Kada Bulawan 7
7
1Ee anakku', ingaranni tee pangpangngajahku',
muparinawa meloi tee kusuanko.
2Pugaukki tee kusuanko,
namasannang to katuoanmu.
Parinawa meloi tee pangpangngajahku',
susi matammu muparakai melo.
3Ingaran rampa'i tee kuajaranko,
mupallan meloi penawammu.
4Angga'i to kamaccan butung sile'tomu,
na kamapahangan susi soba'mu to gaja mukamali'.
5Iamo mpamambelako jio mai baine sala kedo,
jio mai bainena tau to macca massede.
Jagaiko kalemu jio mai baine sala kedo
6Den pissen kumangpellingi'
jio tarali pentiroan bolaku',
7kukita ba'tu pira-pira kallolo totangmapahangpa, kupemataii,
den sala mesa'na to mbango'i kalena.
8-9Ia tonna la marimu-rimumo lambanmi joo kallolo mesa' jio tetuk lalan,
mangnguju lako bolana mesa' baine sala kedo.
10-12Ia joo baine totangrapa' jio bolana.
Te'da dikalannai nata'pa jiomo randan lalan,
namane' jio omo tana lapang,
ba'tu jio omo tetuk lalan ke'deh mangtajan.
Takkaliwa' to sipa'na te'damo naissen masiri'.
Kukita joo baine messun llan mai bolana
mpake pakean susi baine sala kedo,
namale ntammuii joo kallolo,
nasede salai.
13Naambei joo kallolo namane' nnudungngi.
Te'da bang namasiri' ntambai joo kallolo, namangkada kumua,
14“Mangkamo' mangkaroba mpassompan karoba dipasalama'#7:14 Ia to karoba dipasalama' den sangtawan to ditunu pu'puh na den sangtawan to dinasu na dikande. Baca llan Sura' Imamat 7:11-17 tee allo,
nasaba' mpaliuna' tinja'ku'.
15Iamo kumale nnangahko,
dikua muleppang jio bolaku'.
Na kanmiki' sitammu ntee!
16Mangkami kuballahhi kaen lenan macure'-cure' to katindoanku',
kaen dibawa jio mai tana Mesir.
17Na mangkami kupi'pikki mangrupa-rupa minynya'-minynya' bunangngu'
susinna: mur, gaharu, na kadingeq.
18Malemoko mai tamerroja tee bongi tasiraka'-raka',
tapasau kamacinnanta' siupuh bongi.
19Te'da una muaneku' jio bola,
male mambelai.
20Buda doi' nabawa,
jaji agi-agi la malepongpi bulan namane' pole.”
21Nasedei joo kallolo mpake mangrupa-rupa kada passede,
macanning bang timunna la ssuai manggauk sala.
22Nata'pa meundi lako joo baine,
butung sapin dirui' lako panggeresan,
ba'tu susi to tobango' dipumpung la disessa,
23cingga'tu'mora namasolang susi pana llo'po' ate.
Susi manuk-manuk mentia' lako ngenan pangpojan,
susi toomi joo kallolo, te'da naissenni kumua la masolangngi.
24Iamo joo, ee sininna bati'ku',
pesa'dingngii tee kadangku',
parinawai tee pangpakainga'ku'.
25Danggi' muturu'i passedena joo baine,
danggi' mumadoang napasala lalan,
26nasaba' gaja budamo muane nasolang-solang.
Tangdipuramo rrekenni to muane mate, napubua'.
27Ia to bolana iamo lalan lako lino tomate
to mangnguju do' lamunan.
Zur Zeit ausgewählt:
Kada Bulawan 7: mvpAD
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Wycliffe Bible Translators, Inc. All rights reserved.