लूका 19

जक्‍कई राः मन ईसु ञेंलके ते बदलो जोमा

1ईसु एरीहो सहर बोलो केनतेय खँडाः दोहो एनु। 2हेना रे जक्‍काई मलगुजारी तिलाकू रेनिय मुखियाय दोहो एना, हेंय धनमानिय दोहो एना। 3ईसु काय हवे मेनते ञेंलेय लगड जक्‍कई पसींद तेडा। लेकिन हेंय भीड़ राः चलते ते मेनेय ञेंल सको गना, कहेकि हेंय नटवय दोहो एना 4तहाँ हेंय ञेंलेय लगड मड़ंग हनते हुंको सेनकेन ते मियाँटंग डुमरी काठ रेय रकब यनु, कहेकि ईसु हेनेन गलि तेय सेनुः दोहो एनु। 5ईसु हेना जघाय तयाःतेड सी, अगस हन ञेंल केडते हेंयिय कहनी वडू, “ए जक्‍काई, हली तेम अगड़ुऊ; कहेकि तेसींञ इंञ अम ओड़ाः रे दोहोन जरूरी इदाना।” 6तहाँ हेंय तुरेत्तेय अगड़ू एना, अवुर खुसी यनते अनेज ओड़ाः हनतेय गोःतेडिया।

7हेना ञेंलते सींड़ होड़कू कुरू बुसू केनतेकू कहनी तेडा, “मेय दो मियाँहोड़ पापी ओड़ाः रेय सेन उतरो केना।” 8हेना वरी चड़ाँ केनते जक्‍काई परभु थरेय कहनी तेडा, “ए परभु, अँजोम मी, ईञाः अदहा सम्पत्ति गरीब होड़कुंञ ओवाआ। अगर कनय राः ठको केडकू तेंञ अँगेर केड रेदो हेंकू चार गुनांञ मिड़ाः वकुआ।”

9तहाँ ईसु कहनी तेडा, “तेसींञ अमाः अवुर अपे ओड़ाः रेनकू राः पाप वरी माफी ञँमियाना, अम अपन काम तेम तिबकेडा, अम हो अबराहम घयते भगवान थरेम बिसवास केडा। 10#मत्ती 18:11कहेकि होड़ होपोन अड यनकू छपा लगड अवुर हेंकू बंचो कू लगाडिय मेजकेना।”

दस गोटंग चाँदी राः सिक्‍का

(मत्ती 25:14-30)

11ईसु जो कुछीय कहनी दोहो एनु, हेना होड़कू अँजोमे दोहो एनु। हेंकू एरुसलेम कू तयाः दोहो एनु, ईसु हलिते राजा बनो कोःते भगवान राः राजीय बोंहड़िआ मेनते कू अड़ींग दोहो एनु। हेनाते ईसु मियाँटंग उदाहरड़िय कहनी तेडा। 12ईसु कहनी तेडा, “मियाँहोड़ राजा होपोन राजा बनो कोःते मिड़ाः मेजुः लगड सगींञ देस हनतेय चलो एना। 13चलोः वरी पहील ते अपन हरवाहकू मेंडे हेंय दस झन हरवाह कुय राःतेडा। अवुर हेंकू चाँदी राः कुछ सिक्‍काय ओवड कुआ, तहाँ हेंकू थरेय कहनी तेडा, ‘इंञ अनायीनिंञ मिड़ाः मेजुः मेन दिन अपे लेन देन कोःते पे बढ़ो हताड़े।’ 14लेकिन हेना सहर रेनकू हेंय मेने कू बेस गडिय दोहो एनु, तयोम ते खभेरियाकू थरे नआँ याःते खभेर कू कुलतेडा कि मेय अले थरे राजे लगड मेने ले चहोः तना मेनते।”

