लूका 20

ईसु राः अधिकार राः बारे ते सवाल

(मत्ती 21:23-27; मरकुस 11:27-33)

1एक दिन राः दिन रे ईसु मँडिल रे होड़कुय चेड दोहो एनु, अवुर बढ़ियाँः खभेरिय लाय दोहो एनु। बड बडे आजककू, अवुर एहूदी नियम चेचेडकू, अवुर सपायँड़कू मेजकेन ते हेंय बँदे रेकू चड़ाँ यनु। 2तहाँ कू होंबोर तेडिया, “अलेम लायवा, अम नआँ काम लगड अधिकार ईया ओवाड मिआँ, ईया राः अधिकार ते नआँ सींड़ मी काम यडा?” 3तहाँ हेंय हेंकुय जबाब वडा, “इंञ हो अपे मियाँटंग टेबोईंञ होंबोर यडपेआ, अपे लायेपे। 4एहुन्‍ना बतिस्माय एमतेडा, हेना सरग हनवरी दोहो एना, किदो होड़कू हनवरी दोहो एना?” 5हेना वरी अनाकू अनाकू होंबोर ओड़ेंग दोहो एनु, “अबू कहनियूँ, ‘सरग हनवरी दोहो एना,’ मेंडे रेदोय कहनी वबुआ, फेर ‘अपे हेंय राः ची लगड मेने पे बिसवास गडा?’ 6अबू कहनियूँ, ‘होड़कू हनवरी दोहो एना,’ मेंडे रेदो सींड़ होड़कू अबू दिरी तेकू ञेंड बुआ, कहेकि नेकू होड़कू सींड़ कुकू बिसवासेआ कि एहुन्‍ना भविस्यवक्‍ता दोहो एना।” 7तहाँ हेंकू ईसु कू जबाब वडा, “अले मेने ले पपाड़िआ, एहुन्‍ना अधिकार ईया ओवाडिया।” 8हेना वरी ईसु कहनी तेडा, “हेंडे दो इंञ हो अपे एरोंञ लाय वडपेआ, नआँ काम ईया राः अधिकार तेंञ करो यडा।”

दुस्ट किसानकू राः उदाहरड़

(मत्ती 21:33-46; मरकुस 12:1-12)

9हेना वरी ईसु होड़कू थरे मियाँटंग उदाहरड़िय कहनी तेडा, “मियाँहोड़ होड़ अंगूर राः बगानिय लगो तेडा। हेना वरी ठिका ते देख रेखे लगड किसानकू थरेय जिमा अटु केते, अखीर दिन लगड एटाः देस हनतेय चलो एना। 10हेना वरी अंगूर गोड राः समय मेजेना, तहाँ बगान राः कुछ हिसत असी लगड किसानकू थरे मियाँहोड़ हरवाहिय कुलतेडा। हेना वरी हेंकू किसानकू ञेंड बेड़ा वडिय ते एके ती तेकू कुल गोत्तेडियू। 11हेना वरी फेर हेंय होड़ एने टगी हरवाहिय कुलतेडा, हेना वरी हेंय हो ञेंड बेड़ा वडिय ते अवुर मजाक कू उड़ो केडिय ते एके तेकू कुल गोत्तेडियू। 12हेना वरी हेंय होड़ फेरेच मियाँहोड़ हरवाहिय कुलतेडा, हेना वरी हेंय हो हेनेन घयतेकू ञेंड दलमुला केडिय तेकू उडूंग गोत्तेडियू,

13हेना वरी अंगूर बगान रेनिय मुँवर तू मने मन रेय कहनी तेडा, ‘इंञ चिंञ बनोआ? इंञ दुलारिया कोड़ा होपोनींञ हेंकू थरेंञ कुलेया, हेंय दोकू आदारिया जहानू।’ 14मेनते पसींद केते अपन दुलाराय कोड़ा होपोन तुय कुलतेडा। हेना वरी किसानकू ञेंलकेडिय ते अनाकू कहनी ओड़ेंग एना। ‘अपत राः मे-नी राः हाँथ गाँथ होयाआ, हेनाते नेय ञेंड गोजेय बू, हेना वरी अंगूर बगान अबू राः हाँथ गाँथ रे होयाआ।’ 15अवुर हेंकू अंगूर बगान वरी तीड़खो उडूंग केडिय तेकू ञेंड गोज तेडिया। दो निहों अंगूर बगान रेनिय मुँवर तू हेंकुय ची कुआ? 16हेंय मेजकोः ते हेंकू किसान कुय नास कुआ, अवुर अंगूर बगान एटाः किसान कुय जिमा वआ।” हेना वरी अअँजोमकू होड़कू कहनी तेडा, “भगवान न घयते कभी एरोय ईकावडा।”

