लूका 4

ईसु राः परिक्छा

(मत्ती 4:1-11; मरकुस 1:12-13)

1ईसु पवितर आत्मा ते भरो केनते जरदन जोड़ वरिय मिड़ाः एना, अवुर हेंय पवितर आत्मा सुनहर ओत हनते गोःतेडिया चालीस दिन सुनहर ओत रेय दोहो एना, 2हेना तोलोग ईसु कनर मेनेय जोम बेड़ागाडा। चालीस दिन पुरो केन रे रँगेज तेडिया, हेन तोलोग सयतान पाप रे लोजोरिय लगाडिय परिक्छा सोताडिया।

3हेना वरी सयतान हेंय थरेय कहनी तेडा, “सही मेते अम भगवान होपोन हवे रेदो, न दिरीम कहनीवाँ रोटी बनोऊ।” 4तहाँ ईसु जबाब वडिया, “धरमग्रंथ रे नआँ घयते लिखल इदाना, ‘होड़कू सीरिफ रोटी ते एरो कू जियो एना’।”

5हेना वरी सयतान हेंय उसुला जघा रेय इदी तेडिया, अवुर तुरेत्ते संसार राः सींड़ राजीय तिःवाडिया। 6अवुरिय कहनी तेडा, “नआँ राज राः सींड़ धन राः हाँकिंञ ओवा मिआँ; नआँ सींड़ ईञाः हाँथ गाँथ रेआ, अवुर इंञ जेयिंञ बेस वआ हेंयिंञ ओवाआ। 7अम इंञ मी जोहारवा रेदो, नआँ सींड़ अमाः हाँथ गाँथ रे होयाआ।” 8हेना वरी ईसु हेंयिय जबाब वडा, “धरमग्रंथ रे नआँ घयते लिखल इदाना, ‘अम अनामअय भगवान राः मी जोहारवा, सीरिफ हे-नी राः सेवम सेवा’।”

9तहाँ सयतान एरुसलेम राः मँडिल रे सींड़ वरी उसूला जघा रेय चँड़ा तेडिया, अवुरिय कहनी वडियू, “सही मेते अम भगवान होपोन हवे रेदो न वरिम ऊजू। 10अमाः बारे ते धरमग्रंथ रे नआँ घयते लिखल इदाना, ‘अम बंचो लगड सरग वरी सरगदूत कुय कूला’ 11अम कटाम रे दिरी ते अलो लोजोर टोवीजुः लगड सरगदूतकू हथे पथे तेकू तिला दरम मिआँ।” 12तहाँ ईसु जबाब वडिया, “धरमग्रंथ रे नआँ घयते हो लिखल इदाना, ‘अम अनामअय परभु भगवान अलोम अजमोवियू’।”

13हेना वरी सयतान सींड़ याःतेय परिक्छा केडिय तेय चलो यनु, तहाँ दावीय जोहो दोहो एनु।

ईसु सेसेवाय बोंहड़ी तेडा

(मत्ती 4:12-17; मरकुस 1:14-15)

14हेना वरी फेर पवितर आत्मा राः बल ते भरो केनते ईसु गलील जिला रेय मिड़ाः मेजेना, हेना वरी हेंय राः टेबोः आस पास राः सींड़ जघा रे मिरीज एना। 15हेना वरी हेंय हेंकू राः आराधना ओड़ाः ते सिक्छाय ओवाकू दोहो एनु, अवुर सींड़ होड़कू हेंय कू बडेय वडिया।

नसरेत रे ईसु मेनेकू आदर गडिया

(मत्ती 13:53-58; मरकुस 6:1-6)

16हेना वरी ईसु असुल बडे तेडिया, हेना नसरेत गाँव रेय मिड़ाः मेजेना, अवुर एहूदिकू राः रीति बिधी राः अनुसार ते सब्द राः दिन#4:16 एहूदी होड़कू राः गिनती रे हपता राः अखरी दिन सनिचर चेका कू सब्द वआ, हेना चेका हेंकू कनर मेने कू बुताआ, खाली कू गिरजाआ। आराधना ओड़ाः रेय सेनेना। अवुर कागद पड़हो लगड ईसु चड़ाँ एना। 17एसायाह भविस्यवक्‍ता राः कागद कू ओवाडियू, हेना वरी हेंय हेनेन जघाय पोटाः ञँमतेडा, हेनारे न घयते लिखल दोहो एना।

