NALANGTE 16
16
Paul Le Silas Hnenah Timothy Feh
1Paul tu Darbe le Lystra khua ah tlawng i; ciata ah hnuahluntu Timothy um i. A nu tu Judah mi i ai Khristian i, a pa tu Greek miphun i. 2Lystra le Iconium khua ai umtu sangtute in Timothy heh porh tlang roh i. 3Paul in Timothy fehpui a nuam manin a zarhtan sah i. Zaimantifangin ciata ai a umtu Judah mite in Timothy ai pa tu Greek mi i ti khiah ling tlang sio manin i. 4Khua pakhat hnua pakhat hleng betbo ai Jerusalem khua ai nalangte le pawlpui upate in a relcathnak dante khiah sangtute hnenah rel betbo ai hlun tuhin khai forh i. 5Ciamanin pawlpuite tu sanghnak lamah hat deuhdeuh ai ni khat hnua ni khat minung tam amam i.
Paul In Larhnak Hmu I
6Asia ram songah Thuthangpha rel tuhin Rauhla Thianghlim in siang lo manin Phrygia le Galatia ram songah khual tlawng kawm i. 7Mysia ramri hleng fangin Bithynia ram songah lut tum i, ikhalselai Jesuh ai Rauhla in siang lo i. 8Ciamanin Mysia ram tu lan ai Troas khua ah zu kawm i. 9Cia zan ah Paul in larhnak hmu ai ciami a hmuhnak ahcen Macedonia mi pakhat ding ai, “Macedonia ah kawi tulai kin bawm tu,” tiin ninghio ngen i. 10Paul in larhnak a hmu ben sawng fangin Macedonia ah feh tuhin pai kawm i ing, #16:10 Kin tu pai kawm cialep i ing tihnak heh he laingantu in “kin” tihnak pongfang hmasaber a hmanghnak i. zaimantifangin ciata ai mite hnenah Thuthangpha rel tuhin Pathian in kin ko i tiin sang kawm i ing.
Philipi Ah Lydia Thinthlenghnak
11Troas khua in lawng thawn feh kawm ai Samothrace lamah a cang ngai in feh i ing; cen a thangha ah Neapolis khua hleng i ing. 12Cia khua in lai lamin Philipi khua hleng i ing. Philipi khua tu Macedonia ram songai peng pakhat ai khuapui i. Rome ai ukhnak khua i fawn i. Ciata ah ni tampui cam i ing. 13Sabbath nia ah kin khai khuapui songin tipui kamah feh i ing; ciata ah Judah mite hmunkhat ah sawngenhnak hmun um na tu tiin ruat i ing. To kawm ai ciata ai a kawitu nupangte thawn, thu ruat tlang i ing. 14Amahte lakai pakhat, kin thu a ngaitu Thyatira khuami a hming Lydia i ai ani tu pon sannum zuartu i. Ani tu Pathian biatu i ai Paul ai thurelhnak phatak niu in ngai tuhin Bawipa in Lydia ai thinlung dawngkham hong sah i. 15A innsangte baptisma lang tlang sio hnuaah, Lydia in, “Bawipa sang taktak i tiin i ruat le i sikhaw i inn ah cam tu ve hram ih!” tiin kin sawm i. Ciatihin kin sawm manin feh kawm i ing.
Philipi Thawng Songah
16Ni khat ah sawngenhnak hmun kin feh laiah, khuasia molhmi hmai lam thu a relciathaitu nupang pakhat in kin hmuak i. Hmai lam thu a rel cia manin a bawite caah tangka tampui ngah de i. 17Paul le kinmah khel lamin kin hlun betbo ai, “Hemite heh Cungnungber Bawipa ai salte i! Nunohnak thu ning hnenah phuang i!” tiin au betbo i. 18Ciatihin ni tampui au manin hnuavai fangin Paul tu a thintok ze ai khellet her in a khuasia hnenah, “Hemi nu songin suak tuhin Jesuh hming in thu na pe ing!” tiin ti i. Cia sawngpah in khuasia tu suak teu i.