15“हेंडे रेहो हेंय होड़ राजा बनो केनतेय मिड़ाः मेजेना, तहाँ सिक्‍काय ओवड कुआ, हेंकू तीमिन कू कमाय केडा मेनाआँ पपाड़ी लगड दसो झन हरवाहकू अनेज थरेय एर राःतेड कुआ। 16हेना वरी मड़ाँगअय मेजकेन तेय कहनी तेडा, ‘ए मालिक, अम ओवाडिञाँ सिक्‍का ते अवुर दस गोटंग सिक्‍कंञ कमाय केडा।’ 17तहाँ हेंय हेनी थरेय कहनी तेडा, ‘अम आसीस मी ञँमकेडा, ए बढ़ियाँअय हरवाह! अम दमभराआ रे घलि ईमानदार मी उडूंग एना, अब वरी अम दस गोटंग सहर रेम राजे।’ 18हेना वरी अवुर मियाँहोड़ मेजकेन तेय कहनी तेडा, ‘ए मालिक, अम ओवाडिञाँ सिक्‍का ते अवुर पाँच गोटंग सिक्‍कंञ कमाय केडा।’ 19हेना वरी हेनी थरे होय कहनी तेडा, ‘अम हो पाँच गोटंग सहर रेम राजे।’ 20हेना वरी अनावुर मियाँहोड़ मेजकेन तेय कहनी तेडा, ‘ए मालिक, अम ओवाडिञाँ सिक्‍का नेयाना, नआँ इंञ सफी रे घंटी केतेंञ दोहो तडा। 21इंञ आमींञ बोरोवा दोहो एनु, कहेकि अम खतरनाक होड़ हवे, जहाँ रे मेनेम दोहोया, हेना वरिम रिम गोगेआ, अवुर अम मेनेम मे-रेआ हेना वरी होम ईरेआ।’ 22तहाँ हेंय हेनी थरेय कहनी तेडा, ‘ए दुस्ट हरवाह, इंञ अनामाः टेबोः तेंञ बदी यडमिआँ। अम पपाड़ी दोहो एनु, इंञ खतरनाक होड़ हवे, जहाँ रे मेनेंञ दोहो तआ, हेना वरी होंञ रिम गोगेआ, अवुर जहाँ रे मेनेंञ मे-रेआ हेना वरी होंञ ईरेआ; 23दो अम ईञाः पेयसा बेंक रे ची लगड मेनेम दोहो गडा? इंञ मेजकेन ते ब्याज तू सुदांञ तिला तेड मेनू?’ 24अवुर जे जे होड़कू ठाँव रेकू चड़ाँ तना, हेंकू थरेय हेंय कहनी तेडा, ‘मेना सिक्‍का मेय वरी पे असियू, जे थरे दस गोटंग सिक्‍का इदाना हेंय पे ओवा।’ 25हेना वरी हेंकू मालिक थरे कू कहनी तेडा, ‘ए मालिक, मेय थरे दो दस गोटंग सिक्‍का इदाना।’ 26#मत्ती 13:12; मरकुस 4:25; लूका 8:18हेना वरी राजा कहनी तेडा, ‘जे थरे इदाना, हेंय अवुरिय ओवाया, अवुर जे थरे कोवाआ, हेंय थरे जो कुछ इदाना, हेना होय अँगेर अविया। 27#मत्ती 25:14-30ईञाःकू दुस्मनकू अकू थरेंञ राजे लगड मेने चहो गनकू, इंञ मड़ंग रे अक्‍के कुते पे ञेंड गोजकू’।”

एरुसलेम रे ईसु कू आदर इजेत तेडा

(मत्ती 21:1-11; मरकुस 11:1-11; एहुन्‍ना 12:12-19)

28नआँ टेबोः कहनी केते ईसु चेलाकू सुदा एरुसलेम सहर हनते चलोः तोलोग हेंकू मड़ंग मड़ंग तेय से-ने दोहो एनु। 29हेना वरी ईसु जयतुन मेनते कू कहनी वआ हेना रे, बयेतफगे अवुर बयतानियाह गाँव बँदेय तयाः तेडा, दो ईसु बा होड़ चेला कींञतय थरे न याःते कहनी केतेय कुलतेड किञाँ। 30“मेना मड़ंग हँडाः गाँव रेबा सेनुऊ, अवुर जेयसे हेना बा तयाः सी, मियाँटंग गदही होपोन बा ञाँमा, हेंय थरे कनय बेगर घोड़ा बेड़ाआ। तोलकेडिया कू हेंय लड़ा केते बा अगेयू। 31अगर कनय होड़कू, ‘ची लगड बा लड़ा यडिया’ मेनते कू होंबोर बा रेदो, न याःते बा कहनियूँ, ‘परभु ईसु लगड नेय राः जरूरत इदाना।’ ”

