Kada Bulawan 8
8
Pangpakainga'na kamaccan
1 #
Bulawan 1:20-21
Pesa'dingngii! Ia to kamaccan butung baine metamba-tamba.
Na kamapahangan, butung to tometamba mpeandongngi gamaranna,
2jaoi membuntunna jio randan lalan
jioi pangka lalan ke'deh,
3jio tooi babangan lalan mentama kota
mpeandongngi mangkada nakua,
4“Ee sininna tolino, mpeandongngina' gamarangku' lako kamu'
ia tee petambaku' kupatuju lakoi sininna bati' tolino.
5Ee kamu' to tangmapahangpa,
pangngattaii mangngakkalan melo,
na kamu' to battuk,
melajah kamu' mapahang.
6Pesa'dingngi rampa'i,
la mpauna' kara-kara makeangga',
la mpauna' kada tongan.
7Tongan ngasan to kupau,
kukaba'ci to mpau kada mangnguraga.
8Tonganna mandara to kupau,
te'da lalo kupasibalikan kada.
9Gaja majappu to kadangku' lako tomapahang,
na nakanassai tobuda kapaissenanna.
10Tarimai to pangpangngajahku',
la'bihpa na ia to ntarima pera',
la'bih paralluii to kapaissenan,
na ia to bulawan massang.
11Nasaba' kamaccan la'bih keangga' na paramata,
te'da pada-padanna jio mai sininna apa to mukadoangngi.
12Aku'mo to disanga macca,
jio aku' den akkalan melo,
den kapaissenan sola matarruh mangpikkiri'.
13Ngkalaja' ngkasiri' Puang Allataala,
battuananna ngkaba'ci panggaukan gaja'.
Te'da kukabudaii to matampo sola majao penawa.
Kukaba'ci to panggaukan gaja'
sola kada pangnguraga.
14Aku'mo to mpakainga' tau kupangben pangpikkirisan melo.
Aku'mo to mapahang kumawatang too.
15Aku' ntulungngi to sininna raja namangparenta melo,
kutulung tooi to tomapangka' ngkabua' atoran maruruh.
16Pakkaeloranku' namakuasa mangparenta to tomaraja,
pangtulungku' namacca to puang mangra'tah tangmangpasilaenan.
17Kupakamoja' to tompakamoja'na',
na ia to tolantuk tongan penawanna nnangahna' nang la naampa'na'.
18Kasugiran, kadianggasan,
kamarurusan na ewanan tangnakande ane,
pole jio ngasan mai aku'.
19Ia to bua-bua muampa' jio mai aku' tee macca, la'bih makeangga' na ia to bulawan,
la'bih makeangga'pa na ia to bulawan tasak ba'tu pera' massang.
20Tatta'na' nturu' pakkaeloran-Na Puang Allataala,
kuda'tan maruruh mangra'tah.
21Ia to tompakamoja'na' la kupasugih,
kutuli mpadenanni ewanan llan bolana.
22 #
Pengkitanna Yahya 3:14
Aku' pamula Napaden Puang Allataala,
aku'mo pamula jaman-Na tonna anu'.
23Tonna anu'pa kudipaden,
aku'mo pamulanna tonna te'dapa na dipaden tee lino.
24Te'dapa nadipaden to tasik na nang denmo',
na te'da toopa mata wai mangkalimbuah.
25Denmo' tonna te'dapa nadipennosokan to buntu
tonna te'dapa nake'deh to buntu-buntu,
26tonna te'dapa Napadenni Puang Allataala tee lino sola padangna
iarika te'dapa nadipaden to pamula litak.
27Jiona' ton-Naballahhi Puang Allataala to langi',
ton-Napattantui to angge randan langi' jio randan tasik maluah.
28Jiona' ton-Napattantui to saleu' jao langi',
namengkalimbuah to wai jiong tasik namandirrih lempah.
29Jiona' ton-Napattantui to randan tasik
danggi' naliwa'i wai to dianggeanni,
na jio toona' ton-Napattantui to cappa' lino jiongna liu.
30Jiona' sa'de-Na, aku'mo anak to Napakamoja',
allo-allo aku' to Napumasannang,
kutatta' maningo-ningo jio olo-Na.
31Mangmasannang-sannangna' nni tee lino Napaden,
kupumasannang ngkita tolino panggaragan-Na.
32Jaji, ee sininna bati'ku', pesa'dingngina'!
Turu'i to kupatujuan kamu', mipumasannangngi.
33Tarimai to pangpangngajah mimacca,
parinawa meloi danggi' misangai te'da bua'na.
34Maupa' to tompesa'dingngina',
na allo-allo mangtajan jio bolaku',
na mangpeagi jio babanganku'.
35Ia ke naampa'na', la nnampa'i katuoan melo
na Napumasannang Puang Allataala.
36Apa inda to te'da naampa'na', mparugi kalena,
ia to tongkaba'cina' ngkabudai kamatean.”
Zur Zeit ausgewählt:
Kada Bulawan 8: mvpAD
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Wycliffe Bible Translators, Inc. All rights reserved.