Jan 4
4
Tar lə Jeju de kə marə dɛnɛ̂n kə̂ Samari
1 Parijinyɛje ooje nan Jeju aw dda dəwje nya to njê-njaje goe tə̂ ngaâ naw dda dəwje batɛm nya nuta Jan. 2A kə̂ tɔkɔrɔ tə̂, Jeju njaa dda dəw batɛm ang. Njê-njaje goe tə̂ â aw ddaje dəwje batɛm. 3Jeju oo tar nəənn le a, nin Jude, n̂-təl Galile. 4A, ta kaw Galile le, nâ nday kə ddəw kə̂ Samari.
5N̂-tee ngɔsi kə marə tɔkə bbe kə̂ Samari kə̂ daw bbar nan Sikar. Tɔkə bbe le to ngɔsi kə ndɔɔ kə̂ Jakobbo arə ngonnɛ̂ Jojɛpə. 6Buwa-maann lə Jakobbo to lo tə̂ənn le. Rɔ Jeju nyɛɛ̂ go nja tə̂ le ngaâ isi mbɔr buwa-maann tə̂ le kə kar kə̂ ar dannâ.
7Marə dɛnɛ̂n kə̂ Samari ddee ta to maann a, Jeju pa arɛ̂ nan: «Arəm maann may.» 8Kar tə̂ənn le, njê-njaje goe tə̂ awje mə bbe tə̂ ta ndoko nɛ̂n-kusa. 9Dɛnɛ̂n kə̂ Samari le pa arə Jeju nan: «Əi, ə-to Jiipi, a əman, m-to dəw kə̂ Samari, a â dujum maann-kay tokə baânn wa?» Mba marə nɛ̂n kâra aw mbɔn Jiipije kə dəwje kə̂ Samari naan tə̂ ang.
10 Jeju ilɛ̂ tə̂ nan: «Bbo ə-gərə nɛ̂n kə̂ Lubba aw arə dəw ngaâ bbo ə-gərə dəw kə̂ aw duji maann-kay nəənn a, əi â, â duje maann-kay, ta nâ kari maann kə̂ aw arə təbbə.» 11Dɛnɛ̂n le pa arɛ̂ nan: «Əbbəmje, ee kə marə nɛ̂n kâra ta to nɛ̂n maann ang ddəm ngaâ buwa-maann le uru nya, a â kinga maann kə̂ aw arə təbbə le dda wa? 12Əi, uta kajeje Jakobbo wa? Ne â narəje buwa-maann nəənn. Ne njaa kə ngannɛ̂ kə daje laa kara dayje maann nəənn tɔ.» 13Jeju ilɛ̂ tə̂ nan: «Dəw ay maann nəənn a, kunda a kɔɛ̂n bbay. 14A dəw kə̂ a kay maann kə̂ mâ karɛ̂, kunda a kɔɛ̂n ndɔ kâra ang ngaa. Maann kə̂ mâ karɛ̂ le a təl to kəy-maann kə̂ aw arə təbbə kə̂ to kə ndɔ kə ndɔ.» 15Dɛnɛ̂n le pa arɛ̂ nan: «Əbbəmje, arəm maann le arə kunda ɔnʼm ang ngaa ddəm karə m-ddee m-to maann nəənn ang ngaa ddəm.» 16Jeju pa arɛ̂ nan: «Aw ə-bbar ngawije ta ə-təl ə-ddee nəənn.» 17Dɛnɛ̂n le ilɛ̂ tə̂ nan: «Ngamje goto.» Jeju pa arɛ̂ nan: «Tar kə̂ ə-pa nan: ‹Ngamje goto› le to kə dɔgɔlɛ̂. 18Mba ə-taa ngaw gɔl min ngaa. Dingaw kə̂ isi saa bbasinɛn nəənn le to ngawije ang. To tar kə̂ tɔkɔrɔ â ə-pa.» 19Yeenn ngaâ dɛnɛ̂n le pa arɛ̂ nan: «Əbbə-dəwje, moo a, ə-to nje-kila mbər tar lə Lubba. 20Kajeje jee dəwje kə̂ Samari poloje Lubba dɔ ddingiri tə̂ toonn. A see Jiipije, ə-paje nan, lo kə̂ maji polo Lubba tə̂ â to Jerujalɛm.» 