От Иоанна 13

Иисусым Уӷвуҳтуқаңи Малихся̄ҳтыми Итыгӣт

1Ата̄сӣҳтыкақ аӷнық Пасхам Нықынӷаҳқылъыҳқа̄нун. Иисусым лӣсимакыхкаңа қантаӷақун Атамун аглялъыҳқани унилъюку уна нуна. Қӯнпың пиниқыхкақӣ тама̄кут лъми пини нунамылңӯт, пиниқыхкақӣ кынлымун.

2Таўани иӷивгаӷми Иисусылъю малихся̄ҳтыкулъҳӣт қырңуӷуткат ныӷналютың. Туӷныӷа̄м апыӷӣқа̄ сюмыҳтаӷа̄ткысқылъық Иуда Искариотымун увыҳпагутысқылъюку Иисус. (Иуда иӷнықыхкаңа Симоным.) 3Иисусым лӣсимакыхкаңа Атам тӯныхкақыхкаңа аҳтуӷьяҳқа̄нӷилъыӷмың сямун тамаҳа̄нун. Лӣсимакыхкаңалъю Кияӷныӷмың пиңутни, аглялъыҳқанилъю Кияӷныӷмун. 4Ныӷӯтңулютың таўани Иисус ныкывлюни, қа̄слъӣт а̄ткани матаҳқуӷлюки, выхлъюк қукамикун қилъҳутка̄. 5Та̄хкын аӷмигусик мыӷмың имиӷлюкык малихся̄ҳтыми итыгӣт уӷвуҳтуқӣ, қукаминилңуӷмың выхлъюгмың сяңихтақлъюки. 6Иисусым ка̄тка̄ Симон Петр, Петырым а̄птыка̄: «Атанық, итыганка уӷвуӷнақсикӣ?» 7Иисусым кӣмсиқа̄: «Лӣгикна̄нӷитан ся̄қутка ма̄тын иўырңа та̄кўаниңани лӣгикылъықутын». 8Петырым пика̄: «Итыганка уӷвуӷна̄нӷитңўа̄ӷатын». Иисусым пика̄: «Уӷвунӷилъкумки итыгаҳтын, малихся̄ҳтыкнаниҳлъықамкын». 9Симон Петырым пика̄: «Атанық, нақам итыганка уӷвуныӷмың та̄қыхкуфки ӣхынкалъю, на̄сқуқалъю пинакытын». 10Иисусым пика̄: «Ю̄к уӷвуҳқынъыӷмини иқаңӣтақа̄, итыгаҳӣнӣ уӷвуӷьяҳқа̄ўақут қагани иглыҳлъюни итыныӷмини. Қамахлъюси иқаңитуси, иўырңақун кина ата̄сиқ». 11Иисусым лӣсимакыхкаңа кинаңутаңа увыҳпагутияҳқақ лъңаның. Тама̄кын апалъюқлъюку хўатын пика̄лӷӣ: «Қамахлъюси иқаңитуси, иўырңақун кина ата̄сиқ».

12Та̄қсямики итыгӣт уӷвуҳтуныӷмың қа̄слъӣт а̄ткани а̄лъюки ақумынқихлъюни а̄птыкӣ: «Лӣгикынӷистыхӯ та̄на уӷвуҳтуӷилъқа итыгаҳпысиның? 13Туқлъюӷақаҳпысиңа Апыҳтуӷистымыңлъю, Атаныӷмыңлъю, ылъқуӷаҳтақаҳпысиңа, қаюҳлъяк таўатытуңа. 14Хўаңа, Атаныҳпысини, Апыҳтуӷистыхпысини уӷвӯӷақумки итыгаси лъпысилъю уӷвуӷьяҳқақаси иляхпыси итыгӣт. 15Таўатын пӣңа успутақысқылъюку лъпысинун. Ынка̄м лъпысилъю пӣқитык хўаңа пилъымтун лъпысинун. 16Ипа уңипа̄тамси, қыпҳаҳта а̄ңатаӷанӷитуқ умӣлыгминың, уңипаҳталъю а̄ңатаӷанӷитуқ каяхтистыминың. 17Лӣсимакыхкуфсики тама̄кут қуялъықуси таўатын пикуфси».

