Yoane 19
19
Nter asik banta Yes pok misuey mia kenke
1Pirato amarab Yes amamor misuinya.
2Mayor mamaker pok ntshi a kenke ntshi bukumu, bamasik ruk ru ntshue muante, bamanats misuekiya mia baba.
3Keka banta bases u kor ante bampe : Mawiya, kumu basi Yuda ; banta bauku mor makas.
4Pirato kukatou ake, kuror basi Yuda yampe : Rent ana, minyi rumawibitshuas ante busuebe, isina keka binu bayeb, minyi rek ramon ruey rube u kat ante bo.
5Yes amatou arata pok ntshi a kenke, nto ake misuekiya mia baba ; Pirato kubaror yampe : Rent Muot !
6Nter amantar bampang bakump banen nto ake tshuparai, banta kubok minoro bampe : Ndjak ruk ru nte muataka ! ndjak ruku ru nte muataka ! Pirato kubaror yampe : Nab ana binu bina a rinta biamet bundjak ruk ru nte muataka ; isina minyi rek ramon ruey rube ukat ante bo.
7Basi Yuda kunsaks bampe : Bitu tshungwak nto ibo rumwetsh, busek yante iwi, nko ngwak ibo, isina inker ya ampe : Muan a Ntsampe.
8Nter aok Pirato rutot ris nkos, yante kureks upak.
9Ya kukanyingin u kat a mpuru inen ntshi a kumu, ya kuror Yes yampe : Wene watou kue ? Di Yes unsaks ruey bo.
10Pirato kunor yampe : Wene utot nto ami bo ? Wene reke wayeb, minyi rungwa i bunono buidjak ruk ru nte mu- ataka, nto ake rungwa i bunono buipusura ?
11Yes kusaks yampe : Wene rek bunono bumwetsh ruk rami, yar uwar yone ntshu a ru rek iwek a bunta ; isina kankos yone ntshu mantampr minyi ungwa wene, ya nker bube bu bunen.
12Itankua rina Pirato asot kumpusur ; di basi Yuda kubok minoro bampe : Mpe umpusur wene uka mpai a bora Sesaro bo ; muot ntshu rora ampe : minyi ru kumu, yante muna pis a bora Sesaro.
13Nter aoka Pirato mey mas nkos, ya kuwitshuar Yes u busuebe, yante awar ruk ra nkuas ntshi bupatasampo u irak raurak banta ampe : Mamanya mapong a sin, i rutot ribasi Hebreu, bampe : Gabata.
14Mapong mu rusu Rasamp Ntsampe, nter ator itankua rueri itankua musiampr Pirato kuror basi Yuda yampe : Rent ana kumu a binu.
15Di banta kuwam bampe : Ngor ! ngor! Ndjok ruk ru nte muataka ! Pirato kubaror yampe : Rudjak kumu a binu ? Bakumu bu bampang bakump kusakr bampe : Bitu rek a kumu yuekr bo, ya yante Sesaro.
16Ampis keka ya kubawek ante u biar isina banta bundjak u nte muataka, banta bamarab Yes bamawantshuari.
17Yes kusent nte muante muataka, bamawator u irak raur banta ampe : Nguere mu ntshue, i rutot ri basi Hebreu ampe : Golgota.
18Bamandjak ruk ru nte muataka ona, nto ake bat bekr bape, yona ona, yona ona, Yes u nteng.
19Pirato kupunt mukanta kumusik u ruk runte muataka, apunt ampe : Yes nsi Nazareta, kumu nen ntshu basi Yuda.
20Basi Yuda ba buiki barenta mukant mune, isina irak rawa Yes ruk ru nte muataka rawar kor a bora ; mukanta muawar muapunta i rutot ri Hebreu, nto rutot ra Greke, nto ake rutot ri Latin.
21Bakumu bu bampang bakump bu basi Yuda kuror Pirato bampe : Kat punt ampe : Kumu basi Yuda bo, di punt ampe, yante aror ampe : Minyi ru kumu basi Yuda.
22Pirato kusakr yampe : Minyi rumatapunt rine rumpunt minyi.