17हेना वरी ईसु हेंकू हनते तको केतेय कहनी तेडा, “फेर धरमग्रंथ रे लिखल इदाना, ‘जे दिरी राज मिस्तीरिकू बढ़ियाँ कोवाः मेनते कू मेरंग वडा, हेनेना दिरी कोना राः बनो एना।’ 18अवुर कनय हेना दिरी#20:18 नआँ दिरी ईसु मसीह दरसो यडा, ईसु मसीह कू मेरंगवाः हेंकू दिरी रे लोजोरुः घयगी अकू। रेय लोजोरुः रेदो, हेंय राई छाई अयू, अवुर कनय थरे हो हेना दिरी लोजोरुः रेदो, हेंय लेंगेज चुवेरूअयू।”

रोमि सरकार लगड मलगुजारी

(मत्ती 22:15-22; मरकुस 12:13-17)

19एहूदी नियम चेचेडकू, अवुर बड बडे आजककू हेंय हेनेन तोलोग सबेय मेनते कू सँबह तना, कहेकि हेंकू पपाड़ियन किदो अबू पसींद केते नआँ उदाहरड़िय कहनी तेडा, लेकिन होड़कू कू बोरो वडा ते मेने कू सबगाडिया। 20हेंकू ईसु कनर न कनर टेबोः रे गलती रे लोजोर केय ते, रोमि राजपाल थरे एर पकड़ोविय राः मोका कू ञँम बेड़ा दोहो एनु। नआँ लगड एहूदी होड़कू रेनकू नेताकू टेबोः चोरा लगड सही मेते ईसु राः टेबोः अअँजोमकू राः भेस तेकू कुलतेड कुआ। 21टेबोः चोचोराकू हाँःतेकू होंबोर तेडिया, “ए गुरू, अले पपाड़ीः तना ले अम बढ़ियाँ तेम लायेआ, अवुर मी चेडयड कुआ, अवुर कनय गतर हँडे मेनेम मेड़वाआ, अवुर भगवान राः होर सही सही तेम लाय वकुआ। 22अलेम लायवा कयसर लगड मलगुजारी एम जयेज इदाना किदो कोवाआ?”

23हेंय हेंकू राः हुसयारी ञेंल तेय कहनी तेडा, 24“एक दीनार#20:24 एहूदिकू राः एक दिन राः बनी राः सिक्‍का इंञ पे ओवा। ना रे ईया राः छाप अवुर ञुमू इदाना?” हेना वरी हेंकू कहनी तेडा, “कयसर रआ।” 25हेना वरी हेंय कहनी तेडा, “कयसर जो कुछ पे ओवाआ हेना कयसर पे ओवा, भगवान जो कुछ पे ओवाआ, हेना भगवान पे ओवा।” 26हेंकू होड़कू मड़ंग रे न टेबोः ते मेने कू पकड़ो सको गना, अवुर हेंय राः जबाब अँजोम केते अहचरज यन तेकू जपनो यनु।

जियो रिमुआँ अवुर बियाह राः बारे ते

(मत्ती 22:23-33; मरकुस 12:18-27)

27 # परेरित 23:8 सदूकिकू गोजकोः वरी एरो कू जियो रिमेना मेनते बिसवासेःकू दोहो एना। हेंकू मेंडे रे कुछ होड़कू ईसु थरे मेजकेन तेकू होंबोर तेडिया। 28“ए गुरू, अबू लगड नआँ घयते मूसा नियम लिखो केतेय एमकेडा, अगर कनय होड़ बेगर चोंडिजकू जनमो ते इंगत कुय गोज उर अटु रे, हेंय कोड़ीहोन ईरविल तू बियाहियू, अवुर हेंय मगत लगड चोंडिज कुय जनमो। 29मियाँटंग गाँव रे सात झन मगियाकू दोहो एना, बडेअय मगत कू बियाह एनायू, अवुर हेंय बेगर चोंडिज तेय फटियो यनु। 30फेर मंझला अवुर संझला हो हेंय कोड़ीहोन कींञ बियाह तेडिया। 31हेन हेन याःते सातो झन ईरविल तुकू बियाह तेडिया, अवुर बेगर चोंडिज तेकू गोजियानू। 32हेना वरी हेंय कोड़ीहोन होय गोजियानू। 33दो जियो रिमुः रे हेंकू मेंडे रे काय कन्याँय होयाआ, कहेकि हेंकू सातो झनकू कन्याँ तेडिया।”

