LUKA 4

Gidasisimsimda Yesu

(Mat 4:1-11; Mar 1:12-13)

1Iimuchu nea ninyas Yesu Guroorooda Ghaydit, gabiikna Yordani ak ghoadoabiiw Guroorooda 2goobiida dareapcheeda askwearjooji haradam nea gwasimsim meang'nyeandeenda. Ea mwaaga gil eawoojisu seaniin; ng'ata askwearjoojisu, ghwayeat jih. 3Gwayeesha meang'nyeandeenda, “Iiwoosi Orjeeda ASEETA ginung' ghoah lagheaneeni mukaate.” 4Ghwasha Yesu nea gwayeesha, “Geang'waar gideaba, ‘Siida moamu goobiideewa ng'eanyiida mukaate ak ghwahit.’” 5Ghwaat meang'nyeandeenda ak goodiing'da heeda miy ghaang' ak goohiimsa darooraka sean bea ng'eanyiida gili nuwaas. 6Ak gwayeesha, “Gaydagoonyi gheambalmeani seaniin ea giigheambiita nyaawa; aba gideaba sigoonan, ak gaydaadaw siida wassean eagasayi. 7Iighadoawanyaan, gayghoah haleanjeeni seaniin gaagu.” 8Ghwasha Yesu nea gwayeesha, “Geang'waar gideaba,

‘Ghadoawana Ng'utamiida was ASEATAANG'U,

nea gigadiyeesi niny ak ghwahit.’”

9Hean ghwaat Yerusalemu, ak goodiing'da uhuuda gheeda sibata ASEETA heeda geaw, ak gwayeesha, “Iiwoosi Orjeeda ASEETA, giing'adaataawi geaw hiji; 10aba gideaba geang'waar,

‘Gaygoojeagu malaykajeagaaschi ak gafurnyi,’

11Ea gideaba,

‘Gayghwadeabwaneey geatinga nyaawa,

ea mwalasa geeshtaang'u lagheaneeda.’”

12Ghwasha Yesu nea gwayeesha, “Ghayi geeyi, ‘Adisimsimi Ng'utamiida was ASEATAANG'U.’” 13Hean ahiit meang'nyeandeenda giliwas simsimda, ghanyi gawa ea ghwanyas gheata damanamuut.

Yesu ghoang'eat gadiyeadaanyi aba Galilaya

(Mat 4:12-17; Mar 1:14-15)

14Iidu gabiigu Yesu aba uurda Guroorooda ak gawa Galilaya, ak gageawiit iitaanyi aba darooraka sean neeki. 15Goonealshachi aba jeeda ghoorajeega nyaawa siinealshacheewa, nea ghoaghaambiit buuneesean.

Yesu geaheawa aba Nasareti

(Mat 13:53-58; Mar 6:1-6)

16Iidu ghwahidu Nasareti, heeda ghayi hisiina heeda, ak gawa jeeda ghooriida siinealshacheewa, gawuurji gideajusu bea gealaan, aba eaweeda sabaato. Ghamiinaada ak ghoasoamwa; 17geataw gitaabooda sibaneeda siguura Isaya. Ghoayaaw gitaabu ak ghwanyas heeda sing'oorsa gideaba,

18“Guroorooda Ng'utamiida gwanda badaydeanyu,

aba gideaba nimwaaran dawa darukwiisa fuga barbari Giijasta Miy.

Goojeaknean darukusa fuga mida ghealooniga siksiinda nyaawa

nea fuga ng'oowi gayghoang'wearda,

ak goojeaknean dalealu fuga sighabwas,

19nea gearukuti gweayda simwas bea Ng'utamiida.”

