota jo ta ke te kiari te ikano ijirovo ungota kitoho na ingito ke mine ari inono ae aisora. 16Eto ungota emone mamone te namei kamei te du e te da vahai embomeni te na ungo humbuto kitoho embo ta ingeni ta ikaro ungo nei nei amo taro pehasova. 17Eto ungo javo nau avoeto embomeni tapa na ungo uje ae aisora 18rate no siro hu vahai amina mane irae aisuja te 19ungo ngahia eto mihima vasiri be avo humbasova.

Da Jerusalem taro irae aisuja

(Matthew 24:15-21; Mark 13:14-19)

20Rate da Jerusalem ta kitoho embomeni na isoro asi joeketo mihima Jerusalem taro irae aisuja amita iji puvuto ere hua avo kesova. 21Eto ainge kito evujo Judea ei ta mihera embomeni joru tiri ta pahuroro da jo ta mihera avo toto pahuroro eto da engihita mihera avo da jo ta mane horare. 22Iji amo God na Israel ta degi hajire ikasuja iji avo mahu kajari mihia 23eto evohu urete te amita degi eto meni eha ingeto emi kajihia amita degi aja to erena. Iji amikote God na Judea embomeni ta degi tumo ue hajire au koguroro Judea enda embomeni tapa na osaga kesora. 24Enana avo asivo na kakajekaro pehihiroro embo nei andito humbuto enda tapa ta pambasora. Eto enda nei na Jerusalem torue God na enda nei ta degi iji ikari avo irae ururou toasora.

Embo ta Meni ta puvurari

(Matthew 24:29-31; Mark 13:24-27)

25Eto iji ta hariga ta eto kuro ta kiari hajire nei kogue eva ta vasiri peni vahai ururou hindu pajire be avo enda tapa na ingihe mana mana ue joru aisora. 26Eto uhu ta donda iraguja amina jahevihirou embo na kito enda ta do ere puvutuhua avo hotembu hotembu ue joru ururoro tihivina humbuto gosukau veasuja. 27Eto embomeni na Embo ta Meni avo johi jo ta sovera te usasa isapamane te puvutuhurou kesora 28avoeto ari erena avo ihiketo puvutohururou arerembeto kogue irivujo, ungota orekari iji puvuto ere hua avoeto.” ke ainge eto.

Ji junga ta ari hotembevu

(Matthew 24:32-35; Mark 13:28-31)

29Enana ta degi timu hatirari ke na einge ena, “Ji junga te ji nei uhoho amite tapa kogue hotembevujo. 30Eto amita hatu ta ope eto iki vujekaguja amo amita be ari iji auvaguja 31ainge iteko ari erena amo tapa puvutuhurou kogue amo God na enda tihi jigesuja iji amo auvehija ke evujo. 32Na ungota degi ke be na erena embomeni tapa mane sasari aisora te ari emo puvurou kesora. 33Eto uhu te enda te avo irae aisuja te ke nau avo eho mane irae aisuja.

Be kogue irivujo

34Rate enda ta gamo osaga neite neite amina hini pe vihou tihivi ururou irirovo amo vage ta o teaguja aingeko dombo iji kombu puvuto vage ta o tarako aisuja avoeto be kogue irivujo, 35amo enda tapa embomeni ta degi puvuresuja 36ari tapa erevi puvuto ere hua avo tiumbeto pambuto Embo ta Meni ta tihi ta hetasova avo ngahia ra avoeto God ta degi sovera ari kaiketo penunu ijie kogue irivujo,” ainge Iesu na ena. 37Eto iji tapa amo Iesu na temple jo ta embomeni ahe ere poekihoi iji vouvoi pambuto da vahai tiri javo olives engihita kogombari ai ere eviahija. 38Eto iho be te embomeni tapa na Iesu ta ke ingesi temple jo ta ere horihahera.

Zur Zeit ausgewählt:

Luke 21: OKVH

Markierung

Kopieren