21Jeju ilɛ̂ tə̂ nan: «Dɛnɛ̂n, ə-ndiki tar tə̂ ləm: Kar aw ddee kə̂ â kawje dɔ ddingiri tə̂ toonn ang ddəm a kawje Jerujalɛm bba ta polo Bɔy ang ddəm. 22See dəwje kə̂ Samari, aw poloje nɛ̂n kə̂ ə-gərəje ang. A jee Jiipije, jaw polo nɛ̂n kə̂ jeje n-gərə. Mba kaji in bbe lə Jiipije bba ddee. 23A marə kar aw ddee, kar le njaa nəənn, kə̂ dəwje kə̂ aw poloje Lubba tokə tɔkɔrɔ a poloje Bɔy ddəw Ndil tə̂ kə ddəw tar tə̂ kə̂ tɔkɔrɔ. Mba dəwje kə̂ aw poloje Lubba tokə baann â Bɔy aw sangəde. 24Lubba to ndil arə maji karə dəwje kə̂ aw poloje Lubba poleje kə ndil ddəm kə tar kə̂ tɔkɔrɔ ddəm.» 25Dɛnɛ̂n le pa arə Jeju nan: «M-gərə to Mesi a ddee, ne kə̂ daw bbarɛ̂ nan Kristə le. Bbo n̂-ddee a, nâ kɔru gəl nɛ̂nje tɔyn karəje.» 26Jeju ilɛ̂ tə̂ nan: «Əman kə̂ maw pa səi tar nəənn, m-to Mesi le.»
27Kar tə̂ənn, njê-njaje goe tə̂ təlje ddeeje. A Jeju aw pa tar kə marə dɛnɛ̂n. To nɛ̂n kə̂ dum dɔde. A dəw kâra duje se ddi bba naw duju wase mba ddi bba naw pa saa tar wa ang.
28Yeenn ngaâ dɛnɛ̂n le inya jo-maann laa a təl aw mə tɔkə bbe tə̂ ngaâ pa arə dəwje nan: 29«Ə-ddeeje ooje dingaw kə̂ pa tar nɛ̂nje tɔyn kə̂ m-dda arəm nəənn. A du ang, ne â n̂-to Mesi le!» 30Dəwje inje mə bbe tə̂ le teeje ngaâ ddeeje kə rɔ Jeju tə̂.
31Karɛ̂ tə̂ənn, njê-njaje go Jeju tə̂ aw dujeje nan: «Nje-nɛ̂n-tɔju, usa nɛ̂n bba.» 32A nilade tə̂ nan: «Nɛ̂n-kusa kə̂ ə-gərəje ang to ta karə musa.» 33Yeenn ngaâ njê-njaje go Jeju tə̂ aw dujuje naan nan: «Marə dəw ddee kə nɛ̂n-kusa arɛ̂ wa?»
34 Jeju pa arəde nan: «Nɛ̂n-kusa ləm to ənga dda nɛ̂n kə̂ mə Lubba kə̂ ulam ndiki, ta dda kula kə̂ narəm le tunga. 35Sese, aw paje nan: ‹Nɛyn nayn sɔ karə juja ko-ndɔɔ.› A əman, m-pa marəse: Aaje ndɔɔje nəənn ooje. Kandə-koje le sangəje asə ta kuja ngaa. 36Nje-kuja kandə-ko inga kuka laa mban. Naw mbɔn kandə-ko le mba kisi nɛ̂n kə təbbə kə̂ to kə ndɔ kə ndɔ. Yeenn bba karə nje-dubbu ko kə nje-kuja ko, dede joo kəm rɔde nəəlde. 37Mba dəwje aw paje nan: ‹Marə dəw dubbu ko, a marɛ̂ uja ko le.› Tar le to tar kə̂ tɔkɔrɔ. 38Mulase marə aw ujaje ko mə ndɔ tə̂ kə̂ ə-ddaje kulɛ̂ ang. Marə dəwje ddaje kula, a sese â ingaje nɛ̂n go kula tə̂ ləde le.»
