Jan 5
5
Jeju dda arə dəw kə̂ dəbbə rɔɛ̂ oy ddee maji
1Goe tə̂ a, Jeju aw Jerujalɛm mba marə kusu lə Jiipije to. 2Jerujalɛm tə̂ənn, marə maann to ngɔsi baa kə ta-kəy kə̂ daw dandə nɛ̂n kə batəje. Ri maann le kə tar ebərə nan Beteseda. Dɔsu baranda min mbɔrɛ̂ tə̂. 3Njê-rɔ-toje, njê-kəm-tɔje, njê-mətəje kə njê kə̂ dəbbə rɔde oy tokə banya toje kɔ barandaje tə̂ le. [Daw nginanje kar kə̂ maann le a ləngə. 4Mba marə karje a, marə anjə aw uru mə maann tə̂ le aw bu maann le. Yeenn bba bbo nje-rɔ-to kə̂ uru mə maann tə̂ kə̂ aw ləngə le dɔngɔr a, rɔ-to laa le, to rɔ-to ddi wa njaa kara tunga.] 5Horo njê-rɔ-toje tə̂ənn le, marə dingaw kə̂ dəbbə rɔɛ̂ oy dda bbal dɔmota gire jijoo ee tə̂ənn. 6Jeju ooe, n̂-to nangə̂. A noo nan rɔɛ̂ toe bbal banya ngaâ n̂-duje nan: «Ə-ndiki karə rɔi ddee maji wa?» 7Nje-rɔ-to le ilɛ̂ tə̂ nan: «Əbbəmje, dəw ləm kə̂ ta kunnum kurum mə maann tə̂ kə̂ aw ləngə le goto. Bbo kar kə̂ maw maw a, marə dəw uru məɛ tə̂ kete arəm.» 8Jeju pa arɛ̂ nan: «In taar, unn tuwa ləi bbo ə-nja.» 9Njangə baa njaa rɔ dingaw le ddee maji. Nunn tuwa laa ngaâ nunn kutu nja.
Nɛ̂ɛnn le to ndɔ-kuwa-rɔ tə̂. 10Yeenn ngaâ njê-kɔnje dɔ Jiipije paje arə dəw kə̂ rɔɛ̂ ddee maji le nan: «To ndɔ-kuwa-rɔ, ndu ari ddəw karə oto tuwa ləi ang.» 11A nilade tə̂ nan: «Dəw kə̂ dda arə rɔm ddee maji le â pa arəm nan: Unn tuwa ləi bbo ə-nja.» 12N̂-dujeje nan: «Dəw kə̂ pa ari nan unn tuwa ləi bbo ə-nja le to nân wa?» 13A dəw kə̂ rɔɛ̂ ddee maji le gərə dəw le ang. Mba Jeju le andə horo dəwje tə̂ kə̂ banya kə̂ eeje lo tə̂ənn le arə nooe ang.
14Goe tə̂ a, Jeju ingɛ̂ mə kəy-polo Lubba tə̂ ngaâ pa arɛ̂ nan: «Oo, rɔi ddee maji ngaa. A ə-dda majang ang ngaa. Baann ang a, nɛ̂n kə̂ ngəng nya uta ye kə̂ kete le a kingai.» 15Dingaw le aw pa arə njê-kɔnje dɔ Jiipije le nan Jeju â dda arə rɔɛ̂ le ddee maji. 16Mba yeenn bba, njê-kɔnje dɔ Jiipije le unnje kutu sangə ddəw ta dda Jeju maji ang, mba nɛ̂n kə̂ n̂-dda ndɔ-kuwa-rɔ tə̂ lə Jiipije le. 17A Jeju pa arəde nan: «Bɔmje aw dda kula ndərəng bbasinɛn. Əman kara maw dda kula tɔ.» 18Mba tar nəənn le, njê-kɔnje dɔ Jiipije aw sangəje ddəw kə kete kete ta tɔl Jeju. Mba n̂-bbəəl ndɔ-kuwa-rɔ lə Jiipije ang ngaâ dɔɛ tə̂ bbay, n̂-pa nan Lubba to Bɔɛ̂je njaa. Yeenn tɔju to n̂-dda rɔɛ̂ to dəw kə̂ asə naan kə Lubba.
Singa-mɔngu lə Ngonn lə Lubba
19 Jeju təl pa arəde nan: «Tɔkɔrɔ njaa, m-pa marəse: Ngonn asə ta dda nɛ̂n kə dɔɛ̂ baa ang. Nɛ̂n kə̂ noo Bɔɛ̂je dda bba n̂-dda. Nɛ̂n tɔyn kə̂ Bɔ dda a, Ngonn dda tɔ. 20Mba, Bɔ ndiki Ngonn ngaâ n̂-tɔjɛ̂ nɛ̂n tɔyn kə̂ naw dda. Nâ tɔjɛ̂ nɛ̂n-ddaje kə̂ bo uta yeje nəənn karə ooje a, dum dɔse bbay. 21Ddəw kâra baa tokə Bɔ aw ndol dəwje kə̂ oyje ngaâ arə disije kəm baa le, Ngonn aw dda arə dəw isi kəm baa tokə məɛ̂ ndiki tɔ. 22Tɔ bbay, Bɔ gangə sariya dɔ dəw tə̂ kâra ang. Ninya sariya tɔyn ji Ngonn tə̂. 23Yeenn bba karə dəwje tɔyn walje Ngonn le, ddəw kâra baa tokə dəwje tɔyn walje Bɔ. Dəw kə̂ wal Ngonn ang, wal Bɔ kə̂ ulɛ̂ le ang tɔ.
