От Иоанна 8

Гылгаӷнӣқақ Аӷнақ

1Иисус агляқақ Елеоным найӷаҳанун. 2Уна̄ңулюку аглянқихтыкақ Храмымун. Юлӷун тагиляӷа̄сян Иисусым ақумлюни апыҳтуқӣ. 3Лӣлиҳтӯсяның апыҳтуӷикаюгытлъю, Фарисеитлъю тагитка̄т аӷнақ аңуксякақ гылгаӷнӣӷумалюку. Ныкывыслъюку сивуңитхун югыт, 4Иисус пика̄т: «Апыҳтуӷиста, уна аӷнақ аңуксяка̄гуқ гылгаӷнӣӷумалюку. 5Лӣлиҳтӯся̄н Моисейем қылӷусяқа̄, аӷнат таўатын пиката туқутысқылъюки милюҳпага̄таҳӣнақ. Лъпык сямың пинаяҳсигу?» 6Иисус а̄птыка̄т таўатын Лӣлиҳтӯсят кипулъыгмун сямың писқылъюки, қаюҳлъяк анахутысюгукаңат. Иисус пыӷлыҳлъюни иӷныӷўа̄ӷминың игақақ нунакун. 7А̄пта̄таӷьятни Иисусым ныкывлюни пикӣ: «Налиҳпыси сыӷлыҳқылъықшахӣлңӯм милюӷьюхўа̄ӷлигу уйӷагмың». 8Алъя пыӷлыҳлъюни иӷныӷўа̄ӷминың игақақ нунакун. 9Нагасямыхтыху Иисус, аӷуляқӯтыкыстақат. Нуйыклъӣт сивуклъютың, та̄хкын тама̄кут иляңит аӷуляқӯткат. Иисус лъңинаҳа̄ҳтыкақ, иўырңақун та̄на аӷнақ паниның ныкывӷалӷӣ сивуңани. 10Иисусым ныкывынқихлъюни а̄птыка̄: «Аӷнами, на̄ки анахунъистытын? Налиҳӣнӣта̄ аӷью̄ӷьяҳқа̄нилютын пинӷитатын?» 11Кӣмсиқа̄: «Югунӣқ, налиҳӣнӣта̄ пинӷита̄тңа». Ынка̄м Иисусым пика̄: «Хўаңалъю аӷью̄ӷьяҳқа̄нилютын пинақынӷитамкын. Аӷуляқи, алъя сыӷлыҳқыхпынаң».

Иисус Ниӷугӯқ Нунам Юганун

12Та̄кўаниңани Иисусым алыҳқуӷля̄тақӣ югыт. Пикӣ: «Хўаңа ниӷугӯңа нунам юганун. Китум малихтыкумиңа мамлыгми кияҳна̄нӷитуқ, кынылгулъықуқ уңувалъылитикаюгмың». 13Фарисеит пика̄т Иисус: «Та̄ўа апыӷля̄таҳтутын лъпынун, иўырңа акузитытын ипапиҳқусиҳқӣтут». 14Иисусым пикӣ: «Акузиткыӷңа̄ӷма хўаңамның катам, акузитынка ипаңӯт қаюҳлъяк лӣсимакақа накын тагитка̄нка, лӣсимакақалъю такуяҳқақа. Лъпыси налъюкаҳси накын пиматка, талўа налъюкаҳси такуяҳқақа. 15Нанқихтӣқуси нунам югатун, хўаңа нанқихсигатақа кина алңунак. 16Нанқихтинақсяқума нанқихтилъқа ылъқуӷутңанаяҳтуқ қаюҳлъяк лъңина̄нӷитуңа: Ата Каяхтистыка хўаңамнитуқ. 17Лӣлиҳтӯсяҳпысини игақңа̄қ ма̄лӷук югык сяңўа̄ а̄пқумыхтыху таўатыңўа̄қ, акузилъҳик ухпықылъықӣт ипаңунилюки. 18Ынка̄м хўаңамның а̄пҳақуңа, Атамлъю Каяхтистыма а̄пҳақа̄ңа». 19А̄птыка̄т: «На̄гу Атан?» Иисусым кӣмсиқӣ: «Налъюкаҳпысикут Атакулъҳӣгни. Иўырңа хўаңа лӣсимаксяқуфсиңа, Атакалъю лӣсимакнаяӷаҳси». 20Иисус апыҳтуӷиңулӷӣ таўатын Храмыми манимың афлъыңакивиган туңаңани. Иўырңа китум алңунак тугумаңитка̄, қаюҳлъяк пилъыҳқа̄ сялин ка̄сигалңуқ.

