От Иоанна 19

1Ынка̄м Пилатым қылӷутка̄ иқитулъюку Иисус кахсягмигысқылъюку. 2Пилъюўаҳтыт қаҳпаңлъяқа̄т сикуҳлъюхтуқамың аваямың. А̄тыслъюку қаҳпа Иисусым на̄сқўакун, ысныгрукыхтагныңлъю аткуя̄қа̄т. 3Та̄хкын Иисус такулюку лыгасӣӷўа̄ткыхка̄т: «Қуяҳляги, Қӯлваӷамкын, Умӣлгат Иудеит!» қасяҳта̄тақа̄тлъю.

4Пилатым а̄нықихлъюни пикӣ Иудеит: «Ысҳаҳтыху, а̄нутыснақақа Иисус лъпысинун, лӣгикысқылъюси на̄лъкыфикынӷитақа анахутылъыӷмың». 5Та̄хкын Иисус а̄нусяқмыхтыху қаҳпалюни сикуҳлъюгмың, аткуя̄ӷлюнилъю ысныгрукыхтагның аюқыфтуқ. Пилатым пикӣ Иудеит: «Та̄ната ю̄к! Ысҳақаҳтыхуқун!»

6Первосвященнигытлъю, кылыңакистытлъю Иудеит ысҳаӷлюку Иисус акилӷӯткат: «Қақӯраҳтыстигу! Қақӯраҳтыстигу!»

Иўырңа Пилатым пикӣ: «Лъпысиның аӷуляқулъюку қақӯрахтыху, қаюҳлъяк хўаңа на̄лъкыфикынӷитақа сямың анахутылъыӷмың».

7Иудеит пика̄т: «Лӣлиҳтӯсямнъи туқусяҳқа̄гуқ, қаюҳлъяк Иӷнықнилюни Кияӷныӷмун пика̄гуқ».

8Пилатым нагалъюки таўатын пилӷӣт ўатақа̄ӷақ алиңыхкақ. 9Итынқихлъюни нанқихтивигмун а̄птыка̄ Иисус: «Накын пиңузин?» Иўырңа Иисусым кӣмсӣмаңитка̄. 10Пилатым а̄птыка̄: «Алыҳқуӷьюнӷисиңа̄? Лӣсимакынӷисигӯ итымутысқынъаяқымкын, налиӷмың қақӯрӣсқынъаяқымкын?»

11Иисусым кӣмсиқа̄: «Қылыӷна̄нӷитатын пилъюўаҳтыт қақӯрӣсқылъюңа ўыткуқун Кияӷныӷым пиюкылъқыхкагу. Ынка̄м ю̄к тагитистыка сыӷлыҳқылъыҳта̄ӷатуқ лъпынун».

12Киңуңаның та̄м Пилатым итымунъақуткыхкақсяқаңа Иисус, иўырңа Иудеит акилӷӯкат: «Кина алңунак лъминың умӣлыңлъялӷӣ, аңуягӯқ Кесарымун. Итымускувгу та̄на ю̄к илякумта̄қынӷита̄тын Кесарым».

13Пилатым нагалъюки та̄кут акузитыт, а̄нутыстыка̄ Иисус, Каменный Помостымун. (Еврейистун та̄на атық Гаввафаңулӷӣ.) Та̄хкын Пилат ақумыхкақ нанқихтивигым ақумута̄кун. 14(Аӷныӷым қукаӷнақыхкаңа Ята̄ҳқилъҳым Аӷныӷани Пасхамун.) Пилатым пикӣ Иудеит: «Та̄ўа Умӣлыхси!»

15Иудеит акилӷӯткат: «Сяңулюку, сяңулюку, қақӯраҳтыстигу!»

Пилатым а̄птыкӣ: «Хўаңамнун қақӯраҳтыстысюгыстыхӯ умӣлыхси?»

Первосвященнигыт кӣмсиқа̄т: «Кесарыңинаҳа̄гуқ умӣлыхпут».

16Ынка̄м Пилатым пыхтыка̄ Иисус лъңитнун қақӯрӣсқылъюку.

Қақӯрақаңат Иисус

17Та̄хкын пилъюўаҳтыт а̄нутка̄т Иисус уямихтыслъюку қақӯра̄. Агля̄тка̄т таўавык атилъқылӷӣмун: «Югым На̄сқўан Ныңа». (Та̄на Еврейистун, Голгофаңулӷӣ.) 18Таўани қақӯрақа̄т, ма̄лӷуклъю югык малигулъюкык қақӯрақахкыт. А̄лъҳа аӷынқигныӷанилъюку, иляңа сяӷумигныӷанилъюку, Иисус қука̄нилъюку. 19Пилатым игақыстыкақыхкаңа: «иисус назаретыӷмӣ, умӣлгат иудеит». Та̄хкын ныкыхтыстыка̄ қақӯра̄кун Иисусым. 20Та̄на игақыхка̄лӷӣ Еврейскыт, Ромамыт, Грегыт улюңистун. Углялӷӣт Иудеит атиҳтуқа̄т, қаюҳлъяк қақӯраӷвига Иисусым қантаӷанлыңуқ Иерусалимымың. 21Иудеит первосвященнигита такулюку Пилат пика̄т: «Таўатын игақсяҳқа̄нӷисяҳтуқ: “Умӣлгат Иудеит”. Хўатын игақсяҳқа̄яҳтуқ: “Уна ю̄к пика̄гуқ, Хўаңа Умӣлъка̄тңа Иудеит”».

22Пилатым пикӣ: «Игақыстыкақа таўатынъақңӯқ».