18“परभु राः आत्मा इंञ थरे इदाना, कहेकि हेंय गरीब होड़कू बढ़ियाँः खभेर लाय वकू लगड ईञींय अभिसेक केडा। अवुर बंधवाकू छडोअराआ अवुर अंद्हाकू ञेंञेंल रआ बढ़ियाँ खभेर लाय वकू लगाडिय कुलकेडिञाँ, अवुर एटाःकू राः दाब ते खोट केनकुंञ छडो। 19अवुर भगवान ञेंल मया केना हेना समय परचारे लगाडिय कुलकेडिञाँ।”

20हेना वरी हेंय कागद बन्द केते सेसेवआय ती रेय एम गोत्तेडू, अवुरिय दुड़ूब यनु। आराधना ओड़ाः रे दोहो एनकू सींड़ होड़कू हेंय कू ञेंल हाँड़िवाडिया। 21हेना वरी हेंय हेंकू थरेय कहनी तेडा, “धरमग्रंथ रे नआँ घयते लिखल इदाना, अपे अँजोमे तोलोग नआँ टेबोः तेनेसिंञ मड़ंग पेरे उतरो यना।”

22सींड़ होड़कू हेंय कू बडेय वडिया, अवुर हेंय राः किरपा राः टेबोः अँजोम केते होड़कू अहचरज यनकू, तहाँ कू कहनियूँ, “एटागी उसुफ होपोन हवे।”

23हेंय हेंकू थरेय कहनी तेडा, “इंञ थरे नआँ कहावत जरूर पे कहनियाँ ‘ए बयेध, अनाम मी चीकानू! कफरनहूम रे जे काम मी काम केडा, हेना अले अँजोम केडा हेना काम अबू गाँव रेहोम तीबे’।”

24 # एहुन्‍ना 4:44 अवुर हेंय कहनी तेडा, “इंञ अपे थरे सही मेतेंञ कहनी यडा, कनय भविस्यवक्‍ता अपन गाँव रे आदर इजेत एरोय ञँमतेडा। 25इंञ अपे थरे सही मेतेंञ कहनी यडा कि एलियाह भविस्यवक्‍ता राः समय रे ची होया एना? सड़हे तीन बरिस अँगम इसराएल देस रे दाः मेने उयुः गडा, अवुर अकाल तडा। हेना तोलोग हेना देस रे अखीर एकल तनकू कोड़िकू दोहो एना। 26भगवान हेना मेंडे कनय थरे एलियाह मेनेय कुलगाडिया, सयदा राः सारफत रे एकल तनाय कोड़ीहोन थरे भरिय कुलतेडिया। 27अवुर एलीसा भविस्यवक्‍ता राः सयम रेहो, इसराएल रे अखीर बगरा कुड़गा रोगियाकू दोहो एना, हेना मेंडे रे कनय मेने चिकन गना सीरिया देस रेनिय नामान#4:27 नामान सीरिया देस रेनिय दोहो एना, नेय सिपाहिकू रेनिय मुखिया दोहो एना। भर चिकन एना।”

28तहाँ आराधना ओड़ाः रेकू दुड़ूब तनकू, नआँ टेबोः अँजोम केते सींड़ होड़कू धको केनतेकू मुरमुरो यनु। 29हेना वरी हेंकू रिमकेनते हेंय गाँव वरी बहेर हनतेकू उडूंग गोत्तेडियू, अवुर जे बुरू रे हेंकू राः गाँव बसो तना, हेंय हेन बुरू चोटीत वरी बिड केय ते लोजोरिय लगड कू इदी तेडिया। 30तहाँ ईसु हेंकू मँझर वरी उडूंग केनतेय चलो यनु।

ईसु मियाँहोड़ वरी भूतिय उडूंग तेडा

(मरकुस 1:21-28)

