Jan 6
6
Jeju arə nɛ̂n-kusa dəwje doro min (5 000)
1Goe tə̂ a, Jeju aw tura tɔkə dangə tə̂ kə̂ Galile kə̂ daw bbar nan Tiberiyadə tɔ. 2Dəwje tokə banya unnje goe, mba dooje nɛ̂n-mɔrije kə̂ naw dda rɔ njê-rɔ-toje tə̂. 3Jeju aal ddingiri isi tə̂, ne kə njê-njaje goe tə̂. 4Dɔ ndɔɛ̂ tə̂ənn le, kusu lə Jiipije kə̂ to Pakə nayn ngɔsi baa. 5Jeju aa lo a, oo dəwje kə̂ banya kə̂ aw ddeeje kə rɔɛ̂ tə̂. Ngaâ n̂-duju Pilipi nan: «Lo kə̂ dda bba ja ndoko mapa tə̂ karə dəwje nəənn usaje wa?» 6Jeju duju tar tokə baann ta nan nɛ̂n Pilipi. Mba ne njaa n̂-gərə nɛ̂n kə̂ nâ ta dda mban.
7Pilipi le ilɛ̂ tə̂ nan: «Bbo n-ndoko mapa kandə narɛ kɔr joo (200) njaa kara, a kasə karə dəw kâra kâra inga ngaji ngaji ang.» 8Marə nje-nja go Jeju tə̂ kə̂ to Andere ngokɔn Simɔn Piyɛr pa arə Jeju nan: 9«Marə ngonn kə̂ dingaw ee nəənn, nee kə̂ mapa min kə̂ n̂-dda kə̂ nduju ɔrjə kə kanjije joo. A yeenn a kasə dəwje kə̂ banya be wa?» 10Jeju pa nan: «Arəje dəwje le tɔyn isije nangə̂.» Mu to lo tə̂ənn le nya. Yeenn bba, disije nangə̂. Dingawje eeje ngɔsi kə doro min (5 000). 11Jeju taa mapa le ngaâ arə wooyo Lubba. Goe tə̂ a, n̂-kayn dəwje kə̂ eeje tə̂ənn le. N̂-dda tokə baann kə kanjije le tɔ. Narəde tokə məde ndiki. 12Dusaje nɛ̂n le asəde a, Jeju pa arə njê-njaje goe tə̂ nan: «Ə-mbɔnje kəsə nɛ̂nje kə̂ naynje le, arəje nɛ̂n kâra nayn kə kɔrɔ̂ ang.» 13N̂-mbɔnje kəsə mapa kə̂ min kə̂ n̂-dda kə nduju ɔrjə kə̂ dusaje le ngann karɛ dɔku gire joo.
14Dəwje le ooje nɛ̂n-mɔri kə̂ Jeju dda le a, n̂-paje nan: «Ne njaa â n̂-to nje-kila mbər tar lə Lubba kə̂ a ta ddee dɔ nangə tə̂ le.» 15Jeju gərə to dâ ddeeje ta kuwɛ̂ ddɛɛ̂ to tɔkə mbay. Yeenn bba, n̂-təl naw dɔ ddingiri tə̂ guku kə karɛ̂ baa.
Jeju nja dɔ maann tə̂
16Lo-kul a, njê-njaje go Jeju tə̂ awje ta ba-katə tə̂. 17Daalje tɔkə to ngaâ dawje tura ba tə̂ le ər kə Kapɛrnawum. Lo ndul mban, a Jeju təl ddee rɔde tə̂ ang bbay. 18Ləl ula kə singa arə maann le ləngə nya. 19Njê-njaje go Jeju tə̂ le yəlje tɔkə to le asə kilometere min wase misan a, dooje Jeju aw nja dɔ maann tə̂ aw ddee nɛ̂n kə tɔkə to tə̂ ləde le a, n̂-bbəəlje. 20A Jeju pa arəde nan: «Əman â nəənn, ə-bbəəlje ang.»
