От Иоанна 7

Иисусым Аңлыгутаңита Ухпықынӷилъкаңат

1Киңуңаның та̄м Иисус иглыӷакақ Галилеями. Иглыӷаюгумаңилңуқ Иудеями, қаюҳлъяк Иудеит иглыӷутистыңит тама̄нлыңӯт туқусюгукаңат. 2Иудеит нықынӷаҳқылъыҳқа̄т а̄тқылӷӣ шалашымың ка̄сяҳтуңысталӷӣ. 3Иисусым аңлыгутаңита пика̄т: «Аӷуляқи ма̄кын, агля̄ Иудеямун малихся̄ҳтытын ысҳапагысқылъюки алъя̄ҳлъюхўаҳтилъыҳпының. 4Китум алңунак апыҳсыӷӯюлӷӣм аксяқигата̄ сялъыни. Ынка̄м таўатын пинақңукувык тамаҳаӷми югым ысҳапаглитын!» 5(Талўа аңлыгутаңита Иисус ухпықынӷилъкаңат.)

6Иисусым аңлыгутни пикӣ: «Иудеитылъыҳқақа сялин ка̄сигатуқ, иўырңа лъпыси алңунак аӷныӷни пияҳқа̄гуси. 7Нунам юган угумикна̄нӷитӣси, хўаңа угумика̄тңа қаюҳлъяк а̄пҳақыхкыхка сыӷлық атуқақыхкаңат. 8Ынка̄м лъпыси нықынӷаҳқылӷӣнун пикатык; хўаңа пинақынӷитуңа қаюҳлъяк аӷнықа сялин ка̄сигатуқ». 9Иисусым таўатын пилюки лъңа Галилеямыткақ.

Иисус Нықынӷаҳқымъун Пилӷӣ

10Иисусым аңлыгутаңи нықынӷаҳқымъун пикат. Та̄хкын киңуңитның югнун ысҳаҳтысюкаҳпынани лъңалъю пикақ. 11Нықынӷаҳқымъи Иудеит иглыӷутистыңита ивақа̄т Иисус, пимаӷмың: «На̄гу та̄на ю̄к?» 12Угляпихлъыҳӣт югыт таўанлыңӯт сигутқӯткыхка̄т Иисус. Иляңита пика̄т: «Иисус пинӣпихтуқ ю̄к». Иляңита пика̄т: «Нака̄, пӯҳтақӣ югыт». 13Иўырңа китум алңунак қа̄йңакун акузиткумаңилъкаңа Иисус, алиңлюни Иудеит иглыӷутистыңитның.

Иисус Апыҳтуӷилӷӣ Нықынӷаҳқылӷӣни

14Нықынӷаҳқылъҳа неделям қукаӷитақуқлъю, Иисус Храмымун агляӷлюни апыҳтуӷикақ. 15Иудеит иглыӷутистыңита сяӷӣӷаягулъюку пикат: «Натын уна ю̄к лӣтыҳлъяхта игаӷья̄маңилңуқ?» 16Иисусым кӣмсиқӣ: «Апыҳтӯсянка хўаңамның пиңунӷитут, Каяхтистымның пиңӯт. 17Китум алңунак Кияӷныӷым пиюкылъҳа атуқсюгукумигу лӣсимаксяҳқақа̄, апыҳтуӷилъқа Кияӷныӷмың пиңутаңа, налиӷмың хўаңамның катам пиңутаңа. 18Кина алңунак апыҳтуӷилӷӣ лъми катам сюмыҳтаӷалъыӷминың қӯлвалъыңнақуткыңъӯқ. Иўырңа кина алңунак қӯлвалъыңыстинақуткылӷӣ каяхтикамун, акузиңӯқ ипапигмың, иқлъыңиқигатуқ. 19Қамахлъюси лӣсимакаҳси Моисейем Лӣлиҳтӯсялиткақӣси, иўырңа налиҳӣнаҳпыси қа̄ткигатаси. Сяңамаңам туқунъақуткыстыңъа?» 20Югыт кӣмсиқа̄т: «Туӷныӷа̄м ӣтҳума̄тын. Китум туқунъақуткатын?» 21Иисусым пикӣ: «Ата̄симың алъя̄ҳлъюхўаҳтияма Субботами қамахлъюси сяӷӣӷаюхтуси. 22Моисейем қылъқақӣси обрезаниясқылъюки иӷныси (қайўа сивуныси обрезанияка̄ӷңа̄та Моисейем обрезаниясқылъҳан сивуңани). Нақам лъпыси обрезанияҳқа̄нӷата иӷныси Субботами пӣқаси. 23На̄фқыңъунӷилъкуфсигу Моисейем Лӣлиҳтӯся̄ обрезанияӷилъыҳпысигун Субботами, сяңама угумиягутыстыңъа ю̄к на̄лъҳутңўа̄лъымның Субботами? 24Нанқихтихпынаси югыт ся̄қутаңи лӣгикңўа̄ҳпынаки, нанқихтӣқитык ылъқуӷулъюси».