20Hean ghwarat gitaabu, ak ghoadaw siida gadiyeeda, ak goopteada; ak goohang'ooysa ghaang' buuneesean mida jeeda ghooriida siinealshacheewa. 21Ghoang'eat baloaldaanyi nea gwayeesha, “Eanean ng'ooruutsu nisa aba jeeda iidigeagwa.” 22Gabaloola sean ng'asheega miyaasiin aba badaydaanyi nea geahamng'eanyi iisiyiiy ng'asheega dagheerjeanduumeeda baloola. Ak geeyi, “Neada siisi ea mii orjeeda Yosefu?” 23Gwayeesha saawa, “Geasikteawi gideaba gajoorukuneani ghwasiildeanga gideaba, ‘Meang'nyeanda, ahaabwa geaw’; ng'asheega siyiinyi ghayi iisini aba Gapernaumu, sina eara aba ng'eanyiidaang'u.’” 24Ak gwayeesha, “Aba huumwa geayeeshiineegwa manda sibaneeda jea eamwas aba jeeda ng'eanyiidaanyi. 25Asi aba huumwa geayeeshiineegwa, ghayi gwanda masiinung'weega saang'a ng'eanyiida Israeli aba damanda Eliya, damanda roada roopta gweanyeew samwagu ea sheelah, ak ghwahidu geejeeda haw jeeda ng'eanyiisean; 26eara Eliya ea meecheakta gawa hichpa nuut, geenung' gawa heeda masiinung'weanda asagi mida Sarepta, mida ng'eanyiida Sidoni. 27Abeeda gwanda fuga saang'a bearji udamusuura aba ng'eanyiida Israeli gweayda waseewa Elisha sibaneeda; ak ea meamiina eara siyagi, geaghus Naamaneeda ng'eanyiida Shaamu.” 28Iiyiiy ng'asheanji fuga mida jeeda ghooriida siinealshacheewa gwanyareesi sean. 29Ak ghang'eatng'eat eeruuteawa mujiini, ak geayaat mareeta heayeeda sideeksa mujiineeda nyaawa, nea geegasa eang'adaataawa uhuuda heayeeda. 30Ghang'eat ak ghwalach bugusta nyaawa ak gawa.

Siida beardooschi meangeenda

(Mar 1:21-28)

31Ak ghwararang'aada gawa Gapernaumu, was mujiineeda Galilaya. Ak ghoanaal saawa eaweeda Sabaato; 32ghahamng'eanyi buuneeda aba giinealshoadaanyi, aba gideaba ng'asheandaanyi gwandeawa gheambalmeeda. 33Nea aba jeedeaba ghooriidida siinealshacheewean gwanda Siisi mideawa guroorooda meangeenda muy hean; goojuur muuchi aba ghuuta haw, 34“Seh! Ak gayhindaneasaan ang'iing'i Yesuheeda Nasareti? Ghwasaan anda giineayaneasa? Ghaanali siida uwoosi guwoosi dea Ghaydit bea ASEETA.” 35Goojuursa Yesu niny nea gwayeesha, “Siinda, ak giriteawi siisi!” Ghwanung' meangeenda ghoabeada siida aba bugusta buuneeda, ak gwariteaysa siidida nea mii gwasawan. 36Hean ghahamng'eanyi sean ak gaba nih eesha nuut, “Nih ana ng'ashaan? Iissa Gwarukuteawa uurda ea gheambalmeeda nea gwayeesha meangeenda arita ak gwarita.” 37Gageawiit iitaanyi aba jeedeaba ng'eanyiita seaniin ea geeng'oojiga.

Yesu ghoahaap fuga saang'a

(Mat 8:14-17; Mar 1:29-34)

38Iidu ghang'eat ak gwariteawa jeeda ghooriida siinealshacheewa, ak gawa gheeh Simon. Nea abeeda gheamata agweaji Simon ghamnyaan, gabearji sheagheeda ng'waan ak geemus ghoahaap. 39Gawa heeda mida gheamatida ak ghamiinaada aba murdeadaanyi, ak goojuursa sheagheeda, ak ghahaabwa gheamata sheagheadaanyi; deagheata ghang'eat ghoang'aata saawa.

40Damanda mikteawa aseeta, ghapka buuneeda sean headaanyi nea gweadu fuga miyean bea siisi bearji geeyoadaanyi, ak ghwayiin geatingaaschi iheenga fuga miyeani ak gaheaba sean. 41Gwariteaysa fuga saang'a meangeenda nea goojuuri nea gwayi, “Ang'iing'i guwoosi Orjeeda ASEETA!” Goowoowsa saawa, ak ghwarat ghuusiga ea mabaloola aba gideaba eara saawa ghwanal niny Gristo gil.

Yesu gwarukwiida ng'asheega aba ghoorajeega siinealshacheewa

(Mar 1:35-39)

42Muchu sakteayda ghang'eat gawa heeda manda sih, ak gagaseada buuneeda ama sihita heeda geegasa eateal ea manung'usiina heeda; 43gwayeesha saawa, Gaydawa darukwiida Giijasta Miy bea sugoocheanduumeeda ASEETA aba mujiinajeega suurja, aba gideaba suh gea siicheaknaneani.” 44Abeeda gwarukwiida Giijasta Miy aba jeeda ghoorajeega siinealshacheewa aba ng'eanyiida Yudeya.

Zur Zeit ausgewählt:

LUKA 4: BG15

Markierung

Kopieren