От Иоанна 12

Иисус Илякумта̄ӷминилңуқ Вифаниями

1Аӷвинлыгуҳтақуқлъю аӷнық Нықынӷаҳқылъҳанун Пасхам, Иисус Вифанияткақ, Лазарым кияҳфиганун. (Та̄на Лазарь Иисусым уңуваҳтыкақа̄ туқулъыӷмың). 2Таўани Иисус ята̄ҳқутка̄т нықынӷаҳқунъалюку ынка̄м Марфам кытфаҳтӯткӣ ақылъқат. Лазарлъю таўанлыңуқ малигулъюни Иисусымун. 3Та̄хкын Мариям тагиткакык акитупихлъыҳӣк тыпыңлъя̄сик нардопигмың улима̄ӷык. Иисусым итыгӣ кӯвиклъюки сяңихтыкӣ нуяминың. Ынка̄м мыңтыӷам илюңа тыпыңлъя̄сиҳпагниҳқўа̄кақ. 4Иуда Искариотлъю таўанлыңуқ, Иисусым малихся̄ҳтыңа. (Та̄кўаниңани увыҳпагусяҳқақңукаңа Иисус). Иуда пикақ: 5«Та̄кук тыпыңлъя̄сик 300 динарийем акика̄к. Акиксяқлъыгыстун, акиңа та̄на аклъюмалӷӣнун тунқуӷнаяҳтуқ». 6Таўатын пика̄лӷӣ мыгнукылӷӣстун аклъюмалӷӣт иўырңа мыгнукыпихтыкаңа мани. Афлъыңакистыңулӷӣ малихся̄ҳтыт манилӷутӣтның ынка̄м тугуткаюгулӷӣ лъңанун катам атуҳқамың тыглыгнӣҳтыңутминың.

7Иисусым пика̄: «Авылӷаҳу, афлъыңакума̄к тыпыңлъя̄сик аӷныӷмун хўавык ята̄ҳқынъалюку лъивылъыҳқақа. 8Аклъюмалӷӣт қӯнпың тама̄нтут. Хўаңа қӯнпың лъпысининъа̄нӷитуңа».

Иудеит Агӷиткат Лазарь Туқунъалюку

9Угляпихлъыҳӣт Иудеит нагақуӷлюку Иисус Вифаниямынъилюку ысҳаӷьяҳтӯтка̄т, таўавыклъю Лазарь ысҳаӷналюку Иисусым уңуваҳтыка̄. 10-11Лазарь апалъюқлъюку угляпихлъыҳӣт Иудеит унилъюки иглыӷутистытың ухпықыхка̄т Иисус. Ынка̄м та̄кут первосвященнигыт агӷитңўа̄қат туқунъалюку Иисус, ынраӷңам хўа̄ агӷиткыхка̄т Лазарылъю туқунъалюку.

Югыт Усюқыхкаңат Иисус Иерусалимылъҳӣ

12Уна̄миңани юлӷутыҳлъягыт Нықынӷаҳқылъҳанун Пасхам тагиляӷа̄ткат, нагақуқа̄т Иисус тагӣқнилюку Иерусалимымун. 13Ынка̄м кыпӯлъютың пальмат уқфигыт авайӣтның па̄сқа̄т Иисус акилӷӯмаӷмың:

«Усюқнаҳалык Кияӷнық!

Кияӷныӷым қуяслъигу Умӣлга Израилым тагилӷӣ А̄тҳакун Атанӷым!»

14Иисусым навӷаӷлюку осёлаӷақ қа̄йңакун ақумыхкақ таўатыңўа̄қ Акузитыт Игақыхкат пинақнилъҳистун. Та̄кут Акузитыт хўатын пика̄гут:

15«Алиңыхпынаси, югани Иерусалимым!

Ысҳаҳтыху, умӣлыхси тагӣқуқ ақумлюни осёлыӷа̄м қа̄йңакун».

16Таўани пилъыӷми Иисусым малихся̄ҳтыңита лӣгикумаңилъкаңат та̄на ӯкналиқылъық. Ўытку киңуңаның Иисусым уңувалӷанлъю, маюлъҳанлъю қилягмун нықа̄тка̄т та̄на ӯкналиқылъық, нықа̄ткӣтлъю апыӷӣқӣт лъңанун.