21N̂-ndikije ta kunnɛ̂ kə mə tɔkə to tə̂ le a, kar tə̂ənn njaa, to le ɔru nangə lo tə̂ kə̂ daw dawje kə tə̂ le.
Dəwje kə̂ banya aw sangəje Jeju
22Lo-karɛ̂ ngaâ dəwje kə̂ banya kə̂ naynje tura ba tə̂ le ooje a, tɔkə to kâra baa kə̂ ee lo tə̂ənn le â ɔtu. Jeju aal to le kə njê-njaje goe tə̂ ang. Dawje kə karəde baa. 23A marə tɔkə toje inje Tiberiyadə ddee teeje ngɔsi kə lo kə̂ Əbbə-dəwje arə wooyo Lubba tə̂ ngaâ kaynde mapa arə dusaje tə̂ le. 24Dəwje kə̂ banya le ooje a, Jeju ddəm njê-njaje goe tə̂ ddəm n̂-gotoje lo tə̂ənn. Yeenn bba, dunnje tɔkə toje le ngaâ dawje Kapɛrnawum ta sangə Jeju.
Jeju to mapa kə̂ aw arə təbbə
25Dəwje le ingaje Jeju tura ba tə̂ le ngaâ dujeje nan: «Nje-nɛ̂n-tɔju, ə-ddee nəənn ndɔ tə̂ kə̂ dda wa?» 26Jeju ilade tə̂ nan: «Tɔkɔrɔ njaa, m-pa marəse, aw sangəmje mba mapa kə̂ usaje arəje məse ndann, bbo aw sangəmje mba nɛ̂n-mɔrije kə̂ ooje le ang. 27Maji karə nɛ̂n-kusa kə̂ aw tuju â ə-ddaje kula mbɛɛ̂ ang. Maji karə ə-ddaje kula mba nɛ̂n-kusa kə̂ aw to kə ndɔ kə ndɔ ngaâ aw arə təbbə kə̂ to kə ndɔ kə ndɔ. Nɛ̂n-kusa kə̂ to kə ndɔ kə ndɔ le Ngonn lə dəw â, a karəse. Mba, ne â Lubba kə̂ Bɔ arɛ̂ singa.» 28Yeenn ngaâ dəwje le dujeje nan: «Ddi â ja dda bba ja dda kula lə Lubba wa?» 29Jeju ilade tə̂ nan: «Kula lə Lubba to karə ooje məse tə̂ kə dəw kə̂ nulɛ̂.» 30Yeenn ngaâ n̂-paje darɛ̂je nan: «Nɛ̂n-mɔri ddi â, â dda karə joo bba karə joo məje tə̂ səi wa? Ddi â, â dda wa? 31Ləw kajeje usaje nɛ̂n kə̂ ria nan mann mə kɔr tə̂ tokə Makəturu lə Lubba pa nan: Lubba arəde mapa kə̂ in darâ dusaje.»
