लूका 2

ईसु राः जनम

(मत्ती 1:18-25)

1हेन तोलोग सींड़ रोम देस रेनकू होड़कू, अपन अपन ञुमूत कू एर लिखो लगड रोम देस रेनकू राजाकू वरी बडेअय राजा अवगुस्तुस कयसर हुकूम तेडा। 2किवरिनियुस सीरिया रेनिय बडेअय अधिकारिय दोहोएन तोलोग, नआँ सुरवात जनगड़ना होया एना। 3सींड़ होड़कू ञुमू एर लिखो लगड अपन अपन गाँव कू चलो एना।

4उसुफ दाऊद खुटी खनदान अवुर बंस रेनिय दोहो एना, हेनाते गलील जिला राः नसरेत सहर वरी एहूदी देस रे दाऊद राजा बडे एन हेना सहर बयतुलामिय सेनेना। 5मरियोम उसुफ लगड कू असी तडिया, अवुर हेंय दोहरी देंह रेय दोहो एना। हेंय सुदा ञुमू एर लिखो लगड कींञ सेनेना। 6हेन हँडे दोहोएन तोलोग, मरियोम राः दिन पुरती होया एना। 7मरियोम अगुल बेटाय हँबुड तेडा, अवुर हेंकींञ धरम साला रे दोहोन लगड जघा मेने कींञ ञँमगाडा। हेनाते बले कपड़ा ते भेंटो केडिय ते चरनी#2:7 माल मोसी कू चरा कू ओवा कुः हेना जघा रेकींञ गितीज तडिया।

सरगदूतकू भेड़ी चरवाहकू खभेर कू लाय वडकुआ

8हेना देस रे ञींद, केय्यो झन गयरकू खुधे खुधा ते डाँड ओत रे अपन अपन भेड़ी कुकू पहरा दोहो एनु। 9अवुर परभु रेनिय सरगदूत हेंकू थरे अचाकतेय मेजेना, हेन तोलोग हेना रे परभु राः इंजोर हेंकू राः चरियो गतर हँडे चमको एना, तहाँ हेंकू अखीर कू बोरो यनु। 10हेना वरी सरगदूत हेंकुय कहनी वडा, “अलोपे बो-रू; अँजोम पे, इंञ सींड़ होड़कू राः जीव बहालुः हेना खभेरिंञ अगकेडा। 11तेसींञ अपे लगड दाऊद राः सहर रे उऊबराय जनम केना, अवुर ने-नी मसीहा हवे, अवुर अपे रेनिय परभु हवे। 12अवुर हेंय राः निसाना हाँः तेपे ञाँमेआँ, मियाँटंग चोंडिज कपड़ा तेकू भेंटो केडिया, अवुर चरनी रेपे ञमेयाँ।”

13तहाँ अचाकते हेंय सरगदूत सुदा, अखीर बगरा सरगदूतकू भगवान राःकू स्तुति दोहो एनु, अवुर हाँःतेकू कहनिय तोलोग कू ञेंलवड कुआ। 14“पिरथी रे भगवान राः महिमा होयाऊ, धरती रे जे होड़कू थरे खुस इदानिया, हेंकू जीवित कुय असतीरा।”

चरवाहकू बयतुलम कू सेनेना

15सरगदूतकू सरग हनतेकू चलोएन सी गयरकू कहनी ओड़ेंग एना, “दूबु, परभु लाय वडबुआ, हेना टेबोः बयतुलम सेनकोः तेबू ञेंल अगुयू।” 16अवुर तुरेत्ते हेंकू सेनकेनते मरियोम अवुर उसुफ, बले चरनी रेकींञ गितीज तडिय तोलोग कू ञेंल ञँमतेडिया। 17गयरकू हेंय बले ञेंलकेते, सरगदूत हेंकू थरेय लाय तडा, हेना टेबोः होड़कुकू लाय वडा। 18अवुर सींड़कू अअँजोमकू गयरकू लाय तेड हेना टेबोः तेकू अहचरज यनु। 19नआँ सींड़ टेबोः मरियोम मने मन रे दोहो केतेय पसींदे दोहो एनु। 20अवुर जेयसे गयरकू थरेय लाय तडा, हेनेन घयते सींड़ ञेंलकेड अँजोम केते, भगवान राः महिमा अवुर बडेय बेड़ा वडिय तेकू मिड़ा एना।