17Юлӷутыт уңипақңукаңат ысҳапалъыҳтың Иисусым уңуваҳтилъҳа Лазарымың, а̄нысқылъҳалъю лъивыӷмың. 18Ынка̄м угляпихлъыҳӣм югым па̄сқа̄т Иисус, қаюҳлъяк нагақуқақыхкаңат та̄на алъя̄ҳлъюхўаҳтилъық. 19Та̄хкын Фарисеит илятың пикӣт: «Сяңўа̄ тамаҳаӷми анахутңӯқ хўаңкунъун. Ысҳақаҳтыхуқун, ӣңунаҳаӷми югым малихтыңъўа̄ Иисус».

Иисусым Акузиткыхкаңа Туқулъыҳқани

20Иляңилъю Грегыт Иерусалимытка̄лӷӣт манигӯнъалютың Нықынӷаҳқылъҳани Пасхам. 21Агляӷлютың Филиппымун, пика̄т: «Югунӣқ, ысҳаӷьюўақаҳпут Иисус». (Филипп Вифсаидамың пиңулӷӣ, Галилеямылңуӷмың.) 22Ынка̄м Филиппым уңипа̄лъюку Андрей, уңипа̄сяҳтуқа̄к Иисус. 23Иисусым пики: «Афлъю ка̄сима̄қ Иӷныӷан Югым қӯлвалъыңыҳлъялъыҳқа̄. 24Ипа уңипа̄тамси, ўыткуқун пӣтун ифкаҳлъюни нунамун итыӷлюни туқукуми пӣтысқуҳлъягьяҳқа̄гуқ, а̄мта̄м туқунӷилъкуми та̄ўа ата̄сиҳа̄лъықуқ пӣтун. 25Китум алңунак пиниқыхкумигу уңувалъыни ифлъяяҳқақа̄. Иўырңа китум алңунак угумикыхкумигу уңувалъыни хўани нунами кынлыңилңуӷмың уңувалъыңьяҳқа̄гуқ. 26Китум алңунак қыпҳа̄сюкумиңа малихсяҳқақа̄ңа. Ынка̄м қыпҳаҳтыка хўаңамнисяҳқа̄гуқ на̄нсяӷңа̄ӷма. Атама қӯлваӷьяҳқақа̄ кина алңунак қыпҳа̄тилӷӣ хўаңамның.

27Ма̄тын уңувасихка сыӷлылӣӷӯк. Сямың пиляңа? Хўатын пиляңа̄: “Ата̄й, югулиңа икфиқылъыҳқамның”? Нака̄, таўатын пина̄нӷитуңа қаюҳлъяк тагика̄гуңа икфиқналюңа. 28Ата̄й, а̄ңылъыҳлъяга атыҳпык алӣҳтигу». Та̄хкын ма қилягмың пикақ: «А̄ңылъыҳлъяга атыӷма алӣҳсима̄қа, алъя алӣҳлъықақа».

29Юлӷутым ныкывӷалъҳӣм таўани нагалъюку та̄на ма пикат: «Калъюгуҳта̄». Иўырңа иляңи пикат: «Яқулгым алыҳқуӷўа̄ Иисус». 30Иисусым пикӣ: «Ма та̄на лъпысинун аюқуқ, хўаңамнун пиңунӷитуқ. 31Хўа̄ ма̄тын Кияӷныӷым нанқихнақа̄ нунам юга, хўа̄ ма̄тын Кияӷныӷым ыхнақңўа̄ иглыӷутистыңа ӯм нунам. 32Хўаңа кывылъыңыхкума нунамың, та̄хун тагиляӷа̄тыслъықақа қамахлъюку ю̄к хўаңамнун». 33Иисус таўатын пикақ апыӷналюку натын туқулъыҳқани. 34Юлӷутыҳлъягыт пика̄т: «Нагақуқақаҳпут Лӣлиҳтӯся̄ның Моисейем, Христосыңӯқ кияҳсяҳқа̄гуқ қӯнпырухлъяк. Ынка̄м сяңавык пизин: “Иӷныӷа Югым кывылъыңьяҳқа̄гуқ”? Кинаңа̄ўа та̄на: “Иӷныӷа Югым”?» 35Та̄хкын Иисусым пикӣ: «Ниӷук лъпысининъақңӯқ натыңӣҳақ. Ынка̄м иглыҳтык ниӷугаӷлюку, мамлыхфагилган. Кина алңунак иглыҳлъыҳӣ мамлыгми налъюкуқ натмун пӣқутни. 36Ынка̄м ниӷук паниның лъпысинилъюку ухпықитыху, авақуталӣтысқылъюси ниӷугмун». Иисус таўатын пилюни кахтаҳтыкақ лъңитның.

