Kada Bulawan 9
9
Den bua'na to macca
1Ia to kamaccan dipasusi mesa' tau to mangka ngkabua' bolana
na den pitu ariri batunna.
2Mangkami mangcamme juku' sola mpasadia anggoro'
sola kinande la nakande mangmaroah-roah.
3Nasuai to pangjamana baine male metamba-tamba mpau pepasanna
jao ngenan majao llan kota nakua,
4“Ee kamu' to tangmapahangpa, leppang kamu' mai!”
Na lako tote'da akkalanna nakua,
5“Male kamu' mai ngkande rotingku'
sola nniso' anggoro' to kupasadia.
6Pajaimi mbango'-bango'i kalemi,
namanyaman katuoanmi,
turu'i to lalan kamapahangan!”
7Ia ke mupauanni salana to topacapa',
la napetawa-tawairoko.
Ia ke mucaccai to togaja',
la nakada-kadairoko.
8Podonaroko ncacca topacapa',
nasaba' la nakaba'ciroko.
Apa ia ke tomacca mupauan salana,
la napakamoja'ko.
9Ia ke muajahhii to tomacca,
la la'bih maccapa.
Ia ke muajahhii to tomakassing,
la sabuda-budanna kapaissenanna.
10 #
Ayub 28:28; Zabur 111:10; Bulawan 1:7 Ia to garonto'na kamaccan
iamo to ngkalaja'-ngkasiri' Puang Allataala,
na ia to tonnissen tongan Puang Allataala Tomala'bih,
battuananna iamo tomapahang.
11Ia to kamaccan iamo mpamalambeh sunga'ko.
musamasai-sainna tuo llan lino.
12Ia ke maccako,
iko-iko mpumeloi,
apa ia ke pacapa'ko,
iko-iko napolei pangcapa'mu.
Buanna kabangosan
13Ia to kabangosan dipasusi mesa' baine salle kada,
to tangmapahang na tangmasiri'.
14Cumadokkoi jao kadera jio olo bolana,
jao ngenan majao llan kota.
15Jiomo ntuu joo nanii ntambai toliu lalan,
nasedei to tolamale mpusara sara'na nakua,
16“Ee kamu' to tangmapahangpa, leppang kamu' mai!”
Na lako tote'da akkalanna nakua ngkuanni,
17“Macanning diiso' to wai bubun diboko,
na la'bih marasa to kande dikande buni.”
18Ia to tonatambai naturu'i,
te'da naissenni kumua butung malei mbawa matena,
sanga ia to tomentama bolana
padami to mendo' lino tomate.
Zur Zeit ausgewählt:
Kada Bulawan 9: mvpAD
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Wycliffe Bible Translators, Inc. All rights reserved.