लूका 3

बतिस्मा ए-मय एहुन्‍ना ईसु राः खभेरिय लाय तेडा

(मत्ती 3:1-12; मरकुस 1:1-8; एहुन्‍ना 1:19-28)

1तिबिरियुस कयसर#3:1 सींड़ वरी बडेअय राजा राः राज राः पन्द्रहवाँ बरिस रे हेन तोलोग पुन्तियुस पिलातुस, एहूदी देस रेनिय बडेअय अघिकारी दोहो एना। अवुर हेरोदेस, गलील जिला रेनिय बडेअय अधिकारी दोहो एना। इतूरया अवुर तीरखानीतिस जिला रे हेरोदेस मगत फिलिपुस बडेअय अधिकारी दोहो एना। अवुर अबिलेने जिला रे लिसानियस, बडेअय अधिकारी दोहो एना। 2हन्‍ना अवुर कयफा एहूदिकू रेनकींञ बड बडे आजक कींञ दोहो एना। हेन तोलोग भगवान राः टेबोः जकरयाह होपोन एहुन्‍ना, सुनहर ओत रेय दोहोएन तोलोगिय अँजोम तेडा। 3हेंय जरदन जोड़ राः आस पास ते सींड़ जघा रे सेनकेन ते, मन मिड़ाः केते भगवान थरे मेजकोः ते बतिस्मा तिला रेदो, हेंय अपे राः पापिय माफेआ मेनाअय परचार तेडा। 4एसायाह भविस्यवक्ता कहनी केड हेना कागद रे हाँःते लिखल इदाना, “सुनहर ओत रे मियाँहोड़ होड़ गोहार यडा, परभु लगड होर पे तयारू, हेंय राः होर पे सोझ साझू। 5सींड़ डोड्हा गिआ हेना पटोवेपे, अवुर बुरू अवुर घुटरी बरोबरे पे, अवुर टेड़गाआ होर सोझ साझे पे, अवुर उबड़ खबड़ गिआ हेना समथारेपे। 6अवुर सींड़ होड़कू भगवान कुलकेडिय हेनी उऊबराय कू ञेंलेया।”

7 # मत्ती 12:34; 23:33 हेना वरी अखीर होड़कू एहुन्‍ना थरे बतिस्मा तिला लगड कू मेजेना, हेन तोलोग हेंकू थरेय कहनी तेडा, “ए बींञ होपोनकू, अपे मेजुः तना भोग वरी बंचो अले मेनते ईया चेतवन केडपेआ? 8#एहुन्‍ना 8:33भगवान थरे मेजकेनते मन कू मिड़ाः केडा मेनाआँ पपाड़ी लगड, बढ़ियाँः काम पे करो। अवुर अले अपा लेदो अबराहम हवे, बंचो अले मेनते अलोपे फुलायू। अपे थरेंञ कहनी यडा, अनापे भर दो कोवाआ, भगवान दिरी वरी हो अबराहम लगड चोंडिज कुय पयदा सकोआ। 9#मत्ती 7:19टँगा काठ दुबी रे दोहो केडा अवुर जे जे काठ बढ़ियाँ ते मेने जोः हेना गेरकेते सेंगेल रेय तुयाँगेआ।”

10हेना वरी होड़कू हेंय कू होंबोर तेडिया, “हेंडे दोखा अले ची ले बनोआँ?”

11तहाँ हेंकुय जबाब वडा, “जे जे थरे बाटंग अंगा इदान हेनी, कोवाआ हेनी मियाँ टंगिय हटींगवा अवुर जे जे थरे खुदी चुनी इदाना हेंय होय हटींगे।”

12 # लूका 7:29 मलगुजारी तिलाकू हो बतिस्मा तिलाकू मेजेना, अवुर कू होंबोर तेडिया, “ए गुरू, अले ची ले बनोआँ?” 13हेना वरी हेंकुय कहनी वडा, “अपे लगड जेतना रेट तोलकेना हेना वरी बगरा अलोपे तिलायू।”

