NALANGTE 17
17
Thessalonica Khua Hlenghnak
1Paul le Silas tu Amphipolis le Apollonia khua ah tlawng ai Thessalonica khua ah hleng kawm i. Ciata ah Judah mite ai synagogue um i. 2Anite ai a bawn kel de bangin Paul tu synagogue ah feh i. Ciata ah Sabbath nia ni thum song rori misenpui thawn thu el dun ai, 3Messiah tu thihhnak tuar tuhai tho leh tuh i, ti khiah Lai Thianghlim songin larruai ai relfiang betbo i. “Ning hnenai i phuanghnak tu Jesuh tu Messiah i,” tiin Paul in ti i. 4Mi hrekkhatte tu amahte thinlung fiang ngah ai Paul le Silas khiah kom tlang i. Cen nupang hotute le Pathian a biatu Greek mi tampui a burpui in Paul le Silas hnenah kom tlang ve i.
5Ikhalselai Judah mite in iksik tlang ai lamlak ai a vaktu mi huatsuak hrekkhat heh ko ai miburpui burkhat cang i. Khuasong ah au tlang ai a roh ngai in buaihnak suahpui i. Jason tihnak pa ai inn ah kulh tlang ai ciata in Paul le Silas pom in mizapui hmaiah duk tum i. 6Ikhalselai cia inn ah hmu lo manin Jason le sangtute hrekkhat sawn khiah khua upate hmaiah fehpui ai, “Nuamhmuncang ah buaihnak suahpuitute, tunah kin khuasong hleng ai, 7Jason in a inn ah umruai i. Amahte ponghnak tu, ‘Jesuh tihnak kumpibawi dang pakhat um i,’ ti tlang ai ciatihin Rome kumpibawi ai dan bal tlang i,” tiin au murhmo i. 8Ciatih ai au tlang manin miburpui le khuasong upate buaitiar sek i. 9Thunaitute in Jason le a rualpuite tu thukhamhnak tangka kuanruai ben fangin hlat leh i.
Berea Khua Hleng Kawm I
10Khuathim sawng fangin sangtute in Paul le Silas khiah Berea khua ah hla tlang i. Cia khua hleng fangin Judah synagogue ah feh i. 11Ciata ah mi senpui tu Thessalonica khua mite tahin thinlung tluangtlam deuh i. Amahte thurelhnak khiah thinlung takin ngai tlang ai, nisiar in Paul ai relhnak khiah a ngaingai maw, a ngaingai lo ti Lai Thianghlim siar in tehṭhim tlang i. 12Mi tampui in sang tlang i; upat tlak Greek nupangte le Greek pasalte inkhai sang tlang ve i. 13Ikhalselai Thessalonica ai umtu Judah mite in Berea khua ahkhai Paul in Pathian thu rel i ti ling fangin Berea khua ah kawi ai misenpui heh tok ai buaitiar dekdo i. 14Ciasawng ah sangtute in Paul tu tifingriat lamah tlanruai i; ikhalselai Silas le Timothy tu Berea ah tang ta i. 15Paul hlatu sangtute in Paul heh Athens khua tian hlun tlang i; cen a hluntute tu let ai Silas le Timothy in a rang thai tawp in amah hnawh tuhin Paul thucah i.
Athens Ah
16Pual in Silas le Timothy Athens khua in a iang laiah cia khuapui tu milim zuk in dim i ti khiah hmu ai a thin nau roh i. 17Ciamanin Judah mite le Pathian biatu Greek mite thawn pumkhawmhnak inn synagogue ah thu el dun de i; mizapui taikhawmhnak hmun ahkhai a kawitute thawn thu el dun ṭiode i. 18Epicurean thuzirhtu hrekkhat le Stioc thuzirhtute hrekkhat thawn khai thu el dun tlang i. Mi hrekkhat in, “Zaikhai ling si lo, he pa in mi hmaiah lar hiam ze in ziang rel tum ini?” tiin ti tlang i.