23Mayor nter aman banta udjak Yes ruk ru nte muataka, banta kurab maper mante, banta kukap makapua mane, iyor ikapua, iyor ikapua. Banta kukarab misuekiya miante, dimisuekiya miawara reke nsang bo, ya tente yankere.
24Banta kuror bampe : Tshuak mikar bo, tshumibok pantsha, mpe nake imiraba, nkos bakokos ruey rawak rapunta ampe : Banta bamakap maper mami, banta bamabok pantsha imisuekiya miami. Nkos aker mayor.
25Ri inyante nto nsi mua bor inyante, Maria ngar a bora Kreopas, nto ake Maria-Mangandala, banyimt u kora nte mua Yes muataka.
26Nter atar Yes inyante nto ake ronki rawont yante u kor’ante, yante kuror inyante yampe : Ngat, rent muan awo.
27Yante kukaror ronki yampe : Rent nyo. Itankua rina ronki ris kunab isina kuwar nto ante u bora ante.
28Ampis muna Yes amayeb mey makima mumasir isina kukoks mey mawak mapunta u kat mukanta mua Ntsampe ; yante kuror yampe : Minyi rungwa a puesa.
29Ona ibonko rumwetshi rawar rayora to a “vinaigre” #19:29 Vinaigre : mas mankany.. Mayor kuyors vinaigre yina u kat nteka, keka banta kusik kat a tampa “hisope” #19:29 Hisope : nte, rukompua ra munta hisope., banta kuses u nump muante.
30Nter nyo Yes mas ma vinaigre nko, yante kuror yampe : Makima mumakok. Yante kutuiriy ntshue, yante kubatu mony.
31Banta bawar nto butete isina toko usar ruk ru nte muataka rusu ru nkira mu basi Yuda, isina rina rawar rusu rupong rusu ru nkira mu basi Yuda, rawak rusu runen, basi Yuda kuromp Pirato isina kubokr mikor mia bene bawa ruk ri mite miataka, keka banta bubakobr.
32Mayor kuwiy banta kubokor mikor mia yona ntshu bukwetshi, nto ake mia yuekra ntshu awa ruk runte muataka nto ante.
33Di nter ases banta u kor a Yes ba kuntar yante amatawa, banta umokor mikor bo.
34Di iyor rumwetshi kunusur rubampi nto ikonko, makera kutou buash buashi nto ake mas.
35Yona ntshu atar mey mene amatot bukentshi bua manta, bukentshi buante buawar a barabara, ya amayeb ampe, aror a barabara, isina keka a binu ake buyes.
36Mey mene mator nkos isina kukokos mey mawak mapunta kat mukanta mua Ntsampe ampe : Nguer muante mwetsh yekumuboku bo.
37Irak rekra rawak rapunta kate mukanta mua Ntsampe ake ampe : Banta yebupatar yona ntshu arusur banta.
Nter arey banta Yes
38Ampis muna Yosef nsi Arimatea, awaka ronki ra Yes busuaman, apakar basi Yuda, yante kuromp Pirato mpok ntshi rab rutoko ra Yes ; Pirato kungwek mpok. Yante amawiy kurab rutoko ra Yes.
39Nikodem ntshu awiya ngwa Yes buso buso i butu, ya amawiy kuwitshuar ake “mire”#19:39 Mire : nko mas bonko. nto “aroes”#19:39 Aroes : nko ake bonko., baputur, buruturu rueri ri masanke isanke.
40Banta kurab rutoko ra Yes banta kurusuekiy kate maper nto biket bine bia sor ntshi isek, nko nsamp mu basi Yuda murey bat.
41Irak rawa Yes ruk ru nte muataka, yuok rawar ona, u kat a yuok rine marompa ma mwetshi ma roronto mawa ona makautosik muot bo.
42Banta kusik Yes ona isina rusu ri basi Yuda rupong, isina ake marompa mawa kora kora. Nter aumua Yes kat iwa
Zur Zeit ausgewählt:
Yoane 19: EJK2012
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Copyright © 2012, ASAREB, Suisse MiDi BIBLE