Иисус, Христосыңўа̄, Кияӷныӷым Каяхтыка̄?

25Та̄хкын иляңи Иерусалимыӷмӣт пикат: «Та̄ната ю̄к туқусюкаңат. 26Нақам ысҳа апыҳтуӷилӷӣ югнун, нақамлъю иглыӷутистымта сянақигата̄т. Қа̄ хўа̄ лӣгика̄т Христосыңутаңа, Кияӷныӷым каяхтыка̄? 27Иўырңа хўаңкута лӣсимакаҳпут та̄на ю̄к накын пиңутаңа. Христосыпик тагикан, китум алңунак налъюксяҳқақа̄ накын пиңутаңа».

28Иисус паниның апыҳтуӷиңулюни Храмыми, игляхтулюни пикақ: «Қайўа лӣсимакңўа̄ӷыстыхӯ кинаңутка, накынлъю пиңутка? Хўаңамның тагимаңитуңа. Каяхтистыка ипапигӯқ, иўырңа лъпыси налъюкаҳси. 29Хўаңа лӣсимакақа қаюҳлъяк лъңаның тагика̄гуңа, лъңан каяхтыкақа̄ңа». 30Иисус таўатын пиян иляңита югыт тугунақуткыхка̄т. Иўырңа китум алңунак ахтуқа̄маңилъкаңа қаюҳлъяк аӷныӷа сялин ка̄сигалңуқ. 31Иўырңа угляпихлъыҳӣт югыт ухпықыхкаңат Иисус. Ынка̄м пикат: «Лӣсимакаҳпут уна ю̄к Христосыңӯқ, қаюҳлъяк угля̄пихлъюку алъя̄ҳлъюхўаҳтӣқ Христосым пияҳқа̄ның».

Иудеит Лӣгикынӷилъкаңит Иисусым Акузитаңи

32Иляңита Фарисеит нагақуқӣт югыт таўатын акузимлыӷа̄лъҳӣт Иисусымың, ынка̄м лъңиталъю, первосвященнигытлъю каяхтыкӣт кылыңакистыт тугусқылъюку. 33Та̄хкын Иисус пикақ: «Натыңӣҳақ лъпысинилъюңа агляҳлъықуңа Каяхтистымнун. 34Иваҳлъықаҳпысиңа иўырңа на̄лъкынъа̄нӷитаҳпысиңа. Такукамнун агляҳпагниңитуси». 35Иудеит иглыӷутистыңита илятың пикӣт: «Навык уна ю̄к пинақа на̄лъкысяҳқа̄фқа̄ми? Грегыт акуляңитнилңӯт юпут такуляӷнақакӣ? Қа̄ апыҳтуӷилъықуқ Грегынун? 36Сямыңтуқ Иисус пӣ хўатын пӣқңами: “Иваҳлъықаҳпысиңа иўырңа на̄лъкынъа̄нӷитаҳпысиңа; такукамнун агляӷна̄нӷитуси”?»