Mi hrekkhat in, “Ramdang pathiante ai thula rel vuah bang,” ti tlang i. Zaimanin ciatihin ti i tifangin Paul in Jesuh le tholehhnak thu a rel manin i. 19Ciamanin Paul tu Areopagus tihnak khua ai Council hnenah suahpui ai, “Thuthar na zirhhnak heh ziang i, ti ling kin nuam i. 20A hrekkhat na rel kin zahnak tu a lamdang ze ai a sullam ziang ini ti ling kin hiam i,” tiin ti tlang i. 21(Zaimanin ciatihin ti ini tifangin Athens khua songmi hmuahhmuah le he khua ai a umtu ramdang mite inkhai cia thuthar le thilthar heh amahte can veksen hmang in za thliahthlo le rel hnelhno a hiamhnak ber pawl i).
22Pual tu amahte khua Council Areopagus tihnak upa hmaiah ding ai a hnenah, “Ning Athens mite heh biakhnak lam hmuahhmuah ah zuam tlang roh ti hmu ing. 23Zaimantifangin ning khua songah i vak fangin Pathian ning biahnak hmunte khai sik ai puleng pakhat vumah ‘Kin Ling lomi Pathian Hnenah,’ tiin ning nganhnak hmu ing. Ciatihin ning ling lo cing in ning biahnak Pathian heh tunai ning hnenah i phuanghnak heh ihang. 24Lailung le a songai a umhnak hmuahhmuah a bawntu Pathian tu lai le van ai Bawi i ai minung kut ai sahnak biakinn songah um lo i.#2Kum 8:27; Isa 42:5; Nal 7:48 25Ciahlaiah Pathian tu mi zongzong hnenah nunhnak haihawh le thildang hmuahhmuah a petu Pathian a imanin minung in a hrangah kin bawnhnak khiah a kulhnak zaikhai um lo i. 26Mihing pakhat songin laivum miphun hmuahhmuah semsuah ai laivum pumpuhluk ah umruai sio i. A hlanvom in zai teng can ah um tuhai a konteng hmun tian um thil tuh i, ti khiah rel cia sio i. 27Zaimanin hetihin tawlrel cia ini tifangin Pathian si tlang ai hmusuak thil tuhin i. Ikhalselai a ngaingai in tifangin Pathian tu aisu thawn khai hla lo i. 28Mi pakhat in a rel cia bangin,
‘Amah songah nung ising,
Tlangleng ai nun khuasa ising!’
tiin ning la puahtute hrekkhat in a tihnak bangin, ‘Kinmah khai heh a fate ising,’ 29Ciatihin Pathian ai fate kin imanin thilthiam pawl le zuk suai thiam pawl in sui milim, ngun milim le lungto milim bawnhnak heh Pathian ah kin ruat tuh khiah i hrimhrim lo i. 30Minung in Pathian ling loin a um awng can heh amah Pathian in hmu lo bangin um san menma i; ikhalselai tuh ahcen ning nuncan pha lohnak in sualsir tuhin mi zongzong heh ruai i. 31Zaimantifangin a ril cia mi pakhat in lailung mite veksen heh dikcanghnak thawn thukhan tuhin ni tiam zo i. Cia thu tu thudik i, ti khiah mi zongzong hnenah larruaihnak ah ciami pa tu thihhnak in thoruai leh zo i,” tiin ti i.
32Mithi tholehhnak thu Paul ai relhnak za fangin mi hrekkhat in hnihsan i; ikhalselai midang in, “Kin rel lehthio silai kin daih i,” tiin ti i. 33Cia hnuaah Paul tu pumkhawm hmun in suak i. 34Mi hrekkhat in hlun ai sang i. A sangtute lakah Council upa Dionysius tihnak le Damaris tihnak le nupang pakhat le midang tampui khai tel i.
Zur Zeit ausgewählt:
NALANGTE 17: RZB
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Zanniat Bible © Bible Society of Myanmar, 2018.