14सिपाहिकू हो हाँःतेकू होंबोर तेडिया, “अले ची ले बनोआँ खा?” हेना वरी हेंय हेंकुय कहनी वडा, “जिदहाय ते चहे ञेंड बेड़ावकू ते पेयसा अलोपे असियू अवुर झूठ मूठ ते कनय अलोपे दोसू, अपे जेतना ञँमुआ हेन मेनाः रेपे सन्तोकता।”

15एहूदी होड़कू उऊबराय असरा लगय तेकू तँगिय दोहो एनु, अवुर हेंकू अपन अपन मन रे ने-नी मसीहा हवे मेनते, एहुन्‍ना राः बारे तेकू पसींदे दोहो एनु। 16हेना वरी एहुन्‍ना हेंकू सींड़कुय कहनी वडा, “इंञ दो अपे दाः ते बतिस्मांञ ओवापे तना, लेकिन इंञ वरी तयोम तेय मेजुः तनय इंञ वरी बडे गिआयू, इंञ दो हेंय राः जुता रसी लड़ा लायिक हो कोवाञाँ। हेंय अपे पवितर आत्मा#3:16 जे जे मन कू बदलोः हेंकू भगवान एयसा आसीसिय ओवा कुआ, कि पवितर आत्मा हेंकू भीतर रेय एनेम दोहो वआ। पवितर आत्मा होड़कू पाप वरी सुद्ध कुआ, अवुर होड़कू बढ़ियाँः होर ते गोःकुआ, अवुर होड़कू राः भीतर रे राजेआ, हेंडे होड़कू हेंय राः मरजी घयतेकू से-नेआ। अवुर पवितर आत्मा अलग अलग काम रे होड़कू मदेदिय ओवा कुआ। अवुर अनेज रेनकू होड़कू अनेज राः आत्मा ते भरो कू लगड भगवान पनाहिल तेय जबान तडा, नेनेन घयते ईसु मसीह हो अनेज तयोम ते से-नेः कुय जबान वडा। अवुर सेंगेल#3:16 मन मेने बदलो कू थरे भगवान राः सजा सेंगेल राः दरद घयते होयाआ। अवुर भगवान अनेज थरे बिसवासेः हेंकू सेंगेल घयते एएलंग हेना परिकछा ते खँडा केकू तेय सुद्ध कुआ। ते बतिस्माय ओवा पेआ। 17हेंय राः हटाः हें-नी ती रेआ, अवुर हेंय खरियन तय बढ़ियाँ तेय अमीञेंआ। अवुर गोहोम तुदो अनेज राः कोठी रेय जवारेआ, लेकिन कुस्टत दो मेने इड़ीजुआ सेंगेल रेय तुयाँगेआ।” 18नेन याःते हेंय अखीर सिक्छा दे-दे ते होड़कू बढ़ियाँः खभेरिय लाय वकू दोहो एनु।

19 # मत्ती 14:3,4; मरकुस 6:17,18 एहुन्‍ना हेरोदेस राजा अखीरिय दबेट तेडिया, कहेकि बोहोत कन्याँ हेरोदियासिय असुल तेडा, अवुर अखीरिय गलती तेडा, 20अवुर मियाँटंग ए गलतिय गलती तेडा कि एहुन्‍ना जेहेल रेय एर डलो तेडिया।

ईसु बतिस्माय तिला तेडा

(मत्ती 3:13-17; मरकुस 1:9-11)

21तहाँ सींड़ होड़कू बतिस्मा कू तिला तेडा अवुर ईसु हो बतिस्मा तिला केतेय बिनतीः दोहो एनु, हेन तोलोग अगस जीजयानू 22#मत्ती 3:17; मरकुस 1:11; लूका 9:35अवुर पवितर आत्मा परेवाँ राः रूप ते हेंय थरे अगड़ू एना, अवुर अगस वरी न घयते आवाज मेजेना, “अम ईञाअय दुलर कोड़ा होपोन हवे, अवुर अम थरे खुस इदानिञाँ।”

ईसु रेनकू खुटी खनदानकू

(मत्ती 1:1-17)