32कुलतड कींञ हेंकींञ चेला कींञ ईसु जेयसे हेंकींञ थरेय लाय तेडा, हेनेन घयते गदही होपोन तोलताडिय घनी कींञ ञँमतेडिया। 33तहाँ हेंकींञ गदही होपोन कींञ लड़ा तोलोग मुँवर तुकू होंबोर तेडकिञाँ, “नेय गदही होपोन ची लगड बा लड़ा यडिया?” 34हेना वरी हेंकींञ कहनी तेडा, “परभु ईसु लगड नेय राः जरूरत इदाना।” 35हेना वरी हेंकींञ लड़ा केडिय ते, ईसु थरे कींञ इदी तेडिया, तहाँ गदही होपोन थरे अपन कपड़ा तकुकू लदगो तेडा, अवुर ईसु हेंय थरेय दुड़ूब एना। 36हेना वरी ईसु एरुसलेम सहर हनतेय सेनुः तोलोग भीड़ रेनकू होड़कू कपड़ा तकू होर तेकू बीले दोहो एनु।

37हेंकू जयतुन काठ इदाना, हेना बुरू राः उतरान्ती बोंहड़िआ, हेना जघा वरी सींड़ चेलाकू अपन मेड ते चमत्कार काम कू ञेंलताडा हेना राः चलते ते, खुसी यनते बडे बडे तेकू सिरिंग एना, अवुर भगवान राःकू बड़ाई तेडा।

38“परभु राः ञुमू तेय मेजुः तना हेनी राजा आसीसिय ञँमकेडा, अवुर होड़कू मँझर रे सान्ति दोहोनू, अगस रे भगवान राः बड़ाई होयाऊ!”

39तहाँ भीड़ वरी कुछ फरीसिकू ईसु थरे कू कहनिय दोहो एनु, “ए गुरू, चेला कुताम मी दाबेटू।” 40हेना वरी हेंय जबाब तेडा, “इंञ अपे थरेंञ कहनी यडा, अगर नेकू जपनो कोः रेदो इंञ लगड दिरी घलि बड़ाई वञाँ।”

ईसु एरुसलेम रेनकू लगाडिय पसतो एना

41ईसु एरुसलेम सहर बँदेरिय तयाःतेड दो, एरुसलेम सहर ञेंलके तेय ईयाम एना। 42अवुरिय कहनी तेडा, “भगवान सुदा सान्ति ते दोहोन हेना टेबोः तेनेसिंञ पे पपाड़ी एन रेदो बढ़ियाँ दोहोएन मेनू, लेकिन अब वरी सींड़ टेबोः भगवान अपे वरिय उकू गोत्तेडा। 43कहेकि एयसा दिन मेजुआ, अपे रेनकू दुस्मनकू चारियो गतर वरी कू घेरो केपे तेकू बन्द पेआ। 44अपे अवुर चोंडिजकू अपे सुदा कू दोहोना, हेंकू नास केकू ते हास रेकू मिलो कुआ, अवुर नआँ राः सींड़ ओड़ाः कू नासेआ। दिरी उपर दिरी हो एरो दोहो एना, कहेकि अपे भगवान बंचो पे लगड मोकय ओवड पेआ, हेना अपे मेने पे चिन्हो गडा।”

मँडिल वरी बेयपारी कुय उडूंग तेडा

(मत्ती 21:12-17; मरकुस 11:15-19; एहुन्‍ना 2:13-22)

45हेना वरी ईसु एरुसलेम राः मँडिल रे सेनकेनते केकेजाकू बहेर हनतेय उडूंग कू दोहो एनु। 46अवुर हेंकू थरेय कहनी तेडा, “धरमग्रंथ रे लिखल इदाना, ईञाआँ ओड़ाः बिनतिआ ओड़ाः कहोआ, लेकिन अपे नआँ लुटेरकू राः अड्डा पे बनो गोत्तेडा।”

47 # लूका 21:37 हेंय रोज दिन मँडिल रे सिक्छाय चेडकू दोहो एनु; अवुर बडे बडे आजककू अवुर एहूदी नियम चेचेडकू अवुर होड़कू रेनकू एटाः एटाः नेताकू हो ञेंड गोजेय मेनते मोका कू ञँम बेड़ा दोहो एनु। 48लेकिन हेंकू न घयते करोवे लगड कनर मोका मेने कू ञँमगाडा, कहेकि सींड़ होड़कू मन लगय ते हेंय राः टेबोः कू अँजोम दोहो एनु।

Zur Zeit ausgewählt:

लूका 19: ksz

Markierung

Kopieren