Yoane 18
18
Nter awat banta Yes
1Nter aman Yes utot mey mene, ya kuwe nto baronki bante u muin mua ntshar a Sedron, ona kora mas yuok rawara, ya kunyingin ona nto baronki bante.
2Yuda nsariy ante amayeb irak rine, isin Yes awek matu ma buiki nto baronki bante ona.
3Yuda kurab tong mayor, nto tshuparai, bampang bakump banen bamabatom nto ake Bafarisai ; ya mawiy ona nto a mintamia tshiya nto bita.
4Yes amatayeb mey makima mawar muwiya ruk rante, yante kusempr, kubaror yampe : Bukusot nake ?
5Banta kunsaks bampe : Yes nsi Nazareta. Yes kubaror yampe : Minyi. Yuda nsariy ante, awar nto a banta.
6Nter amabaror ya ampe : Minyi ; ba kukaru rumpimpis kubuk ba asin.
7Yante kukabawor ampe : Binu bukusot nake ? Banta kunsaks bampe : Yes nsi Nazaret.
8Yes kasakr yampe : Minyi rumabiror ampe, minyi ; mpe binu bukusot minyi, rekr ana bene buwe.
9Yante atot nkos isina kukoks ruey raror yante ampe : Minyi kuradimis mwetshi bo u kat a bene bamapek wene.
10Simon Petero awar nto rukura ri buketo kururab, yante kubor muot a bora kumu bampang bakump ntshu nen, ya kumatar ito ru nuema rou, muot yos rukompua rante Markus.
11Yes kuror Petero yampe : Kars rukura rawo u kat a pok a rinta, minyi rak nyo nteka muamapek Tata isina kunyo ?
Petero kuber Yes
12Mayor, nto atong a bat, nto ake tshuparai tshu basi Yuda bamawat Yes, ba kunkant.
13Banta kutowantshuar bukwetshi bora Anne, isina awar yante mpuetsh a bora Kaifa, kumu bampang bakump ntshu nen ibur rina.
14Kaifa nywe ntshu aror basi Yuda ampe ; busek muot mwetshi iwu isin bat.
15Simon Petero nto ronki rekr, kurabs a Yes ; ronki rine kumu bampang bakump ntshu nen amanyeb, yante amanying nto a Yes u kat a mpueng a kumu bampang bakump ntshu nen.
16Di Petero asasar mpis busuebe u kor amper, ronki rine rayeb kumu bampang bakump ntshu nen, rinta kutou kuror ngat ntshu abakak ikuik, yante kunyings Petero.
17Ngat nker ngun mu ikuik kuror Petero yampe : Wene ake reka war nsi baronki ba muot nywe Yante kusaks yampe : Ka minyi bo.
18Baker ngun nto mayor mawar ona bamanaminy tshiya nto mayar isina awar piu, banta baukuot tshiya.
19Kumu bampang bakump ntshu nen aukuwor Yes isina mey mu baronki bante, nto ake ruk ra mey mante.
20Yes kunsaks yampe : Minyi runtotok a bat irengene irengene, minyi runtotok matankua makima u kat a mpuru uromp, nto ake u kat a mpuru a Ntsampe u irak runkukoks basi Yuda, minyi keruntotok ruey busuam bo.
21Isin ye ipor we minyi ? Busek wor bene bamapok mey mamabasuengs minyi ; rent, bene ona bamayeb mey mamabaror minyi.
22Nter atot yante ruey ris, kaparai kanyemt ona kubor Yes rukas yampe : Wene ukusaks kumu bampang bakump ntshu nen nkos ?
23Yes kunsaks yampe : Mpe runtot ruey rube, suengene ruey rube runtot minyi, mpe runtot ruey rusek, isin ye imampor wene ?
24Anne kuntom ntshu akanta u bora kumu bampang bakump ntshu nen Kaifa.
25Simon Petero awar ona aukuot tshiya, banta kunor bampe : A wene ake uka nsi baronki bante ? Yante kutepr yampe : ka minyi bo.
26Muot ntshu a bat ba bor kumu ntshu bampang bakump ntshu nen, nsi mua bora yona ntshu abatr Petero ito, kuror yampe : Minyi keramaitar nto ante u kat a yuoka ?
27Petero kukatepr ; itankua rina koko kubek.
Nter awatshuar banta Yes u buso bua Pirato
28Ba kukobu nto a Yes bora Kaifa, ba kuwe nto ante u mpuru inen ntshi a kumu, muawar nyies butu, ba unyingn ba bin a rinta u katou mpur a kumu ntshi inen bo ; isina yar bawar rek umon ntshar ntshi adja kat ntshi rusu Rasamp Ntsampe.
29Pirato kuto isina kuwe ngwa ba, ya kuror yampe : Ibangs ru nake rumangs binu muot nywe ?
30Banta kunsaks bampe : Mpe muot nywe yar uwar ampe ka nker a mey mabe ketshuar iwek ante bo.
31Pirato kubaror yampe : Nab ana binu bin amet, butente ikamp rante nko ibo ra binu. Basi Yuda kunor bampe : Bitu rek bunono budjak muot ikin.
32Mawar nkos isina kukoks mey maror Yes, nter arorak yante mey mu iwa yeruwu yante.
33Pirato kukanyingn u mpuru ntshi inen yante kuur Yes, ya kunor yampe : Wene u kumu nen ntshu basi Yuda ?
34Yes kusakr yampe : Wene untot wene amet, mpe bat bekr bumaisuengs a rinta isin minyi ?
35Pirato kusakr yampe : Minyi rungwa ru nsi Yuda ? Iruentsh ra sina awo, nto ake bakumu bu bampang bakump bumai- wek ngwa minyi, wene waker biye ?
36Yes kusakr yampe : Bukumu buami rek buawar bua bat ba man mene bo, mpe bukumu buami bua war bua bat ba manu mene, keka bat bami bumantshoans, keka rek rawet ubiar bi basi Yuda bo, di kekanko bukumu buanirek buawar ane sin bo.
37Pirato kunor yampe : Wene nkos u kumu nene ? Yes kunsaks yampe : Wene umaruror; minyi rukumu ntshu nen, minyi bamampot, minyi ramawiy u kat a bat ba man isina kuker bukentshi bua barabara. Muot ntshu wara ntshu a barabara, iok rutot rami.
38Pirato kunor yampe : Barabara ingwak biye ? Nter atot ya nkos, yante kukatou isin kukawe ngwa basi Yuda, ya kubaror yampe : Minyi rek ramon ruey rube u kat ante bo.
39Di nko ngwak nsamp mua binu, minyi rupusur muot mwetsh rusu ru nianko mu Asamp Ntsampe ; binu bungont minyi rupusur kumu nen ntshu basi Yuda ?
40Di banta kukabok minoro bampe : Bo, ka yante, di Barabas. Barabas awar muot me, mpuis biket murempo.
Zur Zeit ausgewählt:
Yoane 18: EJK2012
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Copyright © 2012, ASAREB, Suisse MiDi BIBLE