34हेना वरी ईसु हेंकू थरेय कहनी तेडा, “नआँ दुनिया रेदो होड़कू बर बियाहुआ। 35सरग राज रे जे भगवान सुदा दोहोन लायिक इदाना, हेंनकू गोजकोः वरी जियो रिमुआ, अवुर हेनारे हेंकू एरो कू बर बियाह एना। 36अवुर गोजकोः वरी भगवान जियो केडकुआ, हेनाते हेंकू भगवान रेनकू चोंडिजकू हवे। अवुर हेंकू सरगदूतकू घयतेकू दोहोना, अवुर कबोह एरो कू गोजेना। 37गोजकोः वरी जियो रिमुआँ मेनाआँ टेबोः मूसा होय लाय केडा, जब हेंय झवुड़ सलगो एना, हेना राः बारे तेय लिखो केडा, हेना तोलोग मूसा, अबराहम रेनिय भगवान, इसहाक रेनिय भगवान अवुर एकूब रेनिय भगवान मेनतेय हाक दोहो एनु। (हेना तोलोग अबराहम, इसहाक अवुर एकूब पहील तेकू गोजताना)। 38भगवान गोजकेनकू रेनिय न लगे, हेंय दो जीवतकू रेनिय भगवान हवे, कहेकि हेंय नँजेर रे सींड़ कुकू जीवत गिआ।”

39नआँ टेबोः अँजोम केते एहूदी नियम चेचेडकू मेंडे कुछ होड़कू कहनी तेडा, “ए गुरू, अम नआँ बढ़ियाँ तेम कहनी तेडा।” 40फेर हेंकू अवुर होंबोरिय लगड मेने कू हियो गडा।

मसीहा ईया होपोन हवे?

(मत्ती 22:41-46; मरकुस 12:35-37)

41हेना वरी फेर ईसु हेंकुय होंबोर तेडा, “मसीहा#20:41 मसीहा मतलोब भगवान चुनो केडिया राजा दाऊद होपोन मेनते ची लगड कू कहनी वया? 42दाऊद अनानेज सिरिंग कागद रेय कहनियाँ, ‘परभु ईञाअय परभु थरेय कहनी तेडा, 43इंञ अमाःकू दुस्मनकू अनायिन हरो कू मेन दिन ईञाः जोम गतर आदर इजेत राः जघा रेम दुड़ूबु।’ 44दाऊद अनेज मसीहा दो परभु मेनतेय कहनी वया, हेंडे दो फेर हेंय होपोन काःतेय होयाआ?”

एहूदी नियम चेचेडकू वरी सँवचेती ते दोहोनू

(मत्ती 23:1-36; मरकुस 12:38-40; लूका 11:37-54)

45नआँ टेबोः सींड़ होड़कू अँजोमे तोलोग हेंय चेलाकू थरेय कहनी तेडा, 46“एहूदी नियम चेचेडकू वरी सँवचेती तेपे दोहोनू। नेकू जोंगोर जोंगोरा कपड़ा तुसींञ केते होयोर बेड़ाः बढ़ियाँ वकुआ। अवुर बाजार ते एटाःकू जोहार वकुआ, हेना अवुर आराधना ओड़ाः ते, अवुर खवा पिवाः जघा ते मड़ंग हँडे दुड़ूब बढ़ियाँ वकुआ। 47नेकू एकल कोःकू रआ अन धन होकू छरो जोमा, ञेंलेंञ मेनते दो मसत जुवर मेनते कू बिनतिआ। भगवान नेकू अखीर ते सजाय ओवा कुआ।”

Zur Zeit ausgewählt:

लूका 20: ksz

Markierung

Kopieren