Иудеялӷутыт Ухпықыхкаңат Иисус

21Алъямың Иисусым пикӣ югыт: «Унилъықамси, иваҳлъықаҳпысиңа, иўырңа туқулъықуси сыӷлыҳқылъыҳтӯмаҳпыси. Такукамнун агляӷна̄нӷитуси». 22Та̄хкын Иудеит иглыӷутистыңит пикат: «Иисус хўатын пӣқ: “Такукамнун агляӷна̄нӷитуси”. Қа̄ лъминың туқунъақуқ?» 23Иўырңа Иисусым пикӣ: «Лъпыси ма̄кын нунамың пиңӯси, хўаңа памакын пиңӯңа. Лъпыси нунам пикӣси, хўаңа нунам пикынӷита̄ңа. 24Ынка̄м уңипа̄тамси туқулъықнилюси сыӷлыҳқылъыҳтӯмаҳпыси. А̄а туқулъықуси сыӷлыҳқылъыҳтӯмаҳпыси ухпықынӷилъкуфсиңа хўаңа хўаңаңутка». 25А̄птыка̄т: «Кинаңузинми?» Иисусым кӣмсиқӣ: «Хўаңаңӯңа а̄пҳақылъымтун пӣнлиӷьюхўа̄лъыӷмың има. 26Акузиткысяҳқаҳлъягӯңа лъпысиның, нанқихтусиҳқаҳтӯңалъю лъпысинун. Иўырңа Каяхтикақ хўаңамның ипаңӯқ, ынка̄м нунам юганун а̄пҳақанка нагатканка лъңаның».

27Югыт лӣгикумаңилъкаңат Иисусымун акузиткыңъутаңа Ата. 28Ынка̄м Иисусым пикӣ: «Кыфкуфсигу Иӷныӷа Югым лӣлъықаҳси хўаңа хўаңаңутка. Лӣлъықаҳси сяңўа̄ ма̄на пӣқыхкыхка хўаңамның пиңигатулъка. Лӣлъықаҳси акузиткыхкаюгутка Атам апыҳтӯсяқыхкаҳӣна̄ хўаңамнун. 29Каяхтикақ хўаңамның хўаңамнитуқ. Ӣўлың атуқыхкаюўа̄қа ыфқуҳтиналӷӣ лъңанун ынка̄м унисигата̄ңа». 30Иисус таўатын акузималюку, угляпихлъыҳӣм ухпықыхка̄.

Итымутылъық Сыӷлыҳқылъыӷмың

31Иисусым пикӣ Иудеит ухпықилӷӣт лъңаның: «Нагнықуфси қа̄ткулъюси апыҳтулъымнун, ипапыста̄қ малихся̄ҳтыкамси. 32Ипапиҳқылъық лӣлъықаҳси ынка̄м ипапиҳқылъҳым итымулъықӣси». 33Пика̄т: «Авраамым киңунқӣлъю, қыпҳаҳтыля̄ӷунӷитукут. Сяңамта пизикут итымусяҳқа̄нилюта?» 34Иисусым кӣмсиқӣ: «Ипа уңипа̄тамси, кина алңунак сыӷлыҳқыңъалӷӣ, сыӷлыҳқылъыӷмун қыпҳаҳтыля̄ӷыстун аюқуқ. 35Қыпҳаҳтыля̄қ ныңлъюгутынисяҳқа̄нӷитуқ қӯнпырухлъяк. Иўырңа ныңлъюгутыт иӷныӷат лъңитнисяҳқа̄гуқ қӯнпырухлъяк. 36Ынка̄м Иӷныӷым итымыстыкаңиси, ипапыста̄қ итымьяҳқа̄гуси. 37Лӣсимакамси Авраамым киңунқӣси. Иўырңа туқусюўақаҳпысиңа қаюҳлъяк тугуклъӣгалъкыси апыҳтӯсянка. 38Уңипа̄тамси Атама кылгутка̄ның хўаңамнун, иўырңа лъпыси атахпыси қылӷутка̄ пӣқаҳси».

39Кӣмсиқа̄т: «Хўаңкута атакаҳпут Авраам». Иисусым пикӣ: «Ипа Авраамым авақутақсяқаңиси, атуқақнаяӷаҳси Авраамым пика̄. 40Иўырңа хўа̄ лъпыси туқунъақуткақаҳпысиңа, хўаңа ипапигмың уңипа̄тикаюк нагақуқамның Кияӷныӷмың. Авраам таўатын пинаянӷитуқ. 41Атуқңўа̄ҳси атахпыси пика̄». Иудеит пика̄т: «Кияӷныҳӣна̄гуқ Атавут, ынка̄м хўаңкута лъңан иӷныпикӣлъю». 42Иисусым пикӣ: «Кияӷнық ипа Атаксяқуфсигу пиниқнаяӷаҳпысиңа, қаюҳлъяк тагика̄гуңа Кияӷныӷмың, ынка̄м хўа̄ хўа̄нтуңа. Хўаңамның тагимаңитуңа, Кияӷныӷым каяхтыкақа̄ңа. 43Лӣгикигатаҳси сямың пилъқа қаюҳлъяк тугуклъиӷьяҳқақынӷилъкыси апыҳтуӷилъҳынка. 44Авақутақӣси атахпыси туӷныӷа̄м, ынка̄м атуқсюўақаҳси атахпыси пиюкылъҳа. Пӣнлиӷьюхўа̄лъыӷмың има юхтаҳтыңӯқ. Ипапиҳқылъық атуқаҳсигата̄ қаюҳлъяк ипапиҳқылъҳилңуқ. Иқлъыңиқныӷмини та̄ўаңинаҳақ айӷӣткани пӣқыхкаңа қаюҳлъяк иқлъыңиқыстыңулӷӣ, атакыхкаңа иқлъыңам. 45Иўырңа хўаңа акузӣқуңа ипапигмың, ынка̄м тама̄кын апалъюқлъюку ухпықигатаҳпысиңа. 46Налиҳпыси ипапиҳқуткынъаяҳтаңа сыӷлыҳқыстыңутка? Қайўа акузиӷңа̄ӷма ипапигмың, сяңамаңам ухпықигастыңъа? 47Китум алңунак Кияӷныӷым пиңан тугуклъиӷақӣ Кияӷныӷым акузитаңи. Иўырңа лъпыси тугуклъӣгатаси Кияӷныӷым акузитаңи, қаюҳлъяк Кияӷныӷым пикынӷилъкаңиси».

Иисус А̄ңатаӷаҳтуқ Авраамымың

48Иудеит пика̄т: «Пӣмкын, Самарияӷмӣңӯтын, туӷныӷа̄млъю ӣтҳума̄тын. Ипа пизика̄н?» 49Иисусым кӣмсиқӣ: «Туӷныӷа̄м итылъҳита̄ңа. Қӯлваӷақақа Атака̄ иўырңа лъпыси қӯлвӣгатаҳпысиңа. 50Қӯлвалъыңнақуткыңъунӷитуңа хўаңамның. Иўырңа Ата̄сӣгуқ қӯлваӷиюлӷӣ хўаңамның, лъңаңӯқ нанқихтияҳқақ ылъқуӷулъюни. 51Ипа уңипа̄тамси, китум алңунак қа̄ткыхкумики апыҳтуӷилъҳынка, туқуна̄нӷитңўа̄ҳтуқ». 52Иудеит пика̄т Иисус: «Та̄ўа лӣтамкын туӷныӷалгуфтутын илюхпыни. Талўа Авраамылъю, ӯкналиқистытлъю туқуляӷа̄тка̄гут. Иўырңа лъпык пӣтын: “Китум алңунак қа̄ткыхкумики апыҳтуӷилъҳынка, туқуна̄нӷитңўа̄ҳтуқ”. 53Сюмыҳпынӣ а̄ңатаӷаҳсӣн атамнъың Авраамымың? Авраам туқука̄гуқ, ӯкналиқистытлъю туқуляӷа̄тка̄гут. Кинаңунилютын пӣқсин?» 54Иисусым кӣмсиқӣ: «Хўаңамның қӯлвақума та̄на қӯлвалъық сясӣна̄нӷитуқ. Қӯлваӷикаюк хўаңамның Атакақа. Лъпыси Кияӷнықнӣқлъюку 55налъюкаҳси. Хўаңа лӣсимакақа. Налъюкникумкун иқлъыңиқыстыңулъықуңа лъпысистун. Иўырңа хўаңа лӣсимакақа, қа̄ткақанкалъю сямың пилъҳи. 56Атази Авраам қуяҳлъяка̄гуқ ысҳаҳлъықнилюку тагилъқа. Ысҳақақа̄, ынка̄м қуяка̄гуқ». 57Иудеит пика̄т: «Ай? Сямың пизин? Ысҳа̄маңитңўа̄ӷан Авраам. Талўа сялин ю̄к ма̄лӷук қуля сӣпнықлъюку аюмиқиңуҳсигатутын». 58Иисусым пикӣ: «Ипа уңипа̄тамси, талўа сивуңани Авраамым Хўаңаңӯңа». 59Иисус таўатын пиян, югыт уйӷагмың тугуля̄ткат милюҳпага̄таӷналюку. Иўырңа Иисус ӣӷлюни а̄ныхкақ Храмымың.

Zur Zeit ausgewählt:

От Иоанна 8: ess2

Markierung

Kopieren