19A naitute in tangka ngahthilhnak lampui um nawn lo i ti khiah ling fangin Paul le Silas pom ai thunaitu bawite hnen miburpui taikhawmhnak hmunah duk tlang i. 20Rome acuzah thukhantu bawite hmaiah fehpui ai, “Hemite heh Judah miphun i ai kin khua songah buaihnak suakruai i. 21Kin dan thawn a kaih dun lomi dan zirh kawm i; kin tu Rome acuzah minungte i ing ai he amahte zirhhnak dan heh pom thil lo i ing, hlun khai hlun thil lo i ing,” tiin ti tlang i. 22Cen mizapui khai Paul le Silas huatu ah tel tlang ve i.
Cia hnuaah acuzah thukhantu bawite in Paul le Silas ai hnikpon zik sah sek ai vit tuhin thupe i. 23A roh ngai in vit ai thawnginn ah khum i, thawnginn uktu pa tu phatak niu in tawh kalh tuhin thupe i. 24Ciami thupehnak a ngah bangin thawnginn uktu pa in Paul le Silas khiah thawnginn songta khan songah khum ai thingtum rit ngai pahnih in hrengkhen i.
25Zan seulai dung fangin Paul le Silas khiah sawngen ai Pathian thangphat in la sa kawm i; cen a dang thawngto mite in ngai tlang i. 26Mangrin loin a roh ngai in hlinhlin ai thawnginn tu a ham tianin hlin sek i. Cia sawngpah in dawngkhamte tu hong sio ai thawngto mite hmuahhmuah ai kut khihhnak thir cikcin dolh sek i. 27Thawnginn uktu khai phawk ai thawnginn dawngkhamte hong sio i ti a hmu fangin thawngto mite tlan zo sek i tiin ruat ai, a ralvang phok in amah veve rek dun tum i. 28Ikhalselai Paul in a aw naih tawp in au ai, “Nangmah veve tuahmawh mah! Kin veksen in um tlang hlen i ing,” tiin ti i.
29Thawnginn uktu pa in mai koih tu ih, ti ai thawnginn songah rang ngai in lut ai Paul le Silas ke keham ah hlawng hlelhlo in bok i. 30Cen sumpua ah suahpui ai, “I bawipate, nunohnak ngah tuhin ziang bawn tuh ing?” tiin zawt i.
31Anite in, “Bawi Jesuh sang tulai nangmah le ning innsang in nunohnak ngah tuh i si,” tiin ti kawm i. 32Cen Pathian thu tu amah le a innsang veksen hnenah rel kawm i. 33Cen cia zan rori ah thawnginn uktu pa in fehpui ai amahte hmaihma som sah i; cen cia ben sawngpah in amah le a innsang veksen in baptisma lang tlang i. 34Cen Paul le Silas khiah a inn ah tlun ai rong ai tuh pe i. Amah le a innsang veksen in Pathian sang manin anghnak in dim tlang i.
35A thangha ah Rome acuzah thukhantu bawite in palik bawite hlat ai, “Khiamite khiah hlat tu ih,” tiin thupe i.
36Ciamanin thawnginn uktu pa in Paul hnenah, “Thukhantu bawite in nangmah le Silas hlat tuhin thupe zo i. Ciamanin suak tu ilai dap niu in feh tu ih,” tiin ti i.
37Ikhalselai Paul in palik bawite hnenah, “Sualhnak zaikhai nai lo napui mizapui hmai rori ah kin vit tlang i si; Rome acuzah minung ve i ing! Ciahlaiah thawng ah kin toh i si. Cen tunah a thupniu in kin fehruai tum i sim? Feh lamlam hlah ing! Rome acuzah upate amahte rori heta ah kawi tlang tu selai kin suah tuseh!” tiin ti i.
38Ciatih ai a tihnak khiah palik bawite in Rome acuzah ai thunaitu bawite hnenah rel i; cen Paul le Silas tu Rome mi i ti ling fangin thinlau tlang roh i! 39Ciamanin Paul le Silas hnenah feh ai ngaithiamhnak ngen tlang i; cen thawnginn in suah kawm ai khua songin hmundang ah feh tu ih, tiin ngen tlang i. 40Anite khai thawnginn in suak kawm ai Lydia ai inn ah feh kawm i. Ciata ah sangtu unaute in tawk ai thazang pehnak thu rel kawm hnuaah cia khua in suak kawm i.
Zur Zeit ausgewählt:
NALANGTE 16: RZB
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Zanniat Bible © Bible Society of Myanmar, 2018.