Иудеит Ухпықынӷилъкаңат Иисус

37Югыт ысҳапагьяӷңа̄ӷмыхтыху Иисус угля̄пихлъюку алъя̄ҳлъюхўаҳтилӷӣ паниның ухпықумаңилъкаңат. 38Ухпықумаңитылъҳита апыӷӣҳтыстыка̄ Исаиям ӯкналиқистым хўатын пилъҳа:

«Атанық, китум ухпықаки сяңўа̄т а̄пқапут?

Атанӷым аҳтуӷьяҳқа̄нӷилъыни китумун ысҳаҳтыстагу?»

39Тама̄кын апалъюқлъюку ухпыҳпагниңитка̄гут. Исаия хўатынлъю ӯкналиқыхка̄гуқ, Кияӷнық пика̄гуқ:

40«Ӣйңит ая̄стыкақанка ысҳа̄нъаюката.

Умьюгӣтлъю лӣгиксяҳқа̄наниҳқыхкақанка лю̄рақ қӣвнаюката хўаңамнун на̄лъҳутысқылъютың».

41Исаия таўатын пика̄гуқ ысҳақақутминың Иисусым ниӷуҳқылъыҳқа̄ ынка̄м акузиткыхкақыхкаңа.

42Қайўа угляпихлъыҳӣт Иудеит ухпықынӷисяӷңа̄тху Иисус, нақамынрақ угляпихлъыҳӣт иглыӷутистыңита ухпықыхка̄т Иисус, Христосыңутаңа. Иўырңа а̄пҳумаңилъкаңат алиңлютың Фарисеит а̄ныснаюкаңистың синагогамың, 43қаюҳлъяк та̄кут иглыӷутистыт усюқылъыңьюгақут югның пакихулъюку Кияӷныӷым усюқылъыҳқа̄ның.

44Иисус акилӷӯкақ: «Китум алңунак ухпықыхкумиңа, хўаңаңинаӷма ухпықыхпынаңа, ухпықңўа̄ Каяхтистыка. 45Китум алңунак ысҳақумиңа, ысҳа̄ңўа̄ Каяхтистыка. 46Тагика̄гуңа нунамун ниӷугулюңа, китум алңунак ухпықыхкаңаңа мамлыгмынъаниҳлъықуқ. 47Китум алңунак нагалъюки акузитынка қа̄ткынӷилъкаки, нанқихна̄нӷитақа аӷьюӷьяҳқа̄нилюку, қаюҳлъяк нанқихсяҳтӯнӷитанка нунам юги, йыӷлыги югулияҳтӯўанка. 48Китум алңунак иҳсякыхкаңаңалъю, тугуклъинӷилъкакилъю акузитынка нанқихтистыкаҳқалгӯқ. Акузитыт акузиткыхканка нанқихлъықа̄т киңулиӷми аӷныӷми, 49қаюҳлъяк акузитынка хўаңа пикынӷитанка. Атам Каяхтистыма қылӷутка̄ның акузӣқуңа. 50Лӣсимаканка қылӷусӣ кынлыңилңуӷмың уңувалъыңыстикаюгӯт. Ынка̄м акузиткақыхкынка Атам қылӷусяқӣ хўаңамнун акузиткысқылъюки».

Zur Zeit ausgewählt:

От Иоанна 12: ess2

Markierung

Kopieren