31हेना वरी ईसु गलील जिला राः कफरनहूम सहर रेय सेनेना, अवुर सब्द राः दिन रे होड़कू भगवान राः बढ़ियाँ टेबोईय चेडकू दोहो एनु। 32#मत्ती 7:28,29तहाँ हेंकू हेंय राः टेबोः अँजोम केतेकू अहचरज यनु, हेंय राः टेबोः रे अधिकार दोहो एना।

33आराधना ओड़ाः रे मियाँहोड़ होड़ दोहो एना, हेंय थरे भूत लगो तना। 34हेंय अच्छा तेय हाक एना, “ए नसरेत रेनिय ईसु, अले थरे अमाः ची काम इदाना? अम अले नास ले लगड मी मेजकेना किदो? इंञ आमींञ पपाड़िआ अम ईया हवे? अम भगवान रेनिय पवितर होड़ हवे।” 35तहाँ ईसु हेंयिय दबेट तेडिया, “जपनो कोःमी, अवुर नेय वरिम उडूंग चलोऊ” तहाँ भूत हेंय सींड़कू मड़ंग रे पटको केडिय ते बेगर नोकसान तेय उडूंग यनु। 36नआँ सींड़ ञेंल केडते होड़कू अहचरज यनु, अवुर अनाकू अनाकू कहनी यडू, “नआँ कराः घियाः टेबोः हवे, कि मेय राः टेबोः रे तीमिन अधिकार अवुर सक्ति इदाना, भूतकू हो मेय राः टेबोः कू मनोवेआ, अवुर कू उडूंग जोमा।” 37अवुर ईसु जे-जेय करो तेडा, हेना आस पास राः सींड़ जघा रे मिरीज यनु।

पतरस हनहार अवुर एटाः होड़कू होय चिकन तेडकुआ

(मत्ती 8:14-17; मरकुस 1:29-34)

38तहाँ हेंय आराधना ओड़ाः वरी रिमकेनते सिमोन ओड़ाः कू सेनेना। हेना रे सिमोन हनहार जार लेनता डिया, अवुर सींड़कू हेंय चिकानिय लगड ईसु थरे कू अरजी एना। 39ईसु हेंय बँदे रेय चड़ाँ केनते जार केटेज अहा तेय कहनी वडू, तहाँ हेंय राः जार तुरेत्ते अगड़ू यनु, अवुर हेंय तुरेत्ते रिमकेनते आदर भोजन कू लगाडिय भिड़ो यनु।

40बेर डुबोः तोलोग जे जे ओड़ाः रे केय प्रकार ते हसु तनकू ईसु थरे कू इदी तेडकुआ, अवुर सींड़ होड़कू छुवों छुवों तेय चिकन तेडकुआ। 41अवुर केय झन होड़कू थरे भूतकू लगोतन हेंकू सींड़कू वरी कू उडूंग एना, अवुर अहीज अहीज तेकू कहनियूँ, “अम भगवान होपोन हवे,” लेकिन हेंय हेंकुय दबेट कू अवुर मेनेय एनेम टेबोः वकू, कहेकि हेंकू पपाड़ी दोहो एनु किदो नेय मसीहा हवे।

आराधना ओड़ाः तेय परचार तेडा

(मरकुस 1:35-39)

42अखीर ञींदत ते ईसु हेना गाँव वरिय उडूंग केनते, सुनहर ओत हनते बिनतीः लगाडिय चलो एना। अवुर भीड़ कि भीड़ छपा छपा ते हेंय थरे कू मेजेना, हेना वरी ञँम केय ते हेंय थरे कू अरजी एना, किदो “अले बगी वते अलोम चलोऊ।” 43लेकिन हेंय हेंकू थरेय कहनी तेडा, “एटाः एटाः सहर रेहो इंञ भगवान राः राज राः बढ़ियाँ खभेर ललाय जरूरी इदाना, कहेकि इंञ नेन लगाडिय कुलकेडिञाँ।” 44अवुर हेंय एहूदी देस राः गलील जिला राः आराधना ओड़ाः ते अधिकार राः साँथ तेय परचारे दोहो एनु।

Zur Zeit ausgewählt:

लूका 4: ksz

Markierung

Kopieren