24«Tɔkɔrɔ njaa m-pa marəse: Dəw kə̂ oo tar ləm ngaâ unn məɛ̂ arə dəw kə̂ ulam a, nâ kisi kə təbbə kə̂ to kə ndɔ kə ndɔ. Dâ gangə sariya dɔɛ̂ tə̂ ang, n̂-tee ta yo tə̂ ninga təbbə mban. 25Tɔkɔrɔ njaa, m-pa marəse, kar aw ddee ngaâ karɛ̂ le asə mban. Dəwje kə̂ oyje a kooje ndu Ngonn lə Lubba ngaâ njê kə̂ a kooje ndue le a kisije kəm baa. 26Mba, təbbə to rɔ Bɔ tə̂ njaa, yeenn bba narə təbbə to rɔ Ngonn tə̂ njaa tɔ. 27Ngaâ narə Ngonnɛ̂ singa kə̂ ta gangə nɛ̂n sariya, mba n̂-to Ngonn lə dəw. 28Ooje nɛ̂njeenn a, arəje məse unda dɔ binya ang. Kar aw ddee karə dəwje tɔyn kə̂ oyje ngaâ toje mə buwa-yo tə̂ ooje ndu Ngonn lə dəw a, 29inje mə buwa-yo tə̂ teeje. Njê kə̂ ddaje maji a kinje ta kisije kə təbbə. A njê kə̂ ddaje maji ang a kinje karə n̂-gangə sariya dɔde tə̂.»
Tar-najije kə̂ dɔ Jeju tə̂
30«Əman, masə ta dda marə nɛ̂n kâra kə dɔm baa ang. Maw gangə sariya kə turu ndu Bɔ ngaâ sariya kə̂ maw gangə to kə dɔgɔlɛ̂. Mba nɛ̂n kə̂ məm ndiki â maw sangə ddəw ta dda ang. Nɛ̂n kə̂ mə dəw kə̂ ulam le ndiki â maw sangə ddəw ta dda.
31«Bbo əman njaa maw pa tar-naji ləm a, tar-naji ləm kə̂ maw pa le to tar kə̂ tɔkɔrɔ ang. 32A dəw kə̂ dang â aw pa tar-naji ləm. Ngaâ m-gərə to tar-naji ləm kə̂ naw pa le to tar kə̂ tɔkɔrɔ. 33Ulaje dəwje rɔ Jan-Batisi tə̂ ngaâ n̂-pa tar-naji dɔ tar tə̂ kə̂ tɔkɔrɔ le. 34Əman, dəw â aw pa tar-naji ləm ang. A m-pa yeenn mba karə ingaje kaji. 35Jan nayn tokə puru lambe kə̂ aw ɔn ngaâ aw ndoko. Ngaâ ə-ndikije tə̂ ta dda rɔ-nəəl mba gɔju kar kɔ puru tə̂ laa le.
36«A tar-naji kə̂ dɔm tə̂, kə̂ ngəng uta ye kə̂ Jan pa to. Mba kula kə̂ Bɔ ulam arə maw dda le njaa aw pa tar-naji ləm ngaâ tɔju to Bɔ â ulam. 37Ngaâ, Bɔ kə̂ ulam le njaa pa tar-naji ləm. A ooje ndue ndɔ kâra ang ddəm ooje kəmɛ̂ ndɔ kâra ang ddəm. 38Tar laa le nayn məse tə̂ ang, mba ooje məse tə̂ kə dəw kə̂ nulɛ̂ le ang.
39«Aw kinyaje mə Makəturu lə Lubba, mba əjəje to Makəturu le a karəse təbbə kə̂ to kə ndɔ kə ndɔ. Makəturuje le paje tar-naji ləm. 40A ə-ndikije ta ddee rɔm tə̂ ta kinga təbbə kə̂ tɔkɔrɔ ang.
41«Maw sangə karə dəwje pitimje ang. 42M-gərəse. Ndiki lə Lubba to məse tə̂ ang. 43Əman, m-ddee kə ri Bɔmje, a ə-taamje kə rɔse tə̂ ang. A bbo marə dəw ddee kə ria njaa a, ə-tɛɛ̂je kə rɔse tə̂. 44Sese aw pitije naan horose tə̂. A ə-sangəje piti kə̂ in rɔ Lubba tə̂ njaa ang. Yeenn a, â kasəje ta koo məse tə̂ tokə baânn wa?
45«Əman â mâ kunda tar dɔse tə̂ nɔn Bɔ tə̂ ang. Dəw kə̂ a kunda tar dɔse tə̂ to Mɔyijə kə̂ undaje məse dɔɛ̂ tə̂ le. 46Bbo ə-ndikije tarje tə̂ lə Mɔyijə a, â ndikije tarje tə̂ ləm tɔ, mba Mɔyijə pa tar ləm makəturuje tə̂ laa. 47A ə-ndikije tarje tə̂ kə̂ Mɔyijə pa makəturu tə̂ le ang. Yeenn a, â ndikije tarje tə̂ kə̂ maw pa tokə baânn wa?»
Zur Zeit ausgewählt:
Jan 5: KabbaDkS
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