ईसु कू ञुमू तेडा

21 # लूका 1:31 हेंय बले राः आठ दिन पुरो एना, तहाँ हेंय राः खतनाय राः समय होया एना, तहाँ हेंय ईसु मेनते कू ञुमू तेडिया, नआँ याःते ञुमूय लगड सरगदूत मरियोम थरे असापति एन वरी मड़ंग तेय लाय तडा। 22मूसा राः धरम नियम राः अनुसार ते मरियोम सूधुः राः दिन पुरो एना, तहाँ ईसु परभु थरे जिमाय लगड एरुसलेम कींञ इदी तेडिया। 23परभु राः नियम रे नआँ याःते लिखल इदाना, “हर एक अगुल बेटाकू परभु लगड हिगरो कुपे।” 24अवुर परभु राः नियम राः अनुसार ते मियाँ जोड़ा पनकी कींञ चहे बाटंग परेवाँ होपोन कींञ अक्‍के तेकू बलिदान किञूँ।

सिमोन राः सीरिंग

25एरुसलेम रे सिमोन मेनते कू ञुमू तडिया, हेनी मियाँहोड़ धरमी होड़#2:25 भगवान राः नँजेर रे मेनेय पापेः हेंय कू धरमी वआ। दोहो एना, अवुर भगवान नियम एमकेडा, हेनय मनोवे दोहो एनु। अवुर हेंय थरे पवितर आत्मा दोहो एना, अवुर इसराएलिकू उबर हेंयिय तँगी दोहो एनु। 26अवुर अम परभु रेनिय मसीहा ञेंलके बिना एरोम गोजेना मेनते, पवितर आत्मा पहील ते लाय मड़ंग वडिया। 27एक दिन राः दिन रे पवितर आत्मा, सिमोन मँडिल रे सेनुः लगड कहनी वडिया। हेन तोलोग नियम इदान घयते करोवे लगड इंगत अपत ईसु भीतर कींञ अदीर तेडिया।#2:27 एरुसलेम रे एहूदिकू राः आराधनाः हेना जघा, ना रे बलिदान होकू रकाबेआ। 28तहाँ सिमोन अपन कोरा रे ईसु सिपींञ केडते भगवान धन्यावादिय ओवाडिया, अवुरिय कहनी तेडा, 29“परभु, अम इंञ थरेम कहनी तेडा, हेन घयतेम करो केडा, इंञ अमाअय सेवेखिया सान्ति राः साथ तेम बिदा गोत्तेञूँ। 30जे होड़ अम होड़कू उबर लगड मी कुलकेडिया, निहों हेंय अपन मेड तेंञ ञेंलकेडिया। 31नेय सींड़ देस रेनकू होड़कू उबर लगड अम पसींद अगतेडा। 32नेय चोंडिज भगवान राः होर तिब लगड सींड़ जातकू लगड इंजोत होयाआ, अवुर इसराएली होड़कू थरे नेय राः चलते ते भगवान राः मान मरजाद होयाआ।”

33नआँ टेबोः अँजोम केते हेंय इंगत अपत एडकींञ अहचरज यनु। 34सिमोन हेंकींञ आसीर्वादिय ओवड किञाँ, हेना वरी ईसु इंगत मरियोम थरेय कहनी तेडा, “अँजोम मी, नेय बले राः चलते ते अबू कुछ इसराएलिकू बंचोअकू। लेकिन नेय थरे मेने बिसवासेःकू बिलोअकू। नेय बले भगवान राः होर तिब लगड मियाँटंग चिनहाँय होयाः तना। नेय मान मनिस तेकू बदीया, 35हेनाते अखीर होड़कू मन रेकू पसींदेः हेना नेय राः चलते ते देखारूआ। अवुर जीविम अखीर ते लो-आ।”

