LUKAS 20
20
Jesusja Bida Agijo Egaado Tita
1Naagoona Ugatameja owaa duba meido etopeetigo, daana ajii mana pitokeetigo, imam iboudo ma, kapogeije epi bagee ma, me iboudo ma okaapa mei.
2Tijake okei eteete mana, „Enidou, má bida agijo ka kei agijoudo kei teige? Daana meija bida bokouto kaneemegi?” etii.
3Tijake okai wo eteete mana, „Ani na mana mutoona kigaado taipiga. Enidowei!
4Jahja baptis tei tita mana kodo epauto ko epaawado make, mee? meepa make,” etii.
5Tijake okei akado wegene teete mana, „Kou danite, ’Epaawado make’ etipe ko, ’Magijo ka ikii maakodo egai beu?’ eniipagi kodaa.
6Kodeja inii ’Meepa make’ etipe ko, me utoma mogo ka nigigoo taipigai; Jahja kidi gokobaki tijawiidaiga wegai tita me okei epaapa timakai kouja,” wegai.
7Tijake „Epauto ko kaija make juwa inii ewo,” etii.
8Tijake Jesus eteete mana, „Keetigo ko ani maija kei agijoudo kei teiga bida agijo ko ti kitiipiga,” etii.
Táí Mune-tai Peu Bagee
9Tijake kii ena dani awe-tai mana meidoopa oowegai: „Me idaana uta buda táí wejake mune-tai bageepa jajaikijake joko ka makiida uno magoo na dani uwii.
10Uta uwa kijake jakei te-tai me idaana mune-tai bageepa ebadikumii, taida ka uta jamene-tijake. Kodeja mune-tai bagee kedaa kopa wagijake agijo tagu eebakikumii.
11Jakei te-tai me idaana ma ebadikumii. Kii kidi maija okei kopa wagijake daana peepu umina etijawijake agijo tagu eebakikumii.
12Widaago maija ebadikumii. Kii kidi okei jati ewajake tijake juwouda eepekumii.
13Tijake táí ipuwe me kidi kei teete mana, Ani magijo kei tai? Ani joka didé ebadikumiita. Okai kidi okei ibo ejaikaitai kojoka, gai.
14Kodeja mune-tai bagee edojake okei kede wegaate mana, ’Kii ke okai komouto kaine me. Neewagei, jajaikaitagi agijo inii ipuwe ke-tita no,’ wegai.
15Tijake taida make eemigimakijake wagimakai. Kojoka táí ipuwe me kidaa mune-tai bagee maida magijo kei etaitagi?
16Okai mejake mune-tai bagee kede wagimakijake táí kodo me inoopa jajaikaitagi.” Okei kou mana kodo juwijake eteete mana, „Te neekei tai.”
17Kodeja Jesus edomakijake eteete mana, „Keetigo ko kapogeije mana ki boko jato ko magijo:
Owaa mige-tai bagee ka jamo jaikita mogo kodo
Owaa butu ka kabo makita mogo pigu tijawita.
18Meija kou mogo maida gootipi, juma duwadaa. Kodeja mogo kodaa mijo etagimai bagee tagi tidaa.”
19Okai kou gaa kodo kapogeije epi bagee ma imam iboudo ma ejakimakaine dimi gai. Kodeja okei meido weda egai. Kii ena dani awe-tai mana okei kede maida jawegata gamakai kouja.
Kaisar Mege Eedai
20Okei edoutojake doodoo puga bagee ewane-tita ebadikumii, okaija mana maida ejakimakaine tijake, maki douto-tai bagee bidaidaiga eekegajawiine tijake.
21Okei egaado teete mana, „Ei, Kuduu, inii epi aki doodoo mana to godajake nitopai, daana me idaana ma ibo te ejaikijake Ugatameja takaa doodoudaiga nitopeige.
22Kaisar mege menii pijo, mee? dá,” etii.
23Kodeja okeija kuba-mote dimi kodo okai jadojake eteete mana,
24„Mege namuwakiwei. Meija ajá ma ebijamakita mana ma topi?” Etijake „Kaisar ipuwe,” etii.
25Tijake Jesus wo eteete mana, „Keetigo ko Kaisar ipuwe agijo Kaisar wo menii, daana Ugatame ipuwe agijo Ugatame wo menii,” etii.
26Me jumaapa okaija mana jajaki-motii kaga gata. Okaija wo etita mana kodo ego takuu-takuu tijake gabo tou.
Bokata Bagee Anigou Mana Egaado Tita
27Saduki bagee wija wido okaapa mei; bokata bagee taanigou mana wega-tai bagee kede. Okei egaado teete mana,
28„Ei, Kuduu, Musaja nijaebijamakita mana ko: Kou danite me idaana kenekame bokajake jagamome tou, kodeja joka beu ki-toojogo, mijáá kodo wo bukijake kenekame maida make me ijoo jakebajawii.
29Okei keneka pituwo toojogo. Ibouto kidi waka bukijake joka beu kidi bokai.
30Tijake ipougame ma
31mabiime ma jagamo kodo wo bukijake, okei pituwo wo bukijake joka makii beu tijake bokai.
32Wadoutouga jagamo kodo maija bokai.
33Keetigo ko bokata bagee anigou naago kou jagamo kodo meija waka kaita? Okei pituwo ebukita kou no,” etii.
34Tijake Jesus eteete mana, „Kii wagi ka bagee waka bukii ma, waka eumai ma.
35Kodeja wiwitiida gaa kodaa, bokata bagee jupi make anigou manaida woujo kai enaa egata bagee kede waka bukii na beu, waka eumai na beu.
36Okei kigeena ma te bokaitai kouja. Okei Ugatame jaetigo-tai bagee dani bukaa. Okei Ugatame jokaane kede, bokata bagee jupi make anigou mana ipuwe bagee.
37Kodeja bokata bagee eenigojawii mana muto Musa maija nimuwakita, okogo manaida kodaa, okai Ugatame maida jawegata gaa: Ibrahimja Ugatame, daana Isakja Ugatame, daana Jakubja Ugatame kidi.
38Ugatame kidi bokata bagee ipuwe ko beu, kodeja ija bagee ipuwe. Utoma Ugatameepa ija tou kouja.”
39Tijake kapogeije epi bagee wija wido wo eteete mana, „Ei, Kuduu, aki eneege ko maakodo,” etii.
40Kouda make ko okei egaado tai uu beu.
Daud Jokame Maida Make Egaado Tita Mana
41Tijake Jesus eteete mana, „Kawe dani tijake me ka Keristus kidi Daud Jokame wegaigai?
42Daud kidaa ugaa manaida wegai kouja:
Tuhan kidaa anija Tuhan kidiipa etita mana,
Anija etikaato gebo animakai,
43Be kagata bagee akija bado mijouto tagi atijake
Bado makijaida kaaejaikaitaida to.
44Kou danite Daud kidaa Tuhan eebatita Kawe dani tijake okai Jokame kai?” etii.
Jesus Kapogeije Epi Bagee Ewidogai
45Me utoma jumaapa Jesus etope-taidoopa eteete mana,
46„Kapogeije epi bagee maida make akaato munii. Woja kagaba makijake uwina te-tai ide bagee. Daana akaada tetaida ibo ejaikai mana juwii ide. Daana sembahjang owaa duba ibo jaikita animakaida ide. Daana buka no-taida diiti pagaadagaida ide.
47Mijáá jagamo jabokomimakai, daana utoopa sembahjang woja. Umina peu kugouto dokeenii,” etii.
Zur Zeit ausgewählt:
LUKAS 20: EKG
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