32 Jeju ilade tə̂ nan: «Tɔkɔrɔ, m-pa marəse: To Mɔyijə â arəse mapa kə̂ darâ ang. To Bɔmje â aw arəse mapa kə̂ tɔkɔrɔ kə̂ darâ. 33Mba, mapa lə Lubba to ye kə̂ in darâ ngaâ aw arə təbbə dəwje kə̂ duninya tə̂.» 34Yeenn ngaâ dəwje paje arə Jeju nan: «Əbbə-dəwje, arəje mapa le kə ndɔ tɔyn.» 35Jeju pa arəde nan: «Əman, m-to mapa kə̂ aw arə təbbə dəw. Dəw kə̂ ddee rɔm tə̂ a, bbo a ddɛɛ̂ ndɔ kâra ang. Dəw kə̂ unn məɛ̂ arəm a, kunda maann a kɔɛ̂n ndɔ kâra ang. 36A m-pa marəse mban, oomje njaa, a ooje məse tə̂ ang. 37Dəwje tɔyn kə̂ Bɔmje arəm a ddeeje rɔm tə̂. Ngaâ dəw kə̂ ddee rɔm tə̂ a, mâ kilɛ̂ ddaka ang. 38Tɔkɔrɔ njaa, min darâ m-ddee ta dda nɛ̂n kə̂ mə dəw kə̂ ulam ndiki, bbo nɛ̂n kə̂ məm ndiki â m-ddee ta dda ang. 39Nɛ̂n kə̂ mə dəw kə̂ ulam ndiki â nəənn: Maji karə horo dəwje tə̂ tɔyn kə̂ narəm, dəw kâra nayn kə kɔrɔ̂ ang. Maji karə m-ndolde ddutu ndɔ tə̂. 40Nɛ̂n kə̂ mə Bɔmje ndiki â nəənn: Karə dəwje tɔyn kə̂ ooje Ngonn le ngaâ ooje məde tə̂ saa, ingaje təbbə kə̂ to kə ndɔ kə ndɔ. Ngaâ əman, ddutu ndɔ tə̂ a, mâ ndolde.» 41Jiipije nanɛnje kə Jeju mba n̂-pa nan: «Əman, m-to mapa kə̂ in darâ ddee.» 42Ngaâ n̂-paje nan: «Dəw nəənn to Jeju ngonn lə Jojɛpə ang wa? N-gərə bɔɛ̂je kə kɔɛ̂nje ang wa? A nâ pa nan nin darâ bba n̂-ddee tokə baânn wa?» 43Jeju ilade tə̂ nan: «Ə-nanɛnje səm ang ngaa. 44Dəw kə̂ Bɔy kə̂ ulam ndasɛ̂ karə ddee rɔm tə̂ bba a ddee rɔm tə̂. Ngaâ ddutu ndɔ tə̂ a, mâ ndole. 45Njê-kilaje mbər tar lə Lubba ddaje Makəturu tə̂ nan: ‹Lubba a tɔju nɛ̂n dəwje tɔyn.› Dəw kə̂ oo tar lə Bɔ ngaâ taa nɛ̂n-tɔju laa, to dəw kə̂ ddee rɔm tə̂. 46Yeenn tɔju to dəw kâra kə̂ oo Bɔ goto. Dəw kə̂ in rɔ Lubba tə̂ kâra baa â oo Bɔ.
47«Tɔkɔrɔ njaa, m-pa marəse, dəw kə̂ unn məɛ̂, ee kə təbbə kə̂ to kə ndɔ kə ndɔ. 48Əman m-to mapa kə̂ aw arə təbbə dəwje. 49Kasese usaje mann mə kɔr tə̂, a doyje. 50A mapa kə̂ in darâ ddee â nəənn, dəw kə̂ usa a, a koy ang. 51M-to mapa kə̂ nayn kəm baa kə̂ in darâ ddee. Dəw kə̂ usa mapa nəənn le a kisi kə təbbə kə̂ to kə ndɔ kə ndɔ. Mapa kə̂ mâ karɛ̂ to da-rɔm kə̂ a karə təbbə dəwje kə̂ dɔ nangə tə̂.» 52Yeenn ngaâ Jiipije aw maynje naan tar kə singa singa nan: «Dingaw nəənn a karəje taal-rɔɛ̂ karə jusa tokə baânn wa?» 53Jeju pa arəde nan: «Tɔkɔrɔ njaa, m-pa marəse: Bbo usaje da-rɔ Ngonn lə dəw ang ngaâ ayje məse ang a, â kisije kə təbbə ang. 54Dəw kə̂ usa taal-rɔm ngaâ ay məsəm a, ee kə təbbə kə̂ to kə ndɔ kə ndɔ. Ngaâ əman, ddutu ndɔ tə̂ a, mâ ndole. 55Mba taal-rɔm to nɛ̂n-kusa kə̂ tɔkɔrɔ ddəm məsəm to nɛ̂n-kay kə̂ tɔkɔrɔ ddəm. 56Dəw kə̂ usa taal-rɔm ngaâ ay məsəm a, əman je saa ja ddee to dəwje kə̂ kâra baa. 57Bɔ kə̂ ulam le to nje-təbbə. Ne â narə misi kə təbbə. Ddəw kâra baa, dəw kə̂ usa taal-rɔm a, mâ karə isi kə təbbə. 58Mapa kə̂ in dara ddee â nəənn: To ddəw kâra baa kə mapa kə̂ kasese usaje le ang. Dede doyje, a bbo dəw usa mapa nəənn le a, nâ nayn kə təbbə kə ndɔ kə ndɔ.» 59Jeju tɔju nɛ̂nje nəənn bbe tə̂ kə̂ Kapɛrnawum, mə kəy mbɔn-naan tə̂ lə Jiipije.