Иисусым А̄пқаңа Увыҳпагутылъыҳқани

18«Акузиткыңъунӷитамси қамахлъюси. Лӣсимаканка натытуляңи накмикыхканка. Иўырңа апыӷӣӷьяҳқа̄гуқ Акузитнилңуқ Игақыхкани хўатын пилъық: “Югым ныӷылгусиӷикам хўаңамның увыҳпагуткақа̄ңа”. 19Уңипа̄тамси та̄на сивутҳулъюку, ынка̄м апыӷӣқан ухпықылъықаҳпысиңа хўаңа лъңаңӯңа. 20Ипа уңипа̄тамси, китум алңунак тугуклъиқумигу каяхтыкақа̄, хўаңалъю тугуклъиҳлъықа̄ңа. Ынка̄м китум алңунак тугуклъиқумиңа, тугуклъиҳлъықа̄ Каяхтикақ хўаңамның».

21Иисусым апыӷлюку увыҳпагутылъыҳқани ынңа̄талъ қа̄мхурухлъяк қивӷуҳлъякақ, пикӣ: «Ипа уңипа̄тамси, налиҳпыси увыҳпагунъақңўа̄ңа». 22Малихся̄ҳтыт ысҳақақуткат лъмыхның қаюҳлъяк налъюнықсюкыхка̄т кина пикатаңа. 23Ата̄сиқ малихся̄ҳта пиниқыхка̄ Иисусым ақумгалӷӣ ся̄ӷўани. 24Симон Петырым апақулюку та̄на малихся̄ҳта а̄птысқыхка̄ кина пӣқутаңа. 25Та̄м малихся̄ҳтым малъыглюни Иисусымун а̄птыка̄: «Атанық, кинаңа̄ўа увыҳпагутинақылӷӣ лъпынун?» 26Иисусым кӣмсиқа̄: «Ныплъюку нықыкшаңлъяқ қаю̄симун тӯнылъықақа увыҳпагутияҳқамун хўаңамның». Ынка̄м Иисусым тугулюку нықыкшаңлъяқ, ныплъюку, тӯныхка̄ Иуда Искариотымун, иӷныӷанун Симоным. 27Лыган Иудам туўа̄ нықыкшаңлъяқ, Туӷныӷа̄м ӣтқа̄ Иуда. Иисусым пика̄ Иуда: «Та̄на пияҳқан пӣӷаҳтигу». 28Налиҳӣнӣта̄ таўанлыңӯт лӣгикумаңилъкаңат сямың Иисусым Иуда пикатаңа. 29Иудам афлъыңакңукык манилӷутак, ынка̄м сюмыҳтаӷа̄ткыхка̄т сямың тукфиӷияҳтӣсқынъилюку аклъюкыхкамың нықынӷаҳқымъун, налиӷмың аклъюмалӷӣнун тӯнияҳтӣсқынъилюку. 30Ынка̄м Иудам ныӷлюку нықыкшаңлъяқ а̄ныхкақ. Унугулӷӣ таўани.

31Иуда а̄ньян Иисус пикақ: «Хўа̄ ма̄тын югыт ысҳаӷа̄т натын Иӷныӷа Югым қӯлвалъыңылъҳа, ынка̄м лъңакун Кияӷнық қӯлвалъыңуқ. 32Кияӷнық қӯлвалъыңыңукан Иӷныӷакун Югым, Кияӷныӷым қӯлваӷьяҳқақа̄ лъмикун қантаӷаҳақун.

33Таӷнуҳаҳамни, унисяҳтуңыстаӷамси. Қайўа иваӷьяӷңа̄ҳпысиңа, такукамнун пина̄нӷитуси. Иудеит иглыӷутистыңитлъю уңипа̄ткақанка таўатын. 34Уңипа̄нъақамси нутаӷамың қылӷусямың: Пиниқутулъюси. Пиниқутусяҳқа̄гуси катам хўаңа пиниқылъымтун лъпыси. 35Пиниқускуфси тамаҳаӷми югым лӣсимакылъықӣси хўаңамнун малихся̄ҳтыңунилюси».

Иисус Петырымун Налъюнқынъақнилӷӣ

36Симон Петырым а̄птыка̄ Иисус: «Атанық, навык пинақсин?» Иисусым кӣмсиқа̄: «Такуяҳқамнун малихна̄нӷитаҳпыңа ма̄тын иўырңа та̄кўаниңани малигулъықутын». 37Петырым а̄птыка̄: «Атанық, сяңан малихнақынӷисикын ма̄тын? Туқуткысяқлъыгўа̄мкын хўа̄». 38Иисусым кӣмсиқа̄: «Ипа туқуткылъықсиңа̄? Ипа уңипа̄тамкын, пиңаюның налъюнқылъықаҳпыңа петух қалӷиҳтыстыхпына̄н».

Zur Zeit ausgewählt:

От Иоанна 13: ess2

Markierung

Kopieren