39Dəwje nya kə̂ Sikar nangə Samari tə̂ ooje məde tə̂ kə̂ Jeju mba tar lə dɛnɛ̂n kə̂ Samari le. Mba n̂-pa narəde nan: «Dingaw le pa nɛ̂nje kə̂ m-dda tɔyn arəm.» 40Mba yeenn bba, dəwje kə̂ Samari ddee teeje rɔ Jeju tə̂ le a, dujeje nan: «Ə-nayn kə je.» Ngaâ Jeju le nayn kə̂ de ndɔ joo. 41Yeenn bba, dəwje kə̂ ooje məde tə̂ saa mba tarje kə̂ ne njaa n̂-pa banyaje nya bbay. 42Ngaâ, n̂-paje darəje dɛnɛ̂n le nan: «Bbasinɛn, joo məje tə̂ saa mba tarje ləi kə̂ ə-pa le njaa ang ngaa. Joo məje tə̂ mba jeje njaa joo tarje kə̂ tɛɛ̂ tə̂ ngaâ n-gərə to, ne njaa n̂-to Nje-kaji-dəwje kə̂ duninya tə̂.»
Jeju aji ngonn lə marə baw-ddɔ
43Go ndɔ tə̂ kə̂ joo le a, Jeju in lo tə̂ənn aw aw kə Galile. 44Mba ne njaa n̂-pa nan: «Dəwje aw walje nje-kila mbər tar lə Lubba bbeê laa ang.» 45A n̂-tee Galile a, dəwje kə̂ Galile tɛɛ̂je kə rɔde tə̂ kə majɛ̂ mba dede njaa kara dawje Jerujalɛm kusu Pakə tə̂ arə dooje nɛ̂nje tɔyn kə̂ n̂-dda.
46Jeju təl ddee Kana, nangə tə̂ kə̂ Galile, lo tə̂ kə̂ n̂-dda narə maann təl ddee to bɛn tə̂ le. Marə nje-kula kə̂ bo kə̂ kəy lə tɔkə mbay, rɔ ngonnɛ̂ kə̂ dingaw toe Kapɛrnawum. 47Nje-kula le oo nan Jeju in Jude ddee Galile a, naw ningɛ̂ ngaâ n̂-pa narɛ̂ nan: «M-wali nya, ngonnəm a ta koy, ə-ddee Kapɛrnawum ajɛ̂.» 48Jeju pa arɛ̂ nan: «Bbo m-dda nɛ̂n-mɔrije kə nɛ̂nje kə̂ dum dɔ koo ang a, â kasəje ta koo məse tə̂ ang.» 49Nje-kula lə tɔkə mbay le ilɛ̂ tə̂ nan: «Əbbə-dəwje, aw bba nan ngonnəm a koy.» 50Jeju pa arɛ̂ nan: «Aw, ngonni nayn kəm baa.»
Dingaw le ndiki tə̂ kə tar lə Jeju le ngaâ ɔtu. 51Kar tə̂ kə̂ n̂-nayn ddəw-boô bbay a, njê-kulaje laa tilaje kəmɛ̂ ngaâ paje arɛ̂je nan: «Ngonni nayn kəm baa.» 52N̂-dujude nan: «Kar kə̂ baânn â nisi nɛ̂n kə majɛ̂ wa?» Dilɛ̂je tə̂ nan: «Takənɛn kə gɔl kar kâra kə̂ lo-kul tə̂ a rɔɛ̂ wul nɛ̂n.» 53Mə bɔɛ̂je le ole to kar tə̂ənn njaa â Jeju pa arɛ̂ nan: «Ngonni nayn kəm baa.» Yeenn ngaâ ne kə nje kə̂ laa tɔyn dooje məde tə̂ kə Jeju.
54Joo lə nɛ̂n-mɔri kə̂ Jeju dda â nəənn. N̂-dda nɛ̂ɛnn le kar tə̂ kə̂ nin Jude n̂-ddee Galile.
Zur Zeit ausgewählt:
Jan 4: KabbaDkS
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