Marə njê-njaje go Jeju tə̂ ɔtuje inyɛ̂je
60Dooje tarje lə Jeju le a, nya lə njê-njaje goe tə̂ paje nan: «Tar nəənn ngəng nya. Nân a kasə ta ndiki tə̂ saa wa?»
61 Jeju gərə məɛ̂ tə̂ to njê-njaje goe tə̂ aw nyuruje mba tar kə̂ naw pa le. Yeenn ngaâ n̂-dujude nan: «Tar le a dda karə ooje məse tə̂ ang wa? 62Ngaâ bbo ooje Ngonn lə dəw in aw kə darâ, lo kə̂ nee tə̂ dɔngɔr le a, â paje nan ddi wa? 63Ndil lə Lubba â aw arə təbbə dəw, bbo da-rɔ dəw asə dda marə nɛ̂n kâra ang. Tarje kə̂ m-pa marəse le toje to Ndil ddəm təbbə ddəm. 64A horose tə̂, marə dəwje ooje məde tə̂ ang.»
Mba kunn-kute tə̂ njaa, dəwje kə̂ ooje məde tə̂ kə̂ Jeju ang, Jeju gərəde ddəm gərə dəw kə̂ a kunn dɔɛ̂ ddəm. 65Ngaâ Jeju təl pa nan: «Mba yeenn bba m-pa marəse, bbo Bɔ arə ddəw dəw karə ddee rɔm tə̂ bba a kasə ta ddee rɔm tə̂.»
66Unn kute ndɔɛ̂ tə̂ənn, nya lə njê-njaje go Jeju tə̂ ɔruje rɔde kə guku ngaâ njaje saa ang ngaa. 67Yeenn ngaâ Jeju pa arə njê-kaw-kulaje kə̂ dɔku gire joo le nan: «Sese, ə-ndikije ta kɔtu tɔ ang wa?» 68Simɔn Piyɛr ilɛ̂ tə̂ nan: «Əbbə-dəwje, nân bba ja kaw rɔɛ̂ tə̂ wa? Əi â, tar kə̂ aw arə təbbə kə̂ to kə ndɔ kə ndɔ to tai tə̂. 69Ngaâ, jeje joo məje tə̂. N-gərə to əi, ə-to dəw kə̂ maji tɔyn kə̂ Lubba â ulai.» 70Jeju ilade tə̂ nan: «Əman â m-mbərəse, see njê-kaw-kulaje kə̂ dɔku gire joo nəənn ang wa? A marə dəw horose tə̂ to marə əsu.» 71Jeju pa tar nəənn ɔju dɔ Judas ngonn lə Simɔn Iskariyotə. Mba Judas â, a kunn dɔ Jeju. Ne kə̂ nee horo njê-kaw-kulaje tə̂ kə̂ dɔku gire joo le.
Zur Zeit ausgewählt:
Jan 6: KabbaDkS
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
