LUKA 5

Yesu gaguursa giinealanga madeeda

(Mat 4:12-22; Mar 1:16-20)

1Eaweecha nea gwanda murdeeda basooda Genesareti gwaneaweesa buuneeda nea gooleeysiit ng'asheega ASEETA. 2Ghwadaa maleambaji iyeenya aba murdeeda basooda, nea abeeda ea niweay fiibwa goohuun gheareedanga nyaawa siing'oonya ghweayeega. 3Gawa jeemba maleamboonagi was dea Simon, gwayeesha seabwa nung' goosiipta maleambooda gil mwanang' gawa jeeda basooda ak goopteada ak ghoanaal buuneeda nea gwanda jeeda maleambooda. 4Rat ghuuta baloolda, gwayeesha Simon, “Asiipsiina heeda saang'a beega, ak ghoapuuti gheareedangeagwa alealni ghweayeega.” 5Ghwasha Simon nea gwayeesha, “Siida haw, geegadiiyi eaweesean ak ea moang'waanyi gil! Ama ninyaashtunu gaydaabuuta gheareedanga.” 6Iing'ata sinoodeaba nih, ghoang'waay ghweayeega saang'a; ea ghwariikghta gang'ada gheareedanga nyaawa, 7Gang'wachsa geadi fiisu mida jeemba maleambooni neeki ghapka ghaweat. Geegawusa maleambajeega duwaawi ea gwaramagu gwalik beega. 8Daah Simon Betaro ng'asheanji, goobeedeaysa madeeda Yesu nea gwayeesha, “Ea Ng'utamiida, asiipteawana heedeanyu, aba gideaba geabea riing'a.” 9Ghahamng'eanyi sea fugiga sean mideayiin, aba ghweayeega siing'waay; 10nea abeeda gwanda Yakobo ea Yohana was orjooga Sebedayo sinuudayi gadiyeeda sea Simon. Ng'ata gwayeesha Yesu Simon, “Adibeali; ghang'eada ghamneawa gaylealuuni buuneeda.” 11Aruuna maleambajeega nyaawa jeeda basooda ghang'eatng'eat gwanung'usa heeda haleanjeeda sean ak geayaat geeshta.

Yesu ghoahaap siida

(Mat 8:1-4; Mar 1:40-45)

12Eaweecha nea gwanda jeemba mujiinajean, ghwahidu headaanyi Siisi bearji udamusuura, dea Yesu, goobeedeaysa madeadaanyi ak gamus nea gwayeesha, “Ng'utamiida, iigasayi giimuusi amiinaan.” 13Ghoahaakta geadi Yesu ak ghawaas nea gwayi, “Geagasayi; miini.” Deagheata gwariteaysa udamusuura. 14Ghamiin gheang'da ea marukusiina sih; nea gwayeesha, “Una ahiimsiina geaw ashoohoocheanda, ak gisabi geadi haleanjeeda siyeada ghadooweeda was gidaghayi rukuteayda Musa, asi abeeda gajeadaah gideaba siimiineey.” 15Ak gageawiit iita aba darooraka sean, ak ghapka eemeeda headaanyi gooleeysiit nea ghoahaap fuga bearji geeyoonung'weaka. 16Iidu gwajiireada ak gawa dareapcheeda ghamwaash ASEETA.

Yesu ghoahaap siida abitu damealga

(Mat 9:1-8; Mar 2:1-12)