Иисусым Акузитки Аглыӷналӷӣк Таӷныӷак

37Киңулиқ аӷныӷа нықынӷаҳқылъҳым мыгнуналъыҳпига̄лӷӣ. Таўани аӷныӷми, Иисус ныкывлюни игляхтулюни пикӣ: «Кина алңунак мықсюкуми тагилюни хўаңамнун мыӷли. 38Китум алңунак ухпықыхкумиңа, илюңаның қамакын кӣўыт ма̄қсяҳқа̄гут уңувалъыңыстикаюгыт мыӷыт». Акузитыт Игақыхкат таўатын пика̄гут. 39Иисусым акузиткыңъукык Аглыӷналӷӣк Таӷныӷак. Кияӷныӷым Таӷныӷагни сялин тӯнигата̄к қаюҳлъяк сялин кывгигалъкаңа Иисус қӯлвалъылитыҳлъягналюку. Иўырңа та̄кўаниңани тама̄кут ухпықилӷӣт Иисусымың, алъхыӷусяҳқа̄гут Таӷныӷагның.

А̄ҳтӣра̄ӷуткыхкаңат Иисус

40Нагасямыхтыху Иисус таўатын акузилӷӣ иляңи югыт пикат: «Уна ю̄к ипапыста̄қ ӯкналиқистыңӯқ ныӷьюкыхкаҳпут». 41Иляңита пика̄т: «Христосыңӯқ». Иўырңа иляңита пика̄т: «Христос тагияҳқа̄ўа̄ Галилеямың? 42Акузитыт Игақыхкат пика̄гут Христос тагилъықнилюку Давидым ныңлъюгутаңаның, алъхыҳлъықнилюкулъю Вифлеемыми, Давидым кияҳфиганың». 43Иляңита югыт ипапиҳқуткумаңилъкаңат Иисус, 44ынка̄м тугуюка̄т иўырңа китум алңунак ахтуқа̄маңилъкаңа.

Иудеит Иглыӷутистыңит Ухпықинӷилңӯт

45Кылыңакистыт каяхтыка̄ялӷӣт тугусқылъюку Иисус, ка̄сята первосвященнигытлъю, Фарисеитлъю а̄птыкӣт: «Сяңан тагинъаниӷыстыху Иисус?» 46Кӣмсиқӣт: «Кина алңунак та̄тун юхтун акузиңигатуқ». 47Фарисеит а̄птыкӣт: «Лъпысилъю Иисусым пӯҳтисӣ? 48Хўаңкута иглыӷутистынилъю, Фарисеинилъю лӣсимакапут Моисейем Лӣлиҳтӯсӣ. Налимта̄а ухпықатху Иисус? Нака̄! 49Тама̄кут юлӷутыт налъюкӣт Моисейем Лӣлиҳтӯсӣ, ынка̄м Кияӷныӷым на̄фқылъықӣ». 50(Ата̄сиқ Иудеит иглыӷутистыңат Никодимыңуфтуқ, сивунӷани Иисусымун пикақ.) Никодимым пикӣ: 51«Лӣлиҳтӯсямнъи нанқихсяҳқақынӷитаҳпут ю̄к, ўытқукун нагалъюку лӣгикыхкумтыху сяматаңа». 52Пика̄т: «Лъпыклъю Галилеямың пиңузин? Лӣнъақики Акузитыт Игақыхкат. Лӣлъықан ӯкналиқистыңитуқ тагикамың Галилеямың». 53Қамахлъюни тама̄на аӷуляқӯткақ, нымыхнун агляҳтӯткақ.

Zur Zeit ausgewählt:

От Иоанна 7: ess2

Markierung

Kopieren