हन्‍ना राः गोवाही

36मियाँहोड़ हन्‍ना मेनते कू ञुमू तडिय हेनी कोड़ीहोन दोहो एना। नेय भविस्यवक्‍तिन दोहो एना, नेय चवरासी बरिस रेनिय दोहो एना, नेय फनुएल कोड़ी होपोन असेर गोति रेनिय दोहो एना। नेय अखीरिय बुढी यन दोहो एनु। अवुर बियाह केनते सात बरिस अँगम अपत कू सुदाय दोहो एना, तहाँय एकल यनु। 37नेय मँडिल मेनेय बगी बेड़ा गडा, सींञ ञींद उपास अवुर बिनती कोःते भगवान राः सेवा रेय दोहो एना। 38हेन तोलोग हन्‍ना ईसु इंगा अपा थरेय मेजेना। अवुर परभु धन्यावादिय ओवाडिया। जे जे एरुसलेम रेनकू उऊबराय कू तँगी दोहो एनु, हेंकू हन्‍ना ईसु राः बारे तेय लाय वकू दोहो एनु।

नसरेत कींञ मिड़ाः एना

39 # मत्ती 2:23 ईसु इंगा अपा परभु एमकेडा हेना नियम राः अनुसार ते सींड़ चीज कींञ करो केते गलील जिला रे अनाकू सहर नसरेत कींञ मिड़ाः एना। 40लगे चोंडिज बडेऊ, अवुरिय जँगाड़ुऊ, अवुरिय कनहून एना, अवुर भगवान राः किरपा हेंय थरे दोहो एना।

ईसु मसीह मँडिल रे

41ईसु इंगा अपा सलेना पस्का परब मनो लगड, एरुसलेम कींञ सेनुः दोहो एनु। 42ईसु बारह बरिस रेनिय दोहोएन तोलोग हेंकू राः रीति बिधी राः अनुसार ते परब मनो लगड एरुसलेम कू सेनेना। 43हेना वरी परब मनो केतेकू मिड़ाः मेजुः तोलोग, बालक ईसु एरुसलेम हँडेय दोहो यनु; नआँ इंगत अपत एडकींञ मेने कींञ पपाड़ी दोहो एनु। 44हेंकींञ पसींद तेडा कनय एटाःकू गतिकू सुदाया मेनते, हेना वरी एक दिन सेनकेड राः बाद रे अपन कुटुम्बकू अवुर हित नातकू थरे कींञ छपा बेड़ायू। 45हेना वरी मेने कींञ ञँमगाडिया, तहाँ छपा छपा ते एरुसलेम कींञ मिड़ाः यनु। 46हेना वरी तीन दिन बितो केन राः बाद रे मँडिल रे अहूदी नियम चेचेड हेंकू सुदा, दुड़ूब तन तोलोग कींञ सेन ञँमतेडिया। अवुर हेंकू राः टेबोईय अँजोमे, अवुर हेंकू थरे जबाब सवालिय होंबोर कू। 47जेतना हेंय राः टेबोः अवुर जबाब कू अँजोम दोहो एनु, हेंकू अहचरज जोम दोहो एनकू। 48तहाँ इंगत अपत ञेंलकेडिय तेकींञ अहचरज यनु, हेना वरी इंगत ईसु थरेय कहनी तेडा, “ची लगड बाबू, अम अलिंञ सुदा न घयतेम करो तेडा? अपुम सुदा जघा जघा ते अखीर मी एर छपा धँगेच यडलीञाँ।” 49हेंय हेंकींञ थरेय कहनी तेडा, “अबा ची लगड बा छपांञ दोहो एनु? अबा मेने बा पपाड़ी दोहोएन किदो, इंञ अपुंञ ओड़ाः रे दोहोन जरूरी इदाना?” 50जे टेबोईय लाय तेडा, हेना हेंकींञ मेने कींञ जेर गडा। 51हेना वरी इंगत अपत सुदा नसरेत हनतेय चलो एना, अवुर हेंकींञ राः टेबोः चेडकेते हेंकींञ सुदाय दोहो एना। नआँ सींड़ टेबोः इंगत अनेज राः मने मन रेय जोगो तडा। 52ईसु कनहुनुऊँ अवुरिय हराः दोहो एनु, अवुर भगवान अवुर होड़कू राः किरपा तेय बडेः दोहो एनु।

Zur Zeit ausgewählt:

लूका 2: ksz

Markierung

Kopieren