17Eaweecheanjagi aba jeedeaba eawoojigiga goonealshi, abeeda goobiitpiit Farisaayajeega ea giinealshoodiga deaweeda leabu gilinyoo ea gharang'da Galilaya, ea Yudeya ea gealeabu Yerusalemu; nea gwandeawa uurda Ng'utamiida ak ghoahaap buuneeda. 18Asi ng'ula, ghapka buuneeda nea gwasareena muunda siisi abitu damealga, ak geegasa gichea eayaata gah, ak geayiin madeeda Yesu; 19iidu nea mwanyasa gheata gichea gweateayda gah aba seang'ayda eemeeda, gwading'da uhuuda gheeda ak geerareang'u sea muundaanyi gwasku seawadeeda ea eayiin madeeda Yesu. 20Daah masaweega nyaawa gwayi, “Siida, sisamsa riing'eagaagu.” 21Goonyeari geat Farisaayajeega ea ng'oorshoodiga nea gwayeena, “Siisi ng'eaha ang'eawi ASEETEAN ghanyea manda siisi ammu gwasamsa riing'eeda geaghus ASEETA ak ghwahit.” 22Jeeng'u Yesu ng'asheega anyeari geat gwayeesha, “Ghwasaan anda goonyearayi geat ng'asheesu aba gurooruunatkeagwa? 23Ea wusis aneeda, gideaba dayi, ‘Riing'eagaagu sisamsa,’ ghana dayi, ‘Ng'eada ak guwi’? 24Asi geagasayi anala gideaba Orjeeda Siida gwandeawa gheambalmeeda aba jeeda ng'eanyiida jea gwasamsiina riing'eega” iidu gwayeesha siidida abitu damealgeani, “geayi, ng'eada, sareana muundaang'u ak guwi ghoah.” 25Deagheata ghang'eat siidida aba madeenyaawa, ak ghwasar muundaanyi ak gawa ghoah nea ghoaghaambiit ASEETA. 26Ghahamng'eanyi sean, nea geakghambiit ASEETA nea ghang'ut muuwda nea geeyi, “Eanean sidaayi ng'asheega deamdeameadi.”

Yesu gaguursa Lawi

(Mat 9:9-13; Mar 2:13-17)

27Iidu gwarita jarooda ak ghwadaah siisi ang'oonyi gwaadi siguura Lawi, nea goopteada aba gheeda siing'waanya gwaadiin; ak gwayeesha, “Eani geeshteanyu.” 28Ghang'eat ak gwanung'usa heeda haleanjeeda sean, ak ghwaat geeshta.

29Gwasissa Lawi ghweelmeeda haw aba gheanyi; ak gweagiischi nea gambuuchi fuga saang'a ang'oonyi gwaadi ea buuneeda suurja. 30Hean gooniiksa Farisaayajeega ea ng'oorshoodiga nyaawa ginealangaaschi, nea gwayeesha, “Ghwasaan anda gooyeagiischi nea gooleeshi sea fuga ang'oonyi gwaadi ea fuga riing'eega?” 31Ghwasha Yesu nea gwayeesha, “Fuga majeekcheewi magaseadayi meang'nyeanda geaghus gagasa gea miyeani. 32Aniini mwaawuni daguursa fuga doobiiweadi, ghaawunyi daguursa fuga riing'eega gwaduukuuna riing'eega nyaawa.”

Iita giiluuldeaydeaba geaw

(Mat 9:14-17; Mar 2:18-22)

33Hean geeyeesha, “Anda giinealanga Yohana gooluuliida geat nea ghamwaash ASEETA, ak eara giinealanga Farisaayajeega gwasiniidunu, nea gaagu gweagiischi nea gwaleeshi.” 34Gwayeesha Yesu, “Ghoamu gwalilda rabasta nyeangiida nea gwandeayi sea siida geeshi? 35Amadu gwanda eaweeda jea eegeandeawa siida geeshi aba jeenyaawa, eaweecheanji gaygwalilda.” 36Hean gwarukusa galeega nea gwayeesha, “Manda siida jea ghabwaash weasta hang'deesh ak ghawaasa hang'da waas, iisindunu gayghabwaash dea eesh, ak abeeda weastida bea hang'deeshiin maygweateayi sea dea waas. 37Ak ea manda siida jea ghwayiin difaayeeda mii ghwaheas jeesinga ghadeatka woosi; iisindunu, gaygwanyarjeaweada difaayeeda mii ghwaheas ghadeatka ak gaygaweay difaayeeda, ak gwanyara ghadeatka. 38Difaayeeda mii ghwaheas geaghus eeyamsa jeesinga ghadeatka eeshish. 39Ea manda siida jea iing'ata leeyda difaayeeda heeseadi jea gagasa gea mii heeseadi; aba gideaba gaygwayi, ‘Gea heeseadi aamiyaas.’”

Zur Zeit ausgewählt:

LUKA 5: BG15

Markierung

Kopieren