От Иоанна 14

Иисус Тӯмңӯқ Атамун

1Иисус пиля̄тақақ: «Қа̄мнаси сыӷлылӣҳтыстыхпынаки, сиӷимакитыху Кияӷнық, сиӷимакитыңъа хўаңалъю. 2Угля̄пихтуқ ныкаҳқақ Атама мыңтыӷа̄ни ынка̄м ята̄ҳқусяҳтуӷнақамси ныкаҳқамың. Таўатынъыӷисяқан уңипа̄нъаянӷитамси. 3Ята̄ҳқунъыӷмың апыӷӣқумси тагинқихлъюңа тугуклъиҳлъықамси, хўаңамнитысқылъюси кияҳфимни. 4Лӣсимакаҳси тума такунақыхкыхка». 5Фомам пика̄ Иисус: «Атанық, налъюкаҳпут навык пинақутын ынка̄м натынңам лӣсимакылъықыстыху тума?» 6Иисусым кӣмсиқа̄: «Хўаңа тӯмңӯңа, ипапилъҳӯңа, уңувалъҳӯңа. Кина алңунак Атамун агляӷна̄нӷитуқ ўытқукун хўаңамкун. 7Лӣсимакңўа̄ӷьяқуфсиңа, лӣсимакнаяӷаҳси Атакалъю. Иўырңа хўакын кынляңа лӣтаҳсилъю, ысҳаӷаҳсилъю».

8Филиппым пика̄: «Атанық, кылгутигу Ата хўаңкунъун ынка̄м итагнаӷилъта». 9Иисусым пика̄: «Филипп, лъпысинитуңа қавңарухлъяха̄ның, та̄ўа налъюкақсиңа̄? Китум ысҳа̄макумиңа, ысҳақақа̄лъю Ата. Ынка̄м сяңавык пизин: “Кылгутигу Ата хўаңкунъун”? 10Ухпықынӷистыңъа̄ Атам илюңанилңӯңа, Ата хўаңа илюмни? Акузитынка хўаңа катам акузиткынӷитанка. Ата илюмнилңуқ қыпҳаӷақуқ хўаңамкун. 11Ухпықитыңъа Атам илюңанинъилюңа пилӷӣңа, Аталъю илюмнинъикыхка. Налиӷмың ухпықитыңъа алъя̄ҳлъюхўаҳтилъҳынка апалъюқлъюки. 12Ипа уңипа̄тамси, китум ухпықыхкумиңа, та̄кут ата̄сит қыпҳақанка пилъықӣ. Талўа а̄ңатаӷалӷӣт тама̄куның пилъықӣ қаюҳлъяк агляӷнақуңа Атамун. 13А̄птыкуфси сямың алңунак Атымкун лыган пилъықақа, Атам а̄ңылъыҳлъяга кылгутысқылъюку Иӷныӷакун. 14Сямың алңунак а̄птыкуфсиңа Атымкун пилъықақа».

Акықусяқыхкак Аглыӷналӷӣк Таӷныӷак

15«Пиниқыхкуфсиңа қа̄ткылъықаси қылӷусянка. 16А̄плъықақа Ата тӯнысқылъюси алъяның Каюткаҳқамың, ынка̄м тӯнылъықӣси Каюткаҳқамың лъпысинисяҳқамың қӯнпырухлъяк. 17Та̄кук Каютык Таӷныӷа̄гук апыҳтуҳлъықӣси Кияӷныӷым ипапилъҳаның. Нунам юган тугуклъиӷна̄нӷита̄ қаюҳлъяк ысҳӣгалъкаңа талўа налъюкыхкаңа. Иўырңа лъпыси лӣсимакаҳси қаюҳлъяк лъпысинитуқ, илюхпысинисяҳқа̄гуқлъю.

18Унинъа̄нӷитамси лъңинаҳаҳпыси яйўа̄листун. Тагинқихлъықуңа лъпысинун. 19Ма̄тықўа̄қун нунам юган ысҳаӷнаниӷнақа̄тңа, иўырңа лъпыси ысҳаҳлъықаҳпысиңа, қаюҳлъяк уңувалӷӣңа, лъпысилъю уңувалъықуси. 20Ынка̄м таўани аӷныӷми уңуваҳтылъымни лӣлъықаҳси Атама илюңанитулъка, лъпысилъю илюмнитылъыҳси, хўаңалъю илюхпысинитулъка.

21Китум тугуклъиқумики қылӷусянка, қа̄ткыхкумикилъю, пиниқистыкақа, Атамалъю пиниқылъықа̄. Хўаңалъю пиниқылъықақа, лӣтыслъықуңалъю лъңанун». 22Та̄хкын Иудам пика̄, (Иуда Искариотыңунӷилңӯм) «Атанық, сяңавык лӣтыснақсин хўаңкунъун, нақам нунам юганун лӣтыстыхпынаң?» 23Иисусым кӣмсиқа̄: «Китум пиниқыхкумиңа қа̄ткылъықӣ апыҳтӯсянка. Атама пиниқылъықа̄ ынка̄м Атакулъҳӣгни такулюку кияҳфикылъықаҳпут. 24Китум пиниқынӷилъкумиңа қа̄ткынъа̄нӷитӣ апыҳтӯсянка. Апыҳтӯсят нагаткыси хўаңамның пиңунӷитут, Атамың пиңӯт Каяхтистымның.

25Уңипа̄тамси тама̄кын лъпысинилъюңа. 26Каютым апыҳтуҳлъықӣси сямың тамаҳа̄ның. Нықаҳтыслъықӣ қамахлъюки тама̄кут а̄пқанка лъпысинун. Та̄кук Каютык Аглыӷналӷӣңӯк Таӷныӷак, Атам каяхсяҳқакык Атымкун.

27Унивикамси ныкыхмылъыӷмың. Ныкыхмылъқа тӯнақа лъпысинун. Нунам тӯнылъҳатун тӯныӷитамси. Ынка̄м илюси сыӷлылӣҳтыстыхпынаки талўа алиңыхпынаси. 28Нагаткақаҳпысиңа хўатын пилӷӣңа: “Аӷуляқнақуңа иўырңа тагинқихлъықуңа лъпысинун”. Пиниқыхкақсяқуфсиңа қуянаяҳтуси уңипа̄тақңамси Атамун агляӷнақнилюңа, қаюҳлъяк а̄ңыҳлъяхтуқ хўаңамның. 29Хўа̄ уңипа̄тамси та̄хкын сивутҳулъюку пилъыҳқа̄ ынка̄м апыӷӣқан ухпыҳлъықуси. 30Алыҳқуӷнаниӷьяҳтуңыстаӷамси, қаюҳлъяк иглыӷутистыңа нунам ӯм тагиңӯқ. Аҳтуӷьяҳқа̄нӷилъҳитуқ хўаңамнун, 31иўырңа Атам қылӷуткӣ писқылъҳўа̄ӷатун атуқақанка нунам юганун лӣтысқылъюку пиниқилъқа Атамун. Ныкывитык, аӷуляқылъта».

Zur Zeit ausgewählt:

От Иоанна 14: ess2

Markierung

Kopieren