23Пилъюўаҳтыт туқӯқа̄сямыхтыху Иисус қақӯрамун тугулюки а̄ткӣ, ыстамаҳқыхкӣт, ата̄сикаҳта̄н тугуля̄ткат. Ата̄сик аткуя̄ҳӷык кылюңунатык улима̄ӷык тӯймыгның кынимыгнун.

24Пилъюўаҳтыт пикат: «Та̄кук ӣӷўӣхкынка атыҳтӣра̄ӷусиқылътыкык». Таўатын пилъыӷмыхтыхун Акузитыт Игақыхкат апыӷӣҳтыстыкӣт хўатын пилъҳит:

«А̄тканка ныңӣткақӣт,

ынка̄м та̄кук аткуя̄ӷыхка атыҳтӣра̄ӷусиқыхкақахкыт».

25Пилъюўаҳтыт таўатын пималюки, та̄ўаңуқ стамат аӷнат ныкывӷалъҳӣт қақурам туңаңани: Иисусым на̄ңа, на̄ңанлъю аңлыгутаңа, Мариялъю Клеопам нулиҳа, Мариялъю Магдалаӷмӣ. 26Иисусым ысҳақакык на̄нилъю, пиниқыхканилъю малихся̄ҳтыни ныкывӷалӷӣк таўани. На̄ни пика̄: «Аӷнами хўани, та̄на иӷнылӣтан».

27Та̄хкын малихся̄ҳтыни пика̄: «Та̄на на̄лӣтан». Та̄хкын кынляңа малихся̄ҳтыңан агля̄тка̄ лъмыхнун.

Иисусым Туқулъҳа

28Та̄м киңуңаның Иисусым лӣсимакыхка̄ сяңўа̄ тамаҳаӷми хўа̄ апыӷӣлӷӣ. Ынка̄м Акузитыт Игақыхкат апыӷӣӷысқылъюки хўатын пикақ: «Мықсюхтуңа».

29Та̄ўаңуқ сягныӷўа̄қ қуўа̄лӷӣмың виномың ималык. Пилъюўаҳтыт ныкыхлъюку ныпсягусиқ иссопым унаҳсӣӷўа̄ӷакун, ныплъюку виномун Иисусым қа̄нӷанун ныңугутка̄т. 30Иисусым на̄сӣӷлюку вино, пикақ: «Та̄ўа апыӷӣҳтуқ». Гӯҳтуткылъюку таӷныӷагни пыхтыкакык.

31Ята̄ҳқивигутаңаның Аӷнық, Иудеит иглыӷутистыңита та̄кут югусӣт қақӯрамытысюнӷилъкаңит, қаюҳлъяк уна̄миңани Субботаңулӷӣ, Пасхамлъю аӷнықыхкаңа. Ынка̄м Пилатымун қылӷутысқыхкӣт пилъюўаҳтынун айымқӣсқылъюки иӷуңит туқурахкӣӷысқылъюки, иқинъалюки қақӯрӣтның. 32Та̄хкын пилъюўаҳтыт такулюку сивулиқ ю̄к, айымқуқахкыт иӷукык, а̄лъҳанлъю иӷукык айымқуқахкыт. Та̄кук қақӯрақақыхкыхкыт малигулъюкык Иисусымун. 33Иисусым иӷукык айымсимаңилъкыхкыт қаюҳлъяк такуяқмыхтыху туқуңўа̄ӷлюни аюқыфтуқ. 34Иўырңа ата̄сим пилъюўаҳтым панаминың кынуқақа̄ Иисус сяниңакун. Таўаниңинақ а̄кўлю, мықлъю ма̄қыхкак. 35(Ысҳапакам тама̄кын а̄пҳӣ тама̄кут. Акузиткыхкӣ ипаңӯт, лӣсимакуқлъю уңипақңўа̄ ипапилъық. А̄пҳӣ тама̄кут лъпысилъю ухпыӷысқылъюси.) 36Тама̄кут апыӷӣқа̄гут Акузитыт Игақыхкат апыӷӣӷысқылъюки:

«Талўа ата̄сиқ ныҳқўа̄ӷа айымьяҳқа̄нӷитуқ».

37Хўатынлъю Акузитыт Игақыхкат пика̄гут:

«Ысҳапахлъықа̄т панакаҳтың».

Иисус Лъӣфқаңат

38Та̄м киңуңаның югым Аримафеяӷмӣм, а̄тқылӷӣм Иосифымың, Иисусым югусӣ аӷуляқутка̄ Пилатым аңыӷьягу. (Иосиф малихся̄ҳтыкыхкаңа Иисусым, иўырңа аксяқлъюку пика̄лӷӣ алиңлюни Иудеит иглыӷутистыңитның.) 39Никодимым малихтыка̄ Иосиф, кылъқылъюни тыпыңлъя̄симың ю̄к талъимат литра, смирнанкугның, алоэнкугның акумутңалӷӣгның. (Та̄на Никодим сивунӷани Иисусымун пика̄лӷӣ унугми.) 40Та̄кук югык аӷуляқулъюку Иисусым югусӣ тыпыңлъяҳқума̄н ӣмгутка̄к қӣпаӷаҳқун. (Таўатын Иудеит лъӣвӷақыхкаңит югыт туқукат.) 41Иисусым қақӯраӷвиган туңаңани та̄ўаңуқ сад уқфихтуқақ. Таўантыфтуқ нутаӷаҳлъюк лъивық, сялин лъивыӷвикылъҳилңуқ. 42Та̄юҳқыңъулӷӣк қаюҳлъяк Иудеит Ята̄ҳқыфикыхкаңат Аӷнық та̄на, ынка̄м та̄хун қантаӷанлыңуҳқун лъӣфқа̄қ.

Zur Zeit ausgewählt:

От Иоанна 19: ess2

Markierung

Kopieren