LUKAS 19
19
Zacheus
1Okai Jericho woujo kijake wokaato kai.
2Kouda me idaana eka ki Zacheus, mege kotuu te-tai ka ibo kidi toojogo. Okai tonawi.
3Jesus kawe dani kipi gaa edoune kodeja me tipi ka te edomake, okai me pini kouja.
4Tijake okai tiga tibigi uwijake Jesus edoune tijake ara uta pija patikai. Okai kouda kuduuga jawiipagi kouja.
5Jesus kouda kodaa dakii tijake wado dojake eteete mana, „Ei, Zacheus, egaa mijouwe kai. Ito kii naago ki, beu ma ko beu, akija owaapa kaumiine ka,” etii.
6Tijake okai tibigi mijouwe kijake ideide ma ejakimakai.
7Me utoma kou mana kodo dojake kitigi motigi eteete mana, „Okai peu meepa oumiine uweegi!” wegai.
8Zacheus joonidoke tijake Tuhan kidiipa eteete mana, „Juwidou, Tuhan, ani edepedeija jupiidaiga wudijawijake daba bageepa meniipiga, daana me idaana jabokomijake jamotipa ko, kigi wii amo menii,” etii.
9Tijake Jesus eteete mana, „Ito naago ajii bokouto kii uguwoopa dakii teega, okai na Ibrahimja ekebata me kiija.
10Me Joka meta ko igata bagee eubajake ajii ti-meniine,” etii.
Mege Gaati Ena Dani Awe-tai Mana
11Meido kou mana juwijake Jesus ena dani awe-tai mana oowegai, okei Jerusalim kapauto kouja, daana okeija gai ko, Ugatameja jakimakita makiida egaa kodo ewaida kaita gajake.
12Okai kouja Jesus eteete mana, „Ekaago tuma me idaana jakimakita makiida go-motijake joko meine tijake poto makijo uwii.
13Okai jakei te-tai bagee me ida gaati manaa-tijake mege gaati menii, eteete mana, ’Ani meitaida to ikii munaa to wegagoo,’ etii.
14Kodeja okaija makijo ka bagee be egajake, me eepe-tita ebadikumii, wegaate mana, ’Inii kii me kidi nijakimake-tai kai ko be,’ etii.
15Okai joko mejake jakimake-tai boko jaduwajawijake mege menita bagee mewei etii, okeija munaa wegaateida kodo magoo motipai epi kaine tijake.
16Edoga ka kidi okai jumaapa mejake eteete mana, ’Kowaa ke, akija mege ena kidi wado gaati keegai,’ etii.
17Tijake ibo kidaa eteete mana, ’Enaa kodo ko, enaa nakei te-tai me! Mijo manaida aki enanaa kouja, aki maki gaati doutou kajaikeega.’
18Wijaago kidi mejake eteete mana, ’Kowaa ke, akija mege ena kidi wado idibi keegai!’
19Etijake ibo kidaa eteete mana, ’Kojoka aki maija maki idibi doutou kajaikeega,’ etii.
20Tijake me idaana mejake eteete mana, ’Kowaa ke, kii ke akija mege kidi, ani kagaba ka tonijake kaamakeemega.
21Ani weda kagai kouja, aki kegepa bida me kouja; aki makii beu agijo moteige kouja, daana kigii tai beu agijo duwaige,’ etii.
22Tijake ibo kidaa eteete mana, ’Kowaa ke, peu nakei te-tai me! Aki godaage mana kouja peu kaawii. Ani kegepa bida me mana kodo aki epi; ani makii beu agijo moteiga, daana kigii tai beu agijo duwaiga.
23Keetigo magijo ka anija mege ko munaa wega-tai bageepa naamakii beu? ani joko mejake mege kou wado ma abuma joko motii te,’ etii.
24Tijake kou watija joonidaa tita bageepa eteete mana, ’Mege okaapa make jamotijake mege gaati jago me kidiipa naamenii,’ etii.
25Tijake me ka eteete mana, ’Ei, ibo, okaapa mege gaati topai,’ etii.
26’Ani kitii, agijo jago bageepa abuma menii; kodeja agijo tagu bageepa make makita agijo jamotii.
27Kodeja ani ma jape bagee kede, ani ejakimakai ko be nagata bagee, jakai oomejake ani jumaapa naawagii,’ etii.”
28Okai kou mana wegajawijake okai tiga ita uwii, Jerusalim doodoo wado uweete.
Jesus Jerusalim Makijo Wadoujo Kai
29Okei Baitfagi ma Baitani ma kapa kijake Zaitun ebatita dimiidaapa make etope-tai wija ebadikumii,
30eteete mana, „Ikai doodouga maki okogoopa auwai. Wadoujo aakijake ko keledai joka egadimi-toupagi aadoupiga, me idaana ma edokai beu kidi; aekegajawijake aanaaoomei.
31Daana me ka ’Magijo ka buda aekegaate?’ kitipai, ikaija aetai ko, ’Tuhan gai peu kodaa’ aetai,” etii.
32Tijake ebadikumitaija auwijake Jesus etita kidi danite aadomakai.
33Okejai keledai joka buda aekegaatigo gaa ipuwe bagee ka eteete mana, „Magijo ka keledai joka aekegajaweete?”
34Etijake okejai aeteete mana, „Tuhan gai peu kodaa,” aetai.
35Okejai Jesuspa aaoomejake okei kedaa kagaba keledai joka maida mukajake Jesus kou wado eenimakai.
36Okai uweetigo meido kede kagaba ita maida mukajake tai.
37Okai kapa kijake, Zaitun Dimiida mijouwe kijaida etope-tai wedaba kede ideide go-motijake mana wuu kuutakaa Ugatame muta etuwai, ego takuu-takuu manaido dota kodo maida make.
38Okei gaida-gaida teete mana: „Tuhan eka dubaiga jakimaketai ibo meete kidi muta neetuwawei! Epaawado muka-muka, daana monika to-taida ajiipi bokouto!” wegai.
39Me wedaba kede jupi Parisi bagee wija wido Jesuspa eteete mana, „Ei, Kuduu, akija etope-tai kede gabo tou etii,” etii.
40Tijake Jesus wo eteete mana, „Ani kitii, okei gabo kipai, mogo kou ideide taipiga,” etii.
Jerusalim Maida Jege Tita
41Okai kapa kijake maki kodo dojake jege etai,
42eteete mana, „Ito naago kipi maija muka-muka bokouto mejawii manaido aki epi naako. Kodeja ito kou aki pekaidaapa make apumidoke!
43Putu naago kodo aki ma jape bagee utoma kabo duwajawijake kabobimakaitai. Daana kii jato kou jato bagee ka takitaki katijawii.
44Tijake makiida nakuu katimigijake aki ma akeepa ka jokaane ma maki to jaikai, daana aki duba mogo wado make titaida maija ena ma te jaikai. Aki kadou meta wagi kodo aki gamakai beu kouja,” etii.
Jesus Ugatameja Owaa Witogai
45Ugatameja owaa duba wadoujo kijake kaa te-tai bagee eebakeete go-motii.
46Eteete mana, „Kapogeije ebijamakita: Anija owaa ko sembahjang te-tai owaa. Kodeja ikii ke oma bagee ka bijo jaikipa,” etii.
47Okai agapi gakita Ugatameja owaa duba meido etopigoo. Imam iboudo ma, kapogeije epi bagee ma, me jupi ka iboudo ma wagiine dimi ubai.
48Kodeja okeija gata kodo danite domakai beu. Me utoma okaija mana maida tawanii kouja.
Zur Zeit ausgewählt:
LUKAS 19: EKG
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