23लगभग ईसु तीस बरिस रेनिय दोहोएन तोलोग ललायिय बोंहड़ी तेडा, (होड़कू उनुसुफ होपोन मेनते कू अड़ींग दोहो एनु) ईसु उसुफ होपोन दोहो एना; उसुफ अपत एली दोहो एना, 24एली अपत मत्तात दोहो एना, मत्तात अपत लेवी दोहो एना, लेवी अपत मलकी दोहो एना, मलकी अपत अन्‍ना दोहो एना, अवुर अन्‍ना अपत उसुफ दोहो एना, 25उसुफ अपत मत्तियाह दोहो एना, मत्तियाह अपत आमोस दोहो एना, अवुर आमोस अपत नहूम दोहो एना, नहूम अपत असल्याह दोहो एना, असल्याह अपत नोगह दोहो एना, 26नोगह अपत मात दोहो एना, मात अपत मत्तियाह दोहो एना, मत्तियाह अपत सिमी दोहो एना, अवुर सिमी अपत जोसेख दोहो एना, अवुर जोसेख अपत जोदाह दोहो एना, 27जोदाह अपत एहुन्‍ना दोहो एना, एहुन्‍ना अपत रेसा दोहो एना, रेसा अपत जरूब्बाबिल दोहो एना, अवुर जरूब्बाबिल अपत सालतियेल दोहो एना, अवुर सालतियेल अपत नेरी दोहो एना, 28नेरी अपत मलकी दोहो एना, मलकी अपत अदी दोहो एना, अदी अपत कोसाम दोहो एना, कोसाम अपत इलमोदाम दोहो एना अवुर इलमोदाम अपत एर दोहो एना, 29एर अपत ईसु दोहो एना, ईसु अपत इलाजार दोहो एना, इलाजार अपत जोरीम दोहो एना, अवुर जोरीम अपत मत्तात दोहो एना, अवुर मत्तात अपत लेवी दोहो एना, 30लेवी अपत समोन दोहो एना, समोन अपत एहूदाह दोहो एना, अवुर एहूदाह अपत उसुफ दोहो एना, अवुर उसुफ अपत जोनान दोहो एना, जोनान अपत इलयाकीम दोहो एना, 31इलयाकीम अपत मलेआह दोहो एना, मलेआह अपत मिन्‍नाह दोहो एना, अवुर मिन्‍नाह अपत मत्तता दोहो एना, अवुर मत्तता अपत नातान दोहो एना अवुर नातान अपत दाऊद दोहो एना, 32दाऊद अपत ईसेय दोहो एना, ईसेय अपत ओबेद दोहो एना, अवुर ओबेद अपत बोअज दोहो एना, अवुर बोअज अपत सलमोन दोहो एना, अवुर सलमोन अपत नहसोन दोहो एना, 33नहसोन अपत अम्मीनादाब दोहो एना, अम्मीनादाब अपत अरनी दोहो एना, अवुर अरनी अपत हिरसोन दोहो एना, अवुर हिरसोन अपत फिरिस दोहो एना, अवुर फिरिस अपत एहूदा दोहो एना, 34एहूदाह अपत एकूब दोहो एना, एकूब अपत इसहाक दोहो एना, अवुर इसहाक अपत अबराहम दोहो एना, अवुर अबराहम अपत तिरह दोहो एना, अवुर तिरह अपत नाहोर दोहो एना, 35नाहोर अपत सरूग दोहो एना, सरूग अपत रऊ दोहो एना, अवुर रऊ अपत फिलिग दोहो एना, अवुर फिलिग अपत एबिर दोहो एना, अवुर एबिर अपत सिलह दोहो एना, 36सिलह अपत केनान दोहो एना, केनान अपत अरफछाद दोहो एना, अवुर अरफछाद अपत सेम दोहो एना, अवुर सेम अपत नूह दोहो एना, अवुर नूह अपत लिमिक दोहो एना, 37लिमिक अपत मथूसिलह दोहो एना, मथूसिलह अपत हनोक दोहो एना, अवुर हनोक अपत जिरिद दोहो एना, अवुर जिरिद अपत महल्लेल दोहो एना अवुर महल्लेल अपत केनान दोहो एना, 38केनान अपत इनोस दोहो एना, अवुर इनोस अपत सेत दोहो एना, अवुर सेत अपत आदम दोहो एना, आदम भगवान होपोन दोहो एना।

Zur Zeit ausgewählt:

लूका 3: ksz

Markierung

Kopieren