LUKAS 8
8
Tuhan Jesus Eedadita Jagamoudo
1Wadoutouga Jesus kou maki kuduuga uwina tai. Okai mana wudina daana Ugatameja jakimakita makiida ka ajii mana kodo eti-menii. Okei wija ma gaati kede maija okai ma enaimo.
2Daana jagamo wija wido maija, enija ma, didi ma beu jaawita bagee. Kou ko, Magdalena eebatita me Marjam kodo, enija pituwo okai duba make japodomijawita me kodo.
3Johanna, okai Herodes owaa douto-tai me ki Chuza jagamome kodo ma; daana Susana maija, daana joko ka jagamo wedaba. Jesus ma etope-taido ma gai peu agijoudo eedadai.
Pi Kigii Te-tai Me
4Me wedaba kotuu timakijake, daana maki gakita ka meido okaapa mejake, okai ena dani awe-tai manaidaiga oowegaate mana,
5„Pi kigii te-tai me kidi pi kigii taine podomai. Pi kigii teetigo pi ino ko ita watija gootidaa. Tijake bado ka daimita, daana epa bede maki bede ka bedoudo ka nojawigou.
6Dedaana ino ko mogo makiida gootidaa. Ejajake wei kogi tai, maki debeta beu kouja.
7Ino ko dogo jupi gootidaa; dogo ma enaimo ejajake dogo kodaa pi mijo gape-gape tai.
8Ino ko enaa makiida gootijake ejai, tijake uta mepiija ka wija ajaago tidaa,” etii. Okai kou mana wegaatigo bida peu eteete mana, „Juwe-tijake gapa jago bagee juwii to tai,” etii.
Pi Kigii Te-tai Me Mana Boko Petai
9Ena dani awe-tai mana ko boko jato etope-taido egaado tijake
10wo eteete mana, „Ugatameja jakimakita makiida ka boone-boone manaido epi ke-tijake kinita. Kodeja joko ka bageepa ena dani awe-tai manaidaiga; okei dojake te domake-tita tijake, daana juwijake te gamake-tita tijake.
11Kii ena dani awe-tai mana boko jato mana kii dani: Pi kou ko Ugatameja mana muto kodo.
12Ita watija ka kede mana juwita bagee. Tijake Teege mejake mana kodo kegepa duba make jamotigou, okei maakodo gajake ajii tidaa na kojoka.
13Mogo makiida ka kede mana juwijake umina ideide ma jakimakai. Kodeja okei mani wejawii beu tijake mijo gaa to maakodo gajake egaado ti-toojogo ko jaikidokii.
14Dogo jupi gootidaa tita kou ko, okei juwijake ita jaweetigo, gai peu manaido ma, tonawi manaido ma, kii makiida ka ideide manaido ma kodaa mijo gape-gape tijake uta enáá kai beu.
15Enaa makiida ka kede mana juwijake doodoo enaa kegepaida jakimakijake epeepite uta gojawii.
Lampu Kodo Kakate ka Taapumijawija
16Me idaana ma lampu etakijake tapuja ka juwa, umiida ka juwa taapumijawija. Kodeja make-taida makii, tijake wadoujo kaine bagee awe kodo do-tita.
17Boonita agijo ena ma beu, ewaida te kaita mana kodo. Daana gabo mana ena ma beu epi te kija mana kodo, kodeja ewaida kidoke taita.
18Okai kouja ikii kawe danite juwija mana epeepite gai. Agijo jago bageepa euga menii kouja; daana agijo tagu bageepa make okaija ka topi gata agijo jamotii.”
Jesus Ukame ma Kenekaane ma
19Jesus ukame ma kenekaane ma okaapa mei. Kodeja me wedaba tipi-tipi kouja okai watija te kimake.
20Me ka eteete mana, „Akuukai ma aki kenekaane ma juwouda topai, kadoune tijake,” etii.
21Kodeja Jesus wo eteete mana, „Noukai ma ani kenekaane ma okei Ugatameja mana juwijake kei te-tai bagee,” etii.
Pekuuda Ukija Ipata Awii
22Naagoona Jesus etope-taido ma enaimo koma matakijake eteete mana, „Mewei, inii peku adii no,” etijake koma jamo pojawii.
23Okei uweetigo Jesus uno umidoke tai. Ukija ibo peijo pekuuda mijouwe kijake okei gaadi edidaa tijake peu kaine ijeida kai.
24Okei Jesuspa mejake matoki eteete mana, „Ei, Kuduu, Kuduu, inii bokaate,” etii. Okai anigojake ukija ma dokogaa peijo ma ewidogijake duwadoke, tijake ipadoke tai.
25Tijake Jesus eteete mana, „Ikiija ka maakodo gai ko kaija?” Etijake okei weda gai. Okei ego takuu-takuu tijake okei kede wegaate mana, „Kii ke meime? ukija ma, uwo ma etimakijake jajuweega kou ko,” wegai.
Gerasa Makijo ka Enija Jago Me
26Okei Gerasa bagee ka makijo dakii, Galilea auwaato.
27Okai adaida wadouwe kijake kou makiida ka enija jago me idaana ma akado tai, Uno wedaba kagaba tagu tou, daana owaa duba te umijake me okaapa to ume-tai.
28Okai Jesus edojake emeeme ma Jesus jumaapa apaipu tidoke tijake kuutakaa eteete mana, „Ei, Jesus, Monika Ugatame Jokaibo, aki ma ani ma má imee? Peu te naawii kadiimai,” etii.
29Enija okai duba make podomai eteete kouja. Kigi inoudo enija kidaa peepu etei tita kouja. Me ka pute buda egadimimakijake edoutou, kodeja budaido duwamigijake enija kodaa me beuda eepekumii.
30Tijake Jesus egaado teete mana, „Akeeka meime?” Etijake „Legion” etii. Enija wedaba awidaa tita kouja.
31Enija utoma agaagumugu duba te neewe-tijake ediimai.
32Kotuuda kodaa ekina ibo imouto kigi nootigo. Tijake enija kodaa ekina duba amoujo kaine ediimai. Tijake okai ejaikai.
33Tijake enijaido kodo me kidi duba make podomijake ekina duba amoujo kai. Tijake ekina imouto kodo egoudaiga begakapu tidaa tijake pekuuda kenapune tijake bokai.
34Ekina ooto-tai bagee kede kou mana dojake tibigi uwii. Kou maki okogo ma, kou maki dokoo ma okei wegakumii.
35Meido kede podomijake kei tidoke tipa mana doune tijake uwii. Okei Jesuspa mejake, enija japodomijawita me kidi kagaba makijake dimi enaa kijake Jesus jumaapa animaki-toojogo edomakai. Tijake meido kede weda gai.
36Edopai bagee kodaa enija jago me beu jaawita mana kodo eti-menii.
37Tijake Gerasa dokoo ka bageido utoma Jesus uwe-tita tijake ediimai, weda umina gajake kouja. Tijake Jesus koma matakijake metaato amo uwii.
38Kodeja enija podomidaa tita me kidi Jesus ediimai, okai ma enaimo kaine tijake. Kodeja Jesus wo uwii etijake eteete mana,
39„Aki owaapa wo uwijake Ugatameja ibo kakei teegi mana kodo wegakumii.” Okai uwijake kou makiida Jesusja ibo jakei tijawipi mana kodo wegakumii.
Jairus Jokame Eenigojawita
40Jesus joko mejake kotuu timakita bagee wedaba ejakimakai, okei utoma edoutoojogo kouja.
41Me idaana eka ki Jairus mei, sembahjang owaa douto-tai me kidi. Jesus jumaapa mijouga kijake anija owaapa mei ediimai.
42Enaago jagamo joka taun wija ma gaati dani umita bokaine gaa kodaa. Okai uweetigo meido tipi-tipi etai.
43Jagamo idaana emo to ume-ume teete didi taun wija ma gaati umita. Okaija agijo utoma doktodaapa mapugajawii kodeja meena ka ma te jaojawimake.
44Jagamo kodo nemouga mejake Jesus bado jato kagaba jawinikidou. Okai kou gaa kodo maija emo ume-tai kodo duwadoke tai.
45Tijake Jesus wegaate mana, „Meime nawinikidooga?” Okei utoma beu etijake Peterus eteete mana, „Kuduu, me wedaba kabobimakijake tipi-tipi kateete,” etii.
46Tijake Jesus eteete mana, „Me idaana nawinikidooga, bida agijo ani duba make podomeega dooga kouja,” etii.
47Jagamo kodo akaato te boonimake dojake totome ma mei. Jesus jumaapa mijouga kijake okai jawinikidojake beu kipa mana kodo me utoma pekaida eti-menii.
48Tijake Jesus eteete mana, „Ei, ani joka, akija maakodo gai kodaa didi beu keege. Kojáá uwii,” etii.
49Okai mana wegaatigo gaa kodaa sembahjang owaa doutotai me ka owaapa make me idaana mejake eteete mana, „Aki joka bokaaga. Kojoka Kuduu gaagaa te etijawii,” etii.
50Kodeja Jesus kou mana juwijake eteete mana, „Weda te gai. Maakodo gai to. Okai beu kaipiga kojoka,” etii.
51Okai owaapa dakii tijake, meena ma okai ma enaimo woujo kai ejaikai beu, kodeja Peterus ma, Jahja ma, Jakub ma, joka kodo nakame ukame ma to.
52Okei utoma jege ma jiijii ma eteetigo kodeja Jesus eteete mana, „Jege te tai! Okai bokai beu, kodeja uno umeete,” etii.
53Tijake okei ewidogeete odijai etai, okai bokapa kodo epi kouja.
54Kodeja Jesus joka kodo gane ejakijake manaa-teete mana, „Ei, joka, anigodo,” etii.
55Okaija dimi mana komoka kijake okai kou gaa kodo anigodoke. Tijake Jesus naija agijo menii jaetii.
56Nakame ukame ego takuu-takuu umina. Kodeja me idaana ma te oowega-tijake Jesus etimakai.
Zur Zeit ausgewählt:
LUKAS